Joshua 13

1Huan quema Josu'e ya eliyaya huehuentzi, TOTECO quiilhui: "Ta ya tihuehuentzi huan noja mocahua miyac tlaltini para inquitlanise. Ya ni tlen polihui: 2"Nochi inintlal nopa filisteos, nochi inintlal nopa gesureos, 3nochi nopa tlali tlen ama iniaxca nopa cananeos tlen pehua campa temo tonati ica atemitl Sihor ipan inepantipa tlali Egipto huan ica norte yohui hasta inepantipa tlali Ecr'on. Nojquiya polihui nopa macuili altepetini tlen nopa filisteos: Gaza, Asdod, Ascal'on, Gat huan Ecr'on. Huan ica sur polihui nopa tlali tlen nopa aveos, 4huan ica sur, nochi inintlal cananeos ica nopa altepetl Mehara tlen nel'ia eliyaya iniaxca nopa sidonios huan nochi nopa tlali ica norte hasta Afec campa inepa inintlal nopa amorreos. 5Nojquiya polihui inintlal nopa giblitame ica nochi tlali L'ibano para campa quisa tonati. Nopa tlali pehua ica altepetl Baal Gad itzintla tepetl Herm'on huan yohui hasta campa se hueli calaqui ipan Hamat ica norte. 6"Nojquiya polihui nochi inintlal nopa sidonios tlen itztoque ipan nopa tepetini tlatlajco L'ibano huan Misrefotmaim. "Na niquintojtocas nochi ni tlacame imoixpa inisraelitame. Huajca monequi nojquiya inmoilhuise quejatza inquinmajmacase nochi ni tlaltini queja nimitznahuatijtoc. 7Xijxelo ni tlali ica nopa chicnahui huejhueyi familias tlen aya quiselijtoque tlali huan ica ne seyoc tlajco nopa hueyi familia Manas'es tlen ax quiselijtoc." 8Nopa hueyi familia Rub'en huan Gad, huan tlajco nopa hueyi familia Manas'es ya quiselijque inintlal pampa Mois'es, itlatequipanojca TOTECO, quinmacac nopa tlali tlen quintocarohua nopona ipan ne inaliyo atemitl Jord'an para campa quisa tonati. 9Inintlal ajsi ica sur huan campa quisa tonati hasta altepetl Aroer iteno nopa atemitl Arn'on. Nojquiya quipiya nopa altepetl tlatlajco nopa tlamayamitl Arn'on, huan quipiya nochi nopa tlamayamitl tlen altepetl Dib'on campa sur hasta altepetl Medeba m'as ica norte. 10Huan inintlal ajsi ica campa quisa tonati hasta ininnepantipa Am'on. Inintlal quipiya nochi nopa altepetini tlen nopa Tlanahuatijquetl Seh'on tlen nopa amorreos quinnahuati tlen campa mosehui para tlanahuatis ipan altepetl Hesb'on. 11Nopa tlali nojquiya quipiya Galaad, inintlal nopa gesureos huan maacateos. Quipiya nochi nopa tepetl Herm'on huan nochi tlali Bas'an tlen ontlantoc hasta Salca, 12huan nochi itlanahuatilis Og, nopa tlanahuatijquetl tlen tlali Bas'an tlen mosehui para tlanahuatis ipan altepetl Astarot huan Edrei. (Huan Og eliyaya nopa iyojtzi huejcapantic refaita tlacatl tlen mocajqui pampa Mois'es quintehuijtoya huan quinmictijtoya.) 13Pero nopa israelitame ax quintojtocaque nopa gesureos huan maacateos, huan yeca inijuanti itztoque ininhuaya israelitame hasta ama. 14Quema quinmajmacayaya nopa huejhueyi familias inintlal, ax tleno quiselijque iteipa ixhuihua Lev'i. Monequiyaya nopa levitame quiselisqu'iaj nochi nopa tlacajcahualistli tlatlatili tlen israelitame quitencahuasqu'iaj iixpa TOTECO Dios. Huan TOTECO quinahuati para nopa tlacajcahualistli elisqu'ia iniaxca ipatlaca se tlali. 15Ya ni nopa tlali tlen Mois'es quimacac nopa hueyi familia Rub'en queja imiyaca itlacajhua. 