MARCOS 4

1Jes'us sampa pejqui tlamacht'ia iteno hueyi atl, huan mosentilijque miyac tlacame tlen quiyahualocoj. Huajca Jes'us calajqui ipan se cuacanahua ipan hueyi atl huan mosehui, huan nochi tlacame mocajque xalixco nechca iteno hueyi atl. 2Huan Jes'us tlamachtiyaya miyac tlamantli ica huicalotl huan huicaltili huan quinilhui: 3"¡Xijtlacaquilica! Se tlacatl yajqui quiijtzeloto trigo. 4Huan quema quiijtzelohuayaya, sequin xinachtli huetzqui ipan ojtli huan hualajque totome huan quicuajque. 5Sequinoc xinachtli huetzqui temajcajya campa ax oncayaya miyac tlali. Nopa xinachtli nimantzi ixhuac pampa ax huejcatla nopa tlali. 6Pero quisqui tonati, huan tonal tlatlac huan nimantzi huajqui pampa ax huelqui motlatzquil'ia inelhuayo. 7Sequinoc xinachtli huetzqui huitzijtic huan nopa huitztli quiijiyomicti nopa tlatoctli, yeca nopa xinachtli ax temacac itlajca. 8Pero sequinoc xinachtli huetzqui ipan cuali tlali. Tlaixhuac cuali, huan moscalti huan cuali temacac itlajca. Sequin nopa tlatoctli trigo temacac treinta xinachtli, huan sequinoc tlatoctli temacac sesenta xinachtli huan sequinoc tlatoctli temacac se ciento xinachtli." 9Huan teipa Jes'us quinilhui: "Nochi imojuanti ya innechcactoque. Huajca xijneltocaca tlen nimechilhu'ia." 10Teipa quema quistoyaj nopa miyac tlacame, Jes'us huan nopa majtlactli huan ome imomachtijcahua huan sequinoc tlen itztoyaj ihuaya quinechcahuijque huan pejque quitlatzintoquil'iaj tlachque quiijtosnequi nopa huicaltili. 11Huan Jes'us quinilhui: "Toteco Dios inmechcahuilijtoc xijmachilica quejatza yajaya tlanahuat'ia yonque achtohuiya axaca quicahuiliyaya ma quimachili. Huan ama nojquiya ica tlacame tlen nechhuejcamajcahuaj, niquinilhu'ia nochi tlamantli ica huicalotl. 12Quej nopa yonque quiitase tlen nijchihua, ax quimatise tlachque quinequi quiijtos. Huan yonque quicaquise notlajtol, ax quimachilise. Huan quej ni ax moyolcuepase, huan ax quipantise tlapojpolhuili para inintlajtlacolhua." 13Huan Jes'us quinilhui nojquiya: "¿Intla ax inquimachil'iaj ni huicalotl, quejatza huelis inquimachilise sequinoc huicalotl? 14Nopa tlacatl tlen quisemanqui nopa xinachtli quichihua queja se tlacatl tlen quinilhu'ia tlacame itlajtol Toteco. 15Sequin tlacame itztoque queja nopa xinachtli tlen huetzqui ojtipa. Quicaquij itlajtol Toteco, pero nimantzi huala Axcualtlacatl huan quinquixtil'ia tlen Toteco quitlalijtoc ipan ininyolo. 16Sequinoc tlacame itztoque queja nopa xinachtli tlen huetzqui temajcajya. Quicaquij itlajtol Toteco huan nimantzi quisel'iaj ica paquilistli. 17Pero queja nopa xinachtli tlen ax hueli motlatzquil'ia inelhuayo, ax quipiyaj chicahualistli. San itztoque para se tlalochtli, pampa quema huala trabajojyotl huan sequinoc quintlatzacuilt'iaj pampa quiselijtoque itlajtol Toteco, nimantzi quicajtehuaj. 18Sequinoc tlacame itztoque queja nopa xinachtli tlen huetzqui ipan huitztli. Quicaquij itlajtol Toteco, 19pero mocuatoton'iaj miyac ica nochi tlamantli tlen onca ipan ni tonal. Mocajcayajtoque pampa moilhu'iaj paquise intla quipiyase miyac tomi. Tlahuel quinequij miyac tlamantli tlen onca. Huan nochi ni tlamantli tlen quinequij quiijiyomict'iaj itlajtol Toteco, huan yeca ax temaca itlajca. 20Pero sequinoc tlacame itztoque queja nopa xinachtli tlen huetzqui ipan cuali tlali. Yajuanti, quena, quicaquij itlajtol Toteco, huan quisel'iaj huan temacaj inintlajca. Sequin tlen yajuanti itztoque queja se trigo tlatoctli tlen temaca treinta xinachtli, huan sequinoc queja tlen temaca sesenta xinachtli, huan sequinoc itztoque queja se trigo tlatoctli tlen temaca se ciento xinachtli." 