Judges 12

1Teipa nopa hueyi familia Efra'in mosentilijque isoldados huan panoque ica norte huan quiilhuijque Jeft'e: --¿Para tlen tiyajqui tiquintehuito nopa amonitame huan ax intechnotztejque para ma tiyaca mohuaya? Tojuanti tijtlamitlatise mochaj huan ta nojquiya. 2Huan Jeft'e quinnanquili: --Na ihuaya noteixmatcahua titlaijiyohuiyayaj tlahuel ica nopa amonitame huan nimechnotzqui, pero ax inhualajque intechmanahuiquij. 3Huan quema niquitac para ax inquinequij intechmanahuise, huajca yonque nimoilhui nimiquisqu'ia, chicahuac nimotlali, huan niquintehui nopa amonitame. Huan quena, TOTECO quichijqui ma nitlatlani. Huajca, ¿para tlen inhualahuij ama para inquinequij intechtehuise? 4Huan israelitame tlen tlali Efra'in ehuani quinhuetzquilijque huan quinilhuijque nopa israelitame tlen itztoyaj tlali Galaad ehuani: "Imojuanti ax neli inGalaad ehuani. San initztoque nopa tlasolme tlen incholojtejque totlal Efra'in huan Manas'es." 5Huajca Jeft'e quinsentili isoldados tlen tlali Galaad huan pejqui quintehu'ia nopa tlali Efra'in ehuani huan quintlanque. Huan Jeft'e ihuaya nopa Galaad ehuani moaxcatijque campa nochi momatque apanoque atemitl Jord'an para calaquitij tlali Efra'in. Huan nopa Efra'in ehuani ax huelque mocuepaj inintlal. Huan nopa Efra'in ehuani tlen cholosnequiyayaj tlen ne tlatehuijcayotl, ajsiyayaj campa nopa atemitl huan quinequiyayaj panose, pero nopa Galaad soldados quintlajtlaniyayaj intla ehuaj tlali Efra'in. Huan intla quiijtosqu'iaj para axtle, 6huajca quinyejyecosqu'iaj intla melahuac ax nopona ehuaj. Huan para quimatise tlen melahuac, quinnahuatiyayaj ma quiijtoca nopa tlajtoli "Shibolet". Huan intla ax huelisqu'iaj quitenquixtise cuali huan san quiijtosqu'iaj "Sibolet", huajca quimatisqu'iaj para nel'ia Efra'in ehuani. Huan intla eliyayaj Efra'in ehuani, huajca quinitzquiyayaj huan quinmictiyayaj nopona nechca atemitl Jord'an. Huan queja nopa quinixmatque huan quinmictijque 42 mil Efra'in tlacame. 7Huan Jeft'e, tlen ejqui tlali Galaad, itztoya juez huan tlanahuati ipan nopa israelitame para chicome xihuitl. Teipa mijqui Jeft'e huan quitojque nopona ipan se altepetl ipan tlali Galaad. 8Teipa se tlacatl itoca Ibz'an tlen ehuayaya altepetl Bel'en itztoya juez huan tlanahuati campa nopa israelitame. 9Huan Ibz'an quinpixqui 30 itelpocahua huan 30 iichpocahua. Huan nochi nopa 30 iichpocahua quintemactili para monamictise ica tlacame tlen tlacatque ipan sequinoc huejhueyi familias. Huan nojquiya nopa 30 itelpocahua quinhualiquili ichpocame tlen sequinoc huejhueyi familias para mosihuajtise. Huan Ibz'an itztoya juez huan quinnahuati israelitame para chicome xihuitl. 10Teipa mijqui huan quitojque nechca altepetl Bel'en. 11Teipa elqui juez El'on tlen tlacatqui ipan nopa hueyi familia Zabul'on, huan quipixqui tequiticayotl ica israelitame para majtlactli xihuitl. 12Huan mijqui El'on huan quitojque nechca altepetl Ajal'on ipan tlali Zabul'on. 13Teipa elqui juez Abd'on, icone Hilel, tlen ehuayaya altepetl Pirat'on. 14Huan Abd'on quinpixqui 40 itelpocahua huan 30 itlaca ixhuihua, huan inijuanti nemiyayaj ipan 70 burrojme. Huan Abd'on quinnahuati israelitame para chicueyi xihuitl. 15Huan mijqui Abd'on tlen eliyaya icone Hilel tlen ejqui altepetl Pirat'on. Huan quitojque ipan altepetl Pirat'on ipan tlali Efra'in ipan nopa tepetini ipan nopa tlali tlen achtohuiya eltoya iniaxcahua nopa amalecitame.

will be added

X\