MATEO 6

1"Ximotlachilica para ax inquichihuase tlamantli tlen cuali san para tlacame ma inmechitaca. Intla inquichihuaj tlen cuali para inmohueyimatise iniixtla sequinoc, huajca Toteco imoTata tlen itztoc nepa elhuicac ax inmechtlaxtlahuis. 2Huajca quema inquinpalehu'iaj tlen teicneltzitzi, amo xijnequica para sequinoc ma quimatica. Amo xitlapitzaca queja tlacame tlen quinext'ia ome ininxayac quichihuaj ipan tiopamitl huan callejtipa. Yajuanti quinequij sequinoc ma quinitaca ica tlen cuali quichihuaj para ma quinhueyimatica. Intla tlacame quinhueyimatise, san ya nopa quiselise pampa Toteco ax quintlaxtlahuis m'as. 3Quema inquinmacaj se tlenijqui tlen teicneltzitzi, ma ax quimati niyon se tlacatl quesqui inquinmacaque. Niyon moarraves ma ax quimati tlachque temaca moma nejmatl. 4Huajca quema inquimacaj se tlamantli se tlen teicneltzi, xijmacaca ixtacatzi, huan Toteco imoTata tlen quiita nochi tlen ixtacatzi, yajaya inmechtlaxtlahuis tlamiyacapa. 5"Huan quema inmomaijtohuaj ica Toteco, amo xijchihuaca queja tlacame tlen ome ininxayac quichihuaj. Yajuanti quinpact'ia moquetzase tiopan calijtic o callejtipa huan nepa momaijtohuaj ica Toteco san para sequinoc ma quinitaca. Intla tlacame quinhueyimatise, san ya nopa quiselise pampa Toteco ax quintlaxtlahuis. 6Pero imojuanti quema inmomaijtohuaj ica Toteco Dios, xiyaca campa m'as calijtic huan xijtzacuaca cuapuerta huan Toteco imoTata tlen itztoc nepa calijtic imohuaya quiitas huan inmechtlaxtlahuis tlamiyacapa. 7"Huan quema inmomaijtohuaj ica Toteco Dios, amo xijchihuaca queja tlacame tlen ax quiixmatij Toteco. Yajuanti san quiompahu'iaj miyac huelta se tlajtoli tlen quitzontecomajtoque pampa moilhu'iaj intla huejcahuase camatise, Toteco quincaquis. 8Huajca amo xijchihuaca queja yajuanti, pampa imoTata ya quimati tlachque inmechpolohua hasta quema aya inquitlajtlan'iaj. 9Huajca quema inmomaijtose ipan Toteco, xiquilhuica quej ni: 'Toteco Totata tlen tiitztoc nepa elhuicac. Nochi tlacame ma quihueyichihuaca motoca. 10Xihuala, xitlanahuatiqui nica. Ma quichihuaca mopaquilis nochi ipan ni tlaltepactli queja mochijtoc nepa elhuicac. 11Xitechmaca nopa tlacualistli tlen monequi mojmostla. 12Xitechtlapojpolhui totlajtlacolhua, queja tojuanti nojquiya tiquintlapojpolhu'iaj tlen techixpanoj. 13Axaca xijcahuili ma techyoltilana ma titlajtlacolchihuase. Xitechmanahui tlen yajaya tlen ax cuali. Pampa ta moselti tijpiya tlanahuatili para nochi tijnahuatis. San ta tijpiya nopa chicahualistli tlen m'as hueyi. Huan san ta tijpiya motlatlanex huan queja nopa elis para nochipa. San ya nopa.' 14"Pampa intla inquintlapojpolhuise tlacame tlen inmechixpanotoque, huajca imoTata tlen itztoc nepa elhuicac inmechtlapojpolhuis imotlaixpanolhua nojquiya. 15Pero intla ax inquintlapojpolhu'iaj tlacame tlen inmechixpanoj, huajca imoTata ax inmechtlapojpolhuis imotlaixpanolhua. 16"Quema inmosahuaj, amo xijcahuilica ma nesi intla inmosahuaj queja tlacame tlen ome ininxayac quichihuaj. Yajuanti quinequij ma nesi fiero ininxayac queja tlaijiyohu'iaj miyac para tlacame ma momacaca cuenta para mosahuaj. Intla tlacame quinhueyimatij, san ya nopa quiselise pampa Toteco ax quintlaxtlahuis. 17Huajca imojuanti quema inmosahuase, ximoxilhuica cuali huan ximixamica. 