JUAN 9

1Jes'us nejnemiyaya ipan ojtli, huan quiitac se tlacatl tlen popoyotzi tlen queja nopa tlacatqui. 2Huan tiimomachtijcahua tijtlajtlanijque: --Tlamachtijquetl, ¿ajqueya itlajtlacol para elqui popoyotzi ne tlacatl? ¿Itlajtlacol inana o itata o san ya itlajtlacol? 3Huan Jes'us techilhui: --Ax tlacatqui popoyotzi pampa itlajtlacol, niyon pampa itlajtlacol inana, niyon itata. Tlacatqui queja nopa para ma monextis ipan ya tlen Toteco ica ihueyi chicahualis hueli quichihua. 4Monequi nijchihuas nopa tequitl tlen Toteco nechtitlantoc ma nijchihua quema noja tona huan onca hora, pampa san quentzi polihui para tlayohuas huan ayoc aca huelis tequitis. 5Ama quema noja niitztoc ipan ni tlaltepactli, niitztoc itlahuil ni tlaltepactli huan niquintlahuilijtos tlacame ipan inintlalnamiquilis. 6Huan quema quiijtojtoya ni tlajtoli, Jes'us chajchac huan quichijqui soquitl ica ichajcha huan quitlalili nopa soquitl ipan iixtiyol nopa tlacatl tlen popoyotzi. 7Huan quiilhui: --Xiya, ximoixtiyolpajpacati ipan nopa ameli tlen itoca Silo'e. (Silo'e quinequi quiijtos: 'Tlatitlanili'.) Huajca nopa popoyotzi yajqui moixtiyolpajpacato huan quema mocuepqui, cuali hueliyaya tlachiya. 8Huajca nochi icalnechcahua huan nochi tlen quiixmatiyayaj quema noja itztoya popoyotzi moilhuijque: --¿Ax ni tlacatl yajaya tlen mosehuiyaya ojtipa huan motlaejehuiliyaya? 9Huan sequin quiijtojque: --Quena, yajaya. Sequinoc quiijtojque: --Ax ya, pero elisnequi queja ya. Pero nopa tlacatl iselti quiijto: --Quena, na tlen achtohuiya nieltoya nipopoyotzi. 10Huajca quitlajtlanijque: --¿Quejatza huelqui titlachixqui? 11Huan quinnanquili: --Se tlacatl tlen itoca Jes'us quichijqui soquitl huan nechtlalili ipan noixtiyol huan nechilhui ma niya nimoixtiyolpajpacati ipan nopa ameli tlen itoca Silo'e. Huajca niyajqui huan nimoixtiyolpajpajqui huan huajca huelqui nitlachixqui. 12Huan quitlajtlanijque: --¿Canque itztoc nopa tlacatl Jes'us? Huan nopa tlacatl tlen eltoya popoyotzi quinilhui: --Ax nijmati. 13Huan quihuicaque nopa tlacatl tlen eltoya popoyotzi iniixpa nopa fariseos. 14Huan eltoya s'abado nopa tonal quema tiisraelitame ax titequitij quema Jes'us quichijqui soquitl huan quichicajqui nopa tlacatl. Huan nopa fariseos moilhuijque eltoya se tequitl. 15Huajca inijuanti nojquiya quitlajtlanijque quejatza huelqui tlachiya. Huan quinilhui: --Nechtlalili soquitl ipan noixtiyol, huan nimoixtiyolpajpacato huan huajca nitlachixtejqui. 16Huajca sequin nopa fariseos quiijtojque: "Toteco ax quititlantoya ni tlacatl tlen quichijqui ya ni pampa tequitqui ipan s'abado quema monequi timosiyajcahuase." Pero sequinoc moilhuiyayaj para se tlaixpanoquetl ax huelis quichihuas se hueyi tlanescayotl queja ya ni. Huajca motlajcoxelojque. 17Huan sampa nopa fariseos quitlajtlanijque nopa tlacatl tlen mochicajtoya: --¿Tlaque tiquijtohua ta tlen yajaya tlen mitztlachiyalti? Huan nopa tlacatl quiijto: --Yajaya se tiocamanalojquetl. 18Nopa israelita tlayacanani ax quineltocayayaj intla nel'ia nopa tlacatl eliyaya tlen achtohuiya eltoya popoyotzi huan ama hueli tlachiya, huajca quinnotzque inana huan itata. 19Huan nojquiya quintlajtlanijque: --¿Nel'ia, ni imotelpoca? ¿Nel'ia tlacatqui popoyotzi? Huajca ¿quejatza hueli tlachiya ama? 20Huan inana huan itata quinnanquilijque: --Tojuanti tiquixmatij ni totelpoca huan tijmatij tlacatqui popoyotzi. 