MARCOS 6

1Jes'us quisqui nepa huan mocuepqui ialtepe huan imomachtijcahua yajque ihuaya. 2Ipan s'abado, nopa tonal para israelitame ma mosiyajcahuaca, Jes'us pejqui tlamacht'ia ipan israelita tiopamitl. Huan miyac tlacame tlen quicajque quisentlachilijque huan quiijtojque: --¿Ajqueya quimachtijtoc nochi ya ni? ¿Canque quicuic nochi ni tlalnamiquistli? ¿Quejatza hueli quichihua ni huejhueyi chicahualis nescayotl? 3Yajaya se cuaxinquetl. Yajaya icone Mar'ia huan iicni Jacobo, Jos'e, Judas, huan Sim'on. Isihua icnihua nojquiya itztoque nica tohuaya. Huan yeca tlen san sejco ehuani ica Jes'us ax quinejque quichihuilise cuenta. 4Huan Jes'us quinilhui: --Nochipa tlacame tlen san sejco ehuaj se tiocamanalojquetl ax quitlepanitaj. Niyon ax quitlepanitaj iteixmatcahua huan ichampoyohua, pero sejcoyoc ehuani, quena, quitlepanitaj. 5Yeca Jes'us ax huelqui quichijqui niyon se chicahualis nescayotl ipan ialtepe. San quitlali ima ipan se ome cocoyani huan quinchicajqui. 6Huan Jes'us san quinsentlachili nopa tlacame tlen ehuayaya ipan ialtepe pampa ax quineltocaque. Teipa Jes'us panotinenqui ipan miyac pilaltepetzitzi tlen nejnechca para tlamachtis. 7Teipa Jes'us quinnotzqui nopa majtlactli huan ome imomachtijcahua huan pejqui quintitlani ma yaca ojome para teilhuitij itlajtol Toteco. Huan quinmacac tequihuejcayotl ica iajacahua Axcualtlacatl tlen calactoya ipan tlacame. 8Huan Jes'us quinnahuati para ax tleno ma quihuicaca ipan ojtli. Ma ax quihuicaca se yoyon coxtali, niyon pantzi, niyon tomi. Ma quihuicaca san setzi cuatopili huan ax tleno m'as. 9Quinilhui huelis motlalilise tecactli, pero ma ax quihuicaca yoyomitl tlen ica mopatlase. 10Huan Jes'us quinilhui: --Quema inajsise ipan se altepetl huan se inmechnotzas para ximocahuaca ichaj, ximocahuaca ipan ichaj hasta inquisase ipan nopa altepetl. 11Huan intla inajsitij ipan se altepetl, huan ax inmechsel'iaj huan ax inmechtlacaquil'iaj; xiquisaca nepa huan ximotecactzejtzeloca para inquiquixtilise nopa tlalpotectli. Ica nopa tlanescayotl inquinextise para ipan nopa tonal quema Toteco tetlajtolsencahuas, nopa tlacame ipan nopa altepetl tlen ax inmechselijque quipantise se tlatzacuiltilistli tlen m'as hueyi que altepetini Sodoma huan Gomorra. 12Huajca imomachtijcahua quisque huan teilhuitoj para tlacame ma moyolcuepaca huan quicahuaca inintlajtlacolhua. 13Huan quinquixtijque miyac iajacahua Axcualtlacatl tlen calactoyaj ipan tlacame, huan quitlalijque aceite ipan miyac cocoyani huan quinchicajque. 14Nopa Tlanahuatijquetl Herodes 'Antipas quicajqui tlen Jes'us pampa nochi tlacame campa hueli quimatiyayaj tlen quichihuayaya. Huan Herodes quiijto para Jes'us elqui Juan tlen mijqui, huan ama moyolcuitoya huan yeca huelqui quichihua huejhueyi chicahualis nescayotl. 15Sequinoc quiijtohuayayaj para Jes'us eliyaya nopa tiocamanalojquetl El'ias. Huan sequinoc quiijtohuayayaj para Jes'us eliyaya se tiocamanalojquetl queja nopa tiocamanalohuani tlen itztoyaj huejcajquiya. 16Pero quema quicajqui Tlanahuatijquetl Herodes tlen Jes'us quichihuayaya, quiijto para Jes'us eliyaya Juan tlen tecuaaltiyaya huan tlen ya iselti tlanahuati ma quiquechtzontequica. Moilhui para ama Juan ya moyolcuitoya. 17Tlanahuatijquetl Herodes 'Antipas achtohui quintitlanqui isoldados ma quiitzquica Juan huan ma quitzacuaca. Quichijqui ya nopa para ma paqui Herod'ias tlen eltoya isihua. Nopa sihuatl Herod'ias eltoya isihua Herodes Felipe I tlen eli iicni Tlanahuatijquetl Herodes 'Antipas, pero teipa Tlanahuatijquetl Herodes 'Antipas mocuili para isihua. 