LUCAS 17

1Huan Jes'us quinilhui imomachtijcahua: "Nochipa oncas tlamantli tlen quinyoltilanas tlacame ma tlajtlacolchihuaca. Pero se hueyi tlatzacuiltili quichiyas nopa tlacatl tlen quiyoltilanas seyoc. 2M'as cuali quema aya quichihua nopa hueyi tlajtlacoli, ma moquechilpi imetl huan ma moisahuiti ipan hueyi atl para ax quichihuilis ma tlajtlacolchihua se tlen noaxca tlen ax quipiya fuerza. 3Ximomocuitlahuica ica tlen inquichihuaj. "Intla moicni mitzixpanos, huajca xiquilhui tlen quichijtoc. Huan intla yajaya moyolcuepa ica tlen quichijtoc, huajca xijtlapojpolhui. 4Huan intla yajaya mitzixpanos chicome hueltas ipan se tonal huan sesen huelta mocuepas huan quiijtos: 'Xinechtlapojpolhui tlen ax cuali nimitzchihuilijtoc', huajca sesen huelta xijtlapojpolhui." 5Huan itlayolmelajcahua Tohueyiteco Jes'us quiilhuijque: --Xitechpalehui para m'as ma timitzneltoquilica. 6Huan Tohueyiteco quinilhui: --Se mostaza xinachtli eltoc nel'ia pilsiltzi pero teipa mochihua hueyi. Huan intla queja nopa mohueyilis imotlaneltoquilis, huajca huelis inquiilhuise ni hueyi cuahuitl: 'Ximoquixti huan ximotoca ipan hueyi atl', huan ni cuahuitl inmechneltoquilis. 7"Intla itequipanojca se tlacatl tlamehua ipan imil o quinmocuitlahu'ia iborregojhua, huan teipa quitlamiltis itequi huan mocuepas ichaj, iteco ax quiilhuis: 'Xihuala huan ximosehui para titlacuas.' 8¡Axtle! Quema yajaya hualas, iteco quiilhuis: 'Xijsencahua tlen nijcuas huan xinechtequili notlacualis huan teipa ta titlacuas.' 9Huan teipa iteco ax monequi quitlascamatis pampa quichijqui tlen quinahuati ma quichihua pampa quejnopa itequi para quichihuas mojmostla. 10Huan queja nopa eltoc ica imojuanti pampa initequipanojcahua Toteco, huan quema inquichihuaj nochi tlen yajaya inmechnahuat'ia, xiquilhuica: 'Toteco, ax quinamiqui titechtlascamatis pampa tojuanti timoaxcahua huan san tijchijtoque tlen quinamiqui tijchihuase.' " 11Huan Jes'us noja nejnemiyaya ipan ojtli para altepetl Jerusal'en huan panotinenqui nopa inepantipa estado Galilea huan estado Samar'ia. 12Huan calajqui ipan se rancho huan hualajque quinamiquicoj majtlactli tlacame tlen palaniyayaj inintlacayo. Inijuanti mohuejcaquetzque queja monequiyaya ipampa inincocolis, 13huan inijuanti quitzajtzilijque: --Jes'us, titlamachtijquetl, xitechtlasojtla huan xitechchicahua. 14Huan quema Jes'us quinitac, quinilhui: --Xiyaca ximonextitij iixtla nopa totajtzi para quimatis inmochicajtoque. Huan quema yohuiyayaj ipan ojtli campa totajtzi, nochi mochicajque tlen inincocolis yonque eltoya nelfiero. 15Huan se tlen nopa tlacame momacac cuenta para Jes'us ya quichicajtoya, huajca mocuepqui, tlahuel quihueyichijtihualayaya Toteco Dios. 16Huan yajaya motlancuaquetzqui iicxitla Jes'us huan quitlascamatqui. Huan nopa tlacatl eliyaya se Samar'ia ejquetl. 17Huan Jes'us quiijto: --¿Ax niquinchicajqui majtlactli tlacame? ¿Canque itztoque nopa seyoc chicnahui? 18¿Axaca m'as quinequiyaya mocuepas para quihueyichihuas Toteco, san ni sejcoyoc ejquetl? 