JUAN 7

1Teipa Jes'us nejnemiyaya campa hueli ipan estado Galilea campa ejqui. Ax quinejqui yas estado Judea pampa nepa nopa tlayacanca israelitame quinequiyayaj quimictise. 2Ya ajsitihualayaya nopa israelita ilhuitl quema nochi tiisraelitame tijsencahuaj pilxajcaltzitzi para ipan tiitztose huan tijtlascamatij Toteco para nopa pixquistli tlen techmacac. 3