16Quinmacac nopa tlali tlen pehua altepetl Aroer ipan iteno nopa tlamayamitl Arn'on, huan nopa altepetl tlen eltoc tlatlajco nopa tlamayamitl ihuaya nochi nopa tlamayamitl nechca Medeba. 17Huan inintlal quipiya altepetl Hesb'on huan nochi pilaltepetzitzi tlen eltoc ipan nopa tlamayamitl. Nopa pilaltepetzitzi eliyaya Dib'on, Bamot Baal, Bet Baal Me'on, 18Jahaza, Cademot, Mefaat, 19Quiriataim, Sibma huan Zaret Sahar tlen mocahua ipan nopa tepetl ipan nopa hueyi tlamayamitl. 20Inintlal nojquiya quipiya altepetini: Bet Peor, Bet Jesimot, nopa tlaixtemolis ipan tepetl Pisga, 21huan nochi nopa altepetini tlen eltoc ipan tlamayamitl. Huan quipiya nochi itlanahuatilis Seh'on inintlanahuatijca nopa amorreos tlen mosehui para tlanahuatis ipan altepetl Hesb'on. Mois'es quintlantoya Seh'on huan nopa tlayacanani ipan Madi'an tlen itztoyaj ipan itlal huan quipalehuiyayaj. Inintoca eliyaya Ev'i, Requem, Zur, Hur huan Reba. 22Nojquiya nopa israelitame quimictijque Balaam, nopa tetonal tlachilijquetl tlen elqui icone Beor. 23Huan nochi nopa tlali tlen quiseli nopa hueyi familia Rub'en tlanqui campa iteno atemitl Jord'an. Huan quiselijque nopa altepetini huan pilaltepetzitzi tlen mocajqui ipan nopa tlali nopa familias tlen iteipa ixhuihua Rub'en. 24Ya ni nopa tlali tlen Mois'es quimacac nopa hueyi familia Gad queja ininmiyaca itlacajhua. 25Quimacac altepetl Jazer, huan nochi nopa altepetini ipan tlali Galaad huan tlajco inintlal nopa amonitame tlen ajsic hasta nopa seyoc altepetl Aroer tlen mocahua nechca altepetl Rab'a pero quentzi m'as para campa quisa tonati. 26Huan nojquiya quiselijque nopa tlali tlen pejqui ipan altepetl Hesb'on huan yajqui hasta altepetini Ramat Mizpa huan Betonim, huan tlen pehua ica altepetl Mahanaim huan yohui hasta inepa Debir. 27Huan ipan nopa tlamayamitl nechca atemitl Jord'an nopa hueyi familia Gad nojquiya quiselijque altepetini Bet Aram, Bet Nimra, Sucot, Zaf'on huan nopa tlali tlen mocahuayaya tlen eliyaya iaxca Seh'on, nopa tlanahuatijquetl ipan altepetl Hesb'on. Huan inintlal Gad ica campa temo tonati ajsic hasta iteno atemitl Jord'an huan yajqui ica norte hasta nopa mantoc atl Cineret. 28Nochi ni altepetini ica ininpilaltepetzitzi quintocaro nopa familias tlen itztoyaj iteipa ixhuihua Gad. 29Huan ya ni nopa tlali tlen Mois'es quimacac nopa tlajco hueyi familia Manas'es queja imiyaca ifamilias. 30Quintocaro nochi nopa tlali tlen achtohui eliyaya iaxca Tlanahuatijquetl Og ipan tlali Bas'an. Inintlal pejqui ica altepetl Mahanaim huan quipixqui nochi setenta pilaltepetzitzi tlen Jair achtohuiya quitlantoya ipan tlali Bas'an. 31Nojquiya quipixqui tlajco tlali Galaad huan nopa altepetini Astarot huan Edrei campa mosehui Tlanahuatijquetl Og para tlanahuatis. Nochi ni tlali elqui iniaxca iteipa ixhuihua Maquir tlen elqui icone Manas'es huejcajquiya huan quinmajmacac queja ininmiyaca ininfamilias. 32Huajca nochi ya ni nopa tlaltini tlen Mois'es temacac ipan itlamayantipa tlali Moab ipan iteno atemitl Jord'an campa quisa tonati imelac Jeric'o ipan seyoc inali. 33Pero Mois'es ax quinmacac iteipa ixhuihua Lev'i niyon se inintlal. Pero ipatlaca se inintlal quinilhui quintocarohua para quiselise TOTECO toDIOS tiisraelitame queja iniaxca huan ax tlali.

will be added

X\