MATEO 5

1Huan Jes'us quiitac ya ajsicoj miyac tlacame huan huajca tlejcoc quentzi ipan se tepetl huan mosehui. Huan tojuanti tiimomachtijcahua timonechcahuijque campa itztoya ininhuaya nopa tlacame. 2Huan Jes'us pejqui tlamacht'ia huan quiijto: 3"Xipaquica imojuanti tlen inmoicnonequij iixtla Toteco, huan inquimatij inteicneltzitzi ipampa imotlajtlacolhua. Toteco tlen itztoc ipan elhuicac inmechcahuilis xicalaquica campa yajaya tlanahuat'ia. 4Xipaquica imojuanti tlen inmocuesohuaj, pampa Toteco inmechyoltlalis. 5Xipaquica imojuanti tlen ax inmohueyimatij iniixtla sequinoc. Toteco inmechaxcatis nochi tlaltepactli. 6Xipaquica imojuanti tlen ica nochi imoyolo inquitemohuaj quejatza inquichihuase tlen xitlahuac. Initztoque queja tlacame tlen mayanaj huan amiquij para itztose cuali, huan Toteco inmechixhuitis para melahuac inhuelise inquichihuase tlen xitlahuac. 7Xipaquica imojuanti tlen intetlasojtlaj huan intepalehu'iaj, pampa Toteco nojquiya inmechtlasojtlas huan inmechpalehuis. 8Xipaquica imojuanti tlen inyoltlapajpactique, pampa inquiitase Toteco. 9Xipaquica imojuanti tlen inquiyoltlal'iaj cualantli, pampa Toteco inmechtocaxtis iniconehua. 10Xipaquica intla sequinoc inmechtlaijiyohuilt'iaj pampa inquichihuaj tlen xitlahuac, pampa Toteco tlen itztoc elhuicac inmechcahuilis incalaquise ipan itlanahuatilis. 11"Xipaquica quema sequinoc inmechpinajt'iaj huan inmechtlaijiyohuilt'iaj huan inmechistlacahu'iaj pampa innechneltocaj. 12Quena, xipaquica huan amo ximocuesoca pampa Toteco hueyi inmechtlaxtlahuis nepa elhuicac. Quej nopa tlacame nojquiya quintlatzacuiltijque itiocamanalojcahua Toteco huejcajquiya. 13"Istatl quipalehu'ia nacatl para ma ax nenpolihui. Imojuanti nojquiya inhuelij inquinpalehuise tlacame para ma ax tlajtlacolchihuaca pampa initztoque queja istatl ipan ni tlaltepactli. Pero intla istatl ayoc poyec, huajca ax tleno ipati. Huan axaca huelis quipoyeltisoc sampa. Niyon ayoc huelis tijtequihuise. San monequi tijtepehuase huan huajca ipan moquejquetzase tlacame. 14"Imojuanti initztoque itlahuil ni tlaltepactli pampa inquintlahuil'iaj tlacame. Initztoque queja se altepetl tlen mosehu'ia ipan se tepetl huan tlahu'ia para nochi hueli quiitase. 15Axaca quitlat'ia se tlahuili huan quitlal'ia cajon tzala, pero quitlal'ia ipan se tlahuil quetzali para ma tlahuis nochi ipan calijtic. 16Quej nopa xijcahuaca ma cahuani imotlahuil iniixtla tlacame huan quiitase tlen cuali inquichihuaj huan quihueyichihuase imoTata tlen itztoc ipan elhuicac. 17"Amo ximoilhuica nihualajtoc para niquiniyocacahuas itlanahuatil Mois'es huan tlen quiijcuilojtoque itiocamanalojcahua Toteco. ¬°Axtle! Nihualajtoc para nijtlamichihuas nochi tlen quiijtohuaj. 