LUCAS 12

1Quema Jes'us quiijtohuayaya nochi ni tlajtoli, mosentilijtoyaj miyac miles tlacame huan tlahuel mocuatetzopayayaj. Huan Jes'us quincamahui imomachtijcahua iniixtla nopa miyac tlacame huan quinilhui: "Ximotlachilica para ax inquiselise inintlasonejcayo fariseos pampa inijuanti quipiyaj ome ininxayac huan huelis inmechchihuilise nojquiya xijpiyaca ome imoxayac. 2Nochi tlen tlacame quichihuaj ixtacatzi ama, teipa monextis. Huan nochi tlen ama ax nesi, teipa nochi quimatise. 3Huan nochi tlen inquiijtojtoque quema tlayohua, nochi quicaquise tonaya. Huan tlen ixtacatzi inmoilhuijtoque ipan imocalijtic, teipa tlacame moquetzase huejcapa huan chicahuac quiijtose. 4"Nohuampoyohua ya ni nimechilhu'ia. Amo xiquinimacasica tlacame. Inijuanti san hueli inmechmictise, pero ax tleno m'as hueli inmechchihuilise. 5Pero nimechilhuis ajqueya monequi xiquiimacasica. Xiquimacasica Toteco, pampa yajaya huelis inmechmictis huan nojquiya quipiya tequihuejcayotl para quititlanis imoalma nepa mictla. Quena, nimechilhu'ia, yajaya tlen monequi inquimacasise. 6"Yonque quinnamacaj macuili piltototzitzi para ome centavos, Toteco ax quiilcahua niyon se tlen inijuanti. 7Huan ica imojuanti, miyac m'as Toteco inmechmocuitlahu'ia hasta quimati quesqui imotzoncal inquipiyaj. Huajca amo ximomajmatica. Achi m'as imopati iixtla Toteco que miyac totome. 8"Huan nimechilhu'ia, nochi tlacame tlen nechneltocaj huan tepohuil'iaj para nechneltocaj, na tlen niMocuepqui Tlacatl, niquinilhuis ielhuicac ejcahua Toteco para inijuanti noaxcahua. 9Pero intla se teilhu'ia para ax nechneltoca, huajca na nojquiya niquinilhuis ielhuicac ejcahua Toteco para yajaya ax noaxca. 10"Intla se nechtlaijilhu'ia na tlen niMocuepqui Tlacatl ica tlen ax cuali, Toteco huelis quitlapojpolhuis. Pero intla se quitlaijilhuis Itonal Toteco, ax quema oncas tlapojpolhuili. 11"Huan quema tlacame inmechhuicase iniixtla tlayacanani ipan toisraelita tiopa huan iniixtla sequinoc tlanahuatiani huan tequihuejme, amo ximocuesoca tlaque inquiijtose huan quejatza inmomanahuise, 12pampa Itonal Toteco inmechnextilis ipan nopa tlalochtli tlaque monequi inquiijtose." 13Huan se tlen nopa miyac tlacame quiilhui Jes'us: --Tlamachtijquetl, xiquilhui noicni ma nechmaca tlen nechtocarohua tlen totata techcahuilijtejtoc. 14Huan Jes'us quiilhui: --Tate, axaca nechtequimacatoc para ma nieli imojuez huan ma nijtlajcoxelos tlen inquipiyaj. 15Huan teipa Jes'us quinilhui nopa miyac tlacame: --Xijpiyaca cuidado para amo xijnequica nochi tlamantli tlen onca, pampa axaca quipantis yolistli tlen yancuic pampa quipiya miyac tlamantli para iaxca. 16Huan Jes'us quinilhui se huicaltili: "Imil se tlacatl tlen tominpixqui nelnel'ia temacac miyac itlajca. 17Huan nopa tlacatl moilhui: '¿Tlaque nijchihuas? Ax nijpiya m'as cuescontini para ipan nicajcocuis ni pixquistli.' 18Huan teipa quiijto: 'Nijmajtojca tlaque nijchihuas. Nijxolehuas nocuesconhua huan nepa nijchihuas tlen m'as hueyi huan ipan nicajcocuis nochi ni pixquistli huan nochi tlen nijpiya.' 19Huan teipa nimoyolilhuis: 'Nijpiya miyac tomi huan tlacualistli tlen nechaxilis para miyac xihuitl, huajca san nimosehuis, huan nitlacuas huan nitlais queja nijnequis huan nitlamahuisos.' Quej nopa moilhuiyaya nopa tlacatl tlen tominpixqui. 