1 Ya ni nopa tlajtoli tlen TOTECO nechmacac na, niNah'um, tlen niehua pilaltepetzi Elcos, quema nechnextili tlen ipantis altepetl N'inive. 2 TOTECO itztoc se Dios tlen quintlasomati tlacame pampa quinamiqui san ya ma quitequipanoca. Yeca quintlatzacuilt'ia huan quincocol'ia quema ax quitlepanitaj. TOTECO momacuepa huan nel'ia cualani ica tlen moyoltetil'iaj ica ya. Ica miyac cualantli quintzontlamilt'ia nochi icualancaitacahua. 3 TOTECO tlahuel quichiya para pehuas cualanis. Pero nel'ia hueyi ichicahualis huan yajaya quiita para nochi tlen tlajtlacolchijtoque temachtli quiselise inintlatzacuiltilis. TOTECO quinext'ia ichicahualis quema onca ajcomalacatl huan quema chicahuac tlaajaca. Nopa mixtli tlen motlalohua eltoc queja tlaltejpoctli iicxitla. 4 Quema yajaya quimaca tlanahuatili para ma huaqui, huaqui nochi nopa hueyi atl, atlajtli huan sacamili ipan tlali Bas'an. Ica itlajtol nopa cuatitlamitl Carmelo huan nochi nopa cuatini ipan L'ibano moxolehuaj. 5 Quema TOTECO itztoc nechca, nopa tepetini huihuipicaj huan nopa tlachiquili atiyaj. Mojmolin'ia tlali huan nochi tlen itztoque ipani tlahuel momajmat'iaj. 6 Axaca huelis quiijiyohuis quema TOTECO mototonilijtoc ica cualantli. Icualancayo eltoc queja nopa tlilelemectli tlen nochi quitlamitlat'ia. Quema yajaya cualani, nochi nopa tepexitl huehuelocaj. 7 TOTECO hueyi iyolo. Quema se mocuesohua, ma yohui campa ya huan yajaya quimanahuis. Yajaya quinixmati tlen quineltoquil'iaj huan tlen eli iaxcahua. 8 Pero ininca tlachpana icualancaitacahua queja quema huala se hueyi atl huan nochi quihuica. Icualancaitacahua quintojtocatinemi hasta tlayohua. 9 ¿Tlachque inmoilhu'iaj inquichihuilise TOTECO para inquitlanise ya? Yajaya inmechtzontlamiltis san ica se huelta. 10 Tlen mochihuaj icualancaitacahua itztoque queja huitztli tlen moxinepalojtoque. Itztoque queja ihuintini tlen huetztihualahuij pampa tlahuel tlaitoque. TOTECO quintlatis queja xihuitl tlen cuali huactoc. 11 Imojuanti ipan altepetl N'inive inmoilhu'iaj se tlenijqui huelis inquichihuilise TOTECO, pero tlen queja nopa moilhu'ia san fiero itlalnamiquilis. 12 Ya ni tlen TOTECO quinilhui itlacajhua: "Yonque nopa Asiria ehuani quipiyaj tetili huan itztoque nel'ia miyac, na niquintzontlamiltis huan ayoc quema nesise. "Yonque miyac nimechtlaijiyohuiltijtoc, ayoc nimechtlaijiyohuiltis m'as. 13 Huan na nimechtojtomas tlen campa nopa Asiria ehuani inmechpixtose inilpitoque." 14 Huan ya ni tlen TOTECO tlanahuati tlen nopa tlanahuatijquetl tlen tlali Asiria tlen mosehui ipan N'inive. TOTECO quiijto: "Ta ayoc tiquinpiyas moixhuihua para mocahuas motoca. Tlen imotiopahua niquintlapanas nochi nopa totiotzitzi huan tlaixcopincayome. Huan nopano timiquis huan nimitztocas pampa miyac tlajtlacoli tijchijtoc huan ax quinamiqui para tiitztos." 15 ¡Xiquitaca! Nepa campa tepetl huala ne tlayolmelajquetl tlen quihualica se cuali tlajtoli. Nechhualiquilis tlajtoli tlen tlasehuilistli. Xiilhuichihuaca intlali Jud'a ehuani. Xijtlamichihuaca nochi tlen inquiijtojque para inquichihuase. Mocualancaitacahua tlen hualahuij tlen N'inive ayoc quema mocuepase pampa nochi ya niquintzontlamilti.
