LUCAS 5

1Huan nopa miyac tlacame nel'ia quicuatetzopayayaj Jes'us pampa quinequiyayaj quicaquise itlajtol Toteco. Huan Jes'us moquetzayaya iteno hueyi atl tlen itoca Genesaret, 2huan quiitac ome cuacanahua ateno tlen nopa michtlajtlamani quincajtejtoyaj pampa quipajpacayayaj ininmatla. 3Huajca Jes'us tlejcoc ipan icuacanahua Sim'on Pedro huan quiilhui ma quinejnemilti nopa cuacanahua quentzi ipan atl. Huan Jes'us mosehui ipan cuacanahua huan pejqui quinmacht'ia nopa miyac tlacame tlen mocahuayayaj ateno huan nochi huelque quitlachil'iaj. 4Huan teipa quema tlanqui quincamahu'ia nopa tlacame, Jes'us quiilhui Sim'on: --Xijnejnemilti ni cuacanahua hasta campa achi huejcatla huan nepa xijmajcahuaca imomatlahua para inmichitzquise. 5Huan Sim'on quinanquili huan quiilhui: --Tlamachtijquetl, timichtemojque seyohual huan niyon se michi ax tiquitzquijque. Pero intla queja nopa titechilhu'ia ma tijchihuaca, huajca sampa tijmajcahuase tomatla. 6Huan quimajcajque ininmatla, huan quinitzquijque tlahuel miyac michime hasta quinequiyaya tzayanis ininmatla. 7Huan quinmanotzque ininhuampoyohua tlen itztoyaj ipan nopa seyoc cuacanahua para ma quinpalehuiquij. Huan hualajque huan quitemitijque nochi ome cuacanahua ica michime hasta san quentzi misahuiyayaj. 8Huan quema Sim'on Pedro quiitac tlen panotoya, motlancuaquetzqui iixtla Jes'us huan quiilhui: --Toteco, xinechtlalcahui pampa na nieli se nitlajtlacolchijca tlacatl. 9Sim'on quiilhui Jes'us ya ni pampa yajaya huan nochi ihuampoyohua mosentlachiliyayaj pampa quiitaque nopa miyac michime tlen quinitzquijque. 10Huan nojquiya quisentlachilijque Jacobo huan Juan tlen eliyaya itelpocahua Zebedeo huan eliyayaj ihuampoyohua Sim'on. Huan Jes'us quiilhui Sim'on: --Amo ximomajmati. Ama timichtlajtlamajquetl, pero na nimitznextilis quejatza tiquinnotzas tlacame ma nechtoquilica. 11Huan quinejnemiltijque inincuacanahua hasta iteno nopa hueyi atl, huan quicajtejque nochi tlen quipixtoyaj huan quitoquilijque Jes'us. 12Huan Jes'us itztoya ipan se altepetl, huan hualajqui se tlacatl tlen palaniyaya itlacayo ica nopa cocolistli lepra. Huan quema quiitac Jes'us, motlancuaixtlapacho iixtla huan chicahuac quiilhui: --Toteco, intla tijnequi, huelis tinechchicahuas. 13Huajca Jes'us quitlali ima huan quiilhui: --Quena, nijnequi. Ximochicahua amantzi. Huan nimantzi icocolis quicajqui. 14Huan Jes'us quinahuati ma ax tepohuili tlen panoc, quiilhui: --San xiya ximonextiti ica nopa totajtzi huan xijmaca Toteco nopa tlacajcahualistli tlen Mois'es tlanahuati ma quimacaca para ma motlapajpacchihuaca tlen ayoc tlacayo palantoque. Quej nopa quimatise timochicajquiya. 15Pero campa hueli miyac m'as tlacame quicaquiyayaj tlen ichicahualis Jes'us huan huajca miyac mosentilijque campa itztoya para quicaquise itlajtol huan para ma quinchicahua tlen inincocolis. 16Pero miyac huelta Jes'us moiyocaquixti iselti huan yajqui campa axaca aquiyaya para huelis momaijtos ica Toteco. 17Se tonal Jes'us quinmachtiyaya tlacame ipan se cali, huan itztoyaj nepa sequin fariseos huan huejhueyi tlamachtiani tlen itlanahuatilhua Mois'es tlen hualajque ipan nochi ranchos ipan estados Galilea huan Judea huan tlen hueyi altepetl Jerusal'en. Huan Jes'us quipixqui ichicahualis Toteco para quinchicahuas cocoyani. 18Huan hualajque sequin tlacame tlen quihualicayayaj se cocoxquetl tlen ax hueliyaya mojmolin'ia. Huan quinequiyayaj calaquise calijtic campa itztoya Jes'us para quitlalise nopa cocoxquetl iixtla, 19pero ax oncac campa calaquise pampa motetzoptoyaj tlahuel miyac tlacame. Huajca nopa tlacame tlejcoque calpani huan quiijcuenijque se ome tejas. Teipa quitemohuijque nopa cocoxquetl ipan itlapech tlatlajco nochi nopa tlacame huan quitlalijque iixtla Jes'us. 20Huan Jes'us quiitac para nopa tlacame quineltocayayaj huan quiilhui nopa cocoxquetl: --Nohuampo, nimitztlapojpolhu'ia motlajtlacolhua. 