18Melahuac nimechilhu'ia hasta tlamis elhuicactli huan tlaltepactli axaca quixolehuas yon se letra, yon se punto tlen ijcuilijtoc ipan nopa tlanahuatili. Nochi panos queja quiijtohua nepa. 19Intla se tlacatl ax quitlepanita se tlen itlanahuatilhua Mois'es huan quinmachtis sequinoc ma ax quitlepanitaca, yonque nopa tlanahuatili ax hueyi, nopa tlacatl elis pilsiltzi quema Toteco tlen itztoc elhuicac tlanahuatis. Quema tlanahuatis Toteco, elise huejhueyi nopa tlacame tlen quineltocaj itlanahuatilhua huan quinnextil'iaj sequinoc ma quitlepanitaca nojquiya. 20Pampa nimechilhu'ia, intla inquinequij incalaquise campa tlanahuat'ia Toteco tlen itztoc ipan elhuicac, monequi m'as xijchihuaca tlen xitlahuac que quichihuaj nopa fariseos huan nopa tlamachtiani tlen itlanahuatil Mois'es. 21"Inquicactoque para itlanahuatil Mois'es quinmachtiyaya tlacame huejcajquiya para ma ax temictica. Huan ajqueya quimictis se tlacatl yas iniixtla tequitini para quitlajtolsencahuase huan quitlatzacuiltise. 22Pero na nimechilhu'ia, intla se tlacatl cualanis ica iicni, tequitini quitlajtolsencahuase. Huan intla se tlacatl quitelchihuas iicni, nopa tlasentilistli tlen tequitini tlen m'as quipiyaj tlanahuatili mosentilis para quitlajtolsencahuas huan quitlatzacuiltis. Huan ajqueya quitocaxtis seyoc ica tlajtoli tlen fiero, quihuicas tlajtlacoli para yas ipan tlitl nepa mictla. 23"Huajca intla timoquetza campa itlaixpa para tijmacas Toteco se tlacajcahualistli huan ipan nopa tlalochtli tiquilnamiquis para moicni cualani mohuaya, huajca amo xijmaca nopa tlacajcahualistli. 24Xijcahua motlacajcahualis ipan tlaixpamitl huan xiya achtohui para ta huan moicni ma ximotlapojpolhuica huan ximoyoltlalica ica tlen panoc. Huan huajca, quena, ximocuepa para tijmacas Toteco nopa tlacajcahualistli. 25"Huan intla se mocualancaitaca quinequi mitzteilhuis ica tlen ax cuali tijchihuilijtoc, huajca ximosencahua ihuaya nimantzi quema noja itztoc ipan ojtli para mitzteilhuis. Ma ax mitzhuicas iixtla tequihuejquetl, pampa nopa tequihuejquetl mitztemactilis ica polic'ias huan yajuanti mitztzacuase. 26Melahuac nimitzilhu'ia, ax tiquisas ipan tlatzactli hasta titlaxtlahuas senquistoc nochi tlen nopa tequihuejquetl quiijtos xitlaxtlahua. 27"Inquicactoque para itlanahuatil Mois'es quiijtohua para amo ximomecatica. 28Pero na nimechilhu'ia, intla se tlacatl quiita se sihuatl huan ipan itlalnamiquilis quinequi tlen hueli quichihuas ihuaya, ya momecatijqui ihuaya ipan iyolo. 29"Huajca intla se moixtiyol quinequi quitlachilis tlajtlacoli, xijquixti huan xijmajcahua, yonque eliyaya moixtiyol tlen m'as cuali. Pampa m'as cuali para tijpolos se pilquentzi motlacayo, huan ax tiyas nepa mictla ica nochi motlacayo. 30Huan intla moma tlen monejmatl mitzchihuil'ia xitlajtlacolchihua, huajca m'as cuali xijtzontequi huan xijmajcahua, pampa m'as cuali para tijpolos san se pilquentzi motlacayo huan ax tiyas nepa mictla ica nochi motlacayo yamajtic. 31"Nojquiya itlanahuatil Mois'es quiijtohua para ajqueya quinequi quicahuas isihua, monequi ma quimaca se amatl tlen quiijtohua para ayoc iaxca. 32Pero na nimechilhu'ia, intla se tlacatl quicahuas isihua tlen ax momecatijtoc ica seyoc, yajaya quichihuil'ia nopa sihuatl ma momecatis quema monamictis. Huan nojquiya yajaya tlen teipa mosihuajtis ihuaya nopa sihuatl, momecatis. 