MATEO 8

1Teipa Jes'us temoc tlen nopa tepetl huan miyac tlacame quitoquilijque. 2Huan hualajqui campa ya se tlacatl tlen tlacayo palaniyaya ica nopa cocolistli tlen itoca eliyaya lepra. Yajaya motlancuaquetzqui iixtla Jes'us huan quiilhui: --Tohueyiteco, intla tijnequi, tihueli tinechchicahuas. 3Huan Jes'us quitlali ima ipani huan quiilhui: --Quena, nijnequi. Ximochicahua amantzi. Huan nimantzi mochicajqui nopa tlacatl tlen tlacayo palaniyaya. 4Huan Jes'us quiilhui: --Axaca xiquilhui. Pero xiya ximonextiti ica nopa totajtzi huan xijmaca Toteco nopa tlacajcahualistli tlen itlanahuatil Mois'es techilhui ma quimacaca tlen ayoc quipiyaj inintlacayo palantoc para quej ni nochi quimatise ya timochicajqui. 5Teipa Jes'us ajsito altepetl Capernaum, huan ajsico campa ya se capit'an romano tlen quinyacanayaya soldados. Huan quitlajtlani Jes'us se favor, 6quiijto: --Tate, notequipanojca huetztoc huan huajhuapahuixtoc ima huan imetz huan tlahuel tlaijiyohu'ia. 7Huan Jes'us quiilhui: --Niyas huan nijchicahuati. 8Pero nopa capit'an tlen soldados quiilhui: --Tate, ax monequi tiyas pampa ax nihueyi queja ta huan ax quinamiqui ticalaquis nochaj. San xiquijto se tlajtoli para ma mochicahua notequipanojca huan yajaya mochicahuas, pampa ta tijpiya tlanahuatili. 9Nojquiya nijpiya notecohua tlen quipiyaj tlanahuatili ica na huan nijchihua inintlajtol. Huan na nojquiya niininteco sequinoc. Huan intla niquilhuis se notequipanojca: 'Xiya', yajaya yas, huan intla niquilhuis: 'Xihuala', yajaya hualas. Intla niquilhuis notequipanojca: 'Xijchihua ya ni', yajaya quichihuas. Ta nojquiya tlen tiquijtohua, mochihua. 10Quema Jes'us quicajqui tlen quiijto nopa capit'an, quisentlachili, huan quinilhui nopa tlacame tlen quitoquiliyayaj: --Melahuac nimechilhu'ia, ax nijpantijtoc niyon se israelita tlacatl tlen nel'ia temachtli nechneltoca tlen nihueli nijchihua queja ni sejcoyoc ejquetl. 11Huan nimechilhu'ia miyac tlacame tlen ax israelitame queja ya hualase tlen miyac tlaltini campa quisa tonati huan campa oncalaqui tonati huan calaquise campa tlanahuat'ia Toteco tlen itztoc elhuicac. Nepa yajuanti tlacuase ininhuaya nopa huejhueyi israelitame: Abraham, Isaac huan Jacob. 12Huan miyac israelitame tlen Toteco quinequiyaya ma calaquica ipan itlanahuatilis, yase campa tzintlayohuilotl pampa ax quinejque calaquise. Quena, Toteco quinmajcahuas hasta nepa campa tlacame chocaj huan tlanhuehuechocaj pampa tlahuel tlaijiyohu'iaj. 13Huajca Jes'us quiilhui nopa capit'an tlen soldados: --Xiya mochaj. Ya nijchijqui nopa tlen tijneltocayaya nijchihuas. Huan ipan nopa tlalochtli quema Jes'us quiijto ni tlajtoli, mochicajqui itequipanojca nopa capit'an. 14Teipa Jes'us yajqui ichaj Pedro huan imona huetztoya ipan itlapech pampa totoniyayaya. 15Huan Jes'us quimaitzqui huan nimantzi caxanqui nopa tlatotonilotl. Huan yajaya moquetzqui huan pejqui quintlamaca. 16Huan quema tlayohuatinemiyaya, ajsicoj campa Jes'us tlen quinhualicayayaj miyac cocoyani ica iajacahua Axcualtlacatl. Huan Jes'us san camatqui huan quinquixtili ica itlajtol. Huan yajaya quinchicajqui nochi tlen mococohuayayaj. 