Judges 14

1Huan se tonal Sans'on yajqui ipan altepetl Timnat huan quiitac se filistea ichpocatl tlen quiixtocac. 2Huan mocuepqui ichaj huan quiilhui itata ihuaya inana: --Niquixtoca se ichpocatl tlen ehua Timnat huan nijnequi xiyaca xiquijtlanitij para nimocuilis. 3Huan itata ihuaya inana quiilhuijque: --¿Ax hueli tijpantis se ichpocatl nica ihuaya toteixmatcahua o ipan ni altepetl? ¿Para tlen monequi timocuilis se filistea sihuatl tlen ax quineltoca Toteco, niyon ax motequil'iaj ipan inintlacayo nopa tlanextilijcayotl circuncisi'on queja Toteco tlanahuat'ia? Huan Sans'on quinanquili itata: --Pero na ya nopa niquixtoca, techijtlanilitij para nimocuilis. 4Huan itata huan inana ax quimatiyaya para nochi ni tlamantli panoyaya pampa TOTECO queja nopa quinequiyaya ma pano. Yajaya quicualtlaliyaya para ica ni tlamantli quintlanisqu'ia nopa filisteos pampa ipan nopa tonali inijuanti quinnahuatiyayaj tlali Israel ehuani. 5Huan quema Sans'on yahuiyaya altepetl Timnat ihuaya itata huan inana, ajsito campa nopa miyac xocomeca milme tlen iniaxcahua nopa Timnat ehuani. Huan quisqui campa ya se le'on tlen nel'ia tetic huan nanalcatihualayaya para quiajsis. 6Huan Itonaltzi TOTECO motlali ipan Sans'on ica miyac chicahualistli. Huan yonque ax tleno quipiyayaya imaco, quicocototzqui nopa le'on queja elisqu'ia se pilchivojtzi. Pero ax quiilhui itata huan inana tlen panotoya. 7Huan ajsito altepetl Timnat huan quicamahuijque nopa ichpocatl tlen quiixtocayaya huan tlasencajque. 8Huan teipa quema Sans'on sampa yahuiyaya ichaj nopa ichpocatl para quicuiti, Sans'on quisqui tlen iojhui para quitlachiliti itlacayo nopa le'on tlen quimictijtoya. Huan quiitac ipani quinpixtoya cuanecme huan nectli. 9Huan quiquixti nectli huan quicuajtiyajqui ipan ojtli. Huan quema sampa quinajsito itata huan inana nojquiya quinmacac quentzi nectli ma quicuaca, pero ax quinilhui para nopa nectli quicuitoya ipan se le'on itlacayo. 10Huan itata Sans'on yajqui ichaj nopa ichpocatl para tlami tlasencahuas para nopa ilhuitl tlen nenamictili. Huan Sans'on quichijqui se ilhuitl para telpocame tlen elisqu'iaj ihuampoyohua ipan nopa nenamictili pampa queja ni momajtoyaj quichihuaj tlen mosihuajtiyayaj. 11Huan imontat huan imona quiitaque para ajsico Sans'on huan quinnotzque 30 telpocame filisteos para ma itztoca ihuaya ipan iilhui. 12Huan Sans'on queja ni quinilhui nopa telpocame: --Nimechtlajtlanis se ahuil tlatzintoquili tlen ohui huan intla innechilhuise tlen quiijtosnequi ipan ni chicome tonali tlen ni ilhuitl, huajca na nimechmacas 30 yoyomitl tlen senquistoc lino huan 30 yoyomitl para quema inilhuichihuase. 13Pero intla ax inquimatise tlaque quiijtosnequi, huajca innechmacase 30 noyoyo tlen lino, huan 30 noyoyo para quema niilhuichihuas. Huan quinanquilijque: --Xitechilhui nopa ahuil tlatzintoquili tlen ohui huan timitztlacaquilise. 14Huan queja ni quinilhui: "Ipan se tecuajquetl, quisqui tlacualistli, huan tlen se tlen tetic quisqui tlen tzopelic." Huan panoc eyi tonali huan nopa tlanotzalme ax quimatque tlaque quiijtosnequi nopa ahuil tlatzintoquili tlen ohui. 15Huan ipan chicompa tonali, quiilhuijque isihua Sans'on: --Xijtlajtlani Sans'on tlaque quiijtosnequi nopa ahuil tlatzintoquili tlen ohui, pampa intla axtle, tijtlatise ichaj motatahua huan ta nojquiya. ¿Huelis intechnotzque ipan ni ilhuitl para intechtominquixtilise? 16Huajca isihua Sans'on pejqui choca iixpa Sans'on huan quiijto: --Ax tinechicnel'ia. San tinechcualancaita pampa ax tijnequi tinechilhuis tlaque quiijtosnequi nopa ahuil tlatzintoquili tlen ohui tlen tiquintlajtlani nopa telpocame nica. Huan Sans'on quinanquili: --Niyon notata, niyon nonana ax niquinilhuijtoc. ¿Para tlen monequi nimitzilhuis ta? 17Huajca nopa sihuatl chocac iixpa Sans'on nochi nopa tonal quema noja oncac nopa ilhuitl, huan quema ajsic nopa tonali chicome, Sans'on quiilhui isihua tlaque quiijtosnequi nopa ahuil tlatzintoquili tlen ohui pampa quinelcualancamacatoya. Huan nopa sihuatl nima quinilhuito nopa telpocame tlen quiijtosnequi. 18Huan quema aya huetziyaya tonati ipan tonali chicome, nopa telpocame hualajque huan quipohuilijque Sans'on tlaque quiijtosnequi nopa ahuil tlatzintoquili. Quiijtojque: "¿Tlaque m'as tzopelic que nectli? ¿Huan tlaque m'as tetic que se le'on?" Huan Sans'on quinnanquili: "Intla ax inquichijtosqu'iaj nosihua ma chocaqui noixpa, ax inquimajtosqu'iaj tlaque quiijtosnequi tlen nimechtlajtlani." 19Huan Itonaltzi TOTECO motlali ipan Sans'on huan quimacac chicahualistli huan yajqui altepetl Ascal'on. Nopona quinmicti 30 tlacame huan quinquixtili ininyoyo. Huan quinmacac nopa telpocame tlen quimatque tlaque quiijtosnequi nopa ahuil tlatzintoquili. Huan Sans'on nelcualaniyaya huan mocuepqui ichaj ihuaya itata. 20Huajca isihua Sans'on quimactilijque ma mocuili seyoc tlen eliyaya inelhuampo, yajaya tlen itztoya m'as nechca ya ipan nopa nenamictili.

will be added

X\