LUCAS 1

1Noicni Te'ofilo, miyac tlacame quichijtoque campeca quiijcuilose nochi nopa tlamantli tlen panotiyajque toixtla ipan inemilis Jesucristo. 2Quiijcuilojtoque tlen nopa tlacame tlen quiixtonque itlajtol techilhuijque para quiitztiyajque hasta quema pejque nejnemij ihuaya Jes'us. 3Huan huajca na nojquiya nimoilhui cuali para nimitztlajcuilhuis nochi tlen panoc tlen quema tlacatqui Jes'us huan quejatza panotiyajqui hasta itlamiya pampa ica yolic nijtemojtoc tlen melahuac ica nochi ni tlamantli. Huajca noicni Te'ofilo tlen nochi mitztlepanitaj miyac, ama nimitztlajcuilhuis nochi 4para tijmachilis nel'ia temachtli nopa tlamantli tlen tlacame mitzmachtijtoquejya. 5Ipan nopa tonali quema tlanahuatiyaya Herodes el Grande ipan estado Judea, itztoya se totajtzi tlen itoca eliyaya Zacar'ias tlen tequitqui ipan nopa Ab'ias pamitl tlen totajtzitzi. Zacar'ias quipixqui isihua tlen itoca eliyaya Elisabet huan nochi ome eliyayaj iteipa ixhuihua nopa totajtzi Aar'on tlen huejcajquiya itztoya. 6Zacar'ias huan Elisabet itztoyaj xitlahuaque iixtla Toteco. Quintoquilijque itlanahuatilhua Toteco huan nochi tlen yajaya quinnahuati ma quichihuaca. Yeca axaca huelqui quinteilhui ica niyon se tlamantli fiero. 7Pero ax quipiyayayaj niyon se conetl pampa Elisabet ax hueliyaya conecui huan inijuanti ya huehuejtixtoyaj. 8Huan se tonal Zacar'ias quichihuayaya itequi nepa tiopan calijtic iixtla Toteco, pampa quitocaro se ipan nopa Ab'ias pamitl tlen totajtzitzi ma tequiti. 9Huan queja momatque quichihuaj totajtzitzi, mahuiltijque ica piltetzitzi para quiitase ajqueya tlen inijuanti Toteco quitlapejpenis para quitlatis nopa copali iixtla Toteco ipan nopa hueyi israelita tiopamitl. Huan quitocaro Zacar'ias ma quitlati. 10Huan ipan nopa hora quema Zacar'ias quitlatiyaya nopa copali tiopan calijtic, moquetzayayaj calteno miyac tlacame tlen momaijtohuayayaj ica Toteco. 11Huan nimantzi monexti se ielhuicac ejca Toteco iixtla Zacar'ias. Moquetzaco ica inejmatl nopa tlaixpamitl campa quitlatiyaya copali. 12Huan Zacar'ias tlahuel momajmati quema quiitac nopa elhuicac ejquetl. 13Pero nopa elhuicac ejquetl quiilhui: --Zacar'ias, amo ximomajmati. Toteco quicactoc tlen tijtlajtlaniyaya, huan mosihua Elisabet quipiyas se piloquichpiltzi huan tijtocajtis Juan. 14Tlahuel inpaquise quema tlacatis huan paquise imohuaya miyac tlacame, 15pampa yajaya quipiyas se hueyi tequitl iixtla Toteco. Ax quiis xocomeca atl, niyon ax quiis se tlaili nelcococ. Yajaya elis temitoc ica Itonal Toteco hasta quema noja itztos ipan inana. 16Huan yajaya quichihuas para miyac israelitame ma moyolcuepaca huan ma quitoquilica Toteco Dios. 17Juan quipiyas itlalnamiquilis huan ichicahualis queja nopa tiocamanalojquetl El'ias huejcajquiya quipixtoya. Huan yajaya tlayacanas huan quincualtlalilis ininyolo tlacame ma quiselica Tohueyiteco. Quichihuas para tetatme ma moyoltlalica huan ma itztoca ica cuali ica ininconehua. Huan quichihuas para tlacame tlen ax tleno quitlepanitaj, ma tlatlepanitaca. 