1 Ya ni nopa tlajtoli tlen na, niNehem'ias, niicone Hacal'ias, niquijcuilohua. Ipan metztli Quisleu ipan toisraelita calendario, quema Tlanahuatijquetl Artajerjes yahuiyaya para 20 xihuitl tlanahuatis ipan tlali Persia, na niNehem'ias niitztoya ipan nopa hueyi altepetl Susa ipan icaltlanahuatil pampa nijtequipanohuayaya nopa tlanahuatijquetl. 2 Huan nechpaxaloco se noisraelita icni tlen itoca Hanani, huan ihuaya hualajque sequinoc israelita tlacame tlen tlali Jud'a. Huan niquintlatzintoquili quejatza eltoya ica nopa israelitame tlen achtohui quinhuicatoyaj ilpitoque hasta nopano Babilonia, huan teipa sampa quincahuilijque ma mocuepaca altepetl Jerusal'en. 3 Huan yajuanti nechnanquilijque: "Se hueyi pinahualistli queja itztoque nopa israelitame tlen sampa mocueptoque Jerusal'en. Nel'ia tlaijiyohu'iaj miyac. Mocahua sosolijtoc altepetl Jerusal'en, huan nopa tepamitl huetztoc huan ipuertas nochi tlatlatoc." 4 Huan quema na nijcajqui nochi ya ni, nimosehui huan nichocac. Para miyac tonali nimocueso, huan nimosajqui, huan nimomaijto ica Toteco Dios tlen itztoc ipan elhuicac. 5 Huan niquilhui: "TOTECO, ta tiDios tlen tiitztoc elhuicac, nimitztlajtlan'ia chicahuac xinechtlacaquili. Ta tlahuel tihueyi hasta titemajmati. Ta tijchihua nochi tlen tijtencahua tiquinchihuilis moconehua. Tlahuel tiquinicnel'ia nochi tlen quichihuaj motlanahuatil. 6 Pero xinechtlacaquili na, nimotlatequipanojca, tlen yohuali tonali nimitztlajtlan'ia ipampa tiisraelitame tlen timotlatequipanojcahua. Nimoixmati ica ta queja na huan nochi tiisraelitame tlahuel titlajtlacolchijtoque moixtla. 7 Tlahuel timotochonchijtoque ica ta, huan ax tijneltocatoque motlanahuatilhua, niyon moleyes, niyon sequinoc tlamachtili tlen titechmacac huejcajquiya ica motlatequipanojca Mois'es. 8 "Xiquilnamiqui tlen ta tiquilhui Mois'es. Tiquijto intla tiisraelitame titlajtlacolchihuasqu'iaj, huajca titechtzontlamiltisqu'ia huan titechcahuasqu'ia campa hueli ipan nochi tlaltepactli. 9 Pero intla timoyolcuepasqu'iaj sampa huan tijneltocasqu'iaj motlanahuatilhua, huajca yonque timopantisqu'iaj huejca, titechhualicasqu'ia huan titechsejcotilisqu'ia sampa ipan Jerusal'en, nopa altepetl tlen ta tijtlapejpenijtoc para elis moaxca. 10 "Tojuanti timotlatequipanojcahua tlen titechmanahuijtoc huan titechchihuilijtoc timoaxcahua ica mohueyi chicahualis. 11 Huan nimitztlajtlan'ia TOTECO para xijtlacaquili tlen nimitztlajtlan'ia huan xiquintlacaquili moconehua tlen mitzhueyichihuaj ica paquilistli. Xinechpalehui para nopa tlanahuatijquetl ma quiita para cuali tlen niquijtohua huan ma nechtlasojtla quema niyas niquilhuiti ni tlamantli. "Queja nopa na niNehem'ias niquilhui TOTECO. Na tlen nijtequipanohuayaya nopa tlanahuatijquetl. Nijpixqui nopa tequitl para nijyecos nochi itlailis quema aya quiiyaya intla se quitlalijtoya ipajyo."
