1 Quema Jes'us tlanqui quiijtohua nochi ni tlajtoli, techilhui tiimomachtijcahua: 2 --Inquimatij san polihui ome tonali para nopa ilhuitl tlen itoca Pascua campa nechtemactilise na tlen niMocuepqui Tlacatl para ma nechcuamapeloltica. 3 Huan ipan nopa tonal nojquiya nopa tlayacanca totajtzitzi huan nopa huehue tlacame tlen israelitame mosentilijque ipan ichaj Caif'as, nopa hueyi totajtzi. 4 Huan san sejco quisencajque quejatza huelis quicajcayahuase huan quiitzquise Jes'us para quimictise. 5 Pero quiijtohuayayaj: --Ma ax tiquitzquica ipan ni ilhuitl pampa huelis moajcomanase nopa miyac tlacame huan techtehuise. 6 Huan Jes'us mocajtoya ipan altepetl Betania ipan ichaj Sim'on tlen achtohuiya tlacayo palantoya. 7 Huan Jes'us tlacuayaya campa mesa huan ajsico se sihuatl tlen quihualicayaya se tlaajhuiyacayotl tlen tlahuel patiyo ipan se lemete tlen quicoyonijtoya tlen se tetl itoca alabastro. Huan quitequili ipan itzonteco Jes'us. 8 Huan quema tiimomachtijcahua tiquitaque, ticualanque huan tiquijtojque: --¿Para tlen quinenpolohua ne tlaajhuiyacayotl tlen tlahuel patiyo? 9 Hueltosqu'ia tijnamacatosqu'iaj para miyac tomi huan tiquinmacatosqu'iaj tlen teicneltzitzi. 10 Huan Jes'us quimatqui tlen tiquijtojque, huajca techilhui: --Amo xijcuatotonica ni sihuatl pampa nechchihuilijtoc se cuali tlamantli. 11 Mojmostla itztose tlen teicneltzitzi imohuaya, pero na axtle. Ayoc huejcahuas niitztos imohuaya. 12 Ni sihuatl nechtequili ni tlaajhuiyacayotl pampa queja nopa quisencahua notlacayo para quema nechtlalpachose. 13 Nel'ia nimechilhu'ia, campa hueli ipan tlaltepactli campa tlacame tlacamanalose itlajtol Toteco, nojquiya teilhuise tlen ni sihuatl nechchihuilijtoc para nochi quiilnamiquise. 14 Huan se tlen tojuanti tiimomachtijcahua Jes'us tlen quitocaxtiyayaj Judas Iscariote, yajqui quinitato nopa tlayacanca totajtzitzi. 15 Huan quintlajtlani: --¿Quesqui innechmacase intla nimechmactilis Jes'us? Huan nopa tlayacanani quimacaque Judas treinta plata tomi. 16 Huan ipan nopa hora Judas pejqui quitemol'ia quema huelis quitemactilis Jes'us. 17 Ipan nopa achtohui tonal tlen nopa ilhuitl, quema nochi quicuaj pantzi tlen ax quipiya tlasonejcayotl, tiimomachtijcahua tihualajque campa Jes'us itztoya huan tijtlajtlanijque: --¿Canque tijnequi ma tijsencahuaca nopa Pascua tlacualistli para nochi tijcuase? 18 Huan Jes'us techilhui: --Xiyaca ne altepetl huan inquipantise se tlacatl huan inquiilhuise para niimotlamachtijca niquijtohua ya monechcahu'ia nohora. Xiquilhuica monequi nijcuas nopa Pascua tlacualistli nepa ichaj ihuaya nomomachtijcahua. 19 Huan tiimomachtijcahua Jes'us tiyajque campa Jes'us techilhui huan tijsencajque nopa Pascua tlacualistli. 20 Huan quema tlayohuac, Jes'us mosehui campa mesa tohuaya timajtlacme huan ome tiimomachtijcahua. 21 Huan quema titlacuayayaj, yajaya techilhui: --Nel'ia nimechilhu'ia, se tlen imojuanti nechtemactilis. 22 Huan nochi tojuanti tlahuel timocuesojque huan pejqui tijtlajtlan'iaj: --¿Huelis na, noTeco? 