MARCOS 11

1Teipa Jes'us ininhuaya imomachtijcahua ajsitoj nechca Jerusal'en campa nopa altepetini Betfag'e huan Betania, tlen mocahua iixmelac nopa tepetl tlen itoca Olivos. Huan nepa Jes'us quintitlanqui ome imomachtijcahua, 2huan quinilhui: --Xiyaca nopa pilaltepetzi tlen mocahua imoixmelac huan quema inajsitij nepa, inquipantise se pilburrojtzi ilpitoc tlen axaca ipan tlejcotoc. Xijtojtomaca huan xinechhualiquilica. 3Huan intla acajya inmechtlajtlanis para tlen inquichihuaj ya nopa, xiquilhuica: 'Tohueyiteco quinequi quitequihuis huan nimantzi quicuepas.' 4Huajca imomachtijcahua yajque huan quipantitoj nopa pilburrojtzi ilpitoc puertajteno imelac ojtli huan quitojtonque. 5Huan nopa tlacame tlen itztoyaj nepa quintlajtlanijque: --¿Tlachque inquichihuaj? ¿Para tlen inquimalacan'iaj nopa pilburrojtzi? 6Huajca imomachtijcahua quinnanquilijque queja Jes'us quinilhuijtoya. Huan nopa tlacame quincahuilijque ma quihuicaca. 7Huajca quihuicaque nopa pilburrojtzi campa Jes'us huan quitlalilijque ininyoyo icuitlapa huan Jes'us tlejcoc ipani. 8Huan miyac tlacame quisosojque ininyoyo ipan ojtli, huan sequinoc quitzontejque imacuayo apach cuatini huan quitlalijque ipan ojtli. 9Huan tlacame tlen tlayacanayayaj huan tlen nojquiya tlen hualayayaj tlaica pejque tlahuelchihuaj tlen Jes'us, huan quiijtohuayayaj: --¡Ma tijhueyichihuaca Toteco! Ma Toteco Dios mitztiochihua ta tlen tihuala ica itequihuejcayo. 10¡Hueyi tlatiochihualistli tijpiyase quema titlanahuatis ipan totlal queja tohuejcapan tata David tlanahuati huejcajquiya! ¡Ma tijhueyichihuaca Toteco Dios tlen itztoc elhuicac! 11Huan Jes'us calajqui ipan altepetl Jerusal'en huan yajqui ipan nopa hueyi israelita tiopamitl. Huan nepa quitlachili nochi tlamantli tlen oncayaya calijtic. Teipa mocuepqui altepetl Betania ininhuaya nopa majtlactli huan ome imomachtijcahua pampa tlayohuatinemiyaya. 12Huan hualmostla quema Jes'us huan imomachtijcahua quisque Betania, mayanque. 13Huan Jes'us quihuejcaitac se higuera cuahuitl tlen quipixqui ixihuiyo. Huan yajqui quitlachilito intla quipiyayaya itlajca. Pero quema ajsito, ax tleno quipantili, san quipixqui ixihuiyo pampa aya eliyaya ipohual para tlaquis. 14Huajca Jes'us quiilhui nopa cuahuitl: --Ma axaca sampa quicuas motlajca. Huan imomachtijcahua quicajque tlen quiijto. 15Teipa ajsitoj Jerusal'en huan Jes'us calajqui ipan nopa hueyi israelita tiopamitl. Huan nepa pejqui quintotoca nopa tlacame tlen tlanamacayayaj o tlacohuayayaj tiopan calijtic. Quincuamajcahuili ininmesas tlen tominpatlayayaj huan ininsiyas yajuanti tlen quinamacayayaj palomas. 16Huan Jes'us quintzacuili tlacame tlen panoyayaj tlatlajco nopa hueyi tiopan calijtic ica inintlamamal huan ayoc quincahuili ma panoca. 