Judges 11

1Jeft'e eliyaya se tlacatl tlen tlali Galaad tlen tlahuel motemacayaya ipan tlatehuijcayotl. Itata itoca eliyaya Galaad queja inintlal itoca, pero inana elqui se ahuilnenca sihuatl. 2Nopa tlacatl Galaad quinpixqui sequinoc ioquichpilhua ica tlen inelsihua. Huan quema nopa telpocame moscaltijque, quitojtocaque Jeft'e huan quiilhuijque para ax tleno huelis quiselis tlen inintata pampa eliyaya icone seyoc sihuatl. 3Huajca Jeft'e quintlalcahuijtejqui itepotz icnihua huan yajqui itztoti ipan tlali Tob. Huan nopona momatqui ininhuaya tlacame tlen mosisin'iaj huan Jeft'e quinyacanayaya para ojchiyase huan tlaxtequise. 4Huan ipan nopa tonali nopa amonitame pejque quintehu'iaj israelitame. 5Huajca nopa israelitame tlen tlayacanayayaj ipan tlali Galaad yajque quinotzatoj Jeft'e ipan itlal Tob, 6huan quiilhuijque: --Xihuala tohuaya huan tielis titotlayacanca, huan tiquintehuise nopa amonitame. 7Huan Jeft'e quinnanquili nopa huehue tlacame tlen tlali Galaad: --¿Para tlen innechtemohuaj ama quema intlaijiyohu'iaj? Nel'ia innechcualancaitaj huan hasta innechquixtijque ipan ichaj notata. 8Huan nopa huehue tlacame tlen tlali Galaad quinanquilijque Jeft'e: --Monequi xitechpalehui huan yeca tihualahuij timitzitaquij. Xihuala tohuaya huan san sejco ma tiquintehuica amonitame huan ta technahuatis nochi tlen tiehuani tlali Galaad. 9Huajca Jeft'e sampa quintlajtlani nopa tlayacanca tlacame tlen tlali Galaad: --¿Intla nimocuepas imohuaya huan san sejco tiquintehuise nopa amonitame huan intla TOTECO quichihuas para ma huetzica nomaco, nel'ia temachtli nielis niimotlayacanca? 10Huan nopa huehue tlacame tlen tlali Galaad quinanquilijque Jeft'e: --Tijtestigojquetzaj TOTECO para queja nopa elis. 11Huajca Jeft'e yajqui ininhuaya nopa tlacame huan nochi nopa altepetl quitequitlalijque Jeft'e para ma eli ininjuez huan inintlayacanca. Huan nopona campa itoca Mizpa tlamiyacapa Jeft'e quiilhui TOTECO nochi nopa tlajtoli tlen monequiyaya para quiselis itequi ica yejyectzi. 12Huan teipa Jeft'e tlatitlanqui ma quitlajtlanitij inintlanahuatijca amonitame: "¿Tlaque tijnequi tohuaya para ama tijnequi techtehuis ipan totlal?" 13Huan nopa tlanahuatijquetl amonita quinanquili itlayolmelajca Jeft'e huan quiilhui: "Timechtehu'iaj pampa inisraelitame intechichtequilijque nochi totlal quema inquisque tlali Egipto. Inmoaxcatijque tlen pejqui ipan nopa atlajtli Arn'on huan yohui hasta nopa atlajtli Jaboc huan onajsi hasta atemitl Jord'an. Huajca ama techcuepili totlal ica cuali." 14Huan Jeft'e sampa quintitlanqui sequinoc tlayolmelahuani para quiitatij nopa tlanahuatijquetl tlen amonitame, 15huan para ma quiilhuica ni tlajtoli: "Tohuejcapan tatahua tiisraelitame ax moaxcatijtoque inintlal moabitame, niyon imotlal inamonitame. 16Pampa quema tiisraelitame tiquisque tlali Egipto, tijpanoque nopa hueyi atl tlen itoca Chichiltic huan tiajsicoj hasta altepetl Cades. 17Huan tohuejcapan tatahua tiisraelitame quitlajtlanijque se favor nopa tlanahuatijquetl ipan tlali Edom para ma quincahuili panose ipan itlal. Pero nopa tlanahuatijquetl tlen Edom ax quincahuili ma panoca. Nojquiya quitlajtlanijque nopa tlanahuatijquetl tlen tlali Moab. Nojquiya ax quincahuili ma panoca huan yeca nopa israelitame mocajque altepetl Cades. 18"Teipa tohuejcapan tatahua panoque ipan nopa huactoc tlali campa ax tleno eli huan quiyahualojque tlali Edom huan tlali Moab hasta ajsitoj iteno tlali Moab ica campa quisa tonati. Huan mochijque ipan seyoc nali nopa atlajtli Arn'on tlen monepant'ia ica tlali Moab, pero ax calajque nopona. 19"Huajca nopa israelitame quitlatitlanijque Tlanahuatijquetl Seh'on inintlanahuatijca amorreos tlen mosehuiyaya para tlanahuatis ipan altepetl Hesb'on. Huan quitlajtlanijque ma quincahuili panose para huelis ajsitij ipan tlen tojuanti totlal. 20"Pero Tlanahuatijquetl Seh'on ax motemachi ipan israelitame para quincahuilis ma panoca ipan itlal. Quinsentili isoldados huan mochihuatoj nechca altepetl Jahaza huan quintehui nopa israelitame tlen eliyayaj tohuejcapan tatahua. 