20Pero Toteco Dios quiilhui: 'Tlacatl ta tihuihuitic. Ama ni yohuali timiquis, huan ¿ajqueya quiselis nochi tlen timoajcocuilijtoc?' 21Queja nopa eltoc ica tlacame tlen quiajcocuij miyac tlamantli para iniaxca ipan ni tlaltepactli, pero ax quipiyaj ininricojyo nopona iixtla Toteco." 22Huan Jes'us quinilhui imomachtijcahua: "Yeca nimechilhu'ia, amo ximocuesoca ica tlen inpanose. Amo ximocuesoca tlen inquicuase huan inquiise huan ica tlaque inmoyoyontise. 23Toteco inmechmacatoc yolistli huan ya nopa m'as ipati huan inmechmacas tlacualistli nojquiya. Yajaya inmechmacatoc imotlacayo tlen m'as ipati huan inmechmacas nojquiya tlen ica inmoyoyontise. 24Xiquintlachilica totome. Ax momilt'iaj, huan ax pixcaj huan ax quipiyaj inincuesconhua para ipan quiajcocuise inintlacualis, pero Toteco quintlamaca. Huan Toteco nojquiya inmechtlamacas pampa m'as imopati iixtla que totome. 25San tlapic para inmotequipachohuaj. Intla inmocuesohuaj pampa ax inhuejcapantique, ¿huelis inmoscaltise seyoc ome mistitl san pampa miyac inmocuesohuaj? Ax inhuelij. 26Huan intla ax inhuelij inquichihuaj se tlamantli pilsiltzi, ¿para tlen inmocuesohuaj ica sequinoc tlamantli? 27"Xijtlachilica nopa xochitl tlen moscalt'iaj campa hueli. Ax tequitij huan ax tlajtzomaj, pero nimechilhu'ia, nopa hueyi Tlanahuatijquetl Salom'on ica nochi iricojyo ax quipixqui iyejca que se xochitl. 28Toteco quinmacatoc xochitl iniyejca yonque san yoltoque se tlalochtli, huan tonil'ia pilintoc huan tlacame quitlatise. Huan miyac m'as Toteco inmechyoyontis yonque quentzi inquineltocaj. 29Huajca amo ximocuesojtinemica tlaque inquicuase huan tlaque inquise, 30pampa queja nopa motequipachohuaj tlacame tlen ax quiixmatij Toteco, pero Toteco imoTata quimati monequi nochi ni tlamantli para ica inmopanoltise. 31Achtohui xijtemoca para incalaquise ipan itlanahuatilis Toteco huan yajaya no inmechmacas nochi ni tlamantli tlen monequi para inpanose. 32"Amo ximomajmatica yonque ax inmiyaqui tlen innoaxcahua, pampa ica paquilistli Toteco inmechcalaquis campa yajaya tlanahuat'ia. 33Huajca xijnamacaca tlen imoaxca huan xiquinmajmacaca teicneltzitzi para inquiajcocuise tlen ipati nepa elhuicac. Tlen inquiajcocuise nepa ax ijtlacahuis huan ax quicuase cuatzipime, niyon tlaxtequini ax huelis quihuicase. 34Huan intla inquimatij tlen yejyectzi inmechchiya ipan elhuicac, huajca ipan imoyolo inquinequise initztose nepa. 35"Ximocualtlalijtoca huan xijpixtoca imotlahuilhua tlatlatoque para quema nihualas yonque niajsis tonaya o tlayohua. 36Xiitztoca queja tlatequipanohuani tlen quichiyaj ininteco ma mocuepa tlen itlacualis tlen nenamictili. Inijuanti ax cochij para huelis quicaltlapose nimantzi quema yajaya ajsis huan quinnotzas. Huan queja nopa nijnequi ximocualtlalijtoca huan xitlachixtoca para quema nihualas. 37Cuali quipantise nopa tlatequipanohuani tlen tlachixtoque quema mocuepas ininteco. Nel'ia nimechilhu'ia, ininteco moyoyontis queja se tlatequipanojquetl huan quinsehuis campa mesa huan quintlamacas. 38Huan yonque ininteco mocuepas tlajcoyohual o tlanestihuala, nopa tlatequipanohuani tlachixtoque, cuali inijuanti quipantise. 39Inquimatij intla se tlacatl quimatisqu'ia ipan tlaque hora ajsisqu'ia se tlaxtejquetl, huajca tlachixtosqu'ia huan ax quicahuilisqu'ia ma calaqui para tlaxtequis ipan ichaj. 