17Quema Jes'us quinchicajqui cocoyani, quitlamichihuayaya tlen nopa tiocamanalojquetl Isa'ias huejcajquiya quiijto: "Yajaya ica iselti quihuicac tococolis huan nochi totlacuajcualocayo." 18Teipa quema Jes'us quinitac para itztoyaj miyac tlacame tlen quitetzopayayaj, techilhui tiimomachtijcahua ma tijhuicaca ipan cuacanahua huan tiquixcotonase nopa hueyi atl para seyoc nali. 19Huan nepa ajsico campa Jes'us se tlamachtijquetl tlen itlanahuatil Mois'es huan quiilhui: --Tlamachtijquetl, nijnequi niyas mohuaya campa hueli tiyas. 20Huan Jes'us quiilhui: --Cayochime quipiyaj ininchaj huan totome quipiyaj inintepasol, pero na tlen niMocuepqui Tlacatl ax cana nijpiya campa nimotzontecas. 21Huan seyoc itlatoquilijca quiilhui: --Tate, xinechcahuili ma nimocahua nochaj para nijtlalpachos notata quema miquis, huan teipa nimitztoquilis. 22Huan Jes'us quiilhui: --Xinechtoquili nimantzi, huan xiquincahuili tlacame tlen mictoque iixtla Toteco ma quintlalpachoca ininmijcapoyohua. 23Huajca Jes'us tlejcoc sampa ipan cuacanahua huan tiimomachtijcahua tiyajque ihuaya. 24Huan quema ya tiitztoyaj tlatlajco hueyi atl, pejqui tlaajaca chicahuac huan nopa atl tlahuel calaquiyaya ipan cuacanahua, pero Jes'us cochtoya. 25Huajca tojuanti tiquixititoj huan tiquilhuijque: --Tohueyiteco, xitechmanahui pampa ya timisahu'iaj. 26Huajca Jes'us techilhui: --¿Para tlen inmajmahuij? Tlahuel pilquentzi innechneltocaj. Huan yajaya mejqui huan quitlacahualti nopa ajacatl huan nopa hueyi atl huan ayoc mojmolinijque. 27Huan tiimomachtijcahua tijsentlachilijque huan timoilhuijque se ica seyoc: --Ni Jes'us, ¿ajqueya nel'ia yaja? Yajaya quipiya tlanahuatili hasta ica ajacatl huan hueyi atl. 28Huan teipa tiajsitoj nepa seyoc nali hueyi atl ipan se tlali tlen itoca Gadara. Huan hualajque ome tlacame tlen quinpixtoyaj iajacahua Axcualtlacatl huan quinamiquicoj Jes'us. Quisayayaj ipan tlacacahuaya campa quintlaliyayaj mijcatzitzi ipan campo santo pampa nepa mocahuayayaj. Huan nel'ia mosisiniyayaj huan temajmatiyayaj tlahuel hasta axaca huelqui panoj ipan nopa ojtli. 29Huan nopa tlacame chicahuac quiilhuijque: --Jes'us, ta tiIcone Dios. ¿Tihualajtoc nica campa tojuanti para titechtlaijiyohuiltis quema noja polihui tonali? 30Huan ica huejca itztoyaj miyac pitzome tlen tlacame quinhualicaque ma tlacuajtinemica. 31Huan iajacahua Axcualtlacatl tlen itztoyaj ipan nopa tlacame pejque quitlajtlan'iaj Jes'us: --Intla tijnequi ma tiquistehuaca ipan ni tlacame, xitechcahuili ma ticalaquica ipan nopa miyac pitzome. 32Huan Jes'us quinilhui iajacahua Axcualtlacatl: --Xiyaca. Huajca nopa ajacame quisque huan calajque ipan inintlacayo nopa pitzome. Huan nochi nopa pitzome motlalojtejque huan motepexihuijque tepeixco huan huetzque ipan hueyi atl huan misahuijque. 33Huan nopa tlacame tlen quinmocuitlahuiyayaj nopa pitzome motlalojtejque hasta altepetl huan teyolmelajque nochi tlen panoc ica nopa tlacame tlen quinpiyayaya iajacahua Axcualtlacatl. 34Huan nochi altepetl ehuani hualajque campa Jes'us huan quema quiitaque, quitlajtlanijque ma quisa tlen inintlal.

will be added

X\