MARCOS 7

1Huajca mosentilijque campa Jes'us nopa fariseos huan sequin tlamachtiani tlen itlanahuatil Mois'es tlen hualajtoyaj tlen altepetl Jerusal'en. 2Huan quiitaque para sequin imomachtijcahua Jes'us tlacuayayaj huan ax momajtequijtoyaj miyac huelta queja momajtoyaj israelitame para motlapajpacchihuase, huajca quinteilhuijque. 3Nopa fariseos huan nochi israelitame quitoquilijque tlen quiijtojque tohuejcapan tatahua. Moilhuiyayaj intla ax momajtequ'iaj miyac huelta, ax hueli tlacuase. 4Huan nojquiya moilhuiyayaj quema mocuepaj ica tianquis, monequi momajtequise achtohui huan teipa tlacuase. Huan quitoquilijque miyac tlamachtili tlen huejcajquiya. Quipajpacayayaj inintazas, ininxarro huan inintepospaila queja quiijtojque tohuejcapan tatahua. 5Huajca nopa fariseos huan tlamachtiani tlen itlanahuatil Mois'es quitlajtlanijque Jes'us: --¿Para tlen momomachtijcahua ax quitoquil'iaj inintlamachtil tohuejcapan tatahua? Yajuanti tlacuaj yonque ax momajtequijtoque queja quiijtohua nopa tlanahuatili. 6Huan Jes'us quinnanquili: --¡Inquipiyaj ome imoxayac! Melahuac nopa tlajtoli tlen Toteco quimacac nopa tiocamanalojquetl Isa'ias ma quiijcuilo tlen imojuanti campa Toteco quiijto: 'Ni tlacame quiijtohuaj nechtlepanitaj, pero ax neli. Ipan ininyolo ax quema nechilnamiquij. 7Huajca san tlapic nechhueyichihuaj, pampa tlamacht'iaj inintlajtol tlacame queja eltosqu'ia notlajtol.' 8Imojuanti nojquiya inquitlahuelcajtoque itlanahuatil Toteco para inquitoquilise inintlamachtil tlacame. Inquitoquil'iaj nopa tlanahuatili para quejatza monequi inquipajpacase xarros huan tazas tlen ipan inatlise huan inquitoquil'iaj miyac m'as tlamantli queja nopa. 9Huan Jes'us nojquiya quinilhui: --Inquinilcajtoquejya itlanahuatil Toteco pampa inquinequij inquitoquilise inintlamachtil tlacame. 10Pampa Mois'es quiijto: 'Xijtlepanita motata huan monana', huan nojquiya quiijto: 'Intla se quitelchihuas itata o inana, ma miqui.' 11Pero inquiijtohuaj se tlacatl huelis quiilhuis itata o inana para ax huelis quinpalehuis ica tlen monequi para ica panose pampa nochi tlen quipiyaj mocahua Corb'an o tlaiyocatlalili para quimactilise Toteco, yonque ax neli nopa tlajtoli. 12Huajca ayoc inquincahuil'iaj tlacame ma quinpalehuica inintatahua huan ininnanahua. 13Huajca queja nopa inquitlahuelcajtoque itlajtol Toteco para inquitoquilise inintlamachtil tlacame. Huan inquichihuaj miyac tlamantli quej ni tlen ax xitlahuac. 14Sampa Jes'us quinnotzqui nopa miyac tlacame nepa huan quinilhui: --Xinechtlacaquilica nochi imojuanti, huan xijmachilica tlen nimechilhu'ia. 15Ax tleno tlen quicua se tlacatl hueli quiijtlacohua iixtla Toteco Dios. Pero tlen quisa ipan iyolo se tlacatl queja tlen ax cuali quiijtohua huan quichihua, ya nopa quena quiijtlacohua iixtla Toteco. 16Nochi innechtlacaquilijque, huajca xijneltocaca tlen nimechilhu'ia. 17Huan teipa quema Jes'us quincajtejtoya nopa miyac tlacame huan calactoya ipan se cali, imomachtijcahua quitlajtlanijque tlachque quiijtosnequi nopa huicalotl. 18Huan Jes'us quinilhui: --¿Para tlen imojuanti nojquiya ax inquimachil'iaj? ¿Ax inquimatij ax tleno tlen se tlacatl quicuas huelis quiijtlacos iixtla Toteco? 