MARCOS 9

1Nojquiya Jes'us quinilhui: --Nel'ia nimechilhu'ia, sequin imojuanti tlen initztoque nica ax inmiquise hasta inquinitase hualase ica chicahualistli tlen itztoque nepa campa tlanahuat'ia Toteco. 2Quema panotoya chicuase tonali, Jes'us quinhuicac Juan, Pedro huan Jacobo huan tlejcoc ipan se huejcapantic tepetl. Nepa quipatlac itlachiyalis iniixtla. 3Huan iyoyo mocuepqui cahuantic huan nelchipahuac. Axaca se tlachicuenijquetl ipan tlaltepactli tlen hueli quichipahualt'ia yoyomitl queja nopa. 4Huan nopano iniixtla monextijque El'ias huan Mois'es huan quicamahuiyayaj Jes'us. 5Huajca Pedro quiilhui Jes'us: --Tlamachtijquetl, cuali para tiitztose nica. Ma tijchihuaca eyi pilxajcaltzitzi: se para ta, se para Mois'es, huan seyoc para El'ias. 6Imomachtijcahua momajmatiyayaj huan Pedro quiijto ya ni pampa ax quimatqui tlachque quiijtos. 7Teipa temoc se mixtli ininpani huan quintzajqui. Huan ipan nopa mixtli quicajque itos Toteco Dios huan yajaya quiijto: "Ya ni Nocone tlen niquicnel'ia, xijtlacaquilica tlen quiijtohua." 8Huan ipan nopa tlalochtli imomachtijcahua quitlachilijque huan ayoc aca quiitaque, san Jes'us iselti. 9Huan quema ixtemoyayaj ipan nopa tepetl, Jes'us quinnahuati ma axaca quipohuilica tlen quiitztoyaj hasta yajaya tlen Mocuepqui Tlacatl miquisqu'ia huan moyolcuisqu'ia. 10Huajca axaca quiilhuijque, pero motlajtlaniyayaj tlachque quiijtosnequi para moyolcuis tlen campa mijcatzitzi. 11Huan imomachtijcahua quitlajtlanijque Jes'us: --¿Para tlen quiijtohuaj nopa tlamachtiani tlen itlanahuatil Mois'es para achtohui monequi hualas nopa tiocamanalojquetl El'ias huan teipa hualas nopa Cristo? 12Huan Jes'us quinnanquili huan quinilhui: --Melahuac ijcuilijtoc ipan Itlajtol Toteco para El'ias monequi hualas achtohui huan quicualtlalis nochi tlamantli. Pero yonque ya nopa quichihua, xijmachilica para nojquiya ijcuilijtoc ipan Itlajtol Toteco para na tlen niMocuepqui Tlacatl nitlaijiyohuis miyac huan nechhuejcamajcahuase tlacame. 13Huan nimechilhu'ia ya hualajqui nopa tlacatl tlen eliyaya queja El'ias huan tlacame quichihuilijque nochi tlen ax cuali tlen yajuanti quinejque. Quichijque senquistoc queja ijcuilijtoc ipan Itlajtol Toteco para quichihuilisqu'iaj. 14Teipa Jes'us, Juan, Pedro huan Jacobo mocuepque campa itztoyaj nopa sequinoc imomachtijcahua. Huan quinitaque tlahuel miyac tlacame ininhuaya. Nojquiya nepa itztoyaj tlamachtiani tlen itlanahuatil Mois'es tlen mocamaijixnamiquiyayaj ininhuaya. 15Huan nimantzi nopa tlacame quitlachilijque Jes'us, huan san quisentlachilijque huan motlalojtejque para quitlajpalotij. 16Huajca Jes'us quintlajtlani: --¿Tlachque tlamantli inmonajnanquil'iaj ihuaya nomomachtijcahua? 17Huan se tlacatl tlen itztoya nepa quinanquili: --Tlamachtijquetl, nica nijhualica nooquichpil. Quipiya se iajaca Axcualtlacatl tlen quinonotilijtoc. 18Huan campa hueli quema nopa ajacatl quiitzqu'ia, quimajcahua tlalchi huan camaposoni. Huan motlancochhuehuechotza huan huapahu'ia. Niquintlajtlani momomachtijcahua ma quiquixtilica nopa ajacatl, pero ax huelque. 19Huan Jes'us quinnanquili: --¡Nelnel'ia intlacame tlen ama initztoque! ¡Ax innechneltocaj! ¿Quesqui tonali monequi niitztos imohuaya? ¿Quesqui tonali monequi nimechijiyohuis huan ax innechneltocaj? ¡Xinechhualiquilica nopa oquichpil! 20Huan quihualicaque. Huan quema nopa ajacatl quiitac Jes'us, nimantzi quimaquili se ajaca cocolistli nopa oquichpil. Huan huetzqui tlalchi, huan pejqui momimilohua huan camaposoni. 21Huajca Jes'us quitlatzintoquili itata: --¿Quemaya pejqui quipiya ni cocolistli? Huan itata quiijto: --Pejqui quema conetzi eltoya. 22Huan miyac huelta nopa ajacatl quimajcajtoc tlixijco huan atitla para quimictis. Huajca intla tihueli, xitechtlasojtla huan xitechpalehui. 23Huan Jes'us quiilhui: --¿Para tlen tinechtlajtlan'ia intla hueli nimitzpalehuis? Nochi hueli mochihua para se tlen nechneltoca. 24Huan nimantzi itata nopa oquichpil camatqui chicahuac huan quiilhui: --¡Nijneltoca! ¡xinechpalehui para m'as ma nijneltocas! 