LUCAS 4

1Huan Jes'us quisqui atemitl Jord'an temitoc ica Itonal Toteco. Huan Itonal Toteco quihuicac hasta nopa huactoc tlali campa ax tleno eli. 2Huan mocajqui nepa para cuarenta tonali huan Axcualtlacatl quiyoltilanayaya ma tlajtlacolchihuasqu'ia. Huan ipan nochi nopa tonali ax tleno quicuajqui. Huan quema tlanqui nopa tonali, nel'ia mayanayaya. 3Huan hualajqui Axcualtlacatl quiilhuico: --Intla nel'ia tiIcone Toteco, xijnahuati ni tetl ma mocuepa pantzi. 4Huan Jes'us quinanquili: --Ijcuilijtoc ipan Itlajtol Toteco campa quiijtohua: 'Ax san ica pantzi yoltose tlacame. Nojquiya monequi quitoquilijtinemise nochi Itlajtol Toteco.' 5Huan Axcualtlacatl quihuicac Jes'us ipan se tepetl huejcapantic, huan ipan nopa tlalochtli quinextili ininricojyo nochi tlanahuatiani ipan tlaltepactli huan nochi tlaltini tlen iniaxcahua. 6Huan Axcualtlacatl quiilhui: --Nimitzmacas tequihuejcayotl tijnahuatis nochi ni tlaltini ipan nochi tlaltepactli huan nimitzmacas nochi ininricojyo, pampa nochi nechmacatoque na huan huelis nijmacas ajqueya nijnequis. 7Huan nochi nimitzmacas ta intla san timotlancuaquetzas huan tinechhueyichihuas. 8Huan Jes'us quinanquili: --Xinechtlalcahui, Axcualtlacatl, pampa ijcuilijtoc ipan Itlajtol Toteco campa quiijtohua: 'Xijhueyimati san Toteco Dios huan san ya xijtequipano.' 9Huan Axcualtlacatl quihuicac Jes'us altepetl Jerusal'en huan quiquetzqui hasta itzonpac nopa hueyi israelita tiopamitl huan quiilhui: --Intla nel'ia tiIcone Toteco Dios, xitzicuini nica para tlatzintla, 10pampa ijcuilijtoc ipan Itlajtol campa quiijtohua: 'Toteco quinnahuatis ielhuicac ejcahua ma mitzmocuitlahuica. 11Inijuanti mitzmatzacuilise para ax timoicxicocos ica niyon se tetl.' 12Huan Jes'us quinanquili: --Nojquiya Itlajtol Toteco quiijtohua: 'Amo xijyejyeco Toteco Dios san para tiquitas tlaque quichihuas.' 13Huan quema Axcualtlacatl ya quichijtoya fuerza para quiyoltilanas Jes'us ma tlajtlacolchihua, quicajtejqui hasta seyoc huelta. 14Teipa Jes'us mocuepqui ipan estado Galilea temitoc ica ichicahualis Itonal Toteco. Huan campa hueli ipan nochi nopa tlali nochi tlacame quicaquiyayaj tlen ya. 15Huan yajaya pejqui quinmacht'ia tlacame ipan israelita tiopantini campa hueli huan nochi quihueyimatiyayaj. 16Huan Jes'us ajsito pilaltepetzi Nazaret campa moscalti huan ipan s'abado, nopa tonal para ma mosehuica israelitame, yajaya calajqui ipan israelita tiopamitl queja momajtoya quichihua. Huan moquetzqui ipan tlasentilistli para quipohuas Itlajtol Toteco. 17Huan quimacaque nopa amatlajcuiloli tlen huejcajquiya quiijcuilo nopa tiocamanalojquetl Isa'ias. Huan Jes'us quitlapo huan quipanti campa ijcuilijtoc ni tlajtoli huan pejqui quipohua: 18"Itonal Toteco itztoc nohuaya, pampa Toteco nechtequimacatoc para ma niquinilhui tlacame tlen teicneltzitzi itlajtol Toteco. Nechtitlantoc ma niquinchicahuas tlacame tlen mocuesohuaj, huan para ma niquinyolmelahua tlacame tlen Axcualtlacatl quinilpitoc para nihueli niquintojtomas. Nechtequimacac para niquinchicahuas popoyotzitzi para huelise tlachiyase. Huan niquinmaquixtis nochi tlen tlaijiyohu'iaj ininmaco tlen quintlaijiyohuilt'iaj. 19Nechtitlantoc ma niquinyolmelahua nochime para ya ajsic nopa tonali, quema Toteco quinchihuilis tlacame se hueyi favor." 20Huan Jes'us quitzajqui nopa momimilojtoc amatlajcuiloli huan quimacac nopa tiopan tlapalehuijquetl, huan mosehui para tlamachtis. Huan nochi nopa tlacame tlen itztoyaj ipan nopa tlasentilistli quitlachiliyayaj. 21Huan Jes'us pejqui quincamahu'ia huan quinilhui: --Ni tlajtoli tlen nijpojqui moijcuilo huejcajquiya huan camati tlen na tlen nimoquetza imoixtla. Huajca ama motlamichijtoc tlen quiijtohua. 22Huan nochi nopa tlacame camatiyayaj cuali tlen Jes'us huan mosentlachiliyayaj ica itlajtol tlen nel'ia yejyectzi, pero motlatzintoquiliyayaj: --¿Ax ya ni icone Jos'e? 23Huan Jes'us quinilhui: --Nijmati se tonal innechilhuise ni tlajtoli: 'Tepajtijquetl, ximopajti, huan timitzneltocase.' Inquiijtose para inquicactoque tlen nopa tiochicahualnextili tlen nijchijtoc ipan altepetl Capernaum, huajca ihuical ma nijchihua nica ipan imoaltepe. 