MATEO 11

1Quema Jes'us tlanqui techmacht'ia timajtlacme huan ome tiimomachtijcahua huan techtlamiilhui tlen tijchihuasqu'iaj, tiyajque ipan totequi. Huan yajaya quisqui nepa huan yajqui tlamachtito huan tlacamanaloto itlajtol ipan altepetini tlen nechca. 2Huan quema Juan tlen tecuaalti itztoya ipan tlatzactli huan quicajqui tlen Cristo quichihuayaya, quintitlanqui imomachtijcahua ma quicamahuitij. 3Huajca imomachtijcahua Juan quitlajtlanijque Jes'us: --¿Ta tiCristo tlen Toteco techilhuijtoc hualasqu'ia o monequi noja timochiyase para ma huala? 4Huan Jes'us quinnanquili: "Xiyaca, xijyolmelahuatij Juan tlen inquicactoque huan inquiitztoque. 5Xiquilhuitij para ica nochicahualis, tlacame tlen popoyotzitzi, ama tlachiyaj. Huan metzcuachotzitzi, ya cuali nejnemij. Huan tlacame tlen tlacayo palantoyaj ica lepra, mochicajtoquejya. Tlen nacastapaltzitzi, ama tlacaquij. Huan tlen mictoyaj, moyolcuitoquejya. Huan tlen m'as teicneltzitzi quicaquij nopa cuali tlajtoli tlen Toteco pampa niquincamahu'ia. 6Huan nojquiya xiquilhuitij para Toteco quitiochihuas tlen quimachilis ajqueya naja huan nechtoquilis." 7Huan teipa quema ya quistoyaj imomachtijcahua Juan, Jes'us pejqui quincamahu'ia tlen Juan itequi nopa miyac tlacame tlen quiyahualojtoyaj. Quiijto: "Quema achtohuiya inyajque ipan tlali huactoc campa ax tleno eli para inquiitatij Juan, ¿tlachque inmoilhuiyayaj inquiitasqu'iaj? ¿Inmoilhuiyayaj inquiitasqu'iaj se tlacatl tlen yamanic queja se pilacatzi tlen moojolin'ia quema tlaajaca? ¡Ax ya nopa! 8Niyon ax inmoilhuiyayaj inquiitasqu'iaj se tlacatl tlen moyoyontijtoc ica se yoyomitl tlen nelcuali. Ya inquimatij tlen moquent'iaj yoyomitl tlen nelcuali itztoque ipan ininchajchaj tlanahuatiani. Nimechilhuis para tlen inyajque. 9Inyajque ipan nopa tlali huactoc campa Juan itztoya pampa inquimatiyayaj yajaya se itiocamanalojca Toteco. Quena, nimechilhu'ia Juan se tiocamanalojquetl. Yajaya nopa tiocamanalojquetl tlen m'as hueyi. 10Ipan Itlajtol Toteco camati tlen Juan campa ijcuilijtoc: 'Xiquita, nijtitlanis notlayolmelajca ma mitzyacanas. Yajaya quicualtlalis ininyolo tlacame para ma mitzselise.' 11Melahuac nimechilhu'ia, axaca seyoc tlen tlacajtoc ipan ni tlaltepactli tlen m'as hueyi iixtla Toteco que Juan tlen tecuaalt'ia. Pero nopa tlacatl tlen itztoc m'as pilsiltzi ipan itlanahuatilis Toteco tlen itztoc ipan elhuicac, yajaya elis m'as hueyi que Juan. 12"Tlen nopa tonali quema nejnemiyaya Juan tlen tecuaaltiyaya huan hasta ama, miyac quinequij tlatehuise tlen quejatza tlanahuatis Toteco tlen itztoc ipan elhuicac, pampa Toteco quisencajtoc quejatza tlanahuatis, pero ax queja yajuanti quinequij. Huan yeca quinequij ica fuerza quichihuase ma eli seyoc tlamantli tlanahuatili. 13Nochi itiocamanalojcahua Toteco tlen hualajque achtohui quema aya ajsiyaya Juan, tecamahuiyayaj tlen teipa panosqu'ia ipan ni tonali. 14Quiijtojque hualasqu'ia se El'ias, huan intla inquinequij inquimatise, yajuanti camatiyayaj tlen Juan, pampa Juan yajaya El'ias. 15Inquipiyaj imonacas, huajca xijcaquica tlen nimechilhu'ia. 16"¿Quejatza huelis nimechilhuis intlacame tlen ama initztoque quejatza initztoque? Initztoque queja coneme tlen mosehu'iaj tianquis huan quinnotzaj sequinoc coneme ma mahuilticaj ininhuaya huan nopa sequinoc ax quinneltoquil'iaj. 17Huajca nopa coneme cualanij huan quiijtohuaj: 'Titlapitzque para ximijtotica, pero ax inmijtotijque. Tihuicaque se huicatl tlen cuesoli queja mictoya se acajya, pero ax inchocaque.' 