18Huan yeca Juan quiilhuijtoya Tlanahuatijquetl Herodes para ax cuali mocuilijtoya ihuejpol. 19Huajca yeca nopa sihuatl, Herod'ias, quicualancaitayaya Juan. Quinequiyaya quimictis, pero ax hueliyaya. 20Tlanahuatijquetl Herodes quiimacasiyaya Juan pampa quimatiyaya eliyaya se tlacatl tlen xitlahuac huan tlatzejtzeloltic, yeca quimocuitlahuiyaya para ax tleno ipantisqu'ia. Quema Herodes quicajqui itlamachtil Juan, ax quimachili. San moyolilhuiyaya miyac tlen nochi tlen quiijtohuayaya. Pero nochipa quicaquiyaya ica paquilistli. 21Pero se tonal nopa sihuatl Herod'ias quipanti quejatza huelis quimictis Juan quema nopa Tlanahuatijquetl Herodes quichijqui se ilhuitl pampa quiaxiti ixihui. Quipixqui se tlacualistli huan quinnotzqui itequihuejcahua ihuaya itlanahuatijcahua huan tlen tominpixque ipan itlal. 22Huan hualajqui iichpoca nopa sihuatl Herod'ias huan mijtotijqui iselti iniixtla nopa tlanotzalme. Huan quinpacti Tlanahuatijquetl Herodes huan nopa tlacame tlen tlacuayayaj ihuaya. Huajca Herodes quiilhui nopa ichpocatl: --Xinechtlajtlani tlen tijnequis huan nimitzmacas. 23Huan Herodes tlatestigojquetzqui chicahuac iniixtla nochi itlanotzalhua huan quiilhui nopa ichpocatl: --Nimitzmacas nochi tlen tinechtlajtlanis yonque tinechtlajtlanis tlajco ni tlaltini campa nijpiya tlanahuatili. 24Huan nopa ichpocatl quisqui huan quiilhuito Herod'ias, tlen eliyaya inana, huan quitlajtlani tlachque cuali quitlajtlanis. Huan inana quinanquili: --Xiquilhui tijnequi itzonteco Juan tlen tecuaalt'ia. 25Huan nimantzi mocuepqui nopa ichpocatl ipan nopa ilhuitl campa itztoya Herodes huan quiilhui: --Nijnequi amantzi xinechmaca itzonteco Juan, nopa tecuaaltijquetl. Xinechmaca ipan se hueyi plato. 26Huajca nel'ia mocueso nopa tlanahuatijquetl. Pero tlatestigojquetztoya huan quicactoyaj itlanotzalhua ipan nopa tlacualistli huan yeca ax quinejqui quiilhuis para ax quimacas. 27Huajca nimantzi quititlanqui se isoldado, huan quinahuati ma quihualica itzonteco Juan. 28Huajca yajqui isoldado Herodes campa tzactoya Juan huan quiquechtzontequito. Huan quihualicac ipan se hueyi plato, huan quimacac nopa ichpocatl, huan nopa ichpocatl quimacac inana. 29Huan quema quimatque itlatoquilijcahua Juan para quimictijtoyaj, hualajque quitlalanque itlacayo huan quitlalpachojque. 30Teipa imomachtijcahua Jes'us mocuepque tlen campa hueli nejnentoyaj huan mosejcotilijque ihuaya Jes'us. Huan quipohuilijque nochi tlen quichijtoyaj huan tlen tlamachtijtoyaj. 31Huan Jes'us quinilhui imomachtijcahua: --Xihualaca nohuaya ma timosiyajcahuatij quentzi campa tlatzitzica. Quinilhui ya ni pampa ajachica miyac tlacame hualayayaj huan yohuiyayaj, huan Jes'us ihuaya imomachtijcahua ax quipiyayayaj niyon se tlalochtli para tlacuase. 32Huajca Jes'us ininhuaya imomachtijcahua yajque san sejco ipan se cuacanahua hasta campa ax oncayaya caltini. 33Pero miyac tlacame quinitaque quema yajque ipan cuacanahua huan quiixmatque para eliyaya Jes'us. Huan quisque tlen nopa altepetini huan motlalojque hasta campa Jes'us huan imomachtijcahua ajsisqu'iaj, huan yajuanti achtohui ajsitoj nepa. 34Huan quema Jes'us temoc ipan cuacanahua huan quiitac para ya ajsitoyaj nopa miyac tlacame, quintlasojtlac pampa itztoyaj queja borregojme tlen ax quipiyayayaj se tlamocuitlahuijquetl. Huan Jes'us pejqui quinmacht'ia miyac tlamantli. 