LUCAS 7

1Huan Jes'us tlanqui quinmacht'ia nochi nopa tlacame huan yajqui altepetl Capernaum. 2Huan nopona itztoya se capit'an tlen soldados tlen quipixtoya se itequipanojca tlen quiicneli. Huan itequipanojca mococohuayaya huan ya motlahueltijtoya. 3Huan nopa capit'an quicajqui para ajsico Jes'us, huajca quintitlanqui nopa huehue israelita tlacame ma quitlajtlanitij ma huala quichicahuaqui itequipanojca. 4Huan nopa tlacame yajque campa Jes'us huan ica nochi ininyolo quitlajtlanijque ma quichicahuati. Huan quiilhuijque: --Cuali para tijchihuilis se cualtlacayotl ni capit'an, 5pampa nel'ia techicnel'ia tiisraelitame. Huan tlaxtlajqui nopa gastos huan techsencahuili se toisraelita tiopa. 6Huajca Jes'us quisqui ininhuaya para yas ichaj nopa capit'an. Pero quema monechcahuiyaya, nopa capit'an quintitlanqui ihuampoyohua ma quicamahuica Jes'us huan ma quiilhuica: --NoTeco, amo ximocuatotoni m'as. Nopa capit'an quiijtohua para yajaya ax hueyi queja ta huan ax quinamiqui para ticalaquis ichaj. 7Nojquiya yajaya quimati ax quinamiqui mitznechcahuis, niyon mitzcamahuis. Pero yajaya quiijtohua, san xiquijto se tlajtoli huan xijnahuati para mochicahuas itequipanojca huan nimantzi mochicahuas. 8Quiijtohua yajaya quimati tlen ta tiquijtos, ya nopa mochihuas, pampa yajaya nojquiya quipiya iteco tlen quinahuat'ia. Huan nojquiya quinpiya soldados tlen yajaya quinnahuat'ia. Huan intla yajaya quiilhuis se soldado ma yas nopona, yajaya nimantzi yas. Huan intla quiilhuis seyoc ma huala nica, yajaya nimantzi hualas. Huan intla quiilhuis itequipanojca ma quichihua se tequitl, yajaya quichihuas. Huan nopa capit'an quimati ta nojquiya tijpiya san se tequihuejcayotl para nimantzi mochihuas motlajtol. 9Huan quema Jes'us quicajqui itlajtol nopa capit'an tlen ihuampoyohua quiilhuicoj, quisentlachili. Huan Jes'us moicancuepqui huan quinilhui nopa miyac tlacame tlen quitoquiliyayaj: --Nel'ia nimechilhu'ia, ax niquitztoc niyon se israelita tlen nechneltoca nelcuali queja ni capit'an tlen seyoc tlali ejquetl. 10Huan ihuampoyohua nopa capit'an mocuepque ichaj huan ya mochicajtoya itequipanojca. 11Huan teipa Jes'us yohuiyaya se altepetl tlen itoca eliyaya Na'in huan imomachtijcahua huan miyac tlacame yohuiyayaj ihuaya. 12Huan quema Jes'us monechcahui campa ipuerta nopa altepetl, quisayayaj nepa miyac tlacame huan quiquechpanojtiyohuiyayaj se mijcatzi. Huan nopa mijcatzi eliyaya iyojtzi icone se cahual toahui. 13Huan Jes'us quiitac nopa cahual toahui, huan quitlasojtlac huan quiilhui: --Amo xichoca. 14Huan Jes'us yajqui campa nopa mijcatzi huan quiitzqui nopa caja huan inijuanti tlen quihuicayayaj moquetzque. Huan Jes'us quiilhui nopa mijcatzi: --Telpocatl, naja nimitzilhu'ia, ximehua. 15Huan nopa telpocatl tlen mictoya mosehui huan pejqui camati. Huan Jes'us quimactili inana. 16Huan nochi nopa tlacame tlen quiitaque quisentlachilijque, huan pejque quihueyichihuaj Toteco Dios huan quiijtojque: --Ni Jes'us tlen itztoc tohuaya, se hueyi tiocamanalojquetl. Huan nojquiya quiijtojque: --Toteco Dios hualajtoc para techpalehuis tiisraelitame pampa tiiaxcahua. 17Huan nochi tlacame tlen itztoyaj ipan estado Judea huan ipan sequinoc tlaltini nechca quicajque para Jes'us quiyolcuitoya nopa mijcatzi. 