21Huan nopa tlamachtiani tlen itlanahuatil Mois'es huan nopa fariseos pejque moyolilhu'iaj: "¿Ajqueya nel'ia ni Jes'us? Yajaya niyon quentzi ax quitlepanita Toteco Dios pampa mochihua queja ya elisqu'ia Toteco. Axaca hueli tetlapojpolhu'ia tlajtlacoli, san Toteco." 22Pero Jes'us quimatiyaya tlen inijuanti moyolilhuiyayaj huan quinilhui: --¿Para tlen inmoilhu'iaj ax nijtlepanita Toteco Dios? 23Intla niquilhuis ni cocoxquetl: 'Ximehua huan xinejnemi' huan mochihuas notlajtol, nojquiya motlapojpolhui quema niquilhui: 'Nimitztlapojpolhu'ia motlajtlacolhua.' 24Nijnequi xijmatica na tlen niMocuepqui Tlacatl nijpiya tequihuejcayotl ipan tlaltepactli para nitetlapojpolhuis, huajca nimechnextilis para mochihuas tlen niquijtohua. Huan nimantzi Jes'us quiilhui nopa cocoxquetl: --Nimitzilhu'ia, ximehua huan xijtlalana motlapech huan xiya mochaj. 25Huan nimantzi nopa cocoxquetl moquetzqui huan quitlalantejqui itlapech huan yajqui ichaj, quihueyichijtiyajqui Toteco Dios. 26Huan nochi nopa tlacame mosentlachilijque huan momajmatijque. Huan teipa pejque quihueyichihuaj Toteco huan quiijtojque: --Nel'ia se hueyi chicahual nescayotl tiquitztoque ama. 27Teipa quema Jes'us quisayaya ipan nopa altepetl, quiitac se tlacatl tlen tlainanqui impuesto. Yajaya itoca eliyaya Mateo huan nojquiya itoca eliyaya Lev'i, huan mosehuijtoya campa nopa mesa para quiselis impuesto. Huan Jes'us quiilhui: --Xinechtoquili. 28Huan Mateo quicajtejqui nochi tlen quipixtoya. Huan moquetztiquisqui huan yajqui ihuaya Jes'us. 29Huan Mateo quichijqui se hueyi ilhuitl nepa ichaj. Huan tlacuayayaj ihuaya Jes'us campa mesa miyac tlacame tlen tlainanque impuesto huan momajtoyaj tlacajcayahuaj. Huan nojquiya itztoyaj sequinoc tlacame. 30Huan hualajque fariseos huan tlamachtiani tlen itlanahuatil Mois'es huan quiitaque. Huajca pejque quiteilhu'iaj Jes'us iniixtla imomachtijcahua huan quinilhuijque: --¿Para tlen intlacuaj huan inatlij ininhuaya ni tlacame tlen tlainamaj impuesto huan tlacajcayahuaj? Huan ¿ininhuaya ni sequinoc tlen miyac tlajtlacoli quichihuaj? 31Huan Jes'us quinnanquili nopa fariseos huan quinilhui: --Se tetica tlacatl ax quinequi se tepajtijquetl, pero se cocoxquetl, quena. 32Na ax nihualajtoc para niquinnotzas tlacame tlen moilhu'iaj para cuajcualme iixtla Toteco. Nihualajtoc para niquinnotzas tlacame tlen quimatij quipiyaj inintlajtlacolhua para ma moyolcuepaca. 33Huan hualajque sequin tlacame tlen quiilhuijque Jes'us: --Imomachtijcahua Juan tlen tecuaalt'ia ajachica mosahuaj para momaijtose ica Toteco Dios. Huan ihuical quichihuaj tlen quitoquil'iaj inintlamachtil nopa fariseos, pero momomachtijcahua axtle. Nochipa tlacuaj huan atlij. 34Huan Jes'us quinilhui: --Ax quinamiqui ma mosahuaca ihuampoyohua se mosihuajtijquetl ipan nopa tlalochtli quema tlacuaj ihuaya ipan nenamictili. Ihuical eltoc quema na niitztoc ininhuaya nomomachtijcahua, inijuanti ax huelij mosahuaj pampa itztoque nohuaya. 35Pero ajsis tonali quema hualase nocualancaitacahua huan nechhuicase huan huajca quena, nomomachtijcahua mosahuase. 36Huan nojquiya quinpohuili se huicaltili, quinilhui: --Axaca quitequi se quentzi yoyomitl yancuic para quitlatlamanis se yoyomitl tlen sosoltic pampa tzocoyolihuis nopa quentzi tlen yancuic huan ayoc quinamiquis tlen sosoltic. 37Huan axaca quitequil'ia xocomeca atl tlen yancuic ipan bolsas tlen cuetlaxtli sosoltic. Pampa nopa yancuic xocomeca atl xocoyas, huan momiyaquilis huan tzayanis nopa cuetlaxtli sosoltic. Quej nopa toyahuis nopa xocomeca atl huan nojquiya quinenpolos nopa bolsas tlen cuetlaxtli. 38Monequi tijtecas xocomeca atl tlen yancuic ipan bolsas tlen cuetlaxtli tlen yancuic. 39Huan axaca tlen quiitoc xocomeca atl tlen achtohui tlasencahuali quinequis tlen yancuic pampa nochi quiijtohuaj: 'Achi cuali nopa tlen achtohui tlasencahuali.'

will be added

X\