Lamentations 4

1Campa hueli tepejtoc tepayactli tlen itepa tiopamitl tlen achtohuiya quipixqui miyac oro. Ama nopa oro tlen mocahua ya yayahuixtoc huan ayoc petlani. 2Huan toconehua tlen tiquinicneliyayaj huan tiquinitayayaj para m'as ininpati que oro, tocualancaitacahua quinchijtoque queja ax tleno ininpati. Quinchihuilijque queja elisqu'ia soqui chachapali tlen quichijtoya se soquichijquetl. 3Hasta coyochichime quinchichit'iaj ininconehua, pero tojuanti tlen timocahuaj ipan ni altepetl, axaca techpalehu'ia. Tlafiero nochi tlen niquita. Pano fierojtique tlen techtlantoque huan teipa techcajtejtoque toseltitzitzi. Tiitztoque queja iconehua se cuatotoli, nopa tototl tlen quincahua iconehua ininselti ipan huactoc tlali campa ax tleno eli. 4Ama pilconetzitzi amiquij hasta tlatzquitoc ininnenepil ipan inincholec, pero ayoc onca atl. Coneme tlajtlantinemij se quentzi pantzi tlen axaca huelis quinmacas. 5Tlacame tlen achtohuiya quicuayayaj tlen nel'ia cuali, ama apismictinemij ipan ojojtipa. Tlen moquentiyayaj ininyoyo tlen nelalaxtic ama quitemojtinemij se pan tlatlapatztli ipan tlasoli. 6Inintlajtlacolhua noteixmatcahua ipan ni altepetl eltoc m'as miyac que inintlajtlacolhua altepetl Sodoma ehuani, nopa altepetl tlen TOTECO huejcajquiya quixolejqui ica se tlalochtli huan niyon se tlacatl ax huelqui quinpalehui. 7Tlen achtohuiya tlanahuatiyayaj nica ipan toaltepe elque nopa tlacame tlen m'as cuajcualme tlen nochi totlacajhua. Itztoyaj m'as chipahuaque que nextli. Quena, m'as chipahuaque que lechi huan quipixque inintlacayo ica inincampa chichiltic ica miyac fuerza. Huelisqu'ia tijhuicaltisqu'iaj iniyejca ica nopa tetl tlen itoca zafiro. 8Pero ama yajuanti nesij m'as yayahuique que tzintlayohuilotl. Axaca quinixmatisqu'ia intla quinpantisqu'ia ipan ojtli. Inincuetlaxo tlatzquitoc ipan iniomiyo huan nelhuactoc queja cuatlahuejhueloli pampa mayancamictinemij. 9Achi m'as cuali elqui para tlen mijque ica machete que tlen apismiquij. M'as ohui huan m'as tlaijiyohu'iaj tlen miquij pampa ayoc oncac niyon quentzi tlacualistli campa mili. 10Hasta ica ininma sihuame tlen quipiyayayaj cuali ininyolo quinicxitiyayaj ininconehua. Quena, ininconehua elque inintlacualis para noja yoltoya quema soldados quixolehuayayaj ni altepetl. 11TOTECO nel'ia cualanqui tohuaya huan quichijqui ma quisa nochi icualancayo huan ma techajsi tojuanti. Quitlati toaltepe nica ipan tepetl Sion huan quixolejqui ni altepetl hasta itzinpehualtil. 12Ax quineltocaque tlanahuatiani huan tlacame tlen campa hueli ehuaj ipan tlaltepactli para tocualancaitacahua huelis calaquisqu'iaj ipan topuertas ipan nopa tepamitl nica altepetl Jerusal'en. 13Huan nochi ya ni panoc pampa tlajtlacolchijque totiocamanalojcahua huan totajtzitzi. Ipan ni altepetl quitoyajtoque inieso tlen eltoyaj cuajcuali tlacame tlen ax tleno quichijtoyaj. 14Ama ni tlacame san tlamachijchintinemij queja popoyotzitzi ipan ojojtipa ni altepetl. Espoltic ininyoyo hasta axaca quinequi quinitzquis. 15Tlacame quintzajtzilijtinemij: "Ximijcuenica, ax intlapajpactique. Amo xitechitzquica." Queja nopa quiijtohuaj para ma ax quinnechcahuica nopa tlacame huan quinchihuase ax tlapajpactique nojquiya. Yonque nopa tlacame cholojtehuaj hasta seyoc tlali, nopa seyoc tlali ehuani nojquiya quinilhu'iaj: "Ax hueli inmocahuase para initztose nica." 16Icualancayo TOTECO quinsemantoc campa hueli huan yajaya ayoc quintlachil'ia. Axaca quintlepanita totajtzitzi niyon ax quinicnel'iaj nopa huehue tlacame. 17Ya tiixcuatque para titlachixtoque ajqueya techpalehuis. San tlapic timochiyaj ma hualaca nopa tlali ehuani tlen timoilhuijque techpalehuisqu'iaj pampa ayoc hueli techmaquixt'iaj. 18Tocualancaitacahua techtemohuaj campa hueli. Ax hueli tiquisase ipan calle. Nechcatitoc para techtzontlamiltise. Ayoc temachtli. 19Tocualancaitacahua techtepotztocatinemij huan motlalohuaj nelchicahuac hasta contlanij nopa huejhueyi cuajme tlen chicahuac patlantiyohuij ipan elhuicac. Yonque ticholojtinemij iniixtla hasta cuajcuatitla, techpant'iaj. Intla timotlat'iaj ipan nopa huactoc tlali, techtlaquechil'iaj. 20Quiitzquitoque totlanahuatijca tlen quitlapejpenijtoya TOTECO. Yajaya tlen tiquicnelijque queja toyolis, quicuique. Tiquijtojtoyaj para ica totlanahuatijca hueli timomanahuise ica tlen hueli tlali isoldados, pero ax neli. 21Yonque ama inhuetzcaj huan inpaquij intlacame ipan tlali Edom nechca Uz, nojquiya inmechajsis se hueyi tlatzacuiltili. Queja se tlaili chichic tlen ohui para tiquis, TOTECO inmechtlaijiyohuiltis. Nojquiya inxolome inmocahuase. Huan queja tojuanti, ayoc tleno mocahuas imoaxca. 22Se tonal TOTECO techilhuis: "Inehuani altepetl Jerusal'en, ya tlanqui imotlatzacuiltilis. Ayoc nijcahuilis ajqueya ma inmechhuicas tlen tepetl Sion para intlatequipanose ipan seyoc tlali. Pero imojuanti tlen inehuani tlali Edom, san onpejtoc nimechtlatzacuiltis ipampa nochi tlen ax cuali inquichijtoque. Nijpannextis nempa nochi imotlajtlacolhua."

will be added

X\