18Huan imomachtijcahua Juan tlen tecuaaltiyaya quiilhuijque nochi tlen Jes'us quichihuayaya. Huajca Juan quinnotzqui ome imomachtijcahua, 19huan quintitlanqui ma yaca quitlajtlanitij Jes'us intla nel'ia yajaya nopa Cristo tlen Toteco Dios quiijto hualasqu'ia o monequi noja quichiyase ma huala. 20Huan ajsicoj campa Jes'us huan quiilhuijque: --Juan tlen tecuaalt'ia techtitlantoc ma timitztlajtlaniquij intla ta tiCristo tlen Toteco quiijto hualasqu'ia o monequi noja tijchiyase ma hualas. 21Huan ipan nopa hora quema imomachtijcahua Juan itztoyaj ihuaya Jes'us, yajaya quinchicajqui miyac tlen mococohuayayaj ica miyac tlamantli cocolistli. Quinchihuili ma quisaca iajacahua Axcualtlacatl tlen calactoyaj ipan tlacame huan quintlachiyalti miyac popoyotzitzi. 22Huajca Jes'us quinilhui imomachtijcahua Juan: --Xijyolmelahuatij Juan tlen inquiitztoque huan inquicactoque. Xiquilhuitij inijuanti tlen itztoyaj popoyotzitzi, ama tlachiyaj. Huan tlen itztoyaj metzcuachotique, ama nejnemij cuali. Inijuanti tlen palaniyaya inintlacayo ica nopa cocolistli tlen itoca lepra mochicajtoque, huan inijuanti tlen ax tlacaquiyaya, ama tlacaquijya. Tlacame tlen mictoyaj moyolcuitoquejya huan tlen teicneltzitzi quicaquij itlajtol Toteco pampa niquinixtomil'ia. 23Xiquilhuitij para paquij nopa tlacame tlen nechsel'iaj huan nechneltocaj. 24Huajca quistejque nopa tlacame tlen quintitlantoya Juan tlen tecuaalt'ia. Huan teipa Jes'us pejqui quincamahu'ia nopa miyac tlacame tlen Juan. Huan quintlajtlani: "¿Tlaque inmoilhuiyayaj inquiitasqu'iaj quema inyajque inquiitatoj Juan ipan nopa huactoc tlali campa ax tleno eli? ¿Inmoilhuiyayaj Juan elisqu'ia se tlacatl tlen ax temachtli queja se ohua cuahuitl tlen huihuixca quema quentzi tlaajaca? 25¡Ximoilhuica! ¿Tlaque inmochiyayayaj inquiitase? ¿Inquichiyayayaj para Juan elisqu'ia se tlacatl ica iyoyo nelcuali? ¡Axtle! Ya inquimatij tlacame tlen motlalil'iaj ininyoyo nelcuali, tominp'iaj huan itztoque ipan ininchaj tlanahuatiani. 26Huajca, ¿tlaque inyajque inquiitatoj? ¿inyajque pampa inquiitasnequiyayaj se itiocamanalojca Toteco? Huan nimechilhu'ia Juan itztoc m'as hueyi que nochi sequinoc tiocamanalohuani, 27pampa ipan Itlajtol Toteco ijcuilijtoc tlen Toteco Dios nechilhui tlen Juan huan queja ni quiijto: 'Xiquita, na nijtitlanis notlayolmelajca ma mitzyacanas. Yajaya quicualtlalis ininyolo tlacame para ma mitzselise.' 28Huan nimechilhu'ia axaca seyoc tlen tlacajtoc ipan ni tlaltepactli itztoc m'as hueyi iixtla Toteco que Juan tlen tecuaalt'ia, pero aqui hueli tlacatl tlen itztoc ipan itlanahuatilis Toteco elis m'as hueyi que Juan." 29Huan quema nochi nopa miyac tlacame huan nopa tlacame tlen tlainanque impuesto quicajque itlajtol Juan, quinejque ma quincuaalti pampa quiitztoyaj para xitlahuac tlen Juan quiijto tlen Toteco. 30Pero nopa fariseos huan tlamachtiani tlen itlanahuatilhua Mois'es ax quicualcajque tlen Toteco quinequiyaya ma quichihuaca, huan san mohueyimatiyayaj, huan yeca Juan ax quincuaaltijtoya. 31Huan sampa Jes'us quinilhui: "¿Ica tlaque niquinhuicalotis tlacame tlen ama itztoque? 32Tlen ama itztoque mochihuaj queja coneme tlen mosehu'iaj tianquis huan ax paquij pampa nochi ax pano queja quinequij ma pano. Quinnotzaj ininhuampoyohua huan quinilhu'iaj: 'Titlapitzque para ximijtotica, huan ax inmijtotijque. Tihuicaque se huicatl tlen cuesoli quej se mictoya, pero ax inchocaque.' 33Juan tlen tecuaaltiyaya hualajqui huan ax quicuajqui pantzi huan ax quiic xocomeca atl, huan inquiijtojque para quipixtoya se iajaca Axcualtlacatl. 