21Nojquiya Jes'us quinilhui: "Axaca quitlat'ia se tlahuili huan quitlal'ia cajon tzala, niyon ax quitlalis tlapech tzala. Nochi quimatij quitlalise se tlahuili huejcapa ipan se tlaquetzali para ma tlatlanexti. 22Quej nopa nojquiya ica nochi tlamantli tlen ama motlatijtoc. Teipa mocahuas tlanempa huan nochi inquimachilise. Huan tlamantli tlen tlacame ax hueli quimachil'iaj ama pampa nimechmacht'ia ica huicalotl, teipa nochi campa hueli quimatise. 23Nochi imojuanti ya innechcactoque, huajca xijneltocaca tlen nimechilhu'ia." 24Nojquiya Jes'us quinilhui: "Xijpiyaca cuidado quejatza inquicaquij. Intla inquicaquij huan inquineltocaj quentzi, huajca inquimachilise san quentzi. Pero intla inquicaquij cuali huan inquineltocaj nochi, huajca cuali inquimachilise. Huan hasta noja m'as Toteco inmechpalehuis xijmachilica. 25Pampa se tlacatl tlen quipiya itlalnamiquilis para quicaquis notlajtol, Toteco quimacas m'as tlalnamiquistli. Pero se tlacatl tlen ax quinequi quicaquis notlajtol, Toteco quiquixtilis tlen quentzi quicactoc." 26Nojquiya Jes'us quinilhui: "Moscalt'ia ininmiyaca nopa tlacame tlen Toteco quinnahuat'ia yonque axaca momaca cuenta. Eltoc queja se tlacatl tlen quiijtzelohua xinachtli ipan tlali. 27Yajaya cochis ica tlayohua huan mehuas ica ijnaloc. Panos se ome tonali huan teipa nopa xinachtli ixhuas huan moscaltis, pero nopa tlacatl ax quimati quejatza moscalti. 28Achtohui sesen tlatoctli panquisa, huan quisa ixihuiyo. Teipa panquisa ipiloloyo huan teipa itlancoch ipan ioloyo. 29Huan quema nopa simolotl ya chicajtos, nopa tlacatl pehuas quipixcas pampa cuali quimacatoc itlajca." 30Nojquiya Jes'us quiijto: "¿Quejatza huelis nimechilhuis quejatza pehua tlanahuat'ia Toteco Dios ipan ininyolo tlacame ipan se yancuic lugar? ¿Ica tlachque nijhuicalotis para inquimachilise? 31Quema yajaya tlanahuat'ia, pehua queja se ixinajcho mostaza tlen se tlacatl quitoca. Nopa xinachtli eltoc m'as pilsiltzi tlen nochi xinachtli tlen onca ipan tlaltepactli. 32Pero quema se tlacatl quitoca nopa xinachtli mostaza, moscalt'ia huan mochihua m'as hueyi tlen nochi xihuitzontli huan mochihua se cuahuitl. Huan imacuayo moscalt'ia huan moxacalohua huan ipani totome hueli mosehuise pampa cuali itlaacahuilo." 33Huan Jes'us quinmachtiyaya tlacame itlajtol Toteco ica miyac huicalotl quej ni. Quinilhui nochi tlen huelque quimachil'iaj. 34Huan nochi nopa tlamachtilistli quinilhuiyaya ica huicalotl. Pero quema itztoya san ica imomachtijcahua, quinixtomiliyaya tlachque quiijtosnequiyaya sesen huicalotl. 35Quema tlatlayohuac nopa tonal, Jes'us quinilhui imomachtijcahua: --Ma tiquixcotonaca ne hueyi atl hasta ne seyoc nali. 36Huajca quincajtejque nopa miyac tlacame tlen itztoyaj tlalpani huan imomachtijcahua quihuicaque ipan cuacanahua ica Je'us mosehuiyaya campa ipa itztoya huan yajque para seyoc nali. Huan nojquiya itztoyaj sequinoc tlacame tlen yajque ininhuaya ipan tlen yajuanti inincuacanahua. 37Huan nimantzi hualajqui se ajacatl tlen tlahuel chicahuac. Huan motlalanqui hueyi atl huan pejqui acalaqui inincuacanahua hasta temisnequiyaya. 38Huan Jes'us cochtoya iica ipan nopa cuacanahua, motzontectoya ipan se piltzontetontzi. Huajca imomachtijcahua quiixitijque huan quiilhuijque: --¡Tlamachtijquetl! ¿Ax timomaca cuenta para timisahuijtinemij? 39Huajca Jes'us mejtiquisqui huan quitlacahualti nopa ajacatl huan quiilhui hueyi atl: --Amo ximolini, san xielto. Huan nopa ajacatl moquetzqui huan nopa hueyi atl ayoc mojmolini. 40Huajca Jes'us quinilhui imomachtijcahua: --¿Para tlen nel'ia inmajmahuij? ¿Ax inquineltocaj tlen hueli nijchihua? 41Huan nel'ia imomachtijcahua pejque momajmatijque huan moilhuijque se ica seyoc: --¿Ajqueya nel'ia ni Jes'us? Hasta nopa ajacatl huan hueyi atl quineltocaj itlajtol.

will be added

X\