LUCAS 18

1Huan Jes'us quinilhui imomachtijcahua se huicaltili para quinnextilis cuali ma quisenhuiquilica momaijtoca ica Toteco hasta yajaya quinmacas tlen quitlajtlan'iaj. 2Huan quinilhui: "Ipan se altepetl itztoya se juez tlen ax quitlepanitayaya Toteco huan ax quinchihuiliyaya cuenta tlacame. 3Nojquiya itztoya se cahual toahui ipan nopa altepetl huan yajaya ajachica quitlajtlaniyaya ma quitlajtolsencahua ica tlen fiero icualancaitacahua quichihuilijtoyaj. 4Huan miyac huelta quitlajtlani nopa juez huan ax quinequiyaya quipalehuis, pero teipa nopa juez moilhui: 'Yonque ax nijtlepanita Dios huan ax niquinchihuil'ia cuenta tlacame, 5monequi nijchihuas tlen xitlahuac. Monequi nijtlajtolsencahuas queja tlen quinamiqui para ni cahual toahui. Yajaya tlahuel nechcuatoton'ia pampa ajachica huala nechtlajtlan'ia huan ya nechpastlami.' " 6Huan Tohueyiteco quinilhui: "Xijmachilica quejatza nopa ax cual juez moilhui quema quiijto quipalehuis nopa cahual toahui. 7Huan Toteco achi m'as nimantzi quintlajtolsencahuas itlacajhua tlen quintlapejpenijtoc intla inijuanti momaijtohuaj tonaya huan yohuali. Yajaya ax quinilcahuas huan quiijtos para mostla quichihuas. 8Nimechilhu'ia, nimantzi quinpalehuis. Pero quema na tlen niMocuepqui Tlacatl nimocuepas, ¿quesqui tlacame noja nechneltoquilise huan momaijtojtose ipan ni tlaltepactli?" 9Huan Jes'us quinilhui ni huicaltili para tlacame tlen mohueyimatiyayaj. Moilhuiyayaj ya itztoyaj xitlahuaque iixtla Toteco, huan yeca quincocoliyayaj sequinoc pampa quinitayayaj para ax cuajcualme. Huan Jes'us quiijto: 10"Ome tlacame yajque ipan hueyi tiopamitl para momaijtotij ica Toteco. Se eliyaya se fariseo huan seyoc se tlacatl tlen tlainanqui impuesto huan momatqui tlacajcayahua. 11Huan nopa fariseo moquetzqui huan momaijto huan quiijto: 'Toteco Dios, nimitztlascamati pampa ax niitztoc queja sequinoc. Inijuanti tlaxtequij, momecat'iaj huan quichihuaj tlen ax cuali. Nojquiya nipaqui pampa ax niitztoc queja ni tlacatl tlen nonechca itztoc tlen tlainama impuesto huan tlacajcayahua. 12Na nimosahua ompa ipan se samano huan nimitzmaca majtlactli por ciento tlen nochi tlen nijpiya.' 13Pero nopa tlacatl tlen tlainanqui impuesto moquetzqui ica huejca huan mohuijtzonqui pampa mopinahuayaya quitlalanas itzonteco para quitlachilis elhuicac. Huan yajaya moyoltejtejtzonayaya ica cuesoli huan quiijto: 'Toteco xinechtlasojtla pampa miyac nijhuica tlajtlacoli moixtla.' 14Na nimechilhu'ia, Toteco quitlapojpolhui nopa tlacatl tlen tlainanqui impuesto huan yajaya yajqui ichaj xitlahuac iixtla Toteco, pero nopa fariseo, axtle. Pampa nochi tlen mohueyimatij, Toteco quinpinahualtis huan nochi tlen moicnonequij iixtla Toteco, Toteco quinhueyitlalis." 15Huan sihuame quinhualicayayaj campa Jes'us ininpilconehua para ma quintlalili ima ininpani para ma quintiochihua. Huan imomachtijcahua Jes'us quinitaque huan quinajhuaque. 16Pero Jes'us quinnotzqui imomachtijcahua huan quinilhui: --Xiquincahuilica coneme ma hualaca campa na. Amo xiquintzacuilica, pampa Toteco quinnahuatis ipan ininyolo tlacame tlen nechsel'iaj queja ni coneme nechsel'iaj. 17Huan nel'ia nimechilhu'ia ajqueya ax quisel'ia Toteco huan ax quicahuil'ia ma quinnahuati ipan iyolo queja ni coneme quichihuaj, ax calaquis campa Toteco tlanahuat'ia. 18Huan hualajqui se tominpixquetl huan quitlajtlani Jes'us: --Ticuali tlamachtijquetl, ¿tlaque cuali monequi nijchihuas para Toteco ma nechmacas yolistli yancuic para nochipa? 