Judges 4

1Huan quema ya mictoya Aod, nopa israelitame sampa pejque quichihuaj tlen ax cuali iixpa TOTECO. 2Huan TOTECO quintemactili imaco Jab'in inintlanahuatijca cananeos, yajaya tlen mosehui para tlanahuatis ipan altepetl Hazor. Huan S'isara elqui itlayacanca tlen isoldados huan itztoya ipan altepetl Haroset Goim. 3Huan Tlanahuatijquetl Jab'in chicahuac quintlaijiyohuiltijtoya nopa israelitame para 20 xihuitl huan quinpiyayaya 900 tepos carrojme para ica tlatehuise. Huajca nopa israelitame quitzajtzilijque TOTECO para ma quinpalehui. 4Huan ipan nopa tonali quintlajtolsencahuayaya nopa israelitame se sihua juez tlen itoca D'ebora. Yajaya itztoya se tiocamanalojquetl huan isihua Lapidot. 5D'ebora nochipa mosehui para tetlajtolsencahuas campa nochi quitocajtiyayaj "D'ebora icoyol". Nopa coyol cuahuitl eltoya ipan nopa tepetini ipan tlali Efra'in tlatlajco altepetini Ram'a huan Betel. Huan nochi israelitame conitayayaj D'ebora para ma quintlajtolsencahua. 6Huan se tonal D'ebora tlanahuati ma quinotzatij Barac, icone Abinoam, tlen itztoya ipan altepetl Cedes ipan inintlal iixhuihua Neftal'i. Huan quema hualajqui, D'ebora quiilhui: --TOTECO tlen itztoc toDios tiisraelitame mitznahuat'ia xiquinsentili 10 mil tlacame tlen hualahuij ipan nopa huejhueyi familias Neftal'i huan Zabul'on huan xiquinyacana hasta nopa tepetl Tabor. 7Nopona inquintehuise isoldados Tlanahuatijquetl Jab'in huan inintlayacanca tlen itoca S'isara. Huan Toteco quichihuas ma monechcahui campa ta campa atemitl Cis'on ica itlatehuijca carros huan ica tlahuel miyac isoldados. Huan quichihuas ma huetzica momaco huan inquintlanise. 8Huan Barac quiijto: --Intla ta tiyas nohuaya, niyas, pero intla ax nohuaya tiyas, na ax niyas. 9Huan D'ebora quiilhui: --Cualtitoc, niyas mohuaya. Pero pampa ax timotemacac titlayacanas, quema huetzis S'isara huan isoldados, tlacame ax mitzhueyitlalise para tijtlanqui ta. Pampa elis se sihuatl tlen TOTECO quitemactilis S'isara imaco. Huajca D'ebora yajqui ica Barac hasta Cedes. Huan Barac quinnotzqui iixhuihua Zabul'on huan Neftal'i ma mosentilica ipan altepetl Cedes. 10Huan 10 mil soldados mosansejcotilijque huan quistejque ica Barac queja inintlayacanca. Huan D'ebora ininhuaya yajqui. 11Huan Heber nopa quenita moiyocatlalijtoya tlen sequinoc quenita tlacame. (Quenitame elque inintoca iixhuihua itex Mois'es.) Huan Heber quiquetztiyajqui ichaj tlen yoyomitl campa hueli huan ajsito hasta campa nopa hueyi ahua cuahuitl tlen itoca Zaanaim tlen eltoya nechca altepetl Cedes. 12Huan S'isara quicajqui para Barac, icone Abinoam, yajtoya ipan tepetl Tabor. 13Huajca S'isara quinsentili nochi 900 itlatehuijca carros huan nochi isoldados huan quistejqui ininhuaya tlen altepetl Haroset Goim huan ajsitoj campa nopa atemitl Cis'on. 14Huajca D'ebora quiilhui Barac: --Xiya amantzi, pampa ama TOTECO mitzyacantiyas huan mitzmactilis S'isara momaco. Huajca Barac temoc ipan tepetl Tabor ica 10 mil soldados. 15Huan TOTECO quinchihualti S'isara huan isoldados huan tlen ihuaya itztoyaj ipan tlatehuijca tepos carrojme tlahuel ma momajmatica hasta mohuihuichijque. Huan Barac huan isoldados pejque quinmict'iaj ica machete. Huajca S'isara temoc ipan icarro huan cholojtejqui san iicxipa. 16Huan Barac huan isoldados quintoquilijtiyajque isoldados huan tlen itztoyaj ipan tlatehuijca carrojme hasta altepetl Haroset Goim. Huan ax mocajqui itztoc niyon se isoldado S'isara. Nochi mijque ica machete. 17Huan S'isara cholo san iicxipa huan yajqui campa nopa cali tlen yoyomitl tlen elqui iaxca Jael tlen isihua Heber, nopa quenita. Yajqui ichaj pampa Heber huan Tlanahuatijquetl Jab'in ipan altepetl Hazor quichijtoyaj se tlajtoli para ax oncas cualantli ica inijuanti. 18Huajca nopa sihuatl, Jael, quisqui ichaj para quiselis S'isara huan quiilhui: --Xicalaqui nica, notlanahuatijca. Amo ximajmahui, pampa axaca mitzajsis nica. Huan yajaya calajqui ichaj tlen yoyomitl para motlatis, huan Jael quipijqui ica se tlaquemitl. 19Huan S'isara quitlajtlani quentzi atl pampa tlahuel amiquiyaya. Pero nopa sihuatl quitlapo se cuetlaxtli tlen ipan quitectoya lechi huan quimacac ma quii huan sampa cuali quipijpijqui. 20Huan S'isara quiilhui nopa sihuatl: --Ximoquetza puertajteno huan intla acajya hualas huan mitztlajtlanis intla nica nimotlatijtoc, xiquilhui para axtle. 21Huan tlahuel cochqui pampa nel'ia tlaxicojtoya. Huan Jael, isihua Heber, quicuic se cuaestaca huan se martillo huan ica yolic monechcahuijtiyajqui campa ya. Huan quiquechili nopa cuaestaca ipan itzonteco huan quisentlapalhuili hasta mocajqui tlatzquitoc ipan tlali, huan nimantzi mijqui. 22Huan ajsico Barac tlen quitemohuayaya S'isara huan Jael quinamiquito huan quiilhui: --Xihuala huan nimitznextilis nopa tlacatl tlen tijtemohua. Huan calajqui Barac huan quiitac S'isara cuali mictoc ica se cuaestaca ipan itzonteco. 23Huajca queja nopa iniixpa nopa israelitame Toteco Dios quintlanqui isoldados Jab'in, inintlanahuatijca cananeos. 24Huan mojmostla nopa israelitame m'as quipixtiyajque chicahualistli iixpa Jab'in inintlanahuatijca cananeos, huan teipa quitzontlamiltijque.

will be added

X\