19Huan Jes'us quiilhui nopa tlacatl: --Ximoquetza huan xiya mochaj. Timochicajqui pampa tinechneltocac. 20Huan sequin fariseos quitlajtlanijque Jes'us quema hualas Toteco para tlanahuatis ipan ni tlaltepactli. Huan Jes'us quinnanquili huan quinilhui: --Quema Toteco tlanahuatis, ax oncas tlanescayotl tlen huelis inquiitase. 21Huan axaca quiijtos: 'Xiquitaca, nicani Toteco tlanahuat'ia' o 'Nepa Toteco tlanahuat'ia', pampa Toteco tlanahuat'ia ipan ininyolo tlacame. 22Huan Jes'us quinilhui imomachtijcahua: --Ajsis tonali quema inquinequise innechitase na tlen niMocuepqui Tlacatl huan inquinequise sampa initztose nohuaya, pero ax huelis innechitase. 23Huan tlacame inmechilhuise: 'Xijtlachilitij nepa itztoc' o 'Xijtlachiliquij nica itztoc', pero amo xiyaca xinechtemotij. 24Queja nochi hueli quiitaj quema tlapetlani ipan elhuicactli huan tlahu'ia campa hueli, queja nopa nojquiya nochi nechitase na tlen niMocuepqui Tlacatl ipan nopa tonal quema nimocuepas ipan tlaltepactli. 25Pero achtohui monequi para tlahuel nitlaijiyohuis, huan tlacame tlen ama itztoque nechhuejcamajcahuase. 26"Quema na tlen niMocuepqui Tlacatl nimocuepas ipan tlaltepactli elis queja eltoya quema No'e itztoya. 27Ipan nopa tonali quema No'e itztoya, tlacame tlacuayayaj, tlaiyayaj, mosihuajtiyayaj huan quisencahuayayaj para iniichpocahua ma monamictica. Quichihuayayaj nochi tlen ipa momajtoyaj quichihuaj hasta nopa tonal quema No'e calajqui ipan cuacanahua. Huan nopa tonal pejqui tlaahuetzi huan tlatemic campa hueli hasta quintlamimicti nochi tlacame. 28"Huan ihuical panoyaya quema Lot itztoya ipan tlaltepactli. Tlacame tlacuayayaj, tlaiyayaj, tlacohuayayaj, tlanamacayayaj, tlatojtocayayaj huan quichihuayayaj ininchaj. 29Pero ipan nopa tonal quema Lot quisqui altepetl Sodoma, huetzqui tlitl ihuaya azufre huan quintlamitlati nochi nopa tlacame tlen itztoyaj nopona. 30Huan ihuical elis nojquiya ipan nopa tonal quema na tlen niMocuepqui Tlacatl nimonextis, ax oncas tlanescayotl para inmechilhuis intla se tlajqu'ia panos. 31"Ipan nopa tonal intla se itztos icalpani, ma cholo nimantzi. Ma ax temos huan calaquis calijtic para quihuicas se tlenijqui. Huan inijuanti tlen itztose ipan ininmil ma ax mocuepase ininchajchaj. 32Xiquilnamiquica tlen ipantic isihua Lot. 33Nojquiya nimechilhu'ia intla se momanahuisnequi para ax miquis nopampa, quipolos ialma. Huan ajqueya ax majmahui miquis nopampa, quimaquixtis ialma. 34"Huan nimechilhu'ia, ipan nopa tlayohua, ome itztose ipan se tlapechtli, huan nijnahuatis notequipanojca ma quihuica se huan ne se ma quicajtehua nopona. 35Huan intla itztose ome sihuame tlen tisij san sejco, yajaya quihuicas se huan ne seyoc quicajtehuas. 36Huan ome tlacame tequititinemise ipan mili, huan notequipanojca no quihuicas se huan nopa seyoc quicajtehuas." 37Huan inijuanti quitlajtlanijque: --Tohueyiteco, ¿canque panos nochi ya ni? Huan Jes'us quinnanquili: --Queja nochi quiitaj quema mosentil'iaj tzopilome campa huetztoc se mijcatzi, nochi quiitase ya ni.

will be added

X\