LUCAS 11

1Se tonal Jes'us moiyocaquixti huan momaijto campa momatqui yohui huan quema tlanqui, se imomachtijca quinechcahuico huan quiilhui: --Tohueyiteco, xitechmachti quejatza ma timomaijtoca queja Juan quinmachti imomachtijcahua. 2Huan Jes'us quinilhui: --Quema inmomaijtose ica Toteco Dios, xiquilhuica: Toteco Totata, ta tlen tiitztoc nepa elhuicac. Nochi tlacame ma mitzhueyichihuaca. Xihuala xitlanahuatiqui nicani. Ma nochi tlacame quichihuaca tlen ta tijnequi nicani ipan ni tlaltepactli, queja nochi quichihuaj mopaquilis nepa elhuicac. 3Xitechmaca nopa tlacualistli tlen monequi mojmostla. 4Huan xitechtlapojpolhui totlajtlacolhua, queja nojquiya tiquintlapojpolhu'iaj tlen techixpanoj. Axaca xijcahuili ma techyoltilanas para titlajtlacolchihuase. Xitechmanahui ica nochi tlen ax cuali. 5Huan Jes'us quinilhui nojquiya: --Ximoilhuica intla tlajco yohual se tlen imojuanti yas ichaj se imohuampo huan quiilhuis: 'Nohuampo, xinechtlanejti se ome pantzi, 6pampa se nohuampo ajsico huan huejca huala, huan ax tleno nijpiya para nijmacas.' 7Huan huelis mohuampo mitznanquilis nicaltzajtoca huan mitzilhuis: 'Amo xinechcuatotoni. Ya nimocaltzactoc, huan noconehua ya motectoque nohuaya ipan tlapechtli. Ax hueli nimehuas para nimitzmacas tlen tijnequi.' 8Nimechilhu'ia, huelis yajaya ax mehuas para mitzmacas tlen tijtlajtlan'ia pampa tiihuampo, pero intla ax tijcahua tijtlajtlan'ia tlen tijnequi, yajaya mehuas huan mitzmacas nochi tlen tijtlajtlan'ia san pampa ayoc quinequis xijcuatotoni m'as. 9Huajca nimechilhu'ia, xijtlajtlanica Toteco para tlen inmechpolohua huan yajaya inmechmacas. Xijtemoca tlen inmechpolohua huan inquipantise. Xijnotzaca Toteco huan yajaya inmechcaltlapos. 10Pampa nochi tlen tlajtlanij, quisel'iaj. Huan nochi tlen quitemohuaj tlen quinpolohua, quipant'iaj. Huan nochi tlen quinotzaj Toteco, yajaya quincaltlapohua huan quinmaca tlen quitlajtlan'iaj. 11"Huan imojuanti tlen inquinpiyaj imoconehua, intla se mocone mitztlajtlanis se pantzi para quicuas, ax tijmacas se tetl. Huan intla mocone mitztlajtlanis se michi para quicuas, ax tijmacas se cohuatl. 12Huan intla mocone mitztlajtlanis se tejquistli, ax tijmacas se colotl ma quicua. 13Pampa yonque intlajtlacolchihuani, inquimatij inquinmacase imoconehua tlen cuali. Huajca achi m'as Totata tlen itztoc elhuicac quimati quinmacas iconehua tlen cuali. Huan yajaya quinmacas Toteco Itonal nochi tlen quitlajtlanise." 14Huan Jes'us quiquixti se iajaca Axcualtlacatl ipan se tlacatl tlen quichijtoyaj ma nonotiya. Huan quisqui nopa ajacatl, huan nopa tlacatl camatqui huan nochi nopa tlacame quisentlachilijque. 15Pero sequin inijuanti quiijtojque: "Axcualtlacatl, yajaya tlen quinyacana nochi ajacame quimaca chicahualistli ni Jes'us para ma quinquixti ajacame." 16Huan sequinoc tlacame quinequiyayaj quiyejyecose Jes'us huan quitlajtlaniyayaj ma quichihua se tlanescayotl tlen huala elhuicac para ma quinnextili ichicahualis. 17Huan Jes'us quimatqui inintlalnamiquilis huan quinilhui: "Intla tlacame ipan se tlali motlajcoxelohuaj, huajca ax hueli huejcahuas inintlal. Intla tlacame ipan se cali motlajcoxelohuaj, ax hueli itztose san sejco. 18Huan intla Axcualtlacatl motehuis ica ajacame tlen iaxcahua, ¿quejatza huelis huejcahuas itlanahuatil? Inquiijtohuaj niquinquixt'ia ajacame ica chicahualistli tlen Axcualtlacatl nechmaca. 19Pero intla niquinquixtisqu'ia ajacame ica ichicahualis, huajca ¿ica ajqueya ichicahualis quinquixt'iaj ajacame nopa tlacame tlen inmechtoquil'iaj? Inijuanti nojquiya inmechilhuise para se huihuiyotl tlen inmoilhu'iaj. 20Pero xijmachilica, intla yajaya Toteco Dios tlen nechmaca ichicahualis para niquinquixtis ajacame, huajca Toteco tlen tlanahuat'ia ipan ininyolo tlacame ya ajsico imohuaya. 