MARCOS 5

1Ajsitoj Jes'us huan imomachtijcahua nopa seyoc nali hueyi atl campa tlali Gadara. 2Huan Jes'us quisqui ipan cuacanahua huan nimantzi ajsico se tlacatl campa ya tlen quisqui ipan campo santo huan quipixqui iajacahua Axcualtlacatl. 3Nopa tlacatl mocahuayaya nochi tonal ipan campo santo, huan axaca hueliyaya quiilp'ia para quihuicas, yonque quiilpisqu'ia ica tepos cadena. 4Miyac huelta quiilpitoyaj ica tepos cadena ipan iicxi huan ipan ima, pero quicocototzayaya nopa tepos cadena, huan san cuechtic quichihuayaya. Huajca axaca huelqui quitlani. 5Tonali yohuali nopa tlacatl tzajtzitinemiyaya ipan campo santo huan campa tepetini huan iselti mococohuayaya ica tetl. 6Pero quema quiitac Jes'us ica huejca, motlalo huan motlancuaquetzqui iixtla. 7- 8Huan Jes'us quiilhui: --Iniajacahua Axcualtlacatl, xiquisaca ipan ni tlacatl. Huan nopa tlacatl quiijto chicahuac: --¿Tlachque tijpiya noca na? TiJes'us, tiIcone Dios Tlen M'as Quipiya Tlanahuatili. Xijtestigojquetza Dios para ax titechtlaijiyohuiltis. 9Huan Jes'us quitlajtlani: --¿Quejatza motoca? Huan quinanquili: --Notoca, Miyac, pampa nel'ia timiyaqui tiajacame. 10Huan nopa ajacame quitlajtlanijque Jes'us chicahuac para ma ax quintitlanis hasta sejcoyoc. 11Huan nepa nechca itztoyaj miyac pitzome tlen tlacuayayaj ipan se lado se tepetl. 12Huan iajacahua Axcualtlacatl quitlajtlanijque: --Xitechtitlani ma ticalaquica ipan ne pitzome. 13Huajca Jes'us quincahuili. Huan nochi nopa iajacahua Axcualtlacatl quisque ipan nopa tlacatl huan calajque ipan nopa pitzome. Huan itztoyaj nechca ome mil pitzome nopano. Huan nopa pitzome motlalojtejque campa se tlaixtemolis, huan huetzque ipan hueyi atl huan nimantzi misahuijque. 14Huajca nopa tlacame tlen quinmocuitlahuiyayaj nopa pitzome motlalojtejque huan quinpohuilitoj tlen panotoya nopa tlacame tlen itztoyaj ipan nopa altepetl huan ipan ranchos nechca. Huan nopa altepetl ehuani quisque quitlachilicoj tlachque ininpantic nopa pitzome. 15Huan quema ajsicoj campa Jes'us, quiitaque nopa tlacatl tlen achtohuiya quinpixtoya nopa miyac iajacahua Axcualtlacatl. Huan ama nopa tlacatl san locotzijtoya, huan moyoyontijtoya huan quipixtoya cuali itlalnamiquilis. Huan nopa tlacame momajmatijque. 16Huan nopa tlacame tlen quiitztoyaj tlen panoc sampa quinpohuilijque tlen ajsiyayaj nochi tlen panotoya ica nopa tlacatl tlen quinpixtoya ajacame. Huan nojquiya quinpohuilijque tlen panoc ica nopa pitzome. 17Huajca nopa tlacame pejque quitlajtlan'iaj Jes'us ma quisa ipan inintlal. 18Huan Jes'us calajqui ipan nopa cuacanahua para quisas, huan nopa tlacatl tlen achtohui quinpiyayaya iajacahua Axcualtlacatl quitlajtlani ma quicahuili yas ihuaya. 19Pero Jes'us ax quicahuili. Quiilhui: --Xiya mochaj, xiquinpohuili moteixmatcahua nopa hueyi tlamantli tlen Toteco mitzchihuilijtoc huan queja mitzicnel'ia. 20Huajca nopa tlacatl quisqui huan pejqui quinpohuil'ia tlacame ipan nochi altepetini tlen Dec'apolis nopa huejhueyi tlamantli tlen Jes'us quichihuilijtoya. Huan nochi tlen quicajque san quisentlachiliyayaj. 