33"Inquicactoque para itlanahuatil Mois'es quiijtohua intla se quitestigojquetzas Toteco quema quitlajtolcahua se tlamantli, huajca monequi quichihuas tlen quiijtojtoc. 34Pero na nimechilhu'ia, amo xitlatestigojquetzaca. Amo xijtestigojquetzaca elhuicactli pampa elhuicactli eltoc campa Toteco tlanahuat'ia. 35Amo xijtestigojquetzaca tlaltepactli pampa iicxitla Toteco tlen nojquiya yajaya quinahuat'ia. Amo xijtestigojquetzaca altepetl Jerusal'en, pampa Jerusal'en ialtepe Toteco nopa Hueyi Tlanahuatijquetl. 36Niyon amo xijtestigojquetzaca imotzonteco pampa ax inquinahuat'iaj imotzonteco. Ax hueli inquichipahuil'iaj niyon se imotzoncal, huan intla ya chipahuac, ax hueli inquiyayahuil'iaj. 37Quema incamatij, xiquijtoca xitlahuac intla hueli inquichihuaj se tlamantli. Xiquijtoca xitlahuac 'quena, nijchihuas' o 'ax nijchihuas', pero intla intlatestigojquetzaj, ax cuali inquichihuaj, huan quej ni Axcualtlacatl quinequi xijchihuaca. 38"Inquicactoque para itlanahuatil Mois'es quiijtohua intla se acajya mitzixtiyolcocos, huajca xiquixtiyolcoco. Huan intla se acajya mitztlancochtepehuas, huajca xijtlancochtepehua nojquiya. 39Pero na nimechilhu'ia, amo ximomacuepaca ica tlen inmechchihuil'ia tlen ax cuali. Intla se mitzixtlatzinis ipan mocampa tlen monejmatl, huajca xijnextili seyoc mocampa para nepa nojquiya ma mitzixtlatzini. 40Intla tijtlahuiquil'ia tomi se acajya huan yajaya mitzhuicas iixtla tequihuejquetl huan monequi tijmacas mocamisa para tlen titlahuica, xijmaca nojquiya mochamarra. 41Intla se soldado mitznahuatis xijhuica itlamamal para se kil'ometro, xijhuiquili ome kil'ometros ipan iojhui. 42Intla se mitztlajtlanis se tlamantli, xijmaca. Intla se quinequi xijtlanejti se tlamantli, xijtlanejti. 43"Inquicactoque itlanahuatil Mois'es huejcajquiya quiijto xiquinicnelica imohuampoyohua huan xiquincocolica imocualancaitacahua. 44Pero na nimechilhu'ia, xiquinicnelica imocualancaitacahua huan xijtlajtlanica Toteco ma quintiochihua tlen inmechtlaijiyohuilt'iaj. 45Huan queja nopa, nochi quimatise para melahuac initztoque iconehua Toteco imoTata tlen itztoc elhuicac. Pampa yajaya quichihua tonati ma tlahui ipan tlen ax cuajcualme huan ipan tlen cuajcualme. Huan yajaya quichihua ma huetzi atl ipan ininmil tlen itztoque xitlahuaque iixtla huan ipan ininmil tlen ax itztoque xitlahuaque iixtla. 46Pampa intla san inquinicnel'iaj tlacame tlen inmechicnel'iaj, ax tleno tlen cuali inquichijtoque para Toteco inmechtlaxtlahuis teipa. Hasta nopa tlacame tlen tlainamaj impuesto huan tlahuel tlacajcayahuaj nojquiya ya nopa quichihuaj. 47Huan intla san inquintlajpalohuaj imohuampoyohua, ax tleno tlen cuali inquichijtoque. Tlacame tlen ax quiixmatij Toteco nojquiya ya nopa quichihuaj. 48Pero monequi xiitztoca senquistoc cuali ipan nochi tlen inquichihuaj queja imoTata tlen itztoc ipan elhuicac itztoc senquistoc cuali.

will be added

X\