19Pampa itlacualis ax calaquis ipan iyolo. San calaquis iijtico huan teipa quisas ipan itlacayo. Quej nopa Jes'us quinilhui para tlapajpactic iixtla Toteco nochi tlacualistli. 20Pero Jes'us quinilhui: --Ax tlapajpactique tlacame iixtla Toteco Dios pampa ipan ininyolo quisa tlen ax cuali. 21Ax tlapajpactique iixtla Toteco pampa quipiyaj inintlalnamiquilis tlen fiero, o quichihuaj tlen hueli ica ichpocame, o tlaxtequij, o temict'iaj o momecat'iaj. 22O pampa tlahuel quinequij tlen iniaxca sequinoc, o se fiero ojtli quihuicaj, o tlacajcayahuaj o quinequij tlen ax cuali. Ax tlapajpactique iixpa pampa techicoitaj, o teistlacahu'iaj, o mohueyimatij o mohuihuinequij. 23Nochi ni tlajtlacoli quinijtlacohua tlacame iixtla Toteco. Pero tlen quicua se tlacatl ax hueli quiijtlacos iixtla. 24Jes'us quisqui nepa huan yajqui nechca altepetini Tiro huan Sid'on huan calajqui ipan se cali. Ax quinequiyaya tlacame ma quimatica intla itztoya nopano, pero ax huelqui motlat'ia. 25Itztoya se sihuatl tlen quipixqui se isihuapil tlen quipiyayaya iajaca Axcualtlacatl. Huan nopa sihuatl quicajqui para itztoya Jes'us nepa. Huan nimantzi hualajqui huan motlancuaquetzqui iixtla Jes'us. 26Pero nopa sihuatl ax eliyaya se israelita. Yajaya camatqui griego huan ehua se lugar tlen itoca Fenicia ipan tlali Siria. Huan nopa sihuatl hualajqui huan quitlajtlani Jes'us ma quiquixti nopa ajacatl tlen quipixtoya isihuapil. 27Pero Jes'us quiilhui: --Achtohui niquinpalehuis israelitame. Teipa niquinpalehuis tlen hualahui sejcoyoc tlaltini. Intla axtle, elis queja niquinmaca pilchichitzitzi inintlacualis coneme. 28Huan nopa sihuatl quinanquili: --Quena, Toteco, pero quema coneme tlacuaj, huetzi se quentzi panpayaxtli mesajtzala huan pilchichitzitzi quipejpenaj. 29Huan Jes'us quiilhui: --Cuali tinechnanquili, huajca xiya mochaj; nopa ajacatl ya quistejqui ipan mosihuapil. 30Huan quema nopa sihuatl ajsito ichaj, quipanti isihuapil ayoc quipiyayaya nopa ajacatl, san mosiyajcahuayaya ipan itlapech. 31Huan Jes'us quisqui campa itztoya nechca altepetl Tiro huan panoc altepetl Sid'on. Teipa ajsico hueyi atl Galilea huan teipa panoc hasta tlali Dec'apolis. 32Nopano tlacame quihualicaque se tlacatl tlen nacastzactoya huan nonotzi, huan quitlajtlanijque Jes'us ma quitlali ima ipan nopa cocoxquetl para ma quichicahua. 33Huan Jes'us quihuicac nopa tlacatl iyoca campa axaca aquiyaya, huan quinacasmayahuili. Teipa chajchac huan quitlalili ichajcha ipan inenepil nopa tlacatl. 34Huan Jes'us ajcoitac elhuicac huan mijnelti huan quiilhui nopa nonotzi: "¡Efata!" (quinequi quiijtos: "¡Xitlapohui!") 35Huajca ipan nopa tlalochtli tlapojqui inacas huan mochicajqui inenepil huan huelqui camati cuali. 36Huan Jes'us quinnahuati nopa tlacame ma axaca quiilhuica. Pero yonque chicahuac quinnahuati, achi m'as tepohuiliyayaj tlen Jes'us quichihuayaya. 37Huan nopa tlacame nel'ia quisentlachiliyayaj Jes'us huan moijilhuiyayaj: "Yajaya quichihua nochi tlen cuali. Quinchihua ma tlacaquica tlen nacastapaltique huan ma camatica tlen nonome."

will be added

X\