Judges 5

1Ipan nopa tonali D'ebora ihuaya Barac, tlen eliyaya icone nopa Abinoam, queja ni huicaque: 2"Ma tijhueyichihuaca TOTECO pampa nopa tlayacanca israelitame moneltlalijque, huan nopa israelitame nimantzi motemacaque para tlatehuitij. 3Xinechtlacaquilica, intlanahuatiani huan imojuanti tlen inquihuicaj tequiticayotl, huan na nijhuicatis TOTECO, yajaya tlen toDios tiisraelitame. Quena, yajaya nijhuicatis huan nijhueyitlalis. 4TOTECO, quema ta tiquisqui ipan Seir huan tinejnentiyajqui ipan tlali Edom, molini tlali huan tlen nopa mixtli ipan elhuicactli tlaahuetzqui chicahuac. 5Nopa tepetini huihuipicaque moixpa TOTECO, ta tlen techmocuitlahu'ia titlali Israel ehuani. Quena, tepetl Sina'i nojquiya huihuipicac moixpa. 6Ipan nopa tonali quema noja itztoya Samgar, icone Anat, hasta quema itztoya Jael, nochi israelitame quicajtejque nochi huejhueyi ojtli huan ayoc nejnenque nopona pampa momajmatiyayaj para quintlaxtequilise. San quitoquilijque pilojtzitzi tlen huijcoltic para motlatijtiyase. 7Nochi paquilistli tlantoya huan niyon se israelita ax itztoya ica yejyectzi hasta na, niD'ebora, nimotlalanqui queja nieliyaya ininnana israelitame. 8Israelitame quinhueyichihuayayaj tlaixcopincayome tlen ax Dios. Nochi sequinoc altepetl ehuani techtehuijque hasta topuertaj teno. Nopa fiero tlacame tlen technahuatiyayaj ax techcahuiliyayaj ma tijpiyaca niyon se totepostzajca o tepostli tlen ica timomanahuisqu'iaj. Ax oncac niyon se ipan 40 mil israelitame. 9Nel'ia nipaqui ica intlanahuatiani ipan tlali Israel. Nijtlascamati TOTECO imopampa imojuanti. Inyajque ipan tlatehuijcayotl ica nochi imoyolo. Ma tijhueyichihuaca TOTECO. 10Nochi tiisraelitame ma tijhueyichihuaca TOTECO. Nochi tlen ricos huan tlen tlejcoj ipan burrojme chipahuaque, huan tlen mosehu'iaj campa tlatzotzoltic ma paquica. Huan nojquiya ma huicaca nochi tlen teicneltzitzi huan monequi nejnemise. Nochi ma tihuicaca ica tlascamatili. 11Inijuanti tlen quimatij tlatehu'iaj sampa mosentil'iaj campa ameli ininhuaya tlen quinamacaj ininborregojhua. Nopona nopa soldados tlen tlatlantoque tepohuil'iaj quejatza nel'ia hueyi tlen TOTECO quinchihuili, yonque san teicneltzitzi. TOTECO quichijqui para tiisraelitame ma tlahuel titlatlanica. Huan huajca ama nochi tiisraelitame, tojuanti tlen tiitlacajhua TOTECO, sampa timosehu'iaj campa puerta huan tiitztoque ica yejyectzi. 12Xiisa D'ebora. Xiisa huan xihuica se huicatl. Huan ta Barac, tiicone Abinoam, ximotlalana. Xiquinhuica nopa tlacame tlen tiquinitzquitoc ipan tlatehuijcayotl. Ma mitztequipanotij. 13Temoque nopa israelita tlacame tlen motemacayayaj. Yajque motehuitoj ininhuaya inincualancaitacahua. Nopa tlacame tlen iaxcahua TOTECO motecpanque huan yajque, yonque ax nesiyaya intla huelis tlatlanise. 14Hualajque israelita tlacame tlen tlali Efra'in campa nopa amalecitame achtohui itztoyaj. Huan quintoquilijtiyajque isoldados tlen nopa hueyi familia Benjam'in. Nopa tlanahuatijca israelitame hualajque tlen itlal Maquir. Tlacame tlen nopa hueyi familia Zabul'on hualtemoque. 