MARCOS 1

1Quej ni pejqui nopa cuali tlamachtili tlen Jesucristo, Icone Toteco Dios. 2Huejcajquiya Isa'ias, itiocamanalojca Toteco, quiijcuilo tlen Toteco quiilhui Jes'us. Quiijcuilo: "Xiquita nijtitlanis notlayolmelajca ma mitzyacanas. Yajaya quicualtlalis ininyolo tlacame para ma mitzselica. 3Notlayolmelajca camatis chicahuac ipan nopa huactoc tlali campa ax tleno eli, huan quinilhuis tlacame: 'Xijcualtlalica imoyolo pampa hualas Tohueyiteco. Xijxitlahuaca imonemilis queja inquisencahuasqu'iaj se ojtli para hualas se hueyi tequihue.' " 4Ni tlayolmelajquetl tlen Toteco quititlanqui ma tlayacana elqui Juan tlen tecuaaltiyaya ipan nopa huactoc tlali. Quinilhuiyaya tlacame ma mocuaaltica para quipannextise moyolcueptoque huan quicajtejtoque tlajtlacoli. Huan Toteco quintlapojpolhuiyaya inintlajtlacolhua. 5Miyac tlacame tlen estado Judea huan tlen altepetl Jerusal'en yohuiyayaj para quicaquise Juan. Huan quema quiilhuijque Toteco inintlajtlacolhua, Juan quincuaaltiyaya ipan atemitl Jord'an. 6Juan moquentiyaya iyoyo tlen itzoncal camello huan quipixqui se itzinquechilpica tlen cuetlaxtli. Quicuayaya pilchapoltzitzi huan nectli tlen onca ipan nopa huactoc tlali. 7Quincamahuiyaya tlacame tlen Jes'us huan quinilhuiyaya: "Teipa hualas se tlacatl tlen quipiyas miyac m'as itequihuejcayo huan ax quej na. Na ax nihueyi queja ya. Ax nicaxil'ia para nielis niitequipanojca, niyon para nijquixtilis itecac. 8Na nimechcuaalt'ia san ica atl, pero yajaya inmechmacas Itonal Toteco ipan imoyolo." 9Ipan nopa tonali Jes'us quisqui altepetl Nazaret ipan estado Galilea huan yajqui campa Juan itztoya, huan Juan quicuaalti ipan atemitl Jord'an. 10Huan teipa, quema Jes'us quisayaya ipan atl, quiitac tlapojtoya elhuicactli huan Itonal Toteco hualtemoc ipan ya queja se paloma. 11Huan quicajqui Toteco Dios camatqui tlen elhuicac huan quiijto: "Ta tiNocone, nimitzicnel'ia miyac huan nijpiya miyac paquilistli ica tlen tijchihua." 12Teipa Itonal Toteco quiyacanqui Jes'us ma yohui hasta nopa tlali huactoc campa ax tleno eli. 13Huan Jes'us itztoya nepa para cuarenta tonali huan Axcualtlacatl quiyejyecohuayaya ma tlajtlacolchihua. Nopano itztoyaj tecuanime tlen mosisin'iaj huan nojquiya itztoyaj elhuicac ehuani tlen quitequipanohuayayaj Jes'us. 14Quema nopa tlanahuatijquetl quitzajqui Juan tlen tecuaaltiyaya, Jes'us ajsito ipan estado Galilea para quinixtomilis tlacame nopa cuali tlamachtili tlen quejatza tlacame huelis calaquise campa tlanahuat'ia Toteco. 15Huan quinilhuiyaya tlacame: "Ya ajsic nopa tonal huan ama, ax huejcahuas pehuas tlanahuatis Toteco. Xijpatlaca imoyolo huan xijneltocaca itlajtol Toteco." 16Teipa Jes'us nentinemiyaya iteno nopa hueyi atl Galilea huan quinitac Sim'on ihuaya iicni, Andr'es. Yajuanti eliyayaj michtlajtlamani huan quimajcahuayayaj se matlatl atitla. 17Huan Jes'us quinilhui: --Xinechtoquilica. Ama inmichtlajtlamani, pero na nimechnextilis quejatza inquinnojnotzase tlacame ma nechtoquilica. 18Huan quicajtejque ininmatla huan yajque ihuaya. 19Teipa Jes'us nejnenqui se quentzi huan quinitac Jacobo ihuaya iicni, Juan. Yajuanti eliyaya iconehua Zebedeo, huan itztoyaj ipan se cuacanahua quiijtzomayayaj ininmatla. 20Huan nimantzi Jes'us quinnotzqui. Huan quicajtejque inintata Zebedeo ipan cuacanahua ininhuaya itequipanojcahua huan quitoquilijque. 