40Huajca imojuanti nojquiya ximocualtlalijtoca pampa na tlen niMocuepqui Tlacatl nimocuepas ipan se hora quema ax innechchiyaj." 41Huan Pedro quitlajtlani Jes'us: --Tohueyiteco, ¿titechilhuijtoc ni huicaltili para tojuanti timomomachtijcahua ma timitzchiyaca o para nochi ni tlacame nojquiya ma mitzchiyaca? 42Huan Tohueyiteco quiilhui: "Nicamati tlen aqui hueli tlayacanca tequipanojquetl tlen temachtli huan tlalnamiqui tlen se tecojtli quitlalis para quinmocuitlahuis itequipanojcahua huan mojmostla quintlamacas tlen itztoque ipan ichaj. 43Cuali quipantis nopa tlatequipanojquetl intla quema iteco mocuepas, quipantis ya quitlamichijtoc nochi tlen quiilhui. 44Nimechilhu'ia iteco quitequitlalis ma quimocuitlahuis hasta nochi tlen iaxca. 45Pero intla se tlayacanquetl quiijtohua: 'Noteco huejcahuas.' Huan intla pehuas quinhuitequis nopa sequinoc tlatequipanohuani, huan pehuas neltlacuas, huan neltlais huan ihuintis, 46huajca iteco nimantzi mocuepas ipan se tonal quema nopa tlayacanca tlatequipanojquetl ax quichiya huan ipan se hora quema ax quimati. Huan nopa tecojtli chicahuac quitlatzacuiltis itlayacanca tequipanojca huan quiquixtis huan quitlalis campa quinamiqui para inijuanti tlen ax tlaneltocaj. 47"Huan se tlayacanca tlatequipanojquetl tlen quimatqui tlen iteco quinequiyaya huan ax mocualtlali huan ax quineltocac, huajca iteco quihuitequi nelchicahuac. 48Pero seyoc tlatequipanojquetl tlen ax quimatqui tlen iteco quinequiyaya, huan quichijqui tlen ax cuali, huajca quiselis se tlatzacuiltilistli tlen ax m'as hueyi. Pampa nochi tlen Toteco miyac quintlamajmaca, quintlajtlan'ia ma quichihuaca miyac tlen cuali. Huan intla Toteco quicahua miyac tequitl imaco se itequipanojca, miyac tequitl monequi quichihuas. 49"Nihualajtoc ipan ni tlaltepactli para nijlemenaltis se tlitl. Huan nijnequisqu'ia ma ajsiya nopa tonal. 50Nijpiya se tlaijiyohuilistli tlen monequi nijxicos huan nitlaijiyohuis hasta panos. 51Amo ximoilhuica nihualajtoc para ma onca tlasehuilistli ipan ni tlaltepactli. ¡Axtle! Nopampa, moxelose tlacame. 52Para ama huan teipa campa itztoque macuilme tlacame ipan se cali, moxelose. Eyi mocualanise ica nopa ome, huan nopa ome ica nopa eyi. 53Moxelose tetatme ica inintelpocahua huan tename ica iniichpocahua. Yeyojme moxelose ininhuaya iniyejnahua huan yenajme ica iniyeyojhua." 54Huan Jes'us nojquiya quinilhui nopa miyac tlacame: "Quema inquiitaj se mixtli tlen tlejcos campa temo tonati, nimantzi inquiijtohuaj: 'Tlaahuetzis', huan queja nopa pano. 55Huan quema inquimachil'iaj huala se ajacatl tlen sur, inquiijtohuaj: 'Nel'ia tlatotoniyas ama.' Huan queja nopa eli. 56Imojuanti inquipiyaj ome imoxayac. Inquimatij tlen quiijtosnequi tlen nesi ipan tlaltepactli huan elhuicactli, pero ax inquimachil'iaj tlen pano ipan ni tonali ica ni tlanescayotl tlen nijchihua. 57"Huan, ¿para tlen ax inmomacaj cuenta para monequi inquichihuase tlen xitlahuac? 58Quema mocualancaitaca mitzteilhu'ia ica se juez huan noja initztoque ipan ojtli para inajsitij, achi cuali xijcamahui para inquisencahuase nopa tlamantli san imojuanti. Pampa intla axtle, yajaya mitzhuicas iixtla juez huan nopa juez mitztemactilis ica polic'ias, huan nopa polic'ias mitztlalise ipan tlatzactli. 59Huan intla queja nopa panos, ax tiquisas hasta titlaxtlahuas nochi tlen monequi."

will be added

X\