21"Intla se tlacatl tlen tetixtoc queja Axcualtlacatl quipiya tepostli huan cuali quimocuitlahu'ia ichaj, huajca nochi tlen quipiya eltoc temachti imaco pampa axaca huelis quitlacuijcuilis. 22Pero intla hualasqu'ia seyoc queja na tlen m'as tetixtoc que ya huan quitlanis. Huajca quena, huelis quicuilis nochi itepos ipan tlen motemach'ia, huan huelis quihuicas nochi tlen quipixtoya huan quixelos ica sequinoc. 23"Tlen ax quinequi nechpalehuis, yajaya nocualancaitacahua. Huan se tlen ax quinsentil'ia tlacame campa na, quinsemana. 24"Quema quisa se ajacatl ipan se tlacatl, nemi ipan huactoc tlali quitemojtinemi campa mosehuis, huan intla ax tleno quipantis, moilhuis: 'Nimocuepas nochaj ipan nopa tlacatl campa niitztoya.' 25Huan quema mocuepas, quipantis iyolo nopa tlacatl eltos queja se cali tlen tlaxpantli huan tlen quipiya nochi cuali tlacualtlalili. 26Huajca nopa ajacatl yas huan quinhuicas chicome ajacame tlen m'as fiero que ya huan nochi nopa ajacame itztotij ipan nopa tlacatl. Huan nopa tlacatl mocahuas m'as fiero que achtohuiya." 27Huan quema Jes'us tlamachtiyaya ya ni, camatqui se sihuatl tlen itztoya ica nopa miyac tlacame, huan chicahuac quiijto: --Cuali quipanti nopa sihuatl tlen mitztlacatilti huan mitzchichiti. 28Pero Jes'us quinanquili: --M'as cuali quipant'iaj nopa tlacame tlen quicaquij itlajtol Toteco huan quineltoquil'iaj. 29Huan nopa tlacame pejque momiyaquil'iaj huan Jes'us quinilhui: --Intlacame tlen ama initztoque ax incuajcualme. Inquinequij ma nimechchihuili se tlanescayotl para ma nimechnextili ajqueya na. Pero ax nijchihuas. San Jon'as eltoc queja se tlanescayotl para imojuanti. 30Pampa queja Jon'as eltoya se tlanescayotl para tlacame ipan altepetl N'inive huejcajquiya, na tlen niMocuepqui Tlacatl nielis se tlanescayotl para intlacame tlen ama initztoque. 31Ipan nopa tonal quema Toteco tetlajtolsencahuas, nopa sihua tlanahuatijquetl tlen Sur moyolcuis huan inmechteilhuis tlen ama initztoque. Yajaya hualajqui tlahuel huejca quema itztoya ipan tlaltepactli pampa quinejqui quicaquis itlalnamiquilis Tlanahuatijquetl Salom'on. Pero na m'as nihueyi que Salom'on huan ax innechchihuil'iaj cuenta. 32Huan quema Toteco tetlajtolsencahuas, tlacame tlen huejcajquiya itztoyaj ipan altepetl N'inive moyolcuise huan inmechtlateilhuise, pampa inijuanti moyolcuepque quema Jon'as quincamahui itlajtol Toteco, pero na m'as nihueyi que Jon'as huan ax innechcaquij. 33"Axaca quitlat'ia se tlahuili huan quitlal'ia campa ax nesi. Axaca quitlalis cajontzala. Intla se tlacatl quitlat'ia se tlahuili, quitlal'ia ipan se tlahuil quetzali para nochi tlen calaquise ma quiitaca. 34Moixtiyol eltoc queja itlahuil motlacayo. Intla cuali moixtiyol, hueli tiquita tlen tijchihua. Pero intla ax cuali moixtiyol, tiitztoc queja se tlen tzactoc iyolo. Ax hueli tijmachil'ia notlajtol huan motlalnamiquilis mocahua ipan tzintlayohuilotl. 35Huajca ximotlachili tlen tijchihua ica nopa tlahuili tlen tijpiya pampa tijcactoc tlen melahuac. Xijcahua ma mitzyolpatla para ax timocuepas ipan tzintlayohuilotl. 36Pero intla nel'ia senquistoc tijsel'ia notlajtol, huajca nochi motlacayo huan motlalnamiquilis quipiyas tlahuili huan ax oncas tzintlayohuilotl mopan ta. Quena, elis queja se tlahuili tlen mitztlahuilijtos ipan motlalnamiquilis." 37Huan quema Jes'us tlanqui tlamacht'ia, itztoya nopona se fariseo tlen quinotzqui ma yohui tlacuati ichaj. Huan Jes'us yajqui huan mosehui campa mesa. 38Huan nopa fariseo quisentlachili quema Jes'us ax momajtequi miyac huelta queja quiijtojque itlanahuatilhua Mois'es ma quichihuaca tlacame. 