Joshua 1

1Mois'es, itlatequipanojca TOTECO mijqui, huan TOTECO quinojnotzqui Josu'e, itelpoca Nun, tlen ipa quipalehuiyaya Mois'es huan quiilhui: 2"Ya mijqui notlatequipanojca Mois'es. Huajca ama monequi para ta ininhuaya nochi ni tlacame ximocualtlalica huan xiquixcotonaca ni atemitl Jord'an para inyase ipan nopa tlali tlen nimechmacas. 3Huan na nimechmacas nochi nopa tlali tlen ipan innejnentiyase queja ihuaya nimocajqui Mois'es para nijchihuas. 4Nimechmacas nopa tlali tlen pehua ipan huactoc tlali ica sur huan onajsi ica norte hasta nopa tepetl L'ibano. Campa temo tonati nopa tlali pehua ipan nopa Hueyi Atl Mediterr'aneo huan yohui hasta nopa hueyi atemitl 'Eufrates. Quena, nochi inintlal nopa heteo tlacame elis imoaxca. 5Axaca huelis mitztlanis ipan nochi moyolis. Na niitztos mohuaya queja niitztoya ihuaya Mois'es. Ax quema nimitzcajtehuas, niyon ax nimitztlahuelcahuas. 6Ximoyoltetili huan ximosemaca pampa ta tiquinyacanas ni tlacame para tiquinaxcatis nopa tlali tlen ininhuaya nimocajqui ininhuejcapan tatahua para niquinmacasqu'ia. 7San ximoyoltetili huan ximosemaca. Ximomocuitlahui para tijchihuas nochi nopa tlanahuatili tlen notlatequipanojca Mois'es mitzmacatejqui. Huan intla tijchihua nochi queja tlen eltoc ipan nopa tlanahuatili, huajca nochi tlen tijchihuas quisas cuali. 8Ax quema xijcahua xiquinilnamiquiltijtinemi israelitame tlen quiijtohua nopa amatlapohuali tlen quipiya notlanahuatil. Ximoilhuijtinemi tlen notlanahuatil tonali huan yohuali para huelis tijchihuas nochi tlen quiijtohua. Queja nopa tinejnemis ica tlalnamiquistli huan nochi tlen tijchihuas quisas cuali. 9Pero nimitznahuat'ia ximoyoltetili huan ximosemaca. Amo ximajmahui, niyon amo ximocueso, pampa na, nimoTECO Dios, niitztos mohuaya campa hueli campa tinentinemis." 10Huajca Josu'e quinnahuati nochi tlen quinyacanayayaj nopa tlacame: 11"Xiyaca ipan nochi yoyon caltini huan xiquinnahuatica nochi israelitame ma quisencahuaca tlacualistli, pampa ica eyi tonali tiquixcotonase ni atemitl Jord'an para timoaxcatise nopa tlali tlen TOTECO Dios techmacas." 12Nojquiya Josu'e quincamahui iteipa ixhuihua Rub'en, Gad huan nopa tlajco iteipa ixhuihua Manas'es huan quinilhui: 13- 14--Xiquilnamiquica tlen inmechnahuati Mois'es, itlatequipanojca TOTECO. TOTECO Dios inmechmacatoc ni tlali ipan ni inaliyo atemitl Jord'an para nica huelis inmosiyajcahuase. Huan inquincajtehuase imosihuajhua, imoconehua huan imotlapiyalhua nica, pero nochi imosoldados monequi quipanose ni atemitl ica inintepos mocualtlalijtose para tlatehuise. Inijuanti quintlayacancuilijtiyase huan quinpalehuise iniicnihua para quitlanise nopa tlali. 15Huan imosoldados tlatehuise nopona ipan seyoc nali hasta quema TOTECO techpalehuis ma tijtlanica nopa tlali campa ne sequinoc israelitame huelise mosiyajcahuase. Teipa inmocuepase nica ipan imotlal ipan ni inaliyo Jord'an para campa quisa tonati huan ya initztose ica paquilistli ipan ni imotlal tlen inmechmacac Mois'es, itlatequipanojca TOTECO. 16Huan inijuanti tlananquilijque: --Tijchihuase nochi tlen technahuatijtoc, huan campa techtitlanis, nopona tiyase. 17Queja tijneltoquilijque Mois'es nochi tlen technahuati, nojquiya nochipa timitzneltoquilise. San tijnequij para TOTECO Dios tlen tijtequipanohuaj ma mohuaya yohui queja ihuaya yajqui Mois'es. 18Intla se acajya ax quinequi quichihuas tlen ta tijnahuatis, tijmictise. San ximoyoltetili huan ximosemaca.

will be added

X\