19Huan Jes'us quiilhui: --¿Tijmati tlaque quiijtosnequi para tinechnotza nicuali? San Toteco Dios itztoc cuali. 20Tijmati itlanahuatil Toteco: 'Amo ximomecati, amo xitemicti, amo xitlaxtequi huan ax quema xiteistlacahui. Xiquintlepanita motata huan monana.' 21Huan yajaya quiilhui Jes'us: --Nochi ya ni nijchijtihualajtoc hasta quema niconetzi nieliyaya. 22Huan quema Jes'us quicajqui ni, quiilhui: --Intla melahuac tlen tiquijtohua, san se tlamantli noja mitzpolohua. Xijnamacati nochi tlen moaxca huan xiquinmaca nopa tomi tlen teicneltzitzi huan queja nopa tijpiyas tlen ipati para moaxca nepa elhuicac. Huan teipa xihuala huan xinechtoquili. 23Pero quema nopa tlacatl quicajqui tlen Jes'us quiilhui, pejqui mocuesohua pampa nel'ia quipixtoya tomi. 24Huan Jes'us quitlachili huan quiijto: --Nel'ia ohui para tlacame tlen tominpiyaj quicahuilise Toteco ma quinnahuati ipan ininyolo. 25Ohui para se hueyi tlapiyali queja se camello ma pano ipan iixtiyol se huitzmalotl, pero noja m'as ohui para se tlacatl tlen tominpiya calaquis campa Toteco tlanahuat'ia. 26Huan inijuanti tlen quicajque quiilhuijque: --Huajca ¿ajqueya huelis momaquixtis tlen itlajtlacolhua? 27Huan Jes'us quinilhui: --Nopa tlen tlacame ax hueli quichihuaj, Toteco quena, hueli quichihua. 28Huan Pedro quiilhui: --Xiquita, tojuanti tijcajtejtoque nochi tlen tijpixtoyaj para timitztoquilise. 29Huan Jes'us quinilhui: --Nel'ia nimechilhu'ia nochi tlen quicajtejtoc ichaj, o isihua, o iicnihua, o itatahua o iconehua para quichihuas tlen Toteco quinahuat'ia, 30quiselis miyac m'as ipan ni tonali huan ipan nopa tonali tlen huala, quipiyas yolistli tlen yancuic para nochipa. 31Huan Jes'us quinhuicac nopa majtlactli huan ome imomachtijcahua iyoca huan quinilhui: "Xiquitaca, amantzi tiyohuij altepetl Jerusal'en campa panos nochi tlen nopa tiocamanalohuani huejcajquiya tlajcuilojque para nopantis na tlen niMocuepqui Tlacatl. 32Tlacame nechtemactilise ininmaco sejcoyoc ehuani huan nechhuihuiitase huan nechchihuilise tlen fiero. Nechchajchase, 33huan nechhuijhuitequise huan nechmictise, pero ica eyi tonali nimoyolcuis." 34Huan imomachtijcahua ax quimachilijque tlen quinilhuiyaya pampa Toteco quitlatiyaya tlen Jes'us quiijtohuayaya para ma ax quimachilica. 35Huan quema Jes'us monechcahuiyaya altepetl Jeric'o, itztoya nepa se popoyotzi tlen mosehuiyaya ojteno motlaejehuiyaya tlen ica panos. 36Huan quema nopa popoyotzi quincajqui nochi nopa miyac tlacame tlen panohuayayaj ihuaya Jes'us, huajca quintlajtlani ajqueya huala. 37Huan tlacame quiilhuijque para hualayaya Jes'us tlen ehua altepetl Nazaret. 38Huan huajca nopa popoyotzi chicahuac quiijto: --¡Jes'us, tiiixhui Tlanahuatijquetl David tlen huejcajquiya, xinechtlasojtla! 39Huan nopa tlacame tlen tlayacanayayaj quiajhuaque huan quiilhuijque ma ayoc molini, pero yajaya achiyoc chicahuac tzajtzic: --¡Jes'us tiiixhui David, xinechtlasojtla! 40Huan Jes'us moquetzqui huan quinahuati se ma quihualiquili nopa popoyotzi. Huan quema ajsico, Jes'us quitlajtlani: 41--¿Tlaque tijnequi ma nimitzchihuili? Huan nopa tlacatl quiilhui: --NohueyiTeco, nijnequi nitlachiyas sampa. 42Huan Jes'us quiilhui: --¡Xitlachiya! Ya timochicajtoc pampa tinechneltocac. 43Huan nimantzi huelqui tlachiya cuali, huan quitoquili Jes'us ipan ojtli, quihueyichijtiyajqui Toteco Dios. Huan nochi nopa tlacame tlen quiitaque tlen panoc nojquiya quipaquilismacayayaj Toteco.

will be added

X\