39Pero Tohueyiteco quiilhui: --Infariseos inquipajpacaj imotlacayo, pero imoyolo ax inquipajpacaj. Ipan imoyolo san inmoilhu'iaj quejatza intlaxtequise huan tlen ax cuali hueli inquichihuase. 40¡Inhuihuitique! Toteco quichijqui imotlacayo, pero nojquiya quichijqui imoyolo. 41Xijchijtinemica tlen cuali ica nochi imoyolo huan imoyolo elis senquistoc tlapajpactic. 42"¡Inteicneltijque infariseos! Toteco tlahuel inmechtlatzacuiltis. Inquimacaj Toteco majtlactli por ciento tlen nochi tlen inquipiyaj hasta nopa alojhueno huan ruda huan nochi xihuitini tlen m'as pilsiltzi ipan imoxochimil, pero ax inquichihuaj tlen xitlahuac huan ax inquichihuil'iaj cuenta quejatza Toteco quinicnel'ia tlacame. Ni tlamantli achi m'as ipati iixtla Toteco. Huajca monequi xijchihuaca tlen m'as ipati huan nojquiya amo xijcahuaca xijmacaca Toteco se majtlactli por ciento. 43"¡Inteicneltijque infariseos! Toteco tlahuel inmechtlatzacuiltis. Inmechpact'ia inmosehuise campa cuali siyaj campa onca m'as tlatlepanitacayotl ipan tiopamitl. Inmechpact'ia para tlacame ma inmechtlajpaloca ica cuali ipan tianquis. 44"¡Inteicneltijque infariseos huan intlamachtiani tlen itlanahuatil Mois'es! Toteco tlahuel inmechtlatzacuiltis. Initztoque queja nopa mijca tlacoyoctini tlen ax nesi intla mijca campo santo, huan yeca tlacame nemij ipani huan ax quimatij intla ipan moquejquetzaj." 45Huan se tlacatl tlen tlamacht'ia tlen quiijtosnequi itlanahuatilhua Mois'es quiilhui Jes'us: --Tlamachtijquetl, quema tiquinteilhu'ia fariseos, nojquiya titechteilhu'ia tojuanti tlen titlamacht'iaj tlen quiijtosnequi itlanahuatil Mois'es. 46Huan Jes'us quinanquili: --Nojquiya inteicneltique tlen intlamacht'iaj itlanahuatilhua Mois'es. Toteco tlahuel inmechtlatzacuiltis. Axaca huelis quitoquilis nochi tlanahuatili tlen inquiijtohuaj monequi quitoquilise. Eltoc queja inquinmamalt'iaj tlacame tlen etic, pero ax inquinequij inquinpalehuise ica niyon se imomacpil. 47"¡Inteicneltique! Toteco tlahuel inmechtlatzacuiltis. Inquinchihuil'iaj panteones itiocamanalojcahua Toteco para sequinoc ma moilhuica inquintlepanitaj, pero imotatahua quinmictijque, 48huan inpaquij ica tlen quichijque. Quena, imohuejcapan tatahua quinmictijque huan ama inquinchihuil'iaj ininpante'on. 49"Yeca Toteco tlen quipiya nochi tlalnamiquistli huejcajquiya quiijto tlen imojuanti: 'Niquintitlanilis notiocamanalojcahua huan notlayolmelajcahua. Huan sequin quinmictise huan sequinoc quintlaijiyohuiltise.' 50Huan yeca Toteco inmechita intlacame tlen ama initztoque huan quiijtohua para inquihuicaj tlajtlacoli ipampa inieso nochi nopa tiocamanalohuani tlen tlacame quinmictijque hasta quema pejqui tlaltepactli. 51Quena, imojuanti san sejco inquihuicaj tlajtlacoli para nochi tlen mijque hasta quema mijqui Abel huan hasta amanoc quema tlacame quimictijque Zacar'ias tlatlajco tlen nopa tlaixpamitl huan nopa hueyi tiopa. Nochi ni tlajtlacoli inquihuicaj tlen ama initztoque. 52"¡Inteicneltique intlamachtiani tlen itlanahuatilhua Mois'es! Toteco tlahuel inmechtlatzacuiltis. Inquintzacuil'iaj tlen quinequij quimatise itlalnamiquilis Toteco. Ax inquimachil'iaj itlalnamiquilis huan ax inquincahuil'iaj ma quimachilica sequinoc tlen quinequij quimachilise." 53Huan quema Jes'us tlanqui quiijto ya ni, nopa fariseos huan tlamachtiani tlen itlanahuatil Mois'es tlahuel cualanque ihuaya huan pejque quitlajtlan'iaj miyac tlamantli. 54Quitemoliyayaj ma quiijto se tlenijqui tlen ica huelis quiteilhuise.

will be added

X\