25Huan Jes'us quiitac para mosentiliyayaj miyac tlacame, huajca quiajhuac iajaca Axcualtlacatl, huan quiilhui: --Tiajacatl tlen tiquinchihua tlacame ma nacastapalihuica huan ma nonotiyaca, nimitznahuat'ia xiquisa ipan ni oquichpil huan ayoc xicalaqui ipan ya. 26Huan nopa ajacatl tzajtzic, huan quimacac nopa oquichpil seyoc ajaca cocolistli tlen chicahuac, huan quisqui. Huan nopa oquichpil mocajqui queja mictoc. Huan miyac quiijtohuayayaj para ya mictoc. 27Pero Jes'us quimaitzqui huan quitlalanqui huan nopa oquichpil moquetzqui. 28Teipa Jes'us calaquito ipan se cali huan ixtacatzi imomachtijcahua quitlajtlanijque: --¿Para tlen ax tihuelque tijquixtilijque nopa ajacatl? 29Huan ya quinilhui: --Ni tlamantli ajacatl ax quisaj intla ax timomaijtose huan timosahuase. 30Jes'us huan imomachtijcahua quisque nepa huan panotiyajque ipan estado Galilea. Huan Jes'us ax quinequiyaya tlacame ma quimatica campa itztoya, 31pampa quinmachtiyaya imomachtijcahua. Quinilhuiyaya: --Nechtemactilise na tlen niMocuepqui Tlacatl ininmaco tlacame. Yajuanti nechmictise, pero quema nimiquis, ica eyi tonali nimoyolcuis. 32Pero imomachtijcahua ax quimachiliyayaj itlajtol huan momajmatiyayaj quitlajtlanise tlachque quiijtosnequi. 33Teipa Jes'us huan imomachtijcahua ajsitoj altepetl Capernaum. Huan quema itztoyaj calijtic, Jes'us quintlatzintoquili: --¿Tlachque inmonajnanquiliyayaj ipan ojtli? 34Pero ax tleno quiijtojque pampa ipan ojtli monajnanquiliyayaj ajqueya tlen yajuanti quipixqui achi m'as tequihuejcayotl. 35Huajca Jes'us mosehui huan quinnotzqui nopa majtlactli huan ome imomachtijcahua, huan quinilhui: --Intla se tlacatl quinequi elis tlen m'as quipiya tequihuejcayotl iixpa Toteco Dios, ma mochihua queja ax quipiya tequihuejcayotl huan ma quintequipano nochi sequinoc. 36Huan Jes'us quiitzqui se conetl huan quitlali tlatlajco campa yajuanti. Huan quicuanajnahuajqui huan quinilhui: 37--Intla se tlacatl quiselis se conetl queja ya ni pampa nechneltoca, huajca yajaya nechsel'ia. Huan ajqueya nechsel'ia, ax san na nechsel'ia, pero nojquiya quisel'ia noTata tlen nechtitlanqui ipan ni tlaltepactli. 38Huan Juan quiilhui Jes'us: --Tlamachtijquetl, tiquitaque se tlacatl tlen quinquixtiyaya iajacahua Axcualtlacatl ica ichicahualis motoca. Tiquilhuijque ma ayoc quichihua pampa ax tohuaya nemi huan ax techtoquil'ia. 39Pero Jes'us quinilhui: --Amo xijtzacuilica, pampa axaca hueli quiijtos notoca huan quichihua se chicahualis nescayotl huan teipa camatis fiero tlen na. 40Pampa intla se tlacatl ax techcocol'ia, huajca yajaya itztoc tohuaya. 41Ajqueya inmechmacas se quentzi atl pampa quimati innechtoquil'iaj na niCristo, nimechilhu'ia para temachtli noTata quitlaxtlahuis cuali. 42"Intla acajya quinextilis ma tlajtlacolchihua se tlen ni coneme tlen nechneltocaj, Toteco nel'ia quitlatzacuiltis. M'as cuali intla achtohui quiquechilpilisqu'iaj nopa tlacatl se hueyi metlatl huan quimajcahuasqu'iaj ipan hueyi atl para ma misahuis para ma ax quichihua nopa hueyi tlajtlacoli. 43Intla tijnequi titlajtlacolchihuas ica se moma, m'as cuali xijtzontequi. Pampa achi cuali ticalaquis elhuicac ica san setzi moma, huan ax tiyas ica ome moma campa nopa tlitl tlen ax quema sehuis. 44Nepa nopa ocuilime ax miquij huan ax quema sehuis nopa tlitl. 45Huan intla moicxi mitzhuicas para titlajtlacolchihuas, m'as cuali xijtzontequi. Pampa achi cuali ticalaquis elhuicac timetzcototic, huan ax mitzmajcahuase ica ome mometz ipan mictla campa nopa tlitl tlen axaca hueli quisehuis. 46Nepa ocuilime ax miquij huan ax quema sehuis nopa tlitl. 47Huan intla moixtiyol quinequi mitztlajtlacolchihualtis, achi cuali xijquixti. Pampa m'as cuali ticalaquis campa tlanahuat'ia Toteco ica san setzi moixtiyol huan ax mitzmajcahuase mictla ica ome moixtiyol. 48Nepa ax miquise nopa ocuilime huan ax quema sehuis nopa tlitl. 49"Queja quicualtlal'iaj se tlacajcahualistli para Toteco ica istatl huan ica tlitl, nojquiya monequi nochi tlacame quipanose tlaohuijcayotl pampa Toteco quincualtlal'ia para ma quitequipanoca. 50Istatl nel'ia cuali, pero intla quipolohua ipoyeca, axaca huelis quipoyeltis sampa. Xiitztoca queja se tlacualistli tlen cuali poyec pampa initztoque ica cuali se ica seyoc."

will be added

X\