34Huan na tlen niMocuepqui Tlacatl nihualajqui huan nijcua huan niqui tlen onca, huan inquiijtohuaj nineltlacuajquetl huan nineltlaiquetl. Inquiijtohuaj san ninemi ininhuaya tlacajcayahuani tlen tlainamaj impuesto huan tlacame tlen hueyi tlajtlacoli quichihuaj. 35Pero ax ipati tlen inquiijtohuaj. Nochi tlacame tlen tlalnamictoque quimachil'iaj na ihuaya Juan tijchihuaj tlen xitlahuac." 36Monechcahui se fariseo campa Jes'us huan quitlajtlani ma tlacuati ichaj. Yeca Jes'us yajqui ichaj huan mosehui campa mesa. 37Huan ajsico se sihuatl tlen tlacanenqui tlen nojquiya ehuayaya nopa altepetl. Huan quicajqui para Jes'us tlacuayaya ipan ichaj nopa fariseo huan quihualicac se ajhuiyacayotl ipan se frasco tlen quicoyonijtoyaj tlen se tetl itoca alabastro. 38Huan moquetzqui chocayaya iicxiteno Jes'us. Huan pejqui quixolon'ia iicxi ica iixayo tlen huetziyaya. Huan quihuatzayaya ica itzoncal. Quitzoponili iicxi huan quitequili nopa ajhuiyacayotl tlen quihualicac. 39Huan nopa fariseo tlen quinotzqui ma tlacuati ichaj quiitac nochi ya ni huan moilhui: "Intla ni Jes'us nel'ia elisqu'ia se itiocamanalojca Toteco, quimatisqu'ia para ax cuali ni sihuatl tlen quiitzqu'ia iicxi. Quimatisqu'ia miyac tlajtlacolchijtoc." 40Huan yeca Jes'us quinanquili tlen Sim'on moyolilhuiyaya huan quiilhui: --Sim'on, nijpiya se huicaltili tlen nijnequi nimitzilhuis. Huan Sim'on quiilhui: --Cualtitoc, Tlamachtijquetl, xinechilhui. 41Huan Jes'us quiilhui: --Itztoya se tlacatl tlen momatqui tetlanejt'ia tomi. Huan ome tlacame quitlahuiquiliyayaj. Se quitlahuiquiliyaya tomi para san cincuenta tonali tlen tequitl, pero nopa seyoc quitlahuiquiliyaya tomi para quinientos tonali. 42Huan nopa ome ax huelque quicuepil'iaj nopa tomi. Huajca nopa tecojtli ica ipaquilis quintlapojpolhui tlen sesen quitlahuiquiliyayaj. Huan quiijto ax tleno monequi quitlaxtlahuise. Huajca Sim'on, ¿catl'ia tlen ni ome tlacame achi m'as quiicneliyaya nopa tecojtli? 43Huan Sim'on quinanquili: --Huelis yajaya tlen m'as quitlahuiquiliyaya. Huan Jes'us quiilhui Sim'on: --Quena, melahuac tlen tiquijto. 44Huan Jes'us quitlachili nopa sihuatl huan quiilhui Sim'on: --¿Ta tiquita tlen quichihua ni sihuatl? Quema nicalajqui ipan mochaj, ax tinechmacac atl para nimoicxipajpacas queja ipa tijchihuaj, pero yajaya nechxolonili noicxihua ica iixayo huan quihuatzqui ica itzoncal. 45Ta ax tinechtzoponi queja timomajtoque titesel'iaj, pero hasta quema nicalaquico, yajaya ax quicajtoc nechtzoponil'ia noicxihua. 46Ta ax tinechtequili aceite ipan notzonteco queja timomajtoque, pero yajaya quitequili ajhuiyacayotl hasta ipan noicxihua. 47Yeca nimitzilhu'ia, yonque miyac itlajtlacolhua, nochi nijtlapojpolhuijtoc, huajca ama miyac nechicnel'ia. Pero seyoc tlen quipanti tlapojpolhuili ica san pilquentzi tlen tlahuicayaya, san pilquentzi quiicnel'ia yajaya tlen quitlapojpolhuijtoc. 48Huan Jes'us quiilhui nopa sihuatl: --Nimitztlapojpolhuijtoc nochi motlajtlacolhua. 49Huan tlacame tlen mosehuiyayaj ipan mesa ihuaya Jes'us pejque moilhu'iaj: --¿Ajqueya nel'ia ni tlacatl Jes'us tlen moilhu'ia quipiya tequihuejcayotl para tetlapojpolhuis inintlajtlacolhua? 50Huan Jes'us quiilhui nopa sihuatl: --Pampa tinechneltocac, nimitzmaquixtijtoc tlen motlajtlacolhua. Hueli tiyas mochaj ica paquilistli.

will be added

X\