18Huan Zacar'ias quitlajtlani nopa elhuicac ejquetl: --¿Quejatza huelis nijmatis para temachtli tlen tinechilhu'ia? Nosihua huan na tihuehuentzitzijya. 19Huan nopa elhuicac ejquetl quinanquili: --Na niGabriel. Nochipa nimoquetza iixtla Toteco. Yajaya nechtitlanqui ma nimitzcamahuiqui huan ma nimitzyolmelahuaqui tlen itlajtol Toteco. 20Pero pampa ax tijneltocac notlajtol, tinonotiyas huan ax huelis ticamatis hasta tlacatis mocone. Huan nochi ni tlamantli panos quema ajsis nopa tonal tlen Toteco quitlalijtoc. 21Huan nopa miyac tlacame noja quichiyayayaj calteno quema ielhuicac ejca Toteco quicamahuiyaya Zacar'ias. Moilhuiyayaj para tlen Zacar'ias huejcahuayaya tiopan calijtic. 22Huan quema Zacar'ias quisqui, ax hueliyaya camati. Huajca quimatque para quiitztoya se tlanextili tlen Toteco quinextilijtoya tiopan calijtic. Huan Zacar'ias san tlamanexti pampa nonotixtoya. 23Teipa tlanqui nopa tonali tlen quitocaro Zacar'ias para tequitis queja totajtzi, huan yajaya mocuepqui ichaj. 24Huan isihua Elisabet conecuic. Huan teipa senitztoya calijtic huan ax cana yajqui para macuili metztli. Huan isihua moilhuiyaya: 25"Toteco nechtiochijtoc miyac, pampa ama niconehue huan ayoc nimopinahuas iniixtla sequinoc pampa ax nijpixtoya se nocone." 26Elisabet ya quipixtoya icone ipan itlacayo se chicuase metztli quema Toteco quititlanqui ielhuicac ejca tlen itoca Gabriel ma yohui hasta altepetl Nazaret ipan estado Galilea 27para quimacas se tlajtoli se ichpocatl tlen itoca eliyaya Mar'ia. Huan Mar'ia eliyaya se cuali ichpocatl tlen ax quema quiixmajtoya se tlacatl huan ya quiijtlantoya se telpocatl tlen itoca eliyaya Jos'e tlen eliyaya iteipa ixhui Tlanahuatijquetl David tlen huejcajquiya. 28Huan Gabriel calajqui campa Mar'ia itztoya huan quiilhui: --Xipaqui ta tlen Toteco mitzcualita. Toteco itztoc mohuaya huan achi m'as mitztiochijtoc que sequinoc sihuame. 29Pero quema Mar'ia quiitac nopa elhuicac ejquetl, quisentlachili huan moilhui tlaque quiijtosnequi para queja nopa quitlajpalohua. 30Huan nopa elhuicac ejquetl quiilhui: --Amo ximomajmati Mar'ia. Toteco mitztlapejpenijtoc para mitztiochihuas tlahuel miyac. 31Nimantzi ticonehue tielis huan teipa tijtlacatiltis se oquichpil huan tijtocajtlalis Jes'us. 32Yajaya elis hueyi iixtla Toteco. Huan tlacame quiixmatise para Icone Toteco Dios Tlen M'as Quipiya Tlanahuatili. Huan Toteco quichihuas ma mosehuis huan tlanahuatis campa tlanahuatiyaya ihuejcapan tata David. 33Huan quipiyas tequihuejcayotl ica israelitame para nochipa huan ax quema tlamis itlanahuatilis. 34Huajca Mar'ia quitlajtlani nopa elhuicac ejquetl: --¿Quejatza niconehue nielis intla ax quema niitztoya ihuaya se tlacatl? 35Huan nopa elhuicac ejquetl quinanquili: --Itonal Toteco hualas mopani, huan ichicahualis Toteco Dios Tlen M'as Quipiya Tlanahuatili mitztlapachos huan ticonehue tielis. Huan yeca mocone elis nel'ia tlatzejtzeloltic, huan tlacame quiixmatise para Icone Toteco. 