MATEO 16

1Huan hualajque nopa fariseos huan nopa saduceos para quimasiltise Jes'us ica inintlajtol. Huan quitlajtlanijque Jes'us ma quichihua se tlanescayotl tlen elhuicac para quinnextilis intla quipiya ichicahualis Toteco. 2Pero Jes'us quinilhui: "Quema temo tonati inquiijtohuaj para mostla cuali tonas pampa tlachichiltic nepa elhuicac. 3Huan intla ica ijnaloc nesi hasta yayahuic tlamixtentoc, inquiijtohuaj para ama huetzis atl chicahuac. ¡Ome imoxayac! Inquimatij tlachque quiijtosnequi nopa mixtli tlen elhuicac, pero ax inquimachil'iaj tlachque quiijtosnequi nochi tlen inquiitztoque pano ipan ni tonali. 4Imojuanti tlen ama initztoque nel'ia infiero tlacame huan inquicajtejtoque Toteco. San imojuanti innechtlajtlan'iaj ma nijchihua se tlanescayotl para innechneltocase. Pero ax nimechmacas seyoc tlanescayotl. San nopa tlen panoc ica Jon'as eltoc queja se tlanescayotl para imojuanti." Huan Jes'us quincajtejqui huan yajqui. 5Huan teipa quema Jes'us huan tiimomachtijcahua tiajsitoyajya nepa seyoc nali hueyi atl, tiimomachtijcahua timomacaque cuenta para tiquilcajtoyaj tijhualicase pantzi para tijcuase. 6Huan Jes'us techilhui: --Ximotlachilica para amo xijselica inintlasonejcayo fariseos huan saduceos. 7Huan tiimomachtijcahua timoilhuijque se ica seyoc: --Techilhu'ia ya ni pampa tiquilcajque tijhualicase pantzi para tijcuase. 8Huan Jes'us quimatiyaya tlachque tiquijtohuayayaj huan huajca techilhui: --¿Para tlen inmocuesohuaj pampa ax inquihualicaque pantzi? Imojuanti san pilquentzi innechneltocaj. 9¿Noja aya inquimachil'iaj nochicahualis? ¿Ax inquiilnamiquij tlen panoc quema niquintlamacac macuili mil tlacame ica macuili pantzi? ¿Ax inquiilnamiquij quesqui chiquihuitl tlacualistli mocajqui quema ya tlacuajtoyaj? 10¿Ax inquiilnamiquij quesqui chiquihuitl tlacualistli mocajqui quema sampa niquintlamacac nahui mil tlacame ica chicome pantzi? 11¿Quejatza huelis inmoilhu'iaj para nimocuesohua pampa inquiilcajque pantzi? Nimechilhuiyaya ximotlachilica para amo xijselica inintlasonejcayo fariseos huan saduceos. 12Huajca tiimomachtijcahua tijmachilijque para Jes'us ax techcamahuiyaya tlen tlasonejcayotl para pantzi. ¡Axtle! Yajaya techilhuiyaya ma timotlachilica para ax tijselise inintlamachtil nopa fariseos huan nopa saduceos. 13Teipa Jes'us ajsito nechca altepetl Cesarea de Filipo. Huan yajaya techtlajtlani tiimomachtijcahua: --Quema tlacame camatij tlen na tlen niMocuepqui Tlacatl, ¿ajqueya quiijtohuaj para na? 14Huan tiquilhuijque: --Sequin quiijtohuaj ta tiJuan tlen tecuaaltiyaya. Sequin quiijtohuaj ta tiEl'ias. Huan sequinoc quiijtohuaj ta tiJerem'ias o seyoc itiocamanalojca Toteco. 15Huan Jes'us techtlajtlani: --¿Huan imojuanti? ¿Ajqueya inquiijtohuaj para na? 16Huan Sim'on Pedro quinanquili: --Ta tiCristo tlen Toteco techilhui techtitlanilisqu'ia. Ta tiIcone Toteco Dios, yajaya tlen nel'ia itztoc. 17Huan Jes'us quiilhui: --Toteco mitztiochijtoc Pedro, tiicone Jon'as, pampa ax elqui se tlacatl tlen mitznextili ajqueya na, pero elqui noTata tlen itztoc ipan elhuicac. 18Huan nojquiya nimitzilhu'ia ta, tiPedro, tlen quiijtosnequi se tipiltetzi. Huan ipan ni hueyi tepatlactli nijquetzas notiopa. Huan nochi chicahualistli ipan mictla ax quema huelis quitlanis. 19Nimitzmacas tlanahuatili para tijtlapos campa tlanahuat'ia Toteco tlen itztoc elhuicac, pampa tiquinpohuilis tlacame quejatza huelis calaquise nepa. Huan nochi tlen tiquilpis nica ipan tlaltepactli, moilpis nepa ipan elhuicac. Huan tlen tijtojtomas ipan tlaltepactli, nojquiya motojtomas nepa elhuicac. 20Huan Jes'us chicahuac techilhui tiimomachtijcahua ma axaca tiquilhuica para yajaya elqui nopa Cristo tlen Toteco techtitlanilijtoya. 21Huan elqui ipan nopa tlalochtli quema Jes'us pejqui techilhu'ia tiimomachtijcahua para monequi yas Jerusal'en. Huan nepa quitlaijiyohuiltisqu'iaj miyac nopa huehue tlacame tlen israelitame, huan nopa tlayacanca totajtzitzi huan tlamachtiani tlen itlanahuatil Mois'es. Quiijto para quimictise huan teipa ica eyi tonali, moyolcuis. 22Huan Pedro quihuicac iyoca huan quitlacahualti, quiilhui: --Ma Toteco Dios mitzpalehui, noTeco, para ni tlaijiyohuilistli ma ax mitzajsi. 23Pero Jes'us mocueptiquisqui huan quiilhui Pedro: --Xinechtlalcahui, Axcualtlacatl. Tijnequi tinechtzacuilis para ma ax nijchihua ipaquilis Toteco. Ax timoilhu'ia tlen Toteco Dios moilhu'ia, san timoilhu'ia queja tlacame. 24Huajca Jes'us techilhui tiimomachtijcahua: --Intla se tlacatl quinequi nechtoquilis, ma quitlahuelcahua tlen yajaya quinequi. Huan ma quitlalanas icuamapel huan nechtoquilis mocualtlalijtos para miquis nopampa na. 25Pampa tlen quinequi momanahuis para ax miquis ipampa nechixmati, quipolos ialma. Pero tlen nechtoquilis yonque monequi miquis nopampa na, quipantis yolistli yancuic para nochipa. 26Ax quipalehuis se tlacatl yonque moaxcatisqu'ia nochi ni tlaltepactli intla quipolos ialma. Pampa ax onca tleno tlen se huelis tlaxtlahuas para quimanahuis ialma quema quipolojtos nepa mictla. 27Pampa na tlen niMocuepqui Tlacatl nihualasoc ica itlatlanex noTata Dios. Huan noelhuicac ejcahua hualase nohuaya para niquintlaxtlahuis nochi tlacame queja quinamiqui ica tlen quichijtoque. 28Nel'ia nimechilhu'ia, sequin imojuanti tlen inmoquetzaj nica, ax inmiquise hasta inquiitase quejatza na tlen niMocuepqui Tlacatl nimonextis quema nihualas para nitlanahuatis.

will be added

X\