MARCOS 14

1Polihuiyaya ome tonali para nopa israelita ilhuitl tlen itoca Pascua quema israelitame quicuaj pantzi tlen ax quipiya tlasonecajyotl. Huan nopa tlayacanca totajtzitzi ininhuaya tlamachtiani tlen itlanahuatil Mois'es quitemohuiliyayaj quejatza huelisqu'iaj quicajcayahuasqu'iaj Jes'us para quiitzquise huan quimictise. 2Pero moilhuiyayaj ax huelis quiitzquisqu'iaj ipan nopa ilhuitl para nopa tlacame ma ax moajcomanaca huan quintehuisqu'iaj. 3Jes'us itztoya ipan nopa altepetl Betania ipan ichaj Sim'on tlen achtohui tlacayo palaniyaya ica nopa cocolistli tlen itoca lepra. Huan Jes'us mosehuijtoya campa mesa, huan ajsico se sihuatl tlen quihualicayaya se lemete tlen quicoyonijtoya tlen se tetl itoca alabastro. Nopa tlaajhuiyacayotl elqui tlahuel patiyo. Eliyaya senquistoc nardo huan ica nopa tlaajhuiyacayotl momajtoyaj quinpolohuaj mijcatzitzi. Huan nopa sihuatl quiquechpostejqui nopa frasco huan quitequili ipan itzonteco Jes'us. 4Huan sequin tlen itztoyaj nepa cualanque huan moilhuijque: --¿Para tlen san quinenpolohua ne tlaajhuiyacayotl? 5Hueltosqu'ia quinamacatosqu'ia para miyac tomi queja tlaxtlahuaj para eyi ciento tonali tequitl huan nopa tomi hueltosqu'ia quinmacatosqu'iaj tlen teicneltzitzi. Quej nopa quiajhuayayaj nopa sihuatl. 6Pero Jes'us quiijto: --Xijcahuaca, ¿para tlen inquicuatoton'iaj? Ni sihuatl nechchihuil'ia tlen cuali. 7Nochipa itztose tlacame tlen teicneltzitzi imohuaya huan huelis inquinpalehuise quema inquinequise, pero na, ax niitztos nica miyac m'as tonali. 8Ni sihuatl quichijqui tlen huelqui. Nechpolo ni tlaajhuiyacayotl para quicualtlalis notlacayo para quema nimiquis huan nechtlalpachose, yonque noja polihui. 9Nel'ia nimechilhu'ia, campa hueli ipan nochi tlaltepactli campa tlacame teixtomilise itlajtol Toteco, nojquiya tepohuilise tlen nechchihuili ni sihuatl para nochi tlacame ma quiilnamiquica. 10Teipa Judas Iscariote, se tlen nopa majtlactli huan ome imomachtijcahua Jes'us, yajqui quinitato nopa tlayacanca totajtzitzi para quisencahuas quejatza quitemactilis. 11Huan quema nopa tlayacanca totajtzitzi quicajque, nel'ia paquiyayaj huan quiilhuijque para quitlaxtlahuise. Huajca Judas pejqui quitemohua se hora huan se lugar tlen cuali para quiitzquise Jes'us para huelis quitemactilis ininmaco. 12Ajsico nopa achtohui tonal tlen nopa ilhuitl quema tiisraelitame tijcuaj pantzi tlen ax quipiya tlasonejcayotl huan monequi tijmictise nopa pilborregojtzi para tiquilnamiquise nopa Pascua. Huan imomachtijcahua Jes'us quitlajtlanijque: --¿Canque tijnequi ma tijcualtlalitij nopa Pascua tlacualistli para ta? 13Huajca Jes'us quintitlanqui ome imomachtijcahua ma yaca, quinilhui: --Xiyaca ipan nopa altepetl huan inmechnamiquis se tlacatl tlen quihuica atl ipan se comitl. Xijtoquilica. 14Xiquilhuica tlen iaxca nopa cali campa yajaya calaquis para nopa tlamachtijquetl quinequi quimatis campa eltoc nopa hueyi calijtic campa huelis quicuas nopa Pascua tlacualistli ininhuaya imomachtijcahua. 