36Huan momachicni Elisabet nojquiya quipiyas icone yonque ya nanatzi. Huan yonque tlacame quiijtohuaj ax hueli conepiya, ya quipixtoc icone ipan itlacayo chicuase metztli. 37Ax onca niyon se tlamantli tlen Toteco ax hueli quichihuas. Yajaya nochi hueli. 38Huajca Mar'ia quiijto: --Na niiaxca Toteco. Nica niitztoc para nijchihuas nochi tlen nechnahuatis ma nijchihua. Ma nochi panos queja tinechilhuijtoc. Huajca ica ni, yajqui nopa elhuicac ejquetl. 39Teipa Mar'ia mocualtlali huan moisihuilti yajqui se altepetl ipan estado Judea campa onca miyac tepetini 40campa ichaj Zacar'ias. Huan calaquito huan quitlajpalo Elisabet. 41Huan quema Elisabet quicajqui para Mar'ia quinojnotzqui, icone Elisabet mojmolini iijtico. Huan Itonal Toteco quitemiti Elisabet, 42huan chicahuac Elisabet quiilhui Mar'ia: --Toteco m'as mitztiochijtoc, Mar'ia, que sequinoc sihuame huan nojquiya quitiochijtoc mocone. 43Nel'ia se hueyi tlatlepanitacayotl para na, pampa ta tiinana nohueyiTeco tinechpaxaloco. 44Quema tinechnojnotzqui, nimantzi nocone mojmolini ica paquilistli noijtico. 45Toteco mitztiochijtoc pampa tijneltocac para temachtli quichihuas tlen quiijtojtoc. 46Huan Mar'ia quiijto: "Tlahuel nijhueyichihua Tohueyiteco ipan noyolo. 47Quena, nipaqui miyac ipan Toteco Dios, yajaya tlen notemaquixtijca. 48Pampa yonque san niitlatequipanojca, huan san niteicneltzi, yajaya nechilnamijqui, huan ama tlacame tlen tlacajtiyase para nochipa quiijtose para Toteco nechtiochijtoc. 49Quena, Toteco Tlen Quipiya Nochi Chicahualistli nechchihuilijtoc huejhueyi tlamantli. Tlahuel tlatzejtzeloltic ya. 50Toteco quintlasojtla nochi tlacame tlen quitlepanitaj ama, huan nochi tlen teipa tlacajtiyase huan quitlepanitase. 51Quena, quichijtoc huejhueyi tlamantli ica ihueyi chicahualis. Quintzontlamiltijtoc tlen mohueyimatiyayaj ipan ininyolo. 52Toteco quinquixtilijtoc inintequihuejcayo tlacame tlen tlanahuatiyayaj, huan quinhueyitlalijtoc inijuanti tlen moicnonejque iixtla. 53Miyac tlatiochihualistli Toteco quinmacatoc inijuanti tlen mayanayayaj, pampa quinixhuiti. Huan inijuanti tlen quipixque miyac tomi quinmajcajqui san ininmacajya. 54Miyac techpalehuijtoc tiisraelitame pampa tiitlatequipanojcahua. Techtlasojtlatoc huan ax techilcajtoc. 55Quitencahuili Abraham, tohuejcapan tata, para quitlasojtlasqu'ia ya ininhuaya iteipa ixhuihua para nochipa, huan yeca techtlasojtlatoc tojuanti." Quej nopa quiijto Mar'ia. 56Huan Mar'ia mocajqui ihuaya Elisabet nechca eyi metztli huan teipa mocuepqui ichaj. 57Teipa ajsic hora para Elisabet conepiyas huan quitlacatilti se oquichpil. 58Huan nochi icalnechcahua huan ichampoyohua quicajque queja Toteco hueyi quitlasojtlatoya Elisabet huan quimacatoya icone huan huajca nochi paquiyayaj ihuaya. 59Huan quema nopa piloquichpiltzi quipixqui chicueyi tonali, nochi hualajque para quipiltequilise nopa tlanescayotl tlen itoca circuncisi'on ipan ipiltlacayo queja momajtoyaj quichihuaj. Huan nochi quinequiyayaj quitocajtlalise Zacar'ias queja itata. 