35Huan quema tlatlayohuatinemiyaya, imomachtijcahua monechcahuijque huan quiilhuijque: --Ya tiotlaquixqui huan nica ax tleno onca. 36Xiquinnahuati ni tlacame ma yaca ipan ranchos huan ipan pilaltepetzitzi tlen nechca ma mocohuitij pantzi pampa ax tleno quipiyaj para quicuase. 37Pero Jes'us quinnanquili huan quinilhui: --Xiquintlamacaca imojuanti. Huan imomachtijcahua quiilhuijque: --¿Tijnequi tiquijtos ma tiyaca huan tijcohuatij pantzi tlen ome ciento tonali tequitl para tiquintlamacase nochi ni tlacame? 38Huan Jes'us quinilhui: --¿Quesqui pantzi inquipiyaj? Xijtlachilitij. Huan quema quimatque, quiilhuijque: --Macuili pantzi huan ome michime. 39Huajca quinnahuati imomachtijcahua ma quinilhuica nopa tlacame ma mosehuica ica pamitl ipan nopa xoxohuic sacapetlatl. 40Huan mosehuijque ica pamitl tlen cien huan tlen cincuenta tlacame. 41Huajca Jes'us quiitzqui nopa macuili pantzi huan nopa ome michime. Huan ajcoitac elhuicac huan quitlascamatqui Toteco. Huan quitlajcotlapanqui nopa pantzi huan quinmacac imomachtijcahua para ma quinmajmacaca nochi nopa tlacame. Nojquiya Jes'us quinmajmacac nopa ome michime nochi tlacame. 42Huan nochi tlacuajque huan cuali ixhuique. 43Huan teipa quisentilijque nopa panpayaxtli huan michpayaxtli tlen mocajtoya huan quitemitijque majtlactli huan ome chiquihuitl. 44Huan nopa tonal tlacuajque macuili mil san tlacame huan ax quinpojque nopa sihuame huan coneme. 45Huan nimantzi Jes'us quinilhui imomachtijcahua ma calaquica ipan cuacanahua huan ma moachtohuica para quiixcotonase nopa hueyi atl hasta seyoc nali campa altepetl Betsaida. Huan yajaya mocajqui para tenahuatijtehuas. 46Huan teipa quema Jes'us tlanqui quinnahuatijtehua, yajqui ipan se tepetl para momaijtos. 47Huan quema tlayohuixqui, nopa cuacanahua ica imomachtijcahua sanoc nejnentoya tlajco hueyi atl, huan Jes'us mocajtoya iselti ipan tlali. 48Huan quiitac para imomachtijcahua tlaxicojtoyaj pampa tequitiyayaj chicahuac para quinejnemiltise inincuacanahua ipan atl huan chicahuac quinilpitzayaya ajacatl. Huajca queja las tres ica tlayohua, Jes'us monechcahui campa imomachtijcahua, nejnemiyaya aixco. Quinequiyaya quinpanos para quintlayacancuilis. 49Pero quema imomachtijcahua quiitaque nejnemiyaya aixco, moilhuijque huala se animajtzi huan tzajtzique, 50pampa nochi quiitaque huan momajmatiyayaj. Huajca nimantzi Jes'us quincamahui huan quinilhui: --Ximosemacaca. Na niJes'us. Amo ximomajmatica. 51Huan Jes'us calajqui ipan cuacanahua ininhuaya imomachtijcahua huan nimantzi moquetzqui ajacatl, huan nel'ia quisentlachilijque. 52Aya quimachiliyayaj ichicahualis Jes'us tlen quinnextili quema quimiyaquili nopa pantzi pampa noja yoltetixtoyaj. 53Jes'us huan imomachtijcahua quiixcotonque nopa hueyi atl huan ajsitoj ateno ipan altepetl Genesaret. Huan nepa quiilpijque inincuacanahua. 54Huan quema quisque ipan cuacanahua, nimantzi tlacame nepa quiixmatque Jes'us. 55Huajca nopa tlacame motlalojtiyajque ipan nochi inintlal huan pejque quinquechpanojtihualahuij nochi cocoyani ipan inintlapech hasta campa quicaquiyayaj para Jes'us itztoya. 56Huan campa hueli quema Jes'us calaquiyaya ipan ranchos o ipan altepetini o campa caltini, tlacame quintecayayaj nochi cocoyani campa panosqu'ia. Huan nopa cocoyani quitlajtlaniyayaj ma quincahuili san quiajsisqu'iaj iyoyo, huan nochi tlen quiajsique iyoyo, mochicajque.

will be added

X\