15Huan inmechnextilis se hueyi cuarto tlen ya tlacualtlalili ipan se cali tlen moicpahuijtoc. Nepa xijcualtlalica nopa tlacualistli para nochi tojuanti. 16Huajca yajque imomachtijcahua huan calajque ipan nopa altepetl huan quipantijque nochi queja Jes'us quinilhuijtoya. Huan nepa quisencajque nopa Pascua tlacualistli. 17Huan quema tlayohuac, Jes'us ininhuaya nopa majtlactli huan ome imomachtijcahua yajque nepa. 18Huan yajuanti mosehuiyayaj campa mesa tlacuayayaj huan Jes'us quinilhui: --Nel'ia nimechilhu'ia, se tlen imojuanti tlen tlacua nohuaya nechtemactilis. 19Huajca pejque mocuesohuaj huan sesentzitzi yajuanti pejque quitlajtlan'iaj Jes'us: --¿Huelis na? Huan seyoc nojquiya quiijto: --¿Huelis na? 20Huan Jes'us quinilhui: --Yajaya se tlen imojuanti inmajtlactli huan ome. Yajaya tlen tlacua huan quiapachohua ipantzi nohuaya ipan ni plato. 21Nel'ia na tlen niMocuepqui Tlacatl nimiquis queja ijcuilijtoc ipan Itlajtol Toteco huejcajquiya, pero nopa tlacatl tlen nechtemactilis quipantis se hueyi tlatzacuiltilistli. M'as cuali eltosqu'ia para ax tlacajtosqu'ia. 22Huan quema tlacuayayaj, Jes'us quiitzqui pantzi, huan quitlascamatqui iTata huan quitlajcotlapanqui. Teipa quinmajmacac imomachtijcahua huan quinilhui: --Xijcuaca, ni notlacayo. 23Huan Jes'us quiitzqui se taza huan quitlascamatqui iTata. Teipa quinmacac imomachtijcahua huan nochi quiique ipan nopa taza. 24Huan Jes'us quinilhui: --Ya ni noeso tlen nijtoyahuas para miyac tlacame quema nimiquis. Ica ya ni pehuas itequihuejcayo nopa yancuic tlajtoli tlen Toteco Dios quichihua ica tlacame. 25Melahuac, ayoc niquis xocomecatl iayo hasta nopa tonal quema sampa niquis campa tlanahuat'ia Toteco. 26Huan teipa quema huicaque se tiohuicatl, yajque ipan nopa tepetl Olivos. 27Huan Jes'us quinilhui: --Ni yohuali nochi imojuanti inmomajmatise huan innechtlahuelcahuase, pampa ijcuilijtoc ipan Itlajtol Toteco: 'Nijmictis nopa tlamocuitlahuijquetl, huan iborregojhua motlalose.' 28Pero quema nimoyolcuis, teipa nitlayacanas hasta estado Galilea, huan nepa timopantise. 29Huajca Pedro quiilhui Jes'us: --Yonque nochi sequinoc mitztlahuelcahuase, pero na, ax quema. 30Huan Jes'us quiilhui: --Melahuac nimitzilhu'ia, ipan ni tlayohua quema noja polihui para tzajtzis se cuapelech ica ompa, ta tiquinilhuis tlacame expa para ax tinechixmati. 31Pero Pedro noja m'as chicahuac quiijto: --Yonque monequi nimiquis mohuaya, ax quema niquijtos para ax nimitzixmati. Huan nochi yajuanti nojquiya ya nopa quiijtojque. 32Teipa nochi ajsitoj campa se xochimili tlen itoca Getseman'i huan Jes'us quinilhui imomachtijcahua: --Ximosehuica nica huan nimomaijtoti ica noTata. 33Huan Jes'us quinhuicac Pedro, Jacobo ihuaya Juan huan pejqui mocuesohua miyac. 34Huan quinilhui: --Nel'ia tlahuel nimocuesohua hasta nijmati nimiquis amantzi san ica cuesoli. Ximocahuaca nica huan xitlachixtoca. 35Huajca Jes'us moquixti se quentzi huan motlancuaquetzqui tlalchi. Huan pejqui momaijtohua ica Itata huan quitlajtlani intla huelis, ma ax quipanos nopa fiero tlaijiyohuilistli tlen hualayaya. 