Joshua 10

1Huan quicajqui Adonisedec nopa tlanahuatijquetl tlen altepetl Jerusal'en quejatza Josu'e quitlantoya altepetl Hai huan quimictijtoya itlanahuatijca. Huan momacac cuenta para quixolejqui nochi tlen eltoya ipan Hai san se queja quixolejqui nochi ipan altepetl Jeric'o huan quimicti itlanahuatijca. Nojquiya Tlanahuatijquetl Adonisedec quicajqui para nopa gabaonitame quichijtoyaj se tlajtoli ica nopa israelitame huan ama mocahuayayaj ininhuaya. Huajca nel'ia majmajqui. 2Huan noja m'as majmajqui pampa quimatqui Gaba'on nel'ia eliyaya se altepetl hueyi huan quipixqui chicahualistli queja nopa altepetini campa mosehu'ia se tlanahuatijquetl. Nojquiya altepetl Gaba'on elqui m'as hueyi que altepetl Hai, huan nochi isoldados nel'ia mooquichmatiyayaj. 3Yeca Tlanahuatijquetl Adonisedec quintitlanqui itlayolmelajcahua ma yaca quiitatij Tlanahuatijquetl Hoham ipan altepetl Hebr'on, Tlanahuatijquetl Piream ipan altepetl Jarmut, Tlanahuatijquetl Jaf'ia ipan altepetl Laquis huan Tlanahuatijquetl Debir ipan altepetl Egl'on. Huan quinilhui: 4"Xihualaca nica, xinechpalehuiquij tijtehuise altepetl Gaba'on pampa inijuanti mohuampochijtoque ihuaya Josu'e huan nopa israelitame." 5Huan queja nopa ininsoldados nopa macuili tlanahuatiani tlen amorreos, (inijuanti elque nopa tlanahuatiani tlen Jerusal'en, Hebr'on, Jarmut, Laquis huan Egl'on) mosansejcotilijque para quitehuise Gaba'on. Huan yajque huan mocajcajque nechca nopa altepetl para quitehuitij. 6Huajca nopa Gaba'on ehuani quititlanilijque se amatl Josu'e campa itztoya ipan Gilgal huan quiyolmelajque: "Amo xitechtlahuelcahua tojuanti tlen timotlatequipanojcahua. Xihualaca nimantzi xitechpalehuiquij huan xitechmanahuiquij, pampa nochi nopa tlanahuatiani tlen quinnahuat'iaj amorreos campa tlachiquiltipa mosentilijtoque para techtehuise." 7Huajca Josu'e quisqui tlen Gilgal ica nochi isoldados tlen m'as motemacayayaj. 8Huan TOTECO quiilhui Josu'e: "Amo xiquinimacasi pampa na nimitzmactilis momaco. Huan axaca huelis mohuaya motlalis." 9Huan Josu'e nejnenqui nochi se yohual tlen Gilgal huan quinixtacahuito nopa amorreos. 10Huan TOTECO quichijqui ma momajmatica iniixpa nopa israelitame huan ma cholojtehuaca. Huan quipalehui Josu'e ma quinmicti miyac ipan se hueyi tlatehuijcayotl nechca Gaba'on. Teipa quichijqui para nopa israelitame ma quintojtocatiyaca ne sequinoc ipan nopa tlaixtemolis nechca altepetl Bet Hor'on. Huan quinpalehui noja ma quinmictijtiyaca nopa amorreos hasta nopa altepetini Azeca huan Maceda. 11Huan quema nopa amorreos temoque nopa tlaixtemolis nechca Bet Hor'on para mochololtise tlen nopa israelitame, TOTECO quimajcajqui tesihuitl ininpani tlen elhuicac tlen eliyaya queja huejhueyi tetini. Huan TOTECO quinmicti m'as amorreos ica tesihuitl que israelitame quinmictijque ica ininmachete. 