23 Huan Jes'us technanquili: --Nechtemactilis yajaya tlen nohuaya quixolon'ia ipantzi ipan noplato. 24 Melahuac monequi na tlen niMocuepqui Tlacatl nimiquis queja ijcuilijtoc ipan Itlajtol Toteco, pero teicnelti yajaya tlen nechtemactilis. Tlahuel hueyi nopa tlatzacuiltilistli tlen quiselis. M'as cuali eltosqu'ia para nopa tlacatl ax tlacajtosqu'ia. 25 Huan Judas tlen quitemactilisqu'ia quitlajtlani Jes'us: --¿Huelis na, Tlamachtijquetl? Huan Jes'us quinanquili: --Quena, ta. 26 Huan quema titlacuayayaj, Jes'us quiitzqui se pantzi huan quitlascamatqui Itata huan quitlapanqui, huan techmajmacac tiimomachtijcahua huan techilhui: --Xijcuica ni pantzi huan xijcuaca. Ni notlacayo. 27 Teipa quicuic se taza ica xocomecatl iayo huan quitlascamatqui Itata huan techmajmacac, techilhui: --Nochi imojuanti xiquica ipan ni taza, 28 pampa ni noeso tlen nijtoyahuas para nijpehualtis nopa yancuic tlajtolsencahuali tlen Toteco quichihua ica tlacame. 29 Huan nimechilhu'ia, ayoc niquis xocomecatl iayo hasta nopa tonal quema san sejco yancuic tiquise nepa campa noTata tlanahuat'ia. 30 Teipa quema titlanque tihuicaj se tiohuicatl, tiquisque huan tiyajque campa nopa tepetl tlen itoca Olivos. 31 Huan Jes'us techilhui: --Nochi innechcajtehuase ni tlayohua pampa ijcuilijtoc ipan Itlajtol Toteco campa noTata quiijto: 'Nijmictis nopa tlamocuitlahuijquetl huan iborregojhua mosemanase.' Quej nopa quiijtohua. 32 Pero teipa quema ya nimoyolcuitos, nimechtlayacancuilis hasta estado Galilea. 33 Huan Pedro quinanquili huan quiilhui: --Yonque nochi sequinoc mitzcajtehuase, na ax quema nimitzcajtehuas. 34 Huan Jes'us quiilhui: --Nel'ia nimitzilhu'ia, ni yohuali quema aya tzajtzi se cuapelech, tiquinilhuis tlacame expa para ax tinechixmati. 35 Huan Pedro sampa quiilhui: --Yonque monequi nimiquis mohuaya, ax quema niquijtos para ax nimitzixmati. Huan nochi tiimomachtijcahua no ya nopa tiquilhuijque. 36 Huan Jes'us techhuicac hasta campa itoca Getseman'i huan techilhui tiimomachtijcahua: --Ximosehuica nica huan na niya nimomaijtoti. 37 Huan Jes'us quinhuicac Pedro huan nopa ome imomachtijcahua tlen eliyayaj itelpocahua Zebedeo. Huan yajaya pejqui tlahuel miyac mocuesohua. 38 Huan quinilhui nopa eyi: --Tlahuel nimoyolcuesohua hasta nijmachil'ia huelis nimiquis amantzi san ica cuesoli. Ximocahuaca nica. Xitlachixtoca nohuaya. 39 Huan Jes'us yajqui se quentzi iniixmelac huan motlancuaixtlapacho tlalchi huan pejqui momaijtohua huan quiijto: "Pap'a, intla tihuelisqu'ia, xinechquixtilis ni tlaijiyohuilistli tlen hualas para ma ax nechajsi. Pero amo xijchihua tlen na nijnequi, san xijchihua tlen ta mopaquilis." 40 Huan quema tlanqui momaijtohua ica Itata, mocuepqui campa itztoyaj nopa eyi imomachtijcahua huan quinpanti cochtoque. Huajca Jes'us quiilhui Pedro: --¿Ax inhuelque intlachixque nohuaya para se hora? 41 Xitlachixtoca huan ximomaijtoca para ma ax inmechyoltilana tlajtlacoli. Imotonal quinequi quichihuas tlen nimechnahuat'ia, pero imotlacayo ax quipiya tetili. 