36Quiilhui: "Pap'a, ta nochi tihueli tijchihua. Xinechquixtili ni tlaijiyohuilistli tlen huala, pero amo xijchihua tlen na nijnequi, san xijchihua tlen ta mopaquilis." 37Teipa Jes'us mocuepqui campa itztoyaj imomachtijcahua, huan quinpantito cochtoque huan quiilhui Pedro: --Sim'on, ¿ticochtoc? ¿Ax huelqui titlachixtoya niyon se hora? 38Xitlachixtoca huan ximomaijtoca para ma ax inmechyoltilanas tlajtlacoli. Nel'ia imotonaltzi quinequi quichihuas tlen Toteco quinequi, pero imotlacayo tlaxicohua. 39Huan Jes'us sampa yajqui huan momaijtoto. Quiilhui Itata ihuical quej achtohui quiilhui. 40Teipa sampa mocuepqui campa imomachtijcahua huan sampa quinpantito cochtoque, pampa ax huelque quiijiyohuise para ax cochise. Huan imomachtijcahua ax quimatiyayaj quejatza quinanquilise. 41Sampa ica expa Jes'us yajqui momaijtoto. Teipa mocuepqui campa imomachtijcahua huan quinilhui: --¿Noja incochtoque huan inmosiyajcajtoque? San ya ni. Ya ajsic ni hora para nechtemactilise na tlen niMocuepqui Tlacatl ininmaco tlajtlacolchihuani. 42Ximoquetzaca, ma tiyacajya. Xiquitaca, nepa huala tlen nechtemactilis. 43Huan nimantzi quema Jes'us noja camatiyaya, ajsico Judas, se tlen nopa majtlactli huan ome imomachtijcahua. Huan ihuaya hualayayaj miyac tlacame tlen quihualicayayaj machetes huan cuahuitl. Quintitlantoyaj nopa tlayacanca totajtzitzi, ininhuaya nopa tlamachtiani tlen itlanahuatil Mois'es, ininhuaya nopa huehue tlacame tlen israelitame. 44Huan Judas tlen quitemactiliyaya Jes'us quinmacatoya se tlanescayotl pampa quinilhuijtoya para tlen quitzoponis, yaja Jes'us. Huajca ma quiitzquica huan ma quihuicaca cuali ilpitoc. 45Huan nimantzi quema Judas ajsico, quinechcahuico Jes'us huan quiilhui: --¡Tlamachtijquetl! Huan quitzoponi. 46Huajca nopa tlacame quiitzquijque Jes'us huan quihuicaque. 47Pero se tlacatl tlen itztoya nepa quiquixti imachete, huan quimaquili itequipanojca nopa hueyi totajtzi huan quitzontequili se inacas. 48Huan Jes'us quinilhui: --¿Para tlen inhualajtoque nica para innechitzquise ica machetes huan ica cuahuitl queja nielisqu'ia se nitlaxtejquetl? 49Mojmostla nitlamachtiyaya ipan nopa hueyi tiopamitl campa initztoyaj huan ax quema innechitzquijque. Pero ya ni monequi ma pano para mochihuas tlen huejcajquiya ijcuilijtoc ipan Itlajtol Toteco para panos. 50Huan nimantzi nochi imomachtijcahua quicajtejque Jes'us huan cholojque. 51Huan quitoquiliyaya se telpoca tlacatl tlen motzactoya san ica se hueyi yoyomitl. Huan nopa tlacame quiitzquijque, 52pero nopa telpocatl quicajtejqui iyoyo ininmaco huan cholojqui xolotic. 53Teipa quihuicaque Jes'us campa nopa hueyi totajtzi. Huan mosentilijque nochi tlayacanca totajtzitzi, nopa huehue tlacame tlen israelitame huan nopa tlamachtiani tlen itlanahuatil Mois'es. 54Huan Pedro quitoquili Jes'us ica huejca huan calajqui ipan icalixpa nopa hueyi totajtzi. Teipa Pedro mosehuijtoya ininhuaya tlen quimocuitlahuiyayaj nopa cali huan nochi yajuanti mototoniyayaj tliteno. 