MATEO 18

1Ipan nopa tonal tiimomachtijcahua tijtlajtlanijque Jes'us: --¿Ajqueya itztos m'as hueyi campa tlanahuatis Toteco tlen itztoc elhuicac? 2Huajca Jes'us quinotzqui se conetl huan quiquetzqui tlatlajco tojuanti, 3huan techilhui: --Nel'ia nimechilhu'ia intla ax inmoyolpatlase huan inmochihuase queja coneme, ax huelis incalaquise campa Toteco tlen itztoc elhuicac tlanahuat'ia. 4Pampa nepa campa Toteco tlen itztoc elhuicac tlanahuat'ia elis m'as hueyi ajqueya moicnonequis queja se conetl. 5Huan ajqueya quisel'ia se conetl ipan notoca, nechsel'ia nojquiya. 6"Huan Toteco tlahuel quitlatzacuiltis tlen quichihuas se conetl ma ayoc nechneltoca. M'as cuali elisqu'ia quema aya quichihua nopa hueyi tlajtlacoli, intla moilpilisqu'ia se metlatl ipan iquechcuayo huan ma moisahuiti ipan hueyi atl. 7Nel'ia teicneltique tlacame pampa onca miyac tlamantli tlen quinyoltilana ma tlajtlacolchihuaca huan tlacame tlajtlacolchihuaj mojmostla. Pero teicneltic se tlacatl tlen quichihuil'ia seyoc ma tlajtlacolchihua pampa Toteco quitlatzacuiltis. 8"Intla moma o moicxi mitzchihuil'ia xitlajtlacolchihua, huajca xijtzontequi huan xijmajcahua. Pampa m'as cuali para ticalaquis nepa campa onca yolistli ica san setzi moma o san setzi moicxi, huan ax mitzmajcahuase nepa mictla ica motlacayo yamajtic. Pampa nepa mictla ax quema sehuis nopa tlitl. 9Huan intla moixtiyol quinequi quitlachilis tlajtlacoli, m'as cuali xijquixti huan xijmajcahua. Pampa achi m'as cuali ticalaquis nepa campa onca yolistli ica san setzi moixtiyol huan ax mitzmajcahuase ica nochi ome moixtiyol ipan tlitl nepa mictla. 10"Xijpiyaca cuidado para amo xiquiniyocacahuaca ni coneme pampa inielhuicac ejcahua tlen quinmocuitlahu'iaj, mojmostla quiixtlachil'iaj noTata nepa elhuicac. 11Pampa na tlen niMocuepqui Tlacatl nihualajtoc para niquinmaquixtis tlen mocuapolojtoque. 12"¿Quejatza inquiitaj? ¿Tlachque quichihuasqu'ia se tlacatl intla quinpixtoya cien borregojme huan se mocuapolosqu'ia? ¿Ax inmoilhu'iaj para quincahuasqu'ia nopa noventa y nueve cuali tzactoque huan yas ipan tepetl quitemoti nopa tlen mocuapolojtoc? 13Huan intla quipantis, paquis m'as ica nopa borrego tlen mocuapolojtoya que ica nopa noventa y nueve tlen ax mocuapolojtoque. 14Nojquiya san se ica imoTata tlen itztoc nepa elhuicac. Yajaya ax quinequi ma mocuapolo niyon se tlen ni coneme. 15"Intla se moicni ipan Toteco mitzixpano, xiya huan iyoca xiquilhui tlen mitzchihuilijtoc para san ta huan ya inquimatise. Intla mitzcaquis huajca sampa elis queja moicni. 16Pero intla ax mitzchihuilis cuenta, xiquinhuica se o ome mohuaya queja testigos para tijcamahuis para ma quimachili tlen mitzchihuilijtoc. Pampa ijcuilijtoc para temachtli quema ome o eyi testigos tlayolmelahuaj san se tlajtoli para quejatza panoc se tlamantli. 17Huan intla moicni ax quinchihuil'ia cuenta nopa tlacame tlen tiquinhuicac mohuaya, huajca xiquinpohuili nochi nopa tiopamitl tlen tlaneltocani tlen moicni mitzchihuilijtoc. Huan intla nopa tlaneltocani quiitaj para xitlahuac tlen tiquijtohua pero nopa moicni ax quintlacaquilis, huajca xiquitaca queja se tlen ax quiixmati Toteco huan se tlen fiero iyolis queja se tlen tlainama impuesto. 