42 Huan Jes'us sampa yajqui se quentzi. Huan momaijto huan quiijto: "Pap'a, intla ax tihueli tinechijcuenilis ni tlaijiyohuilistli huan monequi nitlaijiyohuis, xijchihua tlen ta mopaquilis." 43 Huan sampa mocuepqui Jes'us campa nopa eyi imomachtijcahua huan quinpanti cochtoque pampa nel'ia cochisnequiyayaj. 44 Huan sampa quincajtejqui huan sampa yajqui momaijtoto ica expa. Huan sampa quiilhui Itata tlen quiilhui achtohuiya. 45 Huan sampa mocuepqui campa imomachtijcahua, huan quinilhui: --¿Noja incochtoque huan inmosiyajcahuaj? Xiquitaca, ya ajsic hora para tlacame nechtemactilise na tlen niMocuepqui Tlacatl ininmaco ax cuajcualme. 46 Ximoquetzaca huan ma tiyacajya. Xiquitaca, ya huala yajaya tlen nechtemactil'ia. 47 Huan quema Jes'us noja camatiyaya, ajsico Judas se tlen timajtlacme huan ome tiimomachtijcahua. Yajaya hualajqui ininhuaya miyac tlacame tlen quihualicayayaj machetes huan cuahuitl tlen quintitlantoyaj nopa tlayacanca totajtzitzi huan nopa huehue tlacame tlen israelitame. 48 Huan Judas tlen quitemactiliyaya Jes'us, ya quinmacatoya nopa tlacame se tlanextili para ajqueya quitzoponisqu'ia, yajaya elisqu'ia Jes'us tlen quitemohuayayaj, huajca ma quiitzquica. 49 Huajca Judas nimantzi monechcahuico campa Jes'us huan quiilhui: --Ya tlapoyahui, Tlamachtijquetl. Huan quitzoponi. 50 Huan Jes'us quiilhui: --Nohuampo, xijchihua tlen tihualajtoc para tijchihuas. Huan nopa tlacame monechcahuijque huan quiitzquijque Jes'us, huan quihuicaque. 51 Huan se imomachtijca Jes'us tlen itztoya ihuaya quiquixti imachete, huan quimaquili itlatequipanojca nopa hueyi totajtzi huan quitzontequili inacas. 52 Huajca Jes'us quiilhui: --Xijcalaqui momachete ipan icuetlaxo pampa tlen tlatehu'iaj ica machete, nojquiya quinmictise ica machete. 53 ¡Huelis ax inquimatij! Na nihuelisqu'ia nimomaijtosqu'ia ica noTata huan yajaya nimantzi nechtitlanilisqu'ia pano setenta mil ielhuicac ejcahua para nechmanahuise. 54 Pero intla queja nopa nijchihuas, ax panos queja ijcuilijtoc ipan Itlajtol Toteco. Huan monequi ma pano tlen quiijtohua. 55 Huan teipa Jes'us quinilhui nopa tlacame tlen hualajtoyaj: --¿Para tlen inhualajtoque nica para innechitzquise ica machetes huan ica cuahuitl queja nielisqu'ia se tlaxtejquetl? Mojmostla nitlamachtiyaya ipan nopa hueyi tiopamitl huan ax quema innechitzquijque. 56 Yonque ax inquimatij pano nochi ni tlamantli tlen inquichihuaj ipan ni tonali para ma motlamichihua tlen itiocamanalojcahua Toteco quiijcuilojque huejcajquiya ipan Itlajtol Toteco para panos. Huan nochi tiimomachtijcahua tijcajtejque huan ticholojque. 57 Huan nopa tlacame tlen quiitzquijque Jes'us quihuicaque ichaj Caif'as, nopa hueyi totajtzi. Huan mosentilijtoyaj nopano nopa tlamachtiani tlen itlanahuatil Mois'es huan nopa huehue tlacame tlen israelitame. 58 Huan Pedro nojquiya quinhuejcatoquilijtiyajqui hasta ajsitoj campa puerta tlen calaqui ipan icalixpa Caif'as. Huan Pedro nojquiya calajqui, mosehuito ininhuaya tlatequipanohuani para quiitas tlachque panosqu'ia. 59 Huan nopa tlayacanca totajtzitzi huan huehue tlacame tlen israelitame huan nochi nopa tlasentilistli tlen tequihuejme tlen m'as hueyi quitemohuayayaj se para tlatestigojquetzas ica se istlacaticayotl para ica huelis quiteilhuisqu'iaj Jes'us. Huan queja nopa huelisqu'ia quitemactilisqu'iaj para ma miqui. 60 Huan ax tleno quipantijque tlen ica huelis quiteilhuisqu'iaj yonque miyac testigos quiijtojque para quiistlacahuisqu'iaj, pero ax san se elqui inintlajtol huajca ax ipati eliyaya. Pero teipa ome tlacame moquetzque, 61 huan quiijtojque: --Ni tlacatl Jes'us quiijto para huelis quixolehuas itiopa Toteco huan sampa quichihuas ica eyi tonali. 62 Huan nopa hueyi totajtzi moquetzqui huan quitlajtlani Jes'us: --¿Ax tleno titlananquil'ia? ¿Tiquijto tlen ica mitzteilhu'iaj o ax tiquijto? 63 Huan Jes'us ax molini. Huan nopa hueyi totajtzi quiilhui: --Nimitznahuat'ia xijtestigojquetza Toteco Dios tlen itztoc. Huan xitechilhui intla tiIcone Toteco huan intla tiCristo tlen Toteco quiijto techtitlanilisqu'ia. 64 Huan Jes'us quiilhui: --Quena, na niCristo. Huan nojquiya nimitzilhu'ia, teipa innechitase na tlen niMocuepqui Tlacatl quema nimosehuijtos inejmatl Toteco Dios tlen quipiya nochi chicahualistli. Huan innechitase quema nihualasoc ipan mixtli tlen elhuicac. 65 Huajca nopa hueyi totajtzi quitzayanqui iyoyo para quinextilis para tlahuel temajmati ica tlen Jes'us quiijto. Huajca quinilhui nopa sequinoc: --Xijcaquica, yajaya mochihua queja Toteco Dios pampa niyon quentzi ax quipatiita. ¿Para tlen monequi m'as testigos? Inquicactoque para mochihua yajaya Toteco Dios. 66 ¿Tlachque tlatzacuiltilistli inmoilhu'iaj quinamiqui para quiselis? Huan quinanquilijque: --Monequi ma miqui. 67 Huajca quiixchajchaque, huan quimaquilijque ica ininmaolol. Huan sequinoc quiixtlajtlatzinijque 68 huan quiilhuijque: --Intla nel'ia ta tiCristo, xicamati queja se tiocamanalojquetl huan xitechilhui ajqueya mitzmaquil'ia. 69 Huan Pedro noja mosehuijtoya calixpa huan se ichpoca tlatequipanojquetl quinechcahuico huan quiilhui: --Ta nojquiya tiitztoya ihuaya Jes'us nopa estado Galilea ejquetl. 70 Huan Pedro istlacatqui iniixtla nochi tlen itztoyaj nepa. Quiijto: --Axtle, ax nijmati tlachque tiquijtohua. 71 Huan Pedro yajqui calteno campa puerta huan seyoc ichpoca tlatequipanojquetl quiitac huan quinilhui nochi tlen mosehuijtoyaj nopano: --Nojquiya ni tlacatl itztoya ihuaya Jes'us, nopa altepetl Nazaret ejquetl. 72 Huan Pedro sampa quiijto para axtle, huan quitestigojquetzqui Toteco huan quiijto: --Ax niquixmati ne tlacatl. 73 Huan quentzi teipa monechcahuicoj campa Pedro nopa tlacame tlen itztoyaj nopano huan quiilhuijque: --Nel'ia ta tiitztoya se tiimomachtijca pampa queja ticamati mitznext'ia canque tiehua. 74 Huan Pedro pejqui tlatelchihua huan quitestigojquetza Toteco huan quiijto: --Ax niquixmati ne tlacatl. Huan nimantzi tzajtzic se cuapelech. 75 Huajca Pedro quiilnamijqui tlen Jes'us quiilhui para quema aya tzajtzi se cuapelech, Pedro quinilhuisqu'iaj tlacame expa para ax quiixmati. Huajca Pedro quisqui huan tlahuel chocac.
