Judges 15

1Panoc miyac tonali huan ajsic ipohual para quitequise trigo. Huan Sans'on yajqui quipaxaloto isihua pampa quinequiyaya ihuaya itztos. Huan quihuiquili se pilchivojtzi huan quiilhuito itata: --Nijnequi nicalaquis campa nosihua itztoc ipan icuarto. Pero itata nopa ichpocatl ax quicahuili ma calaqui, 2huan quiijto: --Na nimoilhui tijcajtejtoya huan yeca nijmactili mohuampo. Pero nijpixtoc seyoc noichpoca tlen m'as pilsiltzi. ¿Ax tiquita m'as yejyectzi? Huajca ya ximocuili queja ipatlaca. 3Huan Sans'on quiijto: --Ayoc aca huelis nechtlajtlacoltis ica tlen fiero nimechchihuilis infilisteos, pampa ax cuali innechchihuilijtoque. 4Huan Sans'on yajqui huan quinitzqui 300 cayochime huan quincuitlapililpi ojome cayochime huan tlatlajco sese ome inincuitlapilhua quinilpili se tlicuahuitl. 5Teipa quitlati nopa tlicuahuitl huan quinmajcajqui nopa cayochime ma motlalojtiyaca campa inintlatoc nopa filisteos. Queja nopa tlami tlatlac nopa trigo tlen moquetzayaya huan tlen ya quitectoyaj ipan ininmil. Nojquiya tlatlac ininxocomecamil huan nochi inincua tlen olivo. Nochi tlen quitoctoyaj tlatlac. 6Huan nopa filisteos quiijtojque: --¿Ajqueya quichijqui ya ni? Huan tlananquilijque: --Sans'on quichijqui, yajaya tlen imontica nopa tlacatl tlen ehua altepetl Timnat pampa quiquixtili isihua huan quimactili tlen inelhuampo ipan nopa nenamictili. Huan nopa filisteos hualajque huan quitlatijque nopa sihuatl ihuaya itata. 7Huan quema Sans'on quimatqui tlen quichijque nopa filisteos, quinilhui: --Pampa inquichijque ya nopa, ama ax nimosiyajcahuas hasta nimechtzontlamiltis. 8Huan quintlamimicti nochi filisteos nopona huan ax quintlasojtlac. Teipa yajqui para itztoti nechca tepetl Etam campa onca se mijca ostotl ipan tetl. 9Huan nopa filisteos yajque mochihuatoj ipan tlali Jud'a nechca altepetl Lehi. 10Huan tlali Jud'a ehuani quintlajtlanijque: --¿Para tlen inhualahuij nica? Huan nopa filisteos tlananquilijque: --Tihualahuij tiquitzquiquij Sans'on para tijcuepilise ica tlen techchihuilijtoc. 11Huan mosentilijque eyi mil israelita tlacame tlen ejque tlali Jud'a huan yajque campa Sans'on ipan nopa tetl nechca Etam huan quiilhuijque: --¿Ax tijmati nopa filisteos quipiyaj tequihuejcayotl ica tojuanti huan ininmaco tiitztoque? ¿Para tlen tiquintehuijtoc quej ni? Huan Sans'on quinnanquili: --San niquincuepilijtoc tlen nechchihuilijtoque. 12Huajca nopa Jud'a ehuani quiilhuijque: --Tihualahuij timitzitzquise para timitztemactilise ininmaco nopa filisteos. Huan Sans'on quinnanquili: --Xijtestigojquetzaca Toteco para ax innechmictise. 13Huan nopa Jud'a ehuani tlananquilijque: --¡Axtle! Ax timitzmictise. San timitzitzquise huan timitztemactilise ininmaco. Huajca quincahuili ma quitatacatzoca ica ome mecatl tlen yancuic huan quichihualtijque ma quisa tlen nopa tepetl. 14Huan Sans'on ajsito nepa altepetl Lehi ilpitoc, huan nopa filisteos quisacoj tlahuejchijtihualahuij para quinamiquise. Pero Itonal TOTECO motlali ipan Sans'on, huan nopa mecatl yancuic tlen ica quiilpitoyaj elqui queja nopa icpatl lino tlen tlatlatoc, nochi cocotocac huan Sans'on mocajqui majcajtoc. 15Huan quipanti se pilburrojtzi icamachal omiyo tlen noja yancuic eltoya huan quitlalanqui huan ica ya nopa quinmicti mil tlacame. 16Huajca Sans'on quiijto: "Ica se burro icamachal omiyo, nijchijqui se tlamontomitl. ¡Axtle! Nijchijtoc nel'ia ome tlamontomitl ica se burro icamachal omiyo, pampa ica niquinmicti mil tlacame." 17Huan quema tlanqui camati, quimajcajqui nopa camachali, huan nopona quitocajti Ramat Lehi. (Ramat Lehi quinequi quiijtos Tepetl Tlen Icamachal Omiyo Se Burro.) 18Huan teipa Sans'on pejqui amiqui tlahuel huan momaijto ica TOTECO huan quiijto: "Nel'ia hueyi tlen tijchijtoc ica noma pampa titechmaquixtijtoc tiisraelitame tlen nopa filisteos. Huajca ama, amo xinechcahuili ma niamijcamiquis huan nimocahuas ininmaco tlen ax mitzneltoquil'iaj." 19Huajca Toteco Dios quicoyoni nopa tetl nopona nechca Lehi huan mexqui atl. Huan Sans'on atlic huan pejqui quipiya m'as chicahualistli. Huan quitocajti nopona Enhacore. (Enhacore quinequi quiijtos Nopa Ameli Tlen Nopa Tlacatl Tlen Momaijto.) Huan nopa ameli hasta ama eltoc nopona nechca Lehi. 20Huan Sans'on quinyacantiyajqui israelitame para 20 xihuitl pero nopa filisteos noja quinahuatiyayaj nopa tlali.

will be added

X\