18"Pampa nel'ia nimechilhu'ia, nochi tlen inquiilpise nica ipan tlaltepactli, moilpis nepa ipan elhuicac. Huan tlen inquitojtomase ipan tlaltepactli nojquiya motojtomas nepa elhuicac. 19"Huan nojquiya nimechilhu'ia ya ni, intla ome tlen imojuanti ipan tlaltepactli inmocahuaj ica san se tlajtoli para inquitlajtlanise Toteco se tlamantli, huajca yajaya noTata tlen itztoc nepa elhuicac inmechmacas. 20Pampa campa mosentil'iaj tlacame ipan notoca, yonque san mosentil'iaj ome o eyi, na niitztoc ininhuaya." 21Huajca Pedro monechcahuico campa Jes'us huan quitlajtlani: --NoTeco, ¿hasta quesqui hueltas monequi nijtlapojpolhuis noicni tlen ajachica nechchihuil'ia tlen ax cuali? ¿Monequi nijtlapojpolhuis hasta chicome huelta? 22Huan Jes'us quiilhui: --Amo san xijtlapojpolhui chicompa huelta. Monequi tijtlapojpolhuijtinemis hasta chicompa setenta hueltas. 23"Quena, monequi tijtlapojpolhuijtinemis pampa Toteco tlen itztoc elhuicac huan tlen tlanahuatis eltoc queja ni tlanahuatijquetl ipan ni huicaltili. Se tonal se tlanahuatijquetl quinequiyaya quincuentajchihuas itlatequipanojcahua tlen quitlahuiquiliyayaj. 24Huan quema pejqui, quihualiquilijque campa ya se itlatequipanojca tlen quitlahuiquiliyaya majtlactli mil bolsas tlen tomi. 25Huan nopa tlacatl ax tleno quipiyayaya para quicuepilis. Huajca nopa tlanahuatijquetl tlanahuati ma quinamacaca nopa tlacatl ihuaya isihua huan iconehua huan nochi tlen iaxca, huan ica nopa tomi tlaxtlahuasqu'ia se quentzi tlen quitlahuiquiliyaya. 26"Huan quema itlatequipanojca quicajqui, moixtlapacho iixtla nopa tlanahuatijquetl huan ica nochi iyolo quitlajtlani: 'Xinechchiya huan nimitztlaxtlahuis nochi tlen nimitztlahuiquil'ia.' 27Huan nopa tlanahuatijquetl quitlasojtlac huan quitlapojpolhui nochi itlahuiquilis para ax tleno monequi tlaxtlahuas. 28"Teipa nopa tlatequipanojquetl yajqui huan quipantito se tlen tlatequipanohuayaya ihuaya huan quitlahuiquiliyaya pilquentzi tomi. Huan quiquechpatzcato hasta ayoc hueliyaya mijmijyotis huan quiilhui: 'Xinechtlaxtlahui amantzi.' 29"Huan ihuampo motlancuaquetzqui iixtla huan ica nochi iyolo quiilhui: 'Xinechchiya huan nimitztlaxtlahuis nochi.' 30"Pero nopa tlatequipanojquetl ax quinejqui quichiyas. Huajca quihuicac ihuampo ipan tlatzactli huan quitzajqui hasta nochi quitlamitlaxtlahuisqu'ia. 31Huan sequinoc itlatequipanojcahua nopa tlanahuatijquetl quiitaque nopa tlacatl tlen ininteco quitlapojpolhuilijtoya itlahuiquilis huan quiitaque tlen quichihuilijtoya ihuampo tlen pilquentzi quitlahuiquiliyaya. Huajca tlahuel mocuesojque huan yajque quiilhuitoj nopa tlanahuatijquetl tlen panoc. 32"Huajca nopa tlanahuatijquetl quinotzqui nopa itlatequipanojca huan quiilhui: 'Ta tifiero tlacatl. Na nijtlapojpolhui motlahuiquilis huan nochi tlen tinechtlahuiquiliyaya pampa ica nochi moyolo tinechtlajtlani. 33Huajca ¿para tlen ax tijtlasojtlac mohuampo tlen nechtequipanohua mohuaya queja na nimitztlasojtlac?' 34Huajca iteco cualanqui huan quinmactili ininmaco tlacame tlen quitlaijiyohuiltisqu'iaj hasta tlaxtlahuasqu'ia nochi tlen tlahuicayaya achtohuiya. 35Huan nojquiya queja nopa quichihuas noTata tlen itztoc nepa elhuicac intla imojuanti ica nochi imoyolo ax inquintlapojpolhuise sesen imoicni tlen inmechchihuil'iaj tlen ax cuali."

will be added

X\