Joshua 11

1Quema Tlanahuatijquetl Jab'in ipan altepetl Hazor quimatqui ya nopa, tlatitlanqui ma quinyolmelahuatij miyac tlanahuatiani para ma mosentilica ica ininsoldados para san sejco ma quintehuitij israelitame. Quiyolmelajqui nopa tlanahuatijquetl Jobab tlen tlali Mad'on huan nojquiya nopa tlanahuatijquetl tlen Simr'on huan tlen Acsaf. 2Nojquiya quinyolmelajqui nochi nopa tlanahuatiani tlen itztoyaj ipan tepetini ica norte, huan campa tlamayantipa Arab'a ica sur tlen nopa atemitl Cineret huan campa tepetini nejnechca Dor neca campa calaqui tonati. 3Quinyolmelajqui nopa tlanahuatiani tlen nopa cananeos ica campa quisa tonati huan nopa sequinoc campa calaqui tonati. Nojquiya quinyolmelajqui nopa tlanahuatiani tlen nopa amorreos, heteos, ferezeos huan jebuseos tlen itztoque campa tepetini huan nopa tlanahuatijquetl tlen nopa heveos tlen itztoque ipan itlaixtemolis tepetl Herm'on ipan tlali Mizpa. 4Huan nochi ni tlanahuatiani quisque ica ininsoldados huan ica miyac tlatehuijca carros huan tlahuel miyac cahuayojme. Itztoyaj tlahuel miyac soldados hasta axaca hueliyaya quinpohua pampa nesiyayaj queja imiyaca xali iteno hueyi atl. 5Nochi inijuanti mosentilijque huan mocajque nechca nopa ameli tlen itoca Merom para quintehuise israelitame. 6Pero TOTECO quiilhui Josu'e: "Amo xiquinimacasi pampa mostla queja ama ni hora na ya nimechmictilijtos nochi inijuanti. Huan inquitequise se iniicxitlalo inincahuayos para ax motlalose huan inquitlatise inintlatehuijca carros." 7Huajca Josu'e huan nochi isoldados quinixtacatehuitoj nechca atemitl Merom huan pejque quintehu'iaj. 8Huan TOTECO quintemactili ininmaco nopa israelitame, huan quintehuijque huan quintojtocatiyajque hasta nopa Hueyi Altepetl Sid'on huan hasta Misrefot Maim. Huan para campa quisa tonati quintepotztocaque hasta nopa Tlamayamitl tlen Mizpa, huan niyon se ax mocajqui itztoc. 9Huan Josu'e quichijqui queja TOTECO tlanahuatijtoya huan quitejque se iniicxitlalo inincahuayos huan quintlati inintlatehuijca carros. 10Teipa quema sampa yohuiyaya Josu'e ichaj, quitlanqui altepetl Hazor, huan quimicti itlanahuatijca. (Achtohui altepetl Hazor elqui tlen quipixqui tequiticayotl ica nochi sequinoc altepetini ipan nochi ni tlaltini.) 11Huan quinmicti ica machete nochi tlen nopona itztoyaj huan quitlatijque nopa altepetl. 12Huan teipa Josu'e quintehuijqui nochi nopa altepetini tlen iniaxcahua nopa tlanahuatiani tlen mosentilijtoyaj para tlatehuise. Quintlanqui nopa altepetini huan quinmicti nochi tlen itztoyaj nopona queja tlanahuati Mois'es, itlatequipanojca TOTECO, huejcajquiya ma quichihuaca. 13Pero nopa israelitame ax quitlatijque niyon se altepetl tlen quichijtoyaj ipan tetl. San Hazor, quena, quitlatijque. 14Quintlamimictijque tlen itztoyaj ipan nopa altepetini huan moaxcatijque nochi tlapiyalime huan tlamantli tlen oncayaya. Niyon se tlacatl ax mocajqui itztoc. 15Nochi tlanahuatili tlen TOTECO quinahuatijtoya Mois'es ma quichihuaca, Mois'es quipanoltijtoya ica Josu'e para ma quichihua. Huan senquistoc nochi nopa tlanahuatil Josu'e quichijqui. Josu'e ax quiiyocacajqui niyon se tlanahuatili tlen TOTECO quinahuatijtoya Mois'es. 16Huan Josu'e quitlanqui nochi nopa tlali campa hueli. Quitlanqui nopa tlali campa tepetini, campa huactoc tlali Neguev, nochi tlali Gos'en, nochi nopa tlamayamitl nechca atl, nochi tlali Arab'a, huan nochi nopa tepetini huan tlamayantipa tlen ama eltoc ipan tlali Israel. 17Mocuilijtoyaj inintlal ica inepa tlen pehua ipan tepetl Halac nechca Seir ica sur huan yohui hasta Baal Gad ipan nopa Tlamayamitl L'ibano ica norte tlen mocahua itzintla tepetl Herm'on. Huan Josu'e quinitzqui huan quinmicti nochi tlanahuatiani ipan nopa tlali, 18yonque huejcajqui para quintehuijtinenqui. 19San ica nopa heveos tlen altepetl Gaba'on quichijque se tlajtoli, pero nochi sequinoc heveos quinmictijque. 20Pampa TOTECO quinyoltetili inincualancaitacahua para ma motochonchihuaca huan ma quintehuitij nopa israelitame. Huan teipa nopa israelitame quintzontlamiltijque huan ax quipixque ininyolo ininhuaya queja TOTECO quinahuatijtoya Mois'es ma quichihuaca. 21Ipan nopa tonali Josu'e yajqui quintzontlamiltito nopa tlacame huejcapantique tlen eliyayaj iteipa ixhuihua Anac huan itztoyaj ipan tepetl Hebr'on, Debir, Anab huan ipan nochi tepetini campa ama tlali Jud'a huan tlali Israel. Quinmicti huan quinxolehuili inialtepehua. 22Huan queja nopa ax mocajqui niyon se huejcapantic tlacatl ipan inintlal nopa israelitame. San, quena, sequin mocajque ipan tlali Gaza, Gat huan Asdod. 23Huajca queja nopa Josu'e quitlanqui nochi nopa tlali queja TOTECO quiilhuijtoya Mois'es. Huan Josu'e quinmajmacac nopa israelitame nopa tlali para iniaxca queja TOTECO quiijto. Quinmajmacac sesen tlen nopa hueyi familias queja imiyaca iteipa ixhuihua. Huan teipa, quena, oncac tlasehuilistli ipan nopa tlali huan ayoc oncac tlatehuijcayotl.

will be added

X\