17Huan Jes'us pejqui quinmacht'ia tlacame huan quinilhui: --Ijcuilijtoc ipan Itlajtol Toteco campa quiijtohua: 'Nochaj eltoc nopa cali campa tlacame tlen ehuaj nochi tlaltini huelis momaijtose', pero inquichijtoque campa mosejcotil'iaj tlaxtequini para tlaxtequise. 18Huan nopa tlayacanca totajtzitzi huan nopa tlamachtiani tlen itlanahuatil Mois'es quicajque tlen quichijqui Jes'us huan pejque quitemohuil'iaj quejatza quimictisqu'iaj. Quiimacasiyayaj pampa nochi tlacame san quisentlachiliyayaj tlen Jes'us quinmachtiyaya. 19Pero quema tlayohuac, Jes'us ininhuaya imomachtijcahua quisque tlen nopa altepetl. 20Hualmostla ica ijnaloc Jes'us huan imomachtijcahua panoque campa nopa higuera cuahuitl huan quiitaque cuali huactoya hasta ipan inelhuayo. 21Huajca Pedro quiilnamijqui huan quiilhui Jes'us: --Tlamachtijquetl, xiquita ne higuera cuahuitl tlen tijtelchijqui para ma ayoc quema temacas itlajca, cuali huactoc. 22Huan Jes'us quinnanquili: --Ximotemachica ipan Toteco, 23huan melahuac aqui hueli tlacatl tlen quiilhuis ni tepetl: 'Ximijcueni huan ximomajcahua ipan hueyi atl', intla quineltocas para panos tlen quiijtojtoc, Toteco quichihuilis. 24Yeca nimechilhu'ia, nochi tlen inquitlajtlanise Toteco quema inmomaijtohuaj, xijneltocaca para inquiselise huan Toteco inmechmacas. 25Huan quema inmomaijtohuaj ica Toteco, xijtlapojpolhuica aqui hueli tlen ica incualanij para queja nopa imoTata tlen itztoc elhuicac nojquiya inmechtlapojpolhuis imotlaixpanolhua. 26Pampa intla ax inquintlapojpolhu'iaj sequinoc, huajca Toteco imoTata tlen itztoc elhuicac nojquiya ax inmechtlapojpolhuis imotlaixpanolhua. 27Huan yajuanti sampa ajsicoj ipan altepetl Jerusal'en. Huan teipa quema Jes'us nejnemiyaya tiopan calijtic, quinechcahuijque nopa tlayacanca totajtzitzi, huan nopa tlamachtiani tlen itlanahuatil Mois'es huan nopa huehue tlacame tlen israelitame. 28Huan quitlajtlanijque: --¿Tlachque tequihuejcayotl tijpiya para tijchihua nochi ni tlamantli? ¿Ajqueya mitzmacatoc tlanahuatili? 29Huan Jes'us quinnanquili: --Na nojquiya nimechtlajtlanis se tlamantli. Intla xitlahuac innechnanquilise, huajca nimechilhuis ajqueya nechmacatoc tequihuejcayotl para nijchihua ni tlamantli. 30¿Ajqueya quititlanqui Juan para tecuaaltis? ¿Toteco quititlanqui o san tlacame? Xinechnanquilica. 31Huajca pejque moijilhu'iaj huan moijilhuijque: "Intla tiquijtose Toteco quititlanqui Juan, yajaya technanquilis: 'Huajca, ¿para tlen ax inquineltocaque?' 32Huan intla tiquijtose san tlacame quititlanque Juan, huajca mahuilili, pampa nochi ni tlacame toca cualanise, pampa nochi quineltocaj para Juan eliyaya se tiocamanalojquetl." 33Huajca quiilhuijque Jes'us: --Tojuanti ax tijmatij ajqueya quititlanqui Juan. Huan Jes'us quinilhui: --Huajca na nojquiya ax nimechilhuis ajqueya nechmacatoc tequihuejcayotl para nijchihua ni tlamantli.

will be added

X\