21"Pero TOTECO Dios tiisraelitame quichijqui para tohuejcapan tatahua ma quitlanica nopa Tlanahuatijquetl Seh'on ihuaya isoldados huan moaxcatijque nochi inintlal nopa amorreos. 22Moaxcatijque inintlal amorreos tlen pehua ica nopa atlajtli Arn'on hasta ajsi campa atlajtli Jaboc, huan tlen pehua campa huactoc tlali huan ajsi hasta atemitl Jord'an. 23"Huajca ¿para tlen ama inamonitame inquinequij intechquixtilise tlen TOTECO toDIOS tiisraelitame quinquixtili nopa amorreos huan quinmactili tohuejcapan tatahua tiisraelitame? 24Intla imotlaixcopincayo, Quemos, inmechmacas se tlenijqui, inquiselisqu'iaj para imoaxca, ¿ax que? Tojuanti nojquiya tijmachil'iaj toaxca tlen TOTECO Dios techmacatoc pampa tetojtocatiyajqui toixpa para huelis tijtlanise. 25¿Huelis ta timomati m'as ticuali que Balac, icone Zipor, tlen elqui tlanahuatijquetl ipan tlali Moab? Balac ax quintehui israelitame para quincuilis inintlal quema yaja itztoya. 26Tiisraelitame ya tijpixtoque ni tlali 300 xihuitl huan ama, ¿ta tijnequi? Nochi ni xihuitl tiitztoque ipan altepetini Hesb'on, Aroer huan nochi ni sequinoc altepetini tlen mocahua iteno nopa atlajtli Arn'on. ¿Para tlen ica 300 xihuitl ax inquinectoque para inmoaxcatise? 27Na ax tleno nimitzchihuilijtoc, pero ta quena, pampa ta tihualajtoc para techtehuis. Pero TOTECO, yajaya Juez, huan TOTECO techtlajtolsencahuas tiisraelitame huan inamonitame para tiquitase ajqueya quipiya tlajtlacoli." "Queja nopa, quiilhuijque nopa tlacame tlen quiitatoj nopa tlanahuatijquetl tlen amonitame ipan altepetl Am'on." 28Pero inintlanahuatijca amonitame ax quichihuili cuenta nopa tlajtoli tlen Jeft'e quititlanilijtoya. 29Huan Itonal TOTECO hualajqui huan motlali ipan Jeft'e. Huan quinyacanqui isoldados huan quipanoque tlali Galaad huan Manas'es, huan teipa panotoj altepetl Mizpa ipan tlali Galaad. Huan quisque nopona huan quintehuitoj nopa amonitame. 30Huan Jeft'e quitlajtolcahuili TOTECO tlen quichihuasqu'ia, huan quiilhui: "Intla tijchihuas ma niquintlani nopa amonitame, 31huajca tlen achtohui quisaqui nochaj para nechseliqui quema nimocuepas huan ya nitlatlantos, na nimitziyocacahuilis queja se tlacajcahualistli." 32Huan Jeft'e yajqui quintehuito nopa amonitame, huan TOTECO quichijqui ma quintlani. 33Huan Jeft'e quinmicti miyac icualancaitacahua. Huan quitlanqui 20 altepetini tlen mocahuayaya tlen altepetl Aroer hasta altepetl Minit, huan nojquiya hasta Abel Keramin. Queja nopa israelitame quintlanque nopa amonitame. 34Huan quema Jeft'e mocuepqui ichaj ipan altepetl Mizpa, quinamiquico iichpoca tlen iyojtzi icone eliyaya. Huan quinamiquico mijtotijtihualajqui huan tlatzotzontihualajqui ica pandero. 35Huan quema Jeft'e quiitac para huala iichpoca para quinamiquiqui, quitzayanqui iyoyo ica cuesoli huan quiijto: --¡Ay tinoichpoca! Nel'ia hueyi nimocuesohua huan ta tlen tinechcuesolmaca. Na nijtencahuilijtoc Toteco para nijmacas tlen achtohui nechnamiquiqui huajca monequi nijchihuas tlen niquijtojtoc. 36Huajca nopa ichpocatl quiilhui itata: --Notata, monequi xijchihua ica na queja tijtencahuilijtoc TOTECO, pampa TOTECO quichijqui xiquintlani mocualancaitacahua, nopa amonitame. 37Huan nopa ichpocatl nojquiya quiilhui itata: --San nijnequi xinechcahuili ma niyas achtohui campa nopa tepetini para ome metztli ihuaya nohuampoyohua para nichocati pampa ax quema nimonamictis. 38Huajca Jeft'e quicajqui iichpoca ma yohui para ome metztli. Huan yajqui ihuaya ihuampoyohua ipan nopa tepetini huan chocaque pampa ax quema monamictisqu'ia. 39Quema ya panotoya ome metztli mocuepqui ichaj campa itata, huan Jeft'e temacac iichpoca para quisentequipanos Toteco tiopan calijtic queja quiijtojtoc. Huajca ax quema itztoya ihuaya se tlacatl. 40Huan pampa iichpoca Jeft'e motemacac quichihuas tlen itata quitencahuilijtoya Toteco, ama nopa israelita ichpocame yohuij iyoca huan quiilnamiquij para nahui tonali sesen xihuitl.

will be added

X\