18Queja nopa coneme, imojuanti ax inpaquij intla ax nochi pano queja inquichiyaj ma pano. Pampa hualajqui Juan huan mosajqui huan ax quiic xocomeca atl huan inquiijtojque quipixtoya se iajaca Axcualtlacatl. 19Huan na tlen niMocuepqui Tlacatl nihualajtoc, huan nijcua huan niqui tlen onca; huan inquiijtojque nineltlacuajquetl huan nineltlaiquetl. Inquiijtojtoque ninejnemi ininhuaya tlacajcayahuani tlen tlainamaj impuesto huan ininhuaya tlacame tlen miyac tlajtlacoli quichijtoque. Pero intla Toteco nechmacatoc cuali notlalnamiquilis, teipa tlanempa nesis para nijchihua tlen xitlahuac." 20Teipa Jes'us pejqui quiijtohua para ax cuali tlen quichijque tlacame ipan altepetini campa quichijtoya miyac chicahualnescayotl iniixtla, pampa yajuanti ax moyolcuepque. 21Quiijto: "Inteicneltique tlen inehuaj altepetl Coraz'in pampa Toteco inmechtlatzacuiltis. Inteicneltique tlen inehuaj Betsaida, pampa ax innechneltocaque quema nijchijqui huejhueyi chicahualnescayotl imoixtla. Intla tlacame tlen huejcajquiya itztoyaj ipan altepetini Tiro huan Sid'on quiitztosqu'iaj nochi nopa chicahualnescayotl tlen nijchijqui imoixtla, moyolcueptosqu'iaj nimantzi huan nochi tlacame quimajtosqu'iaj. 22Huan nojquiya nimechilhu'ia, ipan nopa tonal quema Toteco tetlajtolsencahuas, m'as chicahuac inmechtlatzacuiltis imojuanti tlen inquicactoque notlajtol huan ax inquinejque inmoyolpatlase, que quintlatzacuiltis nopa ax cuajcualme tlen itztoyaj ipan Tiro huan Sid'on huejcajquiya. 23Imojuanti tlen inehuaj altepetl Capernaum, inmohueyimatij huan inmoilhu'iaj inmotlalanase hasta elhuicac, pero axtle. Intemose hasta mictla pampa ax inmoyolcueptoque. Intla Sodoma ehuani tlen huejcajquiya quiitztosqu'iaj nopa chicahualnescayotl tlen inquiitztoque, moyolcueptosqu'iaj huan noja mocahuasqu'ia inialtepe hasta ama. 24Huan ipan nopa tonal quema Toteco tetlajtolsencahuas, m'as inmechtlatzacuiltis inCapernaum ehuani que quintlatzacuiltis nopa ax cuajcualme tlen huejcajquiya itztoyaj ipan Sodoma." 25Huan ipan nopa tonal nojquiya Jes'us quicamahui Itata, Toteco Dios, huan quiilhui: "Pap'a, ta tiToteco Dios tlen titlanahuat'ia ipan elhuicac huan ipan tlaltepactli. Nimitzhueyimati pampa tijtlatijtoc ni tlamantli para ma ax quimachilica tlacame tlen moilhu'iaj tlalnamiquini huan miyac quimachil'iaj. Huan ama tiquinnextilijtoc tlacame tlen itztoque queja coneme huan ax mohueyimatij. 26Quena, queja nopa tijchijtoc pampa queja nopa elqui mopaquilis." 27Huan Jes'us quinilhui nopa tlacame: "NoTata nechmacatoc tlanahuatili ipan nochi tlamantli. Axaca cuali nechyolixmati, san Toteco noTata, quena, yajaya cuali nechyolixmati. Huan axaca quiyolixmati Toteco noTata, san na, quena, cuali nijyolixmati. Huan nojquiya quiyolixmatise nopa tlacame tlen nijnequi para niquinnextilis ajqueya ya. 28Xihualaca campa na nochi imojuanti tlen intlaxicohuaj huan intlamamalhuicaj etic, huan na nimechquixtilis imotlamamal para ximosehuica huan ximosiyajcahuaca. 29Xinechcahuilica ma nieli niimoTeco huan xinemica nohuaya. Ximomachtica tlen na pampa na nijpiya noyolo. Ax nimohueyimati huan ica na inquipantise tlen quitemohua imoalma para ma mosehuis huan mosiyajcahuas. 30Ax ohui nopa tequitl tlen nimechmacas. Eltoc queja se tlamamali tlen ax etic."

will be added

X\