21Pero ax tijmatij quejatza hueli tlachiya ama, niyon ax tijmatij ajqueya quichicajqui iixtiyol. Xijtlajtlanica ya pampa ya tlacatl huan yajaya huelis inmechilhuis tlen panoc. 22Inana huan itata quiijtojque ya ni pampa quinimacasiyayaj nopa israelitame pampa nopa tlayacanani tlen israelitame ya teyolmelajtoyaj intla se tlacatl quiijtosqu'ia para Jes'us eltoya nopa Cristo tlen Toteco quiijto para quititlanisqu'ia, huajca ayoc quicahuilisqu'iaj ma calaqui ipan tiopamitl. 23Huajca inana huan itata quiijtojque: --Xijtlajtlanica ya pampa ya tlacatl. 24Huajca ica ompa quinotzque nopa tlacatl tlen achtohuiya eltoya popoyotzi huan quiilhuijque: --Xijhueyichihua Toteco Dios, huan xitechilhui yajaya mitzchicajqui huan ax ya Jes'us, pampa tojuanti tijmatij nopa Jes'us se tlajtlacolchijquetl. 25Huajca nopa tlacatl quinnanquili: --Ax nijmati intla yajaya se tlajtlacolchijquetl o axtle. San ya ni nijmati. Achtohuiya niitztoya nipopoyotzi huan ama hueli nitlachiya. 26Yeca inijuanti sampa quitlajtlanijque: --¿Tlaque mitzchihuili? ¿Quejatza mitztlachiyalti? 27Huan nopa tlacatl quinilhui: --Ya nimechilhui huan ax innechcajque. ¿Para tlen inquinequij ma nimechilhui sampa? ¿Huelis inquinequij inquitoquilise nojquiya? 28Huan nopa tlayacanani quiajhuaque nopa tlacatl tlen achtohuiya eltoya popoyotzi huan quiilhuijque: --Ta tijtoquil'ia Jes'us, pero tojuanti tijtoquil'iaj Mois'es. 29Tijmatij Toteco quicamahui Mois'es, pero nopa Jes'us ax tijmatij campa hualajtoc. 30Huajca nopa tlacatl quinilhui: --¿Tlaque ya ni? Ax inquimatij canque hualajqui, pero yajaya nechtlachiyalti. 31Nochi tijmatij Toteco ax quinpalehu'ia ax cuajcualme, pero intla se tlacatl quitlepanita Toteco huan quichihua ipaquilis Toteco, huajca quena, Toteco quitlacaquilis tlen quitlajtlanis. 32Hasta quema pejqui tlaltepactli huan hasta ama, axaca quicactoc tlen se acajya tlen hueli quitlachiyalt'ia se tlen tlacatqui popoyotzi. 33Intla Toteco ax quititlantosqu'ia ni Jes'us, huajca ax hueltosqu'ia nechchicajtosqu'ia. 34Huajca nopa israelita tlayacanani quiilhuijque: --¡San tiicno conetl! ¿Tijnequi techmachtis tojuanti? Huan quicuatopejtiyajque tiopan calteno. 35Huan Jes'us quicajqui para quiquixtijtoyaj ipan tiopamitl nopa tlacatl tlen eltoya popoyotzi, huajca yajqui quitemoto huan quiilhui: --¿Tijneltoca Icone Toteco? 36Huan nopa tlacatl quitlajtlani: --Tate, ¿ajqueya ya? Xinechilhui pampa nijnequi nijneltocas. 37Huan Jes'us quiilhui: --Amantzi tiquita ajqueya pampa na tlen nimitzcamahu'ia, niIcone Toteco. 38Huan ni tlacatl quiijto: --NohueyiTeco, nimitzneltoca. Huan nopa tlacatl motlancuaquetzqui huan quihueyimatqui Jes'us. 39Huan Jes'us quiilhui: --Nihualajtoc ipan tlaltepactli para nijsencahuas nochi para ma eli xitlahuac. Nihualajqui para tlacame tlen eliyayaj queja popoyotzitzi ma quiitaca tlen melahuac. Huan para inijuanti tlen moilhu'iaj ya quimachil'iaj nochi tlamantli ma mocahuaca popoyotzitzi ipan inintlalnamiquilis. 40Huan sequin fariseos tlen itztoyaj ihuaya quicajque tlen quiijto huan quitlajtlanijque: --Huajca timoilhu'ia para tojuanti tiitztoque queja tipopoyotzitzi ipan totlalnamiquilis. ¿Ax que? 41Huan Jes'us quinilhui: --Intla nel'ia initztosqu'iaj inpopoyotzitzi huan ax inquiitztosqu'iaj huan inquimachilijtosqu'iaj nochi tlen nijchijtoc, huajca ax inquihuicatosqu'iaj tlajtlacoli. Pero inquiijtohuaj inquimachil'iaj tlen nijchijtoc, huajca nel'ia inquihuicaj tlajtlacoli pampa ax innechselijtoque.

will be added

X\