12Huan quema TOTECO quinmactiliyaya nopa amorreos ininmaco israelitame, Josu'e quicamahui TOTECO iniixpa nopa israelitame huan quiijto: "Ma moquetza tonati ipan nopa altepetl Gaba'on. Huan ma moquetza metztli ipan nopa tlamayamitl Ajal'on." 13Huajca tonati huan metztli moquetzque, hasta nopa israelitame quintlanque inincualancaitacahua. Huan ya ni huan nochi tlen panoc ijcuilijtoc ipan nopa tlapohualistli Jaser. Huan tonati moquetzqui tlatlajco ipan elhuicactli huan quichixqui nechca se tonal para oncalaquisqu'ia. 14Ax quema oncatoya seyoc tonal queja nopa tonal, niyon ax quema oncas; pampa TOTECO quitlacaquili itlajtol se tlacatl. Huan TOTECO nel'ia tlatehuiyaya para nopa israelitame. 15Teipa Josu'e huan nopa israelitame sampa yajque campa mocajcahuayayaj ipan Gilgal. 16Huan ipan nopa tlatehuijcayotl nopa macuilti tlanahuatiani cholojque huan motlatijque ipan se mijca ostotl nechca altepetl Maceda. 17Pero se acajya quiilhui Josu'e canque motlatiyayaj. 18Huajca Josu'e tlanahuati: "Xijmimiloca huejhueyi tetini campa calajque ipan nopa mijca ostotl huan cuali xijtzacuaca. Teipa xiquincahuaca soldados nopona ma quimocuitlahuica para ax huelis quisase. 19Pero imojuanti amo ximoquetzaca. Xiquintojtocatiyaca imocualancaitacahua huan xiquintehuica ica iniica. Amo xiquincahuilica ma calaquica ipan inialtepe, pampa imoTECO Dios inmechmactilijtoc imomaco." 20Huajca Josu'e ininhuaya nopa israelitame quintlanque nopa amorreos huan quinmictijque ipan se hueyi tlatehuijcayotl. San se ome cholojque huan motlatitoj ipan altepetini tlen tzactoya. 21Huan nochi israelita soldados ajsique ica cuali campa itztoya Josu'e nechca Maceda campa mocajcajtoyaj. Huajca axaca motemacac para ininca camatis tlen fiero nopa israelitame. 22Teipa Josu'e quiijto: "Xijtlapoca nopa mijca ostotl campa inquintzajque nopa macuilti tlanahuatiani huan techhualiquilica." 23Huajca nopa israelitame quinquixtijque tlen nopa mijca ostotl nopa macuilti tlanahuatiani; nopa tlanahuatijquetl tlen Jerusal'en, Hebr'on, Jarmut, Laquis huan Egl'on. 24Huan quema quinhualicaque iixpa Josu'e, quinnotzqui nochi nopa israelita soldados ma monechcahuica. Huan quinnahuati nopa tlayacanani tlen isoldados, quinilhui: "Xiquintlaliliquij imoicxi ininquechtla ni tlanahuatiani." Huan queja nopa quichijque. 25Huajca Josu'e quinilhui: "Amo ximajmahuica niyon amo xiyolcuesihuica. Ximotetilica huan ximotemacaca pampa queja ni TOTECO quinchihuilis nochi imocualancaitacahua." 26Teipa Josu'e quinmicti nopa tlanahuatiani huan tlanahuati para sesen ma quicuahuiyonica ipan se cuahuitl. Huan queja nopa quincajque hasta quema tiotlaquixqui. 27Huan quema calaquiyaya tonati, Josu'e tlanahuati ma quintemohuica nopa mijcatzitzi huan ma quintemaca ipan nopa ostotl tlen ipan motlatijtoyaj. Teipa quitzajque nopa mijca ostotl ica huejhueyi tetini huan queja nopa noja eltoc hasta ama. 28Ipan nopa tonal nojquiya Josu'e quitlanqui nopa altepetl Maceda huan quitlamixolejqui. Quinmachetejhui inintlanahuatijca huan nochi tlen itztoyaj nopona, huan axaca mocajqui itztoc. Quichihuili nopa tlanahuatijquetl ipan Maceda san se queja quichihuili nopa tlanahuatijquetl tlen altepetl Jeric'o. 29Huan teipa Josu'e huan nopa israelitame quisque Maceda huan yajque altepetl Libna quitehuitoj. 