MATEO 3

1Ipan nopa tonali Juan tlen tecuaaltiyaya ajsico ipan nopa huactoc tlali campa ax tleno eli nepa ipan estado Judea. Huan pejqui tecamahu'ia, 2huan quinilhuiyaya tlacame: "Ximoyolpatlaca huan xijcahuaca tlen ax cuali inquichihuaj para huelis incalaquise campa tlanahuat'ia Toteco tlen itztoc ipan elhuicac, pampa yajaya inmechnechcahu'ia ama huan inmechnotza xicalaquica." 3Juan eliyaya nopa tlacatl tlen tiocamanalojquetl Isa'ias huejcajquiya quiijcuilo hualasqu'ia. Isa'ias quiijcuilo ya ni: "Tlacame quicaquise se tlen camatis chicahuac ipan nopa huactoc tlali campa ax tleno eli. Huan quiijtos: 'Xijcualtlalica imoyolo pampa hualas Tohueyiteco. Xijxitlahuaca imonemilis queja inquisencahuaj ojtli para hualas se hueyi tequihuejquetl.' " 4Juan moquentiyaya iyoyo tlen tlachijchihuali ica itzoncal camello huan quipiyayaya itzinquechilpica tlen cuetlaxtli. Huan quincuayaya pilchapoltzitzi huan nectli tlen quipantiyaya campa nentinemiyaya campa ax onca caltini. 5Huan yohuiyayaj campa Juan miyac tlacame tlen quisayayaj altepetl Jerusal'en huan sequinoc altepetini ipan estado Judea huan miyac tlen ehuayayaj nechca atemitl Jord'an. 6Huan nochi quipohuiliyayaj Toteco Dios inintlajtlacolhua, huan huajca Juan quincuaaltiyaya ipan atemitl Jord'an. 7Huan quema Juan quinitac para nojquiya ajsiyayaj miyac fariseos huan saduceos tlen quinequiyayaj mocuaaltise, quinilhui: "Initztoque queja incohuame. ¿Ajqueya inmechilhuijtoc para Toteco Dios ax inmechtlatzacuiltis teipa intla inmocuaaltise? Ax queja nopa. 8Nimechilhu'ia monequi inquichihuase tlen cuali para nempa ma nesi para inmoyolcueptoque huan inquicajtejtoque imoojhui tlen fiero. 9Amo ximoilhuica para incuajcualme pampa initztoque initeipa ixhuihua Abraham tlen huejcajquiya itztoya. Nimechilhu'ia Toteco huelis quichihuas ni tetini tlen eltoc nica para ma mocuepaca iteipa ixhuihua Abraham intla yajaya quinequis. 10Imojuanti initztoque queja cuatini tlen ax tlaquij, huajca ximomocuitlahuica pampa Toteco ya quicualtlalijtoc ihacha para inmechtzontequis huan inmechtlatis queja ineltosqu'iaj cuatini. 11"Quena, nel'ia niquincuaalt'ia ica atl nochi tlen ya moyolcueptoque huan quicajtejtoque tlajtlacoli. Pero teipa seyoc hualas tlen m'as quipiya tlanahuatili que na. Na ax nicaxil'ia para nielis itlatequipanojca, niyon para nijquixtilis itecac. Yajaya quinmacas sequin tlacame Itonal Toteco huan sequinoc quintlatzacuiltis ica tlitl. 12Yajaya huala mocualtlalijtoc para quiniyocatlalis tlacame queja se quichihua quema quitequihu'ia itlaajcapehuilol para quiyejyectis trigo. Huan tlacame tlen itztoque queja nopa trigo tlen cuali, quinajcocuis. Huan tlen itztoque queja itlasolo nopa trigo, quintlatis ica se tlitl tlen ax quema sehuis." 13Teipa Jes'us quisqui ipan estado Galilea huan ajsico atemitl Jord'an campa itztoya Juan para ma quicuaalti. 14Pero Juan ax quinequiyaya quicuaaltis Jes'us huan quiilhui: --M'as quinamiqui ta tinechcuaaltisqu'ia, huajca ¿para tlen tijnequi ma nimitzcuaalti? 15Huan Jes'us quiilhui: --Para amantzi, xinechcuaalti na pampa monequi tijchihuase nochi tlen xitlahuac senquistoc queja Toteco Dios quinequi. Huajca Juan quicaquili itlajtol huan quicuaalti. 16Huan quema Jes'us ya mocuaaltijtoya huan quisayaya ipan atl, nimantzi tlapojqui elhuicactli huan quiitac Itonal Toteco hualtemoyaya queja se paloma huan ajsic ipan ya. 17Huan Toteco Dios camatqui tlen elhuicac huan quiijto: "Ya ni Nocone tlen niquicnel'ia. Nipaqui miyac ica tlen quichihua."

will be added

X\