LUCAS 14

1Huan se s'abado nopa tonal quema israelitame mosehu'iaj, Jes'us yajqui tlacuato ichaj se inintlayacanca fariseos, huan nopa fariseos quitlachiliyayaj ajachica. 2Huan itztoya nopona iixtla Jes'us se tlacatl tlen tejtemiyaya. 3Huan Jes'us quintlajtlani nopa tlamachtiani tlen itlanahuatilhua Mois'es huan nopa fariseos: --¿Itlanahuatilhua Mois'es techcahuil'iaj ma tiquinchicahuaca tlacame ipan ni tonal para ma timosehuica o ma ax tiquinchicahuaca? 4Huan inijuanti ax molinijque. Huan Jes'us quimaitzqui nopa tlacatl huan quichicajqui. Huan quiilhui ma yohui. 5Huan teipa Jes'us quinilhui: --Intla imoburro o imotoro tlen tlaxahua huetzisqu'ia ipan se tlacoyoctli, ¿ax inquiquixtisqu'iaj nimantzi yonque ipan s'abado? 6Huan inijuanti ax tleno quinanquilijque. 7Huan Jes'us quiitac nopa tlacame quitlapejpeniyayaj nopa siyas tlen m'as quipixqui tlatlepanitacayotl campa mesas, huajca pejqui quinpohuil'ia se huicaltili tlen se tlacatl tlen quinnotztoya tlacame ipan se tlacualistli. Quinilhui: 8--Quema se inmechnotzas ipan se tlacualistli tlen nenamictili, amo xijtemoca nopa siya campa quipiya m'as tlatlepanitacayotl pampa huelis teipa ajsis seyoc tlacatl tlen no quinotztoque tlen achi m'as monequi quitlepanitase. 9Huan huelis monequis para yajaya tlen inmechnotztoc hualas campa ta huan mitzilhuis: 'Xijmaca mosiya ni tlacatl tlen ajsico.' Huan nel'ia timopinahuas huan monequis tijtemoti tlen hueli siya para ipan timosehuis. 10Quema se inmechnotzas xiyaca ipan se tlacualistli, achi cuali ximosehuica campa ax m'as cuali huan teipa huelis hualas yajaya tlen mitznotzqui huan mitzilhuis: 'Nohuampo, ximosehuiqui ipan nopa siya tlen achi cuali.' Huan queja nopa mitzhueyitlalis iniixtla nochi tlen mosehu'iaj campa mesa. 11Pampa tlacame tlen mohueyimatij ica ininselti ama, teipa Toteco quinpinahualtis. Huan tlen moicnonequij ama, Toteco teipa quinhueyitlalis. 12Huan nojquiya Jes'us quiilhui nopa tlacatl tlen quinnotztoya para ma tlacuatij ichaj: --Quema titemaca se tlacualistli, amo xiquinnotza mohuampoyohua, o moicnihua, o mocalnechcahua tlen m'as quipiyaj tomi, pampa inijuanti teipa mitznotzase ipan se tlacualistli para mitzcuepilise nopa tlacualistli. 13Pero quema tijpiya se tlacualistli, xiquinnotza tlen teicneltzitzi huan tlen macototique huan tlen metzcuachotique huan tlen popoyotzitzi, 14pampa inijuanti ax hueli mitzcuepilise. Huan Toteco mitztiochihuas huan mitztlaxtlahuis quema moyolcuise nochi tlacame tlen itztoque xitlahuaque iixtla. 15Huan se tlacatl tlen mosehuiyaya campa mesa ihuaya Jes'us quicajqui tlen quiijto huan quiilhui: --Cuali quipantis tlen mosehuis huan tlacuas nepa campa Toteco Dios tlanahuat'ia. 16Huan Jes'us quiilhui: --Se tlacatl temacayaya se hueyi tlacualistli huan quinnotzqui miyac ma tlacuatij. 17Huan quema cualtitoyaya nochi tlacualistli, huajca quititlanqui itequipanojca ma yohui ma quinilhuiti nopa tlanotzalme: 'Xihualaca pampa nochi ya tlacuajtlalili.' 18Huan nochi nopa tlanotzalme pejque motecht'iaj. Nopa tlen achtohui quiilhui nopa tlatequipanojquetl: 'Nijcojqui se tlali huan monequi niyas niquitati. Xinechtlapojpolhui, pero ax huelis niyas.' 