LUCAS 10

1Huan teipa Jes'us quintequimacac seyoc setenta tlacame huan quintitlanqui ma yaca ojome para tlayacanase ipan nochi altepetini huan ranchos campa yajaya ajsisqu'ia. 2Huan yajaya quinilhui: "Itztoque miyaqui tlen quichiyaj para quicaquise notlajtol, pero ax miyaqui para yase huan quinilhuitij. Eltoc queja onca se hueyi pixquistli huan san itztoque se o ome tlacame para quisentilise. Xijtlajtlanica Toteco Dios ma quintitlani m'as tequipanohuani para ma tepohuilica itlajtol pampa nopa pixquistli iaxca. 3Imojuanti inelise queja borregojme tlen mopant'iaj ica tepechichime ipan nopa tequitl campa nimechtitlanis. 4Amo xijhuicaca se morral, niyon se payo para inmotominpiquise. Amo xijhuicaca seyoc inmotecac huan amo ximoquetztiyaca ipan ojtli para intetlajpalose. 5Huan quema incalaquise ipan se cali, xiquijtoca: 'Ma Toteco inmechmaca tlasehuilistli nochi tlen initztoque nicani.' 6Huan intla itztoc nopona tlen quinequi itlasehuilis Toteco, huajca Toteco quitiochihuas huan quimacas tlasehuilistli, huan intla ax quinequi itlasehuilis Toteco ax quitiochihuas. 7Huan ximocahuaca ipan nopa cali campa inmechsel'iaj, huan xijcuaca huan xiquica tlen inmechmacase pampa quinamiqui se tlatequipanojquetl quiselis itlaxtlahuil tlen itequi. Ximocahuaca ipan san se cali ipan sesen altepetl, huan ax san campa hueli xicochtinemica. 8Huan quema inajsitij ipan se altepetl campa inmechsel'iaj, xijcuaca tlen inmechmacase. 9Huan xiquinchicahuaca tlen mococohuaj huan xiquinilhuica: 'Toteco Dios tlen tlanahuat'ia ipan ininyolo tlacame inmechnechcahuijtoc ama.' 10Huan quema incalaquise ipan se altepetl huan tlacame nepa ax inmechselise, xiyaca ipan ojtli huan xiquijtoca: 11'Nochi ni tlalpotectli tlen imoaltepe tlen tlatzquijtoc ipan totecac tijtzejtzelohuaj para quinextis nopa tlatzacuiltilistli tlen inmechajsis pampa ax inquiselijque. Pero xijmatica para melahuac ama Toteco inmechnechcahuijtoc para inmechnotzas xicalaquica campa yajaya tlanahuat'ia.' 12Huan nimechilhu'ia, quema Toteco tetajtolsencahuas, nopa tlacame ipan nopa altepetl tlen ax inmechselise, quiselise se tlatzacuiltili tlen m'as hueyi huan amo queja tlen quiselijque tlacame tlen itztoyaj ipan altepetl Sodoma huejcajquiya. 13"Inteicneltijque inCoraz'in ehuani pampa Toteco inmechtlatzacuiltis. Inteicneltique inBetsaida ehuani, pampa ax innechneltocaque quema nijchijqui huejhueyi chicahual nescayotl imoixtla. Intla nopa tlacame tlen huejcajquiya itztoyaj ipan altepetini Tiro huan Sid'on quiitztosqu'iaj tlen nijchijqui imoixtla, moyolcueptosqu'iaj nimantzi, huan nochi tlacame quimajtosqu'iaj. 14Huajca quema Toteco tetlajtolsencahuas, m'as chicahuac inmechtlatzacuiltis que nopa ax cuajcualme tlen itztoyaj ipan Tiro huan Sid'on huejcajquiya. 15Imojuanti inCapernaum ehuani inmohueyimatij huan inmoilhu'iaj inmotlalanase hasta elhuicac, pero ax neli. Intemose hasta mictla pampa ax inmoyolpatlatoque." 16Huan Jes'us sampa quinilhui imomachtijcahua: "Tlacame tlen quicaquise imotlajtol ica cuali, cuali nechtlacaquilise, huan tlen inmechhuejcamajcahuase, nojquiya nechhuejcamajcahuase huan quihuejcamajcahuase yajaya tlen nechtitlantoc." 17Huan teipa nopa setenta tlen Jes'us quintitlantoya mocuepque ica paquilistli huan quiilhuijque: --Toteco, hasta iajacahua Axcualtlacatl techneltoquilijque quema tiquinnahuatijque ipan motoca. 18Huan Jes'us quinilhui: --Quena, niquitac Axcualtlacatl huetzqui tlen elhuicac queja quema huetzi se tlixochitl quema tlapetlani. 19Xiquitaca, nimechmacatoc tequihuejcayotl para ipan inmoquejquetzase ipan cohuame huan colome, huan para inquitlanise nochi ichicahualis Axcualtlacatl, huan ax tleno huelis inmechchihuilise. 20Pero amo xipaquica miyac pampa ajacame inmechchihuil'iaj imotlajtol. M'as xipaquica pampa ya ijcuilijtoc imotoca ipan iama Toteco nepa elhuicac. 21Huan ipan nopa tlalochtli Itonal Toteco quimacac Jes'us miyac paquilistli huan Jes'us quiilhui ITata: "Nimitzpaquilismaca, Pap'a, ta tiToteco Dios tlen titlanahuat'ia ipan elhuicac huan tlaltepactli. Ta Tijtlatijtoc motlalnamiquilis para ma amo quimachilica tlacame tlen mohueyimatij huan tlen moilhu'iaj tlalnamiquij. Pero ama tiquinnextil'ia motlalnamiquilis tlacame tlen moicnonequij queja coneme moixtla. Quena, Pap'a, queja nopa tijchijqui pampa queja nopa mopaquilis." 