15Nojquiya nopa tequitini huan soldados tlen nopa hueyi familia Isacar temoque hasta nopa tlamayamitl ihuaya D'ebora. Huan iteipa ixhuihua Isacar quipalehuijque D'ebora huan Barac quipalehui nojquiya. Quena, moisihuiltijque para tlapalehuise. Pero iixhuihua Rub'en ax yajque. 16¿Para tlen mocajque ininchaj iixhuihua Rub'en campa tzactoque ininborregojhua? ¿Huelis san quintlacaquiliyayaj nopa tlamocuitlahuiani quema quinnotzayayaj inintlapiyalhua ica tlapitztli? Iixhuihua Rub'en ax pajca itztoque para ax yajque. 17Iixhuihua Galaad mocajque ne seyoc inaliyo Jord'an huan iixhuihua Dan mocajque campa nopa barcos. Iixhuihua Aser mocajque iteno hueyi atl huan ax mijcuenijque campa itztoyaj. San mosiyajcahuayayaj. 18Pero iixhuihua Zabul'on ihuaya Neftal'i, inijuanti, quena. Yajque tlatehuitoj huan ax quichihuilijque cuenta intla miquisqu'iaj. 19Huajca nopa tlanahuatiani tlen cananeos hualajque tlatehuicoj nechca altepetl Taanac, campa pehua nopa atl tlen altepetl Meguido, pero ax tleno quitlanque. Ax quihuicaque niyon se tomi. 20TOTECO huan nochi sitlalime ipan elhuicactli techpalehuijque para tijtlanise S'isara. 21Elqui queja nopa atlajtli Cis'on tlejcoc miyac huan nochi quinhuicac. Quena, quinhuahuatatzqui nochi ininmijcatzitzi. (Ma quipiya fuerza noyolo para nijtlamiltis ni nohuica.) 22Huajca caquistic nopa cahuayo tecactli pampa motlalojtiyajque. Yonque tlahuel motemacayayaj nopa soldados ipan inincahuayos, quistejque ica majmajtli. 23Ielhuicac ejca TOTECO quiijto: 'Xiquintelchihua tlen ehuaj Meroz.' Ma itztoca senquistoc tlatelchihualme tlen nopona itztoque, pampa ax hualajque quipalehuicoj TOTECO para quintehuise icualancaitacahua tlen nel'ia elque tejtetique. 24Pero niquijtohua tlahuel xijtiochihua nopa sihuatl Jael, isihua Heber, nopa quenita. M'as ma quitiochihua Jael que nochi sihuame tlen mocahuaj ipan yoyon caltini. 25S'isara quitlajtlani atl huan Jael quimacac lechi. Ipan se taza tlen yejyectzi, quimacac crema. 26Ica se ima quicuic nopa cuaestaca huan ica inejmatl quicuic se martillo tlen ica quimaquili S'isara ipan itzonteco. Quicuacoyoni huan panoc ipan itzonteco nopa cuaestaca. 27Huan nopona campa huetztoya, mijqui. Quena, iicxitla Jael huetztoya huan nopona mijqui. 28Inana S'isara mocuesohuayaya, huan tlachiyayaya ipan ventana para quiitas intla huala. Moilhuiyaya: ¿Para tlen ax huala S'isara ica icarro? ¿Para tlen icarro huejcahua, huan ax caquisti para huala ica cahuayo tecactli? 29Huan inana moilhuiyaya para melahuac tlen isihua tlatequipanojcahua tlen m'as tlalnamiquij quiilhuiyayaj. Inijuanti quiilhuiyayaj: 30'Huelis miyac tlamantli mocuilijque quema tlatlanque, huan ama nochi moajachihu'iaj. Huelis sesen soldado quitocaros se o ome ichpocame huan S'isara quitocaros nopa yoyomitl tlen m'as yejyectzi ica miyac colores. Huelis nechhualiquilis miyac tlamantli tlen yejyectzi tlajtzontli. Huan tlen m'as yejyectzi tlaijilpili mocahuas para moquechcostis iquechtla ya.' 31TOTECO, nochi mocualancaitacahua ma miquica, pero tlacame tlen mitzhueyichihuaj ma elica queja nopa tonati quema quisa ica nochi ichicahualis." Queja nopa huicayayaj D'ebora ihuaya Barac. Huan teipa nopa israelitame quipixque tlasehuilistli ipan nopa tlali para 40 xihuitl.

will be added

X\