19Huan seyoc quiilhui: 'Niquincojtoc macuili pares torojme para tlapoxahuase huan monequi niyas niquinyejyecoti intla tequitij cuali. Xinechtlapojpolhui, pero ax huelis niyas campa nopa tlacualistli.' 20Huan seyoc quiilhui: 'Nel amanoc nimosihuajti huan yeca ax huelis niyas.' 21"Huan nopa tlatequipanojquetl mocuepqui huan quiyolmelajqui iteco nochi tlen quinanquilijque. Huan nopa tlanotzquetl cualanqui pampa axaca hualajqui. Huajca quiilhui itequipanojca: 'Nimantzi xiya tianquis huan xiya ipan nochi callejtipa ipan toaltepe, huan xiquinhualica nochi tlen teicneltzitzi, huan tlen macototique, huan tlen metzcuachotique huan tlen popoyotzitzi para ma hualaca ipan totlacualis.' 22Huan nopa tlatequipanojquetl yajqui huan teipa mocuepqui huan quiilhui: 'Noteco, ya nijchijqui tlen tinechnahuati huan miyac niquinhualicac, pero noja mocahua siyas.' 23Huan nopa tecojtli quiilhui itequipanojca: 'Xiya ipan ojoteno huan ipan miltini huan xiquinfuerzajhuiti tlacame ma hualaca para ma temi nochaj. 24Huan nimitzilhu'ia, niyon se inijuanti tlen achtohui niquinnotzqui ax quiyecos notlacualis.' " 25Huan tlahuel miyac tlacame nejnemiyayaj ihuaya Jes'us ipan ojtli, huan yajaya moicancuepqui huan quinilhui: 26"Intla se quinequi nechtoquilis, monequi nechicnelis miyac huan ax queja quiicnel'ia itata, huan inana, huan isihua, huan iconehua huan iicnihua. Quena, monequi tlahuel nechicnelis m'as miyac huan ax queja ya moicnel'ia, pampa intla ax queja nopa nechicnel'ia, ax huelis elis nomomachtijca. 27Nomomachtijca monequi elis queja se tlacatl tlen quihuica icuamapel para ipan miquis. Intla ax queja nopa nechtoquil'ia mocualtlalijtoc para miquis pampa nechneltoca na, ax hueli elis nomomachtijca. 28"Intla se tlen imojuanti quinequi quichihuas se hueyi cali, huajca achtohui mosehuis huan quipohuas quesqui tomi monequis para quimatis intla quiaxil'ia para quitlamiltis. 29Pampa intla ax moilhu'ia quesqui ipati achtohui, huelis san quitzinpehualtis nopa cali huan tlamis itomi. Huan nochi quiitase para ax huelqui quitlamilti huan quihuihuiitase. 30Quiijtose: 'Ne tlacatl pejqui quichihua ichaj, pero ax huelqui quitlamilti.' 31"Huan intla itztoc se tlanahuatijquetl tlen quinequi motehuis ihuaya seyoc, ¿ax mosehuis huan moilhuis achtohui intla nopa diez mil soldados tlen quinpiya huelis quitlanise nopa seyoc tlanahuatijquetl tlen quinpixtoc veinte mil soldados? 32Huan intla quiitas para ax huelis quintlanise, quema quihuejcaitas nopa tlanahuatijquetl huala ica isoldados, nimantzi quintitlanis tlacame ma quicamahuitij, huan mosencahuase quejatza huelis mosejseltise inincualancayo. 33Huajca axaca huelis elis nomomachtijca intla ax quicahua nochi tlen quipiya para iaxca. 34"Istatl nel'ia cuali, pero intla ayoc poyec, ¿quejatza huelis tlapoyeltisoc sampa? 35Intla ayoc poyec ax hueli tijtequihuise para tlacualistli. Niyon ax hueli tijtequihuise ipan tlali, o ipan yamanic tlali para toctli. San monequi tijtepehuase. Nochi imojuanti inquipiyaj imonacas, huajca xijtlacaquilica tlen nimechilhu'ia."

will be added

X\