24Pero tlacame tlen san sejco ehuani ihuaya se tiocamanalojquetl ax quisel'iaj. 25Huan quema itztoya El'ias, nopa tiocamanalojquetl tlen huejcajquiya, itztoyaj miyac israelita cahual toahuime ipan tlali Israel campa yajaya ejqui. Huan nochi nopa cahual toahuime quinpolohuayaya inintlacualis pampa ax tlaahuetzqui para eyi xihuitl huan tlajco ipan tlali Israel huan oncac se hueyi mayantli. 26Pero Toteco ax quititlanqui El'ias ma yahui ica se israelita cahual toahui tlen san sejco ehuaj. Quititlanqui ma quipalehuiti nopa cahual toahui ipan pilaltepetzi Sarepta ipan seyoc tlali tlen itoca Sid'on. 27Huan itztoyaj miyac tlacame ipan tlali Israel tlen palaniyayaj inintlacayohua ica lepra quema itztoya tiocamanalojquetl Eliseo, pero Eliseo niyon se inijuanti ax quichicajqui. San quichicajqui Naam'an tlen hualajqui ipan seyoc tlali tlen itoca Siria. 28Huajca nel'ia cualanque nochi nopa israelitame tlen quicaquiyayaj Jes'us ipan nopa israelita tiopamitl. 29Huan motlalanque huan quiquixtijque Jes'us tlen inialtepe. Teipa quihuicaque hasta se tepexico tlen ipan quiquetztoyaj nopa altepetl. Quinequiyayaj quicuamimilose, 30pero Jes'us san panotiquisqui tlatlajco inijuanti huan yajqui. 31Huan Jes'us ajsito altepetl Capernaum ipan estado Galilea huan pejqui quinmacht'ia ipan israelita tiopamitl sesen s'abado, nopa tonal para israelitame ma mosehuica. 32Huan nochi tlen quitlacaquiliyayaj san quitlachiliyayaj ica itlamachtil pampa itlajtol quipixqui tequihuejcayotl. 33Huan itztoya se tlacatl ipan nopa israelita tiopamitl tlen quipixqui ipan itlacayo se iajaca Axcualtlacatl. Huan yajaya tzajtzic chicahuac huan quiilhui Jes'us: 34--Jes'us, tiNazaret ejquetl, xitechcahua. Ax huelis timomatise mohuaya. ¿Tihualajtoc para titechtzontlamiltis? Tojuanti timitzixmatij ajqueya ta. Ta titlatzejtzeloltic. Ta tiIcone Dios. 35Huan Jes'us quitlacahualti iajaca Axcualtlacatl huan quiilhui: --Amo ximolini. Xiquisa ipan ni tlacatl. Huan nopa ajacatl quimajcajqui nopa tlacatl tlalchi iniixtla nochi nopa tlacame, huan teipa quisqui ipan itlacayo huan ax tleno m'as quichihuili. 36Huan nochi nopa tlacame quisentlachiliyayaj huan pejque motlajtlan'iaj se ica seyoc: --¿Tlaque tlamantli tlajtoli camati ni Jes'us? Nempa itlajtol Jes'us quipiya tlanahuatili huan chicahualistli pampa quema quinnahuat'ia iajacahua Axcualtlacatl, nopa ajacame quineltoquil'iaj huan quisaj. 37Huan campa hueli ipan nopa tlali nechca altepetl Capernaum nochi tlacame quimatque tlen Jes'us quichihuayaya. 38Huan Jes'us moquetzqui huan quisqui ipan tiopamitl huan yajqui ichaj Sim'on Pedro. Huan quipanti imona Pedro mococohuayaya pampa chicahuac totoniyaya. Huan nochi tlen itztoyaj nepa quitlajtlanijque Jes'us ma quichicahua. 39Huajca Jes'us mopacho campa huetztoya huan quinahuati nopa tlatotonilotl ma quisa. Huan nopa tlatotonilotl quicajtejqui, huan nimantzi moquetzqui nopa sihuatl huan pejqui quintlamaca. 40Huan ica tiotlac nochi tlacame tlen quinpixtoyaj cocoyani ipan ininchajchaj quinhualicaque campa Jes'us. Huan itztoyaj cocoyani tlen quipixtoya miyac tlamantli cocolistli. Huan Jes'us quitlali ima ipan sesen nopa cocoyani huan quinchicajqui. 41Huan miyac tlacame nepa quinpixtoyaj iajacahua Axcualtlacatl. Huan inijuanti quisayayaj huan chicahuac quiijtohuayayaj tlen Jes'us: --Ta tiIcone Dios. Pero Jes'us quinnahuati nopa ajacame ma ayoc camatica pampa inijuanti quiixmatiyayaj yajaya itztoya nopa Cristo tlen Toteco quiijto quititlanisqu'ia. 42Huan quema tlanestihualayaya, Jes'us quisqui nopona, huan yajqui ipan nopa huactoc tlali campa ax tleno eli. Huan miyac tlacame quitemohuayayaj. Huan quema quipantijque, quiilhuijque ma mocahua ipan inintlal. 43Pero Jes'us quinilhui: --Monequi nojquiya niyas ipan sequinoc altepetini para niquinilhuis tlacame itlajtol Toteco huan niquinnotzas ma calaquica campa yajaya tlanahuat'ia, pampa ya nopa nechtitlantoc ma nijchihua. 44Huan Jes'us tlaixtontinenqui itlajtol Toteco ipan israelita tiopantini ipan campa hueli altepetl ipan estado Galilea.

will be added

X\