21Teipa Jes'us huan tlen itztoyaj ihuaya ajsitoj altepetl Capernaum. Huan ipan nopa tonal para ma mosiyajcahuaca israelitame, Jes'us calajqui ipan nopa israelita tiopamitl huan pejqui tlamacht'ia. 22Huan tlacame san quisentlachiliyayaj ica itlamachtil pampa quinmachtiyaya queja se tlen quipixqui tequihuejcayotl. Ax quinmachtiyaya queja tlamachtiani tlen itlanahuatil Mois'es. 23Nojquiya ipan tiopamitl itztoya se tlacatl tlen quipixqui se iajaca Axcualtlacatl tlen calactoya ipan itlacayo. Yajaya quiitac Jes'us huan chicahuac quiijto: 24--Jes'us ta tiNazaret ejquetl, ¿tlachque tinechchihuilis? ¿Tihualajtoc para tinechtzontlamiltis? Na nimitzixmati. Ta tlen titlatzejtzeloltic tlen Dios quititlantoc nica. 25Huan Jes'us quiajhuac nopa iajaca Axcualtlacatl huan quiilhui: --Ayoc ximolini. Xiquisa ipan ni tlacatl. 26Huajca iajaca Axcualtlacatl quichijqui nopa tlacatl ma huetzi ica se ajaca cocolistli. Huan tzajtzitejqui chicahuac huan quisqui ipan itlacayo. 27Huan nochi momajmatijque huan moilhuijque: --¿Tlachque panoc? ¿Huelis ya ni se yancuic tlamachtilistli? ¡Ni tlacatl Jes'us quipiya tequihuejcayotl para quinnahuatis iajacahua Axcualtlacatl huan yajuanti quineltoquil'iaj! 28Huajca nimantzi nochi tlacame campa hueli ipan estado Galilea quimatque tlen quichijqui Jes'us. 29Quema ya quistoyaj ipan tiopamitl, Jes'us yajqui ihuaya Jacobo ihuaya Juan hasta ininchaj Sim'on huan Andr'es. 30Huan imona Sim'on Pedro huetztoya ipan cocolistli pampa totoniyayaya. Huan nimantzi quiilhuijque Jes'us para mococohua. 31Huajca Jes'us quinechcahui nopa sihuatl huan quimaitzqui. Quitlalanqui huan nimantzi quicajqui nopa cocolistli. Huan nopa sihuatl pejqui quintlamaca. 32Quema ya calajqui tonati huan tlayohuatoya, tlacame pejque quinhuicaj campa Jes'us nochi tlen mococohuayayaj huan tlen quipixque iajacahua Axcualtlacatl. 33Huan nochi tlacame tlen nopa altepetl mosentilijque calteno. 34Huan Jes'us quinchicajqui miyac cocoyani tlen quipixque miyac tlamantli cocolistli. Huan quinquixtili miyac iajacahua Axcualtlacatl. Pero Jes'us ax quincahuiliyaya iajacahua Axcualtlacatl ma camatica pampa quiixmatiyayaj para yajaya eliyaya nopa Cristo tlen Toteco Dios quititlantoya. 35Huan hualmostla ijnaltzi quema noja tlatlayohuayaya, Jes'us mejtejqui huan yajqui campa tlatzitzicaya para momaijtos ica Toteco Dios. 36Huan teipa Sim'on ihuaya ihuampoyohua yajque quitemotoj. 37Huan quipantijque Jes'us huan quiilhuijque: --Nochi tlacame mitztemohuaj. 38Pero Jes'us quinilhui: --Ma tiyaca ipan nopa pilaltepetzitzi tlen nechca para nitepohuilis itlajtol Toteco nepa nojquiya pampa yeca nihualajtoc. 39Huajca Jes'us panotinenqui campa hueli ipan nochi estado Galilea huan tepohuiliyaya itlajtol Toteco ipan sesen israelita tiopamitl. Huan quema quinpantiyaya tlacame tlen quipixque iajacahua Axcualtlacatl, Jes'us quinchihualtiyaya ma quisaca. 40Huan quinechcahuico Jes'us se tlacatl tlen tlacayo palaniyaya ica se cocolistli tlen itoca lepra. Huan motlancuaquetzqui iixtla Jes'us huan quiilhui: --Jes'us, intla tijnequi, huelis tinechchicahuas. 41Huan Jes'us quitlasojtlac, huan quitlali ima ipani huan quiilhui: --Quena, nijnequi. Ximochicahua amantzi. 42Huan ipan nopa tlalochtli, nopa cocolistli quicajqui. 43Huajca Jes'us quinahuati: 44--Amo aca xiquilhui. San xiya ximonextiti iixtla nopa israelita totajtzi huan xijmaca Toteco nopa tlacajcahualistli tlen Mois'es tlanahuati ma quimacaca tlen ayoc quipiyaj inintlacayo palantoc para queja nopa nochi quimatise ya timochicajtoc. 45Pero nopa tlacatl yajqui huan pejqui quinilhu'ia nochi tlacame tlachque ipantic huan nel'ia momajqui itlajtol. Yeca Jes'us ayoc huelqui calaqui tonaya ipan altepetini. San nejnemiyaya campa tlatzitzica huan nepa nojquiya quipantiyayaj miyac tlacame tlen hualajque tlen campa hueli pilaltepetzitzi.

will be added

X\