LUCAS 15

1Huan monechcahuiyayaj campa Jes'us para quitlacaquilise nochi nopa tlacame tlen tlainanque impuesto huan tlen miyac tlajtlacoli quichijtoyaj. 2Huajca nopa fariseos huan tlamachtiani tlen itlanahuatil Mois'es pejque quiteilhu'iaj huan quiijtojque: --Ni tlacatl Jes'us quinsel'ia tlacame tlen huejhueyi tlajtlacolchihuaj huan hasta tlacua ininhuaya. 3Huajca Jes'us quinpohuili ni huicaltili: 4"Intla se tlen imojuanti quinpiyasqu'ia cien borregojme huan se polihuisqu'ia, ¿ax quicahuasqu'ia nopa noventa y nueve campa potrero huan contemosqu'ia nopa se tlen polijtoc hasta quipantis? 5Huan quema quipantis, quiajcolpantlalis ica paquilistli huan quihuicas ichaj. 6Huan quema ajsiti ichaj, quinnotzas ihuampoyohua huan icalnechcahua huan quinilhuis: 'Xipaquica nohuaya pampa ya nijpanti nopilborrego tlen mocuapolojtoya.' 7Nimechilhu'ia, ihuical eltoc nepa elhuicac. Nepa onca m'as paquilistli ica se tlajtlacolchijquetl tlen moyolcuepa huan quicahua itlajtlacolhua, huan ax queja ica noventa y nueve tlen moilhu'iaj ya itztoque xitlahuaque iixtla Toteco huan ax monequi moyolcuepase. 8"Huan intla se sihuatl quipiyasqu'ia majtlactli huejhueyi plata tomi huan quipolosqu'ia se, ¿ax quitlatisqu'ia se tlahuili, huan tlachpanasqu'ia cuali calijtic huan quitemosqu'ia cuali hasta quipantis? 9Huan quema quipantis, huajca quinnotzas ihuampoyohua huan icalnechcahua huan quinilhuis: 'Xipaquica nohuaya pampa ya nijpanti nopa tomi tlen nijpolojtoya.' 10Huan nimechilhu'ia, queja nopa paquij ielhuicac ejcahua Toteco quema se tlajtlacolchijquetl moyolcuepa huan quicajtehua itlajtlacolhua." 11Huan Jes'us quinilhui: "Se tlacatl quinpixtoya ome itelpocahua, 12huan yajaya tlen teipa ejquetl quiilhui itata: 'Pap'a, xinechmaca ama nochi tlen elis noaxca quema timiquis.' Huajca nopa tetat quitlajcoxelo tlen quipixtoya, huan quimacac tlen quiaxcatisqu'ia. 13Huan ax huejcajqui nopa telpocatl tlen teipa ejquetl quisentili nochi tlen iaxca huan quistejqui para yas huejca ipan seyoc tlali. Huan nepa san quinenpolo nochi itomi ica tlamantli tlen fiero. 14Huan quema ya quitlamiltijtoya nochi itomi, ajsico se hueyi mayantli ipan nopa tlali, huan nopa telpocatl ax quipixqui tomi para itlacualis. 15Huan quitemoto tequitl ica se tlen nopona ehuayaya, huan yajaya quititlanqui ma quintlamacati ipitzohua. 16Huan nopa telpocatl nel'ia mayanayaya hasta quinequiyaya quicuas nopa epetlatl tlen quicuayayaj pitzome, pampa axaca quimacayaya tlen quicuas. 17Pero quema pejqui motejtemo, quiilnamijqui quejatza eltoya nepa ichaj itata huan moilhui: 'Nochi itequipanojcahua notata quipiyaj hasta mocahua tlen quicuase, huan na nica nimayancamictinemi. 18Niquisas nica huan niyas campa notata huan niquilhuis: Pap'a, na nitlajtlacolchijtoc iixtla Toteco Dios huan moixtla. 19Ayoc quinamiqui para tinechitas queja nimocone. San xinechcahuili ma nimitztequipano.' Queja nopa moilhui para quiilhuis itata. 20"Huan yajaya quisqui huan yajqui ichaj itata. Pero quema aya onajsiyaya ichaj, itata quihuejcaitac huan quitlasojtlac. Huan itata motlalojtejqui, huan quicuanajnahuajqui huan quitzoponi. 21Huan nopa telpocatl quiilhui: 'Pap'a, nitlajtlacolchijtoc iixtla Toteco Dios huan moixtla, huan ayoc quinamiqui para tinechitas queja nimocone.' 22"Pero itata quinnotzqui itequipanojcahua huan quinilhui: 'Nimantzi, xijhualicaca nopa yoyomitl tlen achi cuali para ma moquenti notelpoca. Huan xijhualicaca se anillo para ima huan xijhualicaca tecactli para ma motlalili. 23Huan xijhualicaca nopa pilhuacaxtzi tlen achi m'as tomahuac huan xijmictica. Ma titlacuaca huan ma tiilhuichihuaca, 24pampa ni nocone eltoya queja mictoya, huan ama queja moyolcuitoc. Polijtoya huan ama ya tijpantijque.' "Huajca inijuanti pejque ilhuichihuaj. 25"Huan iachtohui ejca cone tequitiyaya mila. Huan quema monechcahuico ichaj, quicajqui tlatzotzonayayaj huan mijtotiyayaj. 26Huan quinotzqui se itequipanojca huan quitlajtlani tlaque oncayaya ipan ichaj. 27Huan itequipanojca quiilhui: 'Moicni mocuepqui huan motata quimicti nopa pilhuacaxtzi tlen achi m'as tomahuac pampa mocuepquiya ica cuali huan ax tleno m'as fiero ipantic.' 28"Huan nopa achtohui ejquetl nel'ia cualanqui huan ax quinequiyaya calaquis ichaj. Huan itata hualajqui huan quiilhui ica cuali ma calaqui. 29Pero nopa achtohui ejquetl quiilhui itata: 'Xiquita, nimitztequipanojtoc para miyac xihuitl huan nochipa nijchijtoc tlen tinechnahuatijtoc, pero ax quema tinechmacac se chivo para ma niilhuichihua ica nohuampoyohua. 30Pero quema mocuepqui ne motelpoca tlen quiahuiloto nochi motomi ica ahuilnenca sihuame, ta tijsel'ia ica cuali. Huan tijmictijtoc nopa pilhuacaxtzi tlen achi tomahuac para ma quicua.' 31"Huan itata quiilhui: 'Nocone, nochi tonali tiitztoc nohuaya huan nochi tlen nijpiya moaxca. 32Pero monequi tiilhuichihuase huan tijpiyase paquilistli pampa eltoya queja ya mictoya moicni huan ama eltoc queja moyolcuitoc sampa, huan polijtoya huan ama ya tijpantijque.' "

will be added

X\