60Pero inana quiijto: --Axtle, ax tijtocajtise Zacar'ias, tijtocajtise Juan. 61Huan quiilhuijque: --¿Para tlen? Niyon se imotatahua ax quipixqui itoca Juan. 62Huan quimanextilijque itata para quimatise tlaque itoca quinequiyaya quitlalilis. 63Huan Zacar'ias quintlajtlani ma quihualiquilica tlen ipan tlajcuilos. Huan Zacar'ias quiijcuilo: "Itoca elis Juan." Huan nochi ininhuampoyohua san quisentlachilijque. 64Huan nimantzi pejqui quiolin'ia inenepil Zacar'ias, huan pejqui camati huan quipaquilismaca Toteco. 65Huan inincalnechcahua quiitaque tlen panoc, huan nochi tlahuel momajmatijque. Huan teipa nochi tlacame tlen itztoyaj campa hueli tepetini nepa ipan estado Judea mocamahuiyayaj se ica seyoc tlen panoc. 66Huan nochi tlen quicajque tlen panoc moilhuiyayaj: "¿Tlaque elis ni piloquichpiltzi quema moscaltis?" Quej nopa quiijtohuayayaj pampa quiitayayaj para Toteco nel'ia quitlalijtoya ima ipan nopa oquichpil para quitiochihuas. 67Huan nimantzi Itonal Toteco ajsic ipan Zacar'ias, itata nopa pilconetzi, huan yajaya pejqui quiijtohua ni tlajtoli tlen Toteco quimacac. Quiijto: 68"Ma tijhueyichihuaca Toteco Dios tlen tiisraelitame, pampa hualajtoc techmaquixtis tiitlacajhua. 69Techtitlanil'ia se Temaquixtijquetl tlen quipiyas hueyi chicahualistli. Yajaya elis se iteipa ixhui Tlanahuatijquetl David tlen huejcajquiya eliyaya itlatequipanojca. 70Queja Toteco techtencahuili huejcajquiya ica itiocamanalojcahua tlen tlatzejtzeloltique, 71ama yajaya techmaquixtis ica tocualancaitacahua huan ica inijuanti tlen ax quinequij techitase. 72Quintlasojtlac tohuejcapan tatahua, huan quiilnamijqui nopa tlajtoli tlatzejtzeloltic tlen quitencahuili Abraham. 73Quena, Toteco Dios motestigojquetzqui huan melahuac quitlajtolcahuili Abraham, tohuejcapan tata, 74para melahuac techmanahuisqu'ia ica tocualancaitacahua para huelis tijtequipanose Toteco huan ax timajmahuise. 75Huelis tiitztose titlatzejtzeloltique iixtla huan tijchihuase tlen cuali hasta timiquise." 76Huan teipa Zacar'ias quiilhui ipiloquichpil: "Tinopilcone, Toteco Tlen M'as Quipiya Tlanahuatili mitztequitlalijtoc tiitiocamanalojca, huan ta titlayacanas huan tijcualtlalijtiyas iojhui Tohueyiteco tlen hualas teipa. 77Tiquinyolmelahuas iisraelita tlacajhua para yajaya tlen hualas quinmaquixtis, pampa quintlapojpolhuis inintlajtlacolhua. 78Quena, Toteco techtlasojtla miyac, huan yeca techtitlanilijtoc yajaya tlen techtlahuilis, yajaya tlen itztoya elhuicac hualas. 79Quintlahuilis ipan ininyolo nochi tlacame tlen nemij ipan tzintlayohuilotl huan campa onca miquistli. Huan quinnextilis quejatza quipiyase tlasehuilistli ihuaya Toteco." Quej nopa Zacar'ias quiijto. 80Huan nopa piloquichpiltzi Juan moscaltijtiyajqui huan motlacachijqui huan Toteco quimacac chicahualistli ipan itonal. Huan teipa yajaya itztoya ipan nopa tlali huactoc campa ax tleno elqui hasta ajsic tonal para monextis huan para israelitame ma quiixmatica.

will be added

X\