21Jes'us sampa quiixcotonqui hueyi atl ipan cuacanahua hasta seyoc nali. Huan mosentilijque miyac tlacame tlen quiyahualojque huan yajaya mocahuayaya ateno. 22Huan ajsico se tequihue tlen nopa israelita tiopamitl tlen itoca eliyaya Jairo. Huan quema Jairo quiitac Jes'us, motlancuaquetzqui, 23huan ica nochi iyolo, quiilhui: --Nosihuapil miquinequiya. Xiya, xijtlaliliti moma para mochicahuas huan yolis. 24Huajca Jes'us yajqui ihuaya, huan miyac tlacame quintoquiliyayaj huan quicuatetzopayayaj. 25Huan itztoya nopano se sihuatl tlen mojmostla esotemoyaya para majtlactli huan ome xihuitl. 26Quiijiyohuijtihualajtoya miyac tlamantli ininmaco miyac tepajtiani para quichicahuasqu'iaj pero san quiyaltijtoya nochi tomi tlen quipixtoya, huan ax tleno quipalehui. San achi m'as motlahueltiyaya. 27Huan quema nopa sihuatl quicajqui tlen Jes'us, hualajqui huan monechcahui iica ininhuaya nopa tlacame huan quiajsic iyoyo. 28Pampa nopa sihuatl moilhuiyaya: "Intla san huelisqu'ia nicajsis iyoyo, nimochicahuas." 29Huan nimantzi huajqui icocolis huan quimatqui para ya mochicajtoya. 30Huan Jes'us nimantzi quimachili para quistoya chicahualistli ipan ya huan quichicajtoya se tlacatl. Huajca moicanitac, huan quintlachili nopa miyac tlacame huan quintlajtlani: --¿Ajqueya quiajsic noyoyo? 31Huan imomachtijcahua quiilhuijque: --Ta tiquita ni tlacame mitzcuatetzopaj, ¿para tlen titlatzintoca, ajqueya quiajsic moyoyo? 32Pero Jes'us moicancueptoya huan tlachiyayaya campa hueli para quiitas ajqueya quiajsitoya. 33Huajca nopa sihuatl tlen quimatqui ya mochicajtoya momajmatiyaya huan huihuipicayaya. Huan yajqui motlancuaquetzato iixtla Jes'us huan quiilhui xitlahuac tlen quichijqui. 34Huan Jes'us quiilhui: --Nane, timochicajqui pampa tinechneltocatoc. Xiya ica paquilistli pampa ayoc tijpiya mococolis. 35Jes'us noja quiilhuiyaya nopa sihuatl quema ajsicoj sequin tlacame tlen hualajque tlen ichaj nopa hueyi tequihue ipan nopa israelita tiopamitl. Quiilhuijque itata nopa sihuapil: --Mosihuapil ya mijqui. Ayoc xijcuatotoni ni tlamachtijquetl. 36Pero Jes'us quicajqui tlen quiilhuijque huan quiilhui nopa tequihue tlen tiopamitl: --Amo ximomajmati, san xinechneltoca. 37Huan Jes'us ax quincahuili sequinoc ma yaca ihuaya. San quincahuili Pedro, Jacobo huan iicni, Juan. 38Huan quema ajsitoj ichaj nopa hueyi tequihue tlen tiopa, quinpanti tlacame tlahuejchihuayayaj, chocayayaj huan tzajtziyayaj. 39Huajca Jes'us calaquito campa nopa mijcatzi huan quinilhui: --¿Para tlen intlahuejchihuaj huan inchocaj? Ni sihuapil ax mictoc, yajaya san cochtoc. 40Pero nopa tlacame san quihuetzquilijque Jes'us. Huajca Jes'us quinquixti nopa tlacame. Teipa quinhuicac itata huan inana nopa sihuapil, huan nopa eyi imomachtijcahua huan calajque campa quitectoyaj. 41Huan Jes'us quimaitzqui nopa sihuapil huan quiilhui: --Talita, cumi (quiijtosnequi: 'Sihuapil, nimitzilhu'ia: ximehua.') 42Huan ipan nopa tlalochtli nopa sihuapil tlen quipixtoya majtlactli huan ome xihuitl, mejqui huan pejqui nejnemi, huan nochi tlen itztoyaj ihuaya nel'ia momajmatijque. 43Huan Jes'us quinnahuati chicahuac ma axaca quiilhuica. Huan quinilhui ma quitlamacaca nopa sihuapil.

will be added

X\