18Quej nopa tlacame ax momacase cuenta intla inmosahuaj, pero Toteco imoTata tlen quimati nochi tlen eltoc ixtacatzi tlen sesen imojuanti, yajaya quimatis inmosahuaj huan yajaya inmechtlaxtlahuis. 19"Amo xicajcocuica miyac tomi o miyac tlamantli tlen ipati nica ipan ni tlaltepactli pampa huelis cualos, o pojyahuis o moxixas. O huelis calaquise tlaxtequini huan quiixtequise. 20M'as cuali xicajcocuica tlen nel'ia ipati nepa elhuicac para inmechchiyas tlen cuajcualtzi nepa. Nepa ax cualos, ax pojyahuis, ax moxixas, niyon ax aquise tlaxtequini para tlaxtequise. 21Pampa intla inquimatise tlen nel'ia ipati inmechchiya nepa elhuicac, huajca ipan imoyolo inquinequise initztose nepa. 22"Toixtiyol eltoc queja se tlahuili ipan totlacayo huan intla cuali toixtiyol, nochi totlacayo quipiya tlahuili huan tijmatij tlen cuali para tijchihuase. 23Pero intla ax cuali toixtiyol, nochi totlacayo eltos ipan tzintlayohuilotl. Pero intla timoilhu'iaj tijpiyaj tlahuili ipan toyolo, pero nel'ia tlen tiquitaj para tlahuili, eltoc tzintlayohuilotl; nel'ia melahuac achi m'as tiitztoque ipan tzintlayohuilotl pampa niyon quentzi ax tijmatij tlen cuali. 24"Axaca huelis quintequipanos ome itecojhua, pampa quicocolis se huan quiicnelis ne se. Huan ica se elis temachtli, pero ne seyoc quitlahuelcahuas. Ihuical eli, ax hueli inquitequipanose Toteco intla inquicahuil'iaj ma inmechyoltilana tomi. 25"Yeca nimechilhu'ia, amo ximocuesoca tlen imonemilis huan intla oncas tlen ica inpanose huan tlen inquicuase huan tlen inquiise. Amo ximoilhuica tlen imotlacayo huan intla oncas ica tlen inmoyoyontise. Toteco inmechmacatoc yolistli huan ya nopa tlen achi m'as ipati; huan yajaya nojquiya inmechmacas tlacualistli. Yajaya inmechmacatoc imotlacayo huan ya nopa tlen achi m'as ipati; huan yajaya nojquiya inmechmacas tlen ica inmoyoyontise. 26Xiquintlachilica totome tlen patlantinemij. Yajuanti ax momilt'iaj, huan ax pixcaj, niyon ax quiajcocuij inintlacualis. Pero imoTata tlen itztoc nepa elhuicac quintlamaca. Huan Toteco nojquiya inmechtlamacas pampa m'as inmopati iixtla que totome. 27San tlapic para inmocuesose. Intla inmocuesose pampa ax inhuejcapantique, ¿huelis inmoscaltise seyoc ome mistitl pampa inmocuesojtoque? Ax inhuelij. 28"Huan ¿para tlen inmocuesohuaj ica tlen inmoyoyontise? Xijtlachilica xochitl tlen moscalt'iaj campa hueli. Ax tequitij, niyon ax tlajtzomaj. 29Pero nimechilhu'ia, nopa hueyi Tlanahuatijquetl Salom'on ica nochi ihueyitilis ax quema quipixqui iyejyejca queja nopa xochitl. 30Quena, nochi xochitl Toteco quinmacatoc ininyejca yonque cahuantoque san se tlalochtli ama huan hualmostla pilinise. Huajca miyac m'as inmechyoyontis imojuanti, yonque ohui inquineltocase para inmechmacas tlen inmechpolohua. 31Huajca amo ximocuesoca. Amo xiquijtoca: '¿Tlachque tijcuase? o ¿tlachque tiquise? o ¿ica tlachque timoyoyontise?' 32Pampa quej ni moilhu'iaj nopa tlacame tlen ax quiixmatij Toteco, pero imoTata tlen itztoc nepa elhuicac, ya quimati monequi nochi ni tlamantli para ica inpanose. 33Achtohui xijtemoca para incalaquise ipan itlanahuatilis Toteco huan para inquipiyase se yolistli tlen xitlahuac iixtla. Huan yajaya inmechmacas nojquiya nochi ni tlamantli tlen monequi. 34Huajca amo ximocuesoca tlen huelis panos mostla. Pampa mojmostla tijpantijtiyohuij cuesoli. Mojmostla achi cuali san timoilhuise tlen nopa cuesoli tlen nopa tonal quihualicac.

will be added

X\