30Huan nojquiya TOTECO quinmactili nopa altepetl ihuaya itlanahuatijca. Huan quinmictijque nochi tlen itztoyaj nopona ica machete. Axaca mocajqui itztoc, huan quichihuilijque inintlanahuatijca san se queja quichijque ica nopa tlanahuatijquetl tlen Jeric'o. 31Teipa Josu'e huan nopa israelitame quisque Libna huan quiyahualotoj altepetl Laquis para quitehuise. 32Huan mostlaijqui TOTECO quinmactili altepetl Laquis huan nopa israelitame quinmachetejhuijque nochi tlen itztoyaj nopona queja quichijtoyaj ipan Libna. 33Huan quema quitehuiyayaj Laquis, Tlanahuatijquetl Horam ipan altepetl Gezer hualajqui ica isoldados para quimanahuico nopa altepetl, pero Josu'e nojquiya quitlanqui ya ininhuaya nochi isoldados huan axaca quicajqui itztoc. 34Huan quema Josu'e huan nopa israelita soldados tlen itztoyaj ihuaya quisque altepetl Laquis, quiyahualotoj altepetl Egl'on para quitehuise. 35Huan ipan nopa tonal quitlanque nopa altepetl huan quinmachetejhuijque nochi tlen nopona itztoyaj. Quintlamimictijque queja quichijtoyaj ica Laquis. 36Teipa quistejque altepetl Egl'on huan yajque altepetl Hebr'on para quitehuitij. 37Huan quitlanque nopa altepetl huan quimachetejhuijque nopa tlanahuatijquetl huan nochi tlacame tlen itztoyaj nopona huan ipan nochi pilaltepetzitzi nejnechca. Quichijtoyaj san se queja quichijtoyaj ica altepetl Egl'on. Huan axaca mocajqui itztoc. 38Teipa Josu'e huan nopa israelita soldados sampa yajque altepetl Debir para quitehuitij. 39Huan quimachetejhuijque nopa tlanahuatijquetl huan nochi tlen itztoyaj ipan nopa altepetl huan ipan nochi ipilaltepehua. Huan axaca mocajqui itztoc ipan Debir pampa quintlamimictijque nochi queja quichijtoyaj ipan altepetl Hebr'on huan Libna. 40Queja nopa Josu'e quitlanqui nochi nopa tlali huan inintlanahuatijcahua. Ica norte quitlanqui campa nopa tlachiquiltipa, huan ica sur campa nopa huactoc tlali Neguev. Quitlanqui nopa tlamayan tlali campa temo tonati huan nopa tlaixtemolis ica campa quisa tonati. Nochi altepetini quintlamixolejqui huan nochi tlacame quintlamimicti. Axaca mocajqui itztoc queja technahuatijtoya TOTECO Dios tlen tiisraelitame tijtequipanohuaj. 41Quintlamitlanqui huan moaxcati nochi nopa tlali tlen Cades Barnea ica sur hasta Gaza campa temo tonati, huan nochi nopa tlali tlen Gos'en hasta altepetl Gaba'on ica norte. 42Nochi ya ni quichijqui ica se huelta pampa techtehuili TOTECO Dios tlen tiisraelitame tijtequipanohuaj. 43Huan teipa Josu'e huan nochi israelita soldados sampa yajque campa mocajcajtoyaj ne sequinoc israelitame ipan tlali Gilgal.

will be added

X\