22Huan Jes'us quinilhui nopa tlacame: "Notata nechmacatoc tequihuejcayotl ica nochi tlamantli. Axaca cuali nechixmati na tlen niIcone Toteco, san Notata, quena, cuali nechixmati. Huan axaca cuali quiixmati noTata, san na niIcone huan ajqueya nijnequi nijnextilis ajqueya ya." 23Huan teipa moicancuepqui Jes'us huan quintlachili imomachtijcahua huan iyoca quinilhui: "Xijpiyaca miyac paquilistli para inquiitaj tlaque nijchihua queja ama inquiitaj. 24Nimechilhu'ia, miyac tiocamalohuani huan tlanahuatiani tlen huejcajquiya itztoyaj quinequiyaya quiitase tlen ama inquiitaj, pero ax quiitaque. Inijuanti quinequiyayaj quicaquise tlen ama inquicaquij, pero ax huelque." 25Huan se tlamachtijquetl tlen itlanahualtilhua Mois'es moquetzqui para quimasiltis Jes'us ica itlajtol huan quitlajtlani: --Tlamachtijquetl, ¿tlaque monequi nijchihuas para nijselis nopa yolistli yancuic tlen ax quema tlamis? 26Huan Jes'us quiilhui: --¿Tlaque ijcuilijtoc ipan itlanahuatilhua Mois'es? ¿Quejatza tijmachil'ia ta? 27Huan yajaya quinanquili: --Xiquicneli Toteco Dios ica nochi moyolo, huan ica nochi moyoltzi, huan ica nochi mochicahualis, huan ica nochi motlalnamiquilis. Huan xiquinicneli sequinoc queja timoicnel'ia. 28Huan Jes'us quiilhui: --Cuali tinechnanquilijtoc. Huajca xijchihua nochi ya ni huan tiitztos. 29Pero nopa tlacatl quinequiyaya monextis cuali iniixtla nopa tlacame, huajca quitlajtlani Jes'us: --¿Ajqueya inijuanti ne sequinoc tlen monequi niquinicnelis queja nimoicnel'ia? 30Huan Jes'us quinanquili: --Se tlacatl quisqui altepetl Jerusal'en huan temoyaya ipan nopa tlaixtemolis tlen ajsi altepetl Jeric'o. Huan tlaxtequini quipantijque, huan quiquixtilijque iyoyo huan nochi tlen quipixqui. Huan teipa quihuitejque huan quicajtejque queja mictoc. 31Huan panoc se totajtzi ipan ojtli huan quiitac nopa tlacatl huilantoc, pero quitlalcahui huan ax quichihuili cuenta. 32Huan nojquiya hualajqui se levita tlen tlapalehui ipan israelita tiopamitl. Huan yajaya ajsico campa huilantoya huan quiitac, pero nojquiya san quipanoc huan ax quichihuili cuenta. 33Pero hualayaya ipan ojtli se Samar'ia ejquetl, huan ajsico nopona huan quema quiitac nopa tlacatl huilantoc, quitlasojtlac. 34Quinechcahuito huan quipajpaquili campa cocojtoya ica xocomeca atl, huan teipa quitequili aceite. Huan quipijqui ica se yoyomitl. Huan quitlejcolti ipan iburro huan quihuicac ipan se cali campa cochij paxalohuani huan quimocuitlahui. 35Huan itonilijcapa quiquixti tomi para ome tonati tequitl, huan quimacac nopa tlacatl tlen quinmocuitlahu'ia ajsini huan quiilhui: 'Xijmocuitlahui ni cocoxquetl huan intla tijyaltis m'as tomi para tijmocuitlahuis, huajca quema nimocuepas, nimitztlaxtlahuis.' Huajca Jes'us quitlajtlani nopa tlamachtijquetl tlen itlanahuatilhua Mois'es: 36--¿Catl'ia tlen ni eyi tlacame tlen hualajque ipan ojtli quiicneli tlen huilantoya queja moicnel'ia? 37Huan nopa tlamachtijquetl tlen itlanahuatilhua Mois'es quiijto: --Yajaya tlen quitlasojtlac. Huan Jes'us quiilhui: --Quena, nel'ia. Xiya ta huan queja nopa nojquiya xijchihua. 38Teipa Jes'us yajqui ipan ojtli hasta se rancho, huan se sihuatl itoca eliyaya Marta quiseli ipan ichaj ica yejyectzi. 39Yajaya quipixtoya se iicni tlen itoca Mar'ia tlen mosehuico iicxitla Jes'us huan quitlacaquiliyaya itlajtol. 40Huan Marta quipixtoya miyac tequitl pampa quinequiyaya quisencahuas miyac tlacualistli para Jes'us. Marta quinechcahuico huan quiilhui: --Toteco, ¿ax tiquita noicni nechcajtejtoc para noselti ma nijsencahua nochi tlen tijcuase? Xiquilhui ma nechpalehuiqui. 41Pero Tohueyiteco Jes'us quinanquili: --Marta, Marta, timocuesohua huan timocuatoton'ia ica miyac tlamantli tlen tijchihua, 42pero san se tlamantli achi m'as ipati. Mar'ia quitlapejpenijtoc para quicaquis notlajtol, huan nopa achi cuali, huan axaca huelis quiquixtilis.

will be added

X\