55Nopa tlayacanca totajtzitzi ininhuaya nochi nopa tlasentilistli tlen tequihuejme quintemohuayayaj ome tlacame para quiteilhuise Jes'us ica tlen ax cuali quiitztoyaj quichihua para huelis quimictise, pero ax quinpantijque. 56Miyaqui istlacatiyayaj ica ya para quichijtoya tlamantli tlen ax neli quichijqui, pero ax elqui san se inintlajtol. 57Sequin moquetzque huan quiijistlacahuijque Jes'us, huan quiijtojque: 58--Tojuanti tijcajque quema quiijto para quixolehuasqu'ia ni tiopamitl tlen tlacame quichijtoque huan ica eyi tonali quichihuas seyoc tiopamitl tlen ax tlamachijchihuali. 59Pero niyon ica ya nopa, ax elqui san se inintlajtol. 60Huan nopa hueyi totajtzi moquetzqui huan monechcahui campa Jes'us huan quitlajtlani: --¿Ax tleno tiquinnanquil'ia tlen ica mitzteilhu'iaj? ¿Quejatza timomanahuis? 61Pero Jes'us ax molini huan ax tleno quinanquili. Huajca sampa nopa hueyi totajtzi quiilhui: --¿Ta tiCristo, tiIcone Toteco tlen nochi tijhueyichihuaj? 62Huan Jes'us quiilhui: --Quena, najaya. Huan innechitase na tlen niMocuepqui Tlacatl nimosehuijtos inejmatl Toteco Dios tlen quipiya nochi chicahualistli. Huan innechitase quema nihualas ipan nopa mixtli ipan elhuicac. 63Huajca nopa hueyi totajtzi motzayanili iyoyo pampa quiitac para se hueyi tlaixpanoli tlen quiijto Jes'us. Huan quiijto: --¿Para tlen tiquintemose sequinoc tlacame ma techilhuica tlachque quichijtoc ni tlacatl? 64Ya inquicajque para tlahuel ax quitlepanita Toteco pampa mochihua queja yajaya elisqu'ia Toteco Dios. ¿Tlachque inquiijtohuaj ma tijchihuaca? Huan nochi quiilhuijque quinamiqui ma miqui. 65Huajca sequin pejque quiixchajchaj Jes'us. Teipa quiixtzajque huan pejque quiixtlatzin'iaj huan quiilhu'iaj: --¡Xitechilhui ajqueya mitzixtlatzini! Huan nopa soldados quimaquiliyayaj ipan ixayac. 66Huan Pedro itztoya calixpa nepa tlatzintla huan ajsico nepa se ichpocatl tlen tlatequipanohuayaya ichaj nopa hueyi totajtzi. 67Huan nopa ichpocatl quiitac Pedro mototoniyaya tliteno huan quitlachili huan quiilhui: --Ta nojquiya tinemiyaya ihuaya Jes'us, nopa Nazaret ejquetl. 68Pero Pedro ax mocahuili para quiixmatiyaya, huan quiijto: --Ax niquixmati, niyon ax nijmachil'ia tlen tinechilhu'ia. Huan Pedro quisqui calteno huan nimantzi tzajtzic se cuapelech. 69Huan nopa ichpoca tlatequipanojquetl quitlachili sampa huan pejqui quinilhu'ia tlen itztoyaj nopano: --Ni tlacatl itztoc se tlen yajuanti tlen nejnemiyayaj ihuaya Jes'us Nazaret ejquetl. 70Pero Pedro sampa quiijto para ax quiixmati. Huan quentzi teipa, nopa tlacame tlen itztoyaj nepa sampa quiilhuijque: --Nel'ia ta tiitztoc se tlen yajuanti. Nesi tiehua estado Galilea pampa ticamati queja tlen nepa ehuaj. 71Huajca Pedro pejqui tlatelchihua huan pejqui quitestigojquetza Toteco Dios huan quinilhui: --Ax niquixmati ne tlacatl tlen innechcamahu'iaj. 72Huan ipan nopa tlalochtli se cuapelech tzajtzic ica ompa. Huajca Pedro quiilnamijqui tlen Jes'us quiilhuijtoya. Quiijto para quema noja polihui para tzajtzis se cuapelech ica ompa, Pedro quiijtosqu'ia expa para ax quiixmati Jes'us. Huan Pedro moilhui tlen quichijqui huan pejqui choca.

will be added

X\