MATEO 23

1Teipa Jes'us quincamahui nopa miyac tlacame tlen quitoquiliyayaj huan techcamahui tiimomachtijcahua huan techilhui: 2"Nopa fariseos huan tlamachtiani tlen itlanahuatil Mois'es quipiyaj tlanahuatili ihuical queja Mois'es para tlamachtise tlachque quiijtosnequij itlanahuatil. 3Huajca amo xiquilcahuaca xijchihuaca tlen inmechilhu'iaj xijchihuaca. Pero amo xijtoquilica iniojhui tlen fiero pampa yajuanti ax quichihuaj tlen tlamacht'iaj. 4Pampa yajuanti inmechmacaj miyac tlanahuatili tlen yajuanti quisencahuaj para inmochihuasqu'iaj incuajcualme, pero axaca hueli quintlamichihuas. Eltoc queja inmechilpil'iaj tlamamali tlen tlahuel etic para inquimamajtiyase, pero nopa tlamachtiani ax quinequij quinpalehuise tlen tlamamajtiyohuij niyon ica se ininmacpil. 5Nochi tlen nopa tlamachtiani huan fariseos quichihuaj, san quichihuaj para tlacame ma quinitaca. Para nesis tlatzejtzeloltique yajuanti moilpil'iaj ipan ininma huan ipan inincuajtoltipa nopa piltlajcuiloltzitzi ica Itlajtol Toteco. Nojquiya quinpact'ia quipiyase ininyoyo itenhuaxo nelhuehueyac para ma ajsi tlalchi para nochi quiitase. 6Quinequij mosehuise ipan nopa siyas campa achtohui quintequilise tlacuali ipan se tlacualistli. Huan quinequij mosehuise ipan nopa siyas tlen m'as cuali ipan tiopamitl. 7Quinpact'ia quema tlacame quintlajpalohuaj ica cuali ipan tianquis. Quinpact'ia quema tlacame quintocaxt'iaj 'Tlamachtijquetl'. 8"Pero imojuanti amo xijnequica para inmohueyichihuase huan para sequinoc ma inmechnotzaca 'Rab'i' o 'Tlamachtijquetl' pampa san na niCristo niimotlamachtijca, huan nochi imojuanti san sejco initztoque queja inicnime. 9Huan axaca ipan ni tlaltepactli xijhueyimatica huan xijtocaxtica 'Totata' pampa iyojtzi itztoc imoTata huan yajaya Totata Dios tlen itztoc elhuicac. 10Huajca amo xijcahuilica sequinoc ma inmechnotzaca 'Tlayacanquetl' pampa san na niCristo tlen Toteco nechtitlanqui ipan tlaltepactli niimotlayacanca. 11Huan ajqueya tlen imojuanti quinequi mochihuas tlen m'as hueyi, ma mochihua imotequipanojca. 12Pampa nochi tlen mohueyimatij ama, teipa Toteco quinpinahualtis, pero nochi tlen ama moicnonequij, teipa Toteco quinhueyimatis. 13"¡Inteicneltique infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis! Ome imoxayac. Inquintzacuil'iaj tlacame para ma ax calaquica campa Toteco tlen itztoc elhuicac tlanahuat'ia. Ax inquinequij incalaquise imojuanti, niyon ax inquincahuil'iaj ma calaquica sequinoc tlen quinequij. 14"¡Inteicneltijque infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis! Ome imoxayac. Huejcahua inmomaijtohuaj ica Toteco tlamiyacapa para intlacajcayahuaj, pero iyoca inquinquixtil'iaj ininchajchaj cahual toahuime. Huajca nopa tlatzacuiltili tlen inquiselise elis m'as hueyi que sequinoc quiselise. 15"¡Inteicneltique infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis! Ome imoxayac. Campa hueli ipan tlaltepactli inyohuij. Inquipanotinemij hueyi atl huan hasta campa hueli tlali para inquintemohuaj ajqueya yancuic quitoquilis nopa tlajtoli tlen intlamacht'iaj. Huan quema ya inquiyolpatlatoque se tlacatl para ma quitoquilis imotlajtol, inquichihuil'iaj ma eli noja m'as fiero que imojuanti. Huajca nopa tlitl nepa mictla quichiya, queja nojquiya inmechchiya imojuanti. 16"¡Inteicneltique imojuanti, Toteco hueyi inmechtlatzacuiltis! Initztoque queja popoyotzitzi tlen tenextil'iaj catl'ia ojtli ma quitoquilica. Inquiijtohuaj: 'Intla se quitestigojquetzas tiopamitl para quichihuas se tlamantli, ax monequi quichihuas tlen quiijto quichihuasqu'ia. Pero intla se quitestigojquetzas nopa oro tlen eltoc tiopan calijtic, huajca, quena, monequi quichihuas tlen quiijto.' 17¿Quejatza huelis inmoilhu'iaj m'as ipati nopa oro que nopa tiopamitl tlen quitlatzejtzelolchihua nopa oro? 18Huan nojquiya inquiijtohuaj: 'Aqui quitestigojquetzas nopa tlaixpamitl para quichihuase se tlamantli, ax monequi quichihuas tlen quitencahuilijtoc quichihuas, pero intla se quitestigojquetzas nopa tlacajcahualistli tlen eltoc ipan tlaixpamitl, huajca quena, monequi quichihuas tlen quitencahuili quichihuas.' 19¡Inhuihuitique pampa ax tleno inquimachil'iaj! Initztoque queja inpopoyotzitzi. ¿Huelis m'as hueyi nopa tlacajcahualistli tlen tlacame quihualicaque que nopa tlaixpamitl tlen quitlatzejtzelolchihua nopa tlacajcahualistli? ¡Ax cuali imotlalnamiquilis! 20Nel'ia yajaya tlen quitestigojquetza nopa tlaixpamitl nojquiya quitestigojquetza nochi tlen eltoc nopano. 21Huan se tlen quitestigojquetzas nopa tiopamitl, nojquiya quitestigojquetza nopa tiopamitl huan Toteco tlen nopano itztoc. 22Huan yajaya tlen quitestigojquetzas elhuicactli, nojquiya quitestigojquetzas isiyaj yejyectzi campa Toteco mosehu'ia huan nojquiya quitestigojquetza Toteco tlen mosehu'ia nopano. 23"¡Inteicneltijque infariseos huan intlamachtiani tlen itlanahuatilhua Mois'es, pampa Toteco hueyi inmechtlatzacuiltis! ¡Ome imoxayac! Inquimacaj Toteco majtlactli por ciento tlen nochi tlen inquipiyaj hasta nopa alojhueno, an'is huan cominos, pero tlen m'as ipati tlen itlanahuatilhua Mois'es techilhu'iaj ma tijchihuaca, ax inquitoquil'iaj. Itlanahuatilhua quiijtohuaj ma tijchihuaca tlen xitlahuac iixtla Toteco, huan ma titetlasojtlaca huan ma tiitztoca titemachme. Ni tlamantli achi m'as monequi xijchihuaca, huan nojquiya monequi ax inquicahuase inquimacase Toteco se majtlactli por ciento tlen nochi tlen inquipiyaj. 24Initztoque queja popoyotzitzi tlen tenextil'iaj catl'ia ojtli ma quitoquilica. Inquitoquil'iaj nopa tlajtoli tlen pilquentzi ipati, pero nopa tlajtoli tlen hueyi ipati, ax inquichihuil'iaj cuenta. 25"¡Inteicneltique infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis! Ome imoxayac. Imopani innesij queja incuajcualme, pero ipan imoyolo san inmoilhu'iaj nochi tlen intlachtectoque huan tlen fiero inquichijtoque. 26¡Inteicneltijque infariseos! Achtohui ximoyolpajpacaca, huan huajca nel'ia inelise intlapajpacme ipan imoyolo huan imopani queja se vaso tlen tlapajpactic iijtico huan ipan itejteno. 27"¡Inteicneltijque infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis! ¡Ome imoxayac! Initztoque queja panteones tlen nesij yejyectzitzi ininpani pampa quinnexhuijtoque, pero iijtic nel'ia fiero pampa temitoc ica iniojomiyo mijcatzitzi. 28Imojuanti innesij para incuajcualme para tlacame ma inmechtlachilica, pero ax neli incuajcualme, pampa fiero inmoyolo. San inquichihuaj ome imoxayac. 29"Inteicneltique infariseos huan intlamachtiani tlen itlanahuatil Mois'es, pampa Toteco hueyi inmechtlatzacuiltis. ¡Ome imoxayac! Inquinchihuil'iaj panteones campa quintoctoque itiocamanalojcahua Toteco tlen quinmictijque huejcajquiya. Huan inquinxochitem'iaj ininpanteones nopa tlacame tlen itztoyaj huejcajquiya huan eliyayaj xitlahuaque iixtla Toteco. 30Huan inquiijtohuaj para intla initztosqu'iaj huejcajquiya quema tohuejcapan tatahua itztoyaj, ax inquinpalehuijtosqu'iaj para quinmictijtosqu'iaj itiocamanalojcahua Toteco. 31Huajca ica imotlajtol intenextil'iaj para inelij inininteipa ixhuihua nopa tlacame tlen quinmictijque itiocamanalojcahua Toteco. 32Huan san polihui para nojquiya inquichihuase queja yajuanti quichijque huan intemictise para inquipiyase miyac tlajtlacoli iixtla Toteco queja imotatahua quipixtoyaj. 33"Initztoque queja miyac cohuame ipan san se tepasoli. Ax huelis incholose. Temachtli inyase ipan tlitl nepa mictla campa intlaijiyohuise. 34Huajca nimechtitlanilis tiocamanalohuani, huan tlalnamijca tlacame, huan tlamachtiani. Sequin inquinmictise, sequin inquincuamapeloltise huan sequin inquinhuitequise tiopan calijtic, huan sequin inquintotocatinemise tlen se altepetl hasta seyoc para inquintlatzacuiltise. 35Huajca queja nopa inmechajsis nopa hueyi tlatzacuiltilistli tlen quinamiqui, huan inquihuicase tlajtlacoli pampa inquinmictijque nochi cuajcualme hasta quema mijqui Abel achtohui huan hasta teipa quema inquimictijque Zacar'ias icone Berequ'ias tlatlajco tiopamitl huan tlaixpamitl. 36Nel'ia nimechilhu'ia nochi ni tlatzacuiltilistli inmechajsis imojuanti tlen ama initztoque. 37"¡Inteicneltijque inJerusal'en ehuani! Inquinmict'iaj itiocamanalojcahua Toteco huan inquintepachohuaj tlen Toteco inmechtitlanil'ia. Nel'ia miyac huelta nijnequiyaya nimechsentilis nomaco queja se tenanpiyo quinsentil'ia ipilconehua huan quinpachohua ica ieltlapal, pero ax inquinejque. 38Huajca xijtlachilica imotiopa eltoc queja se cali tlen tlatzitzica pampa Toteco ayoc itztoc nopano. 39Huan nel'ia nimechilhu'ia ayoc innechitase hasta nopa tonal quema innechilhuise: 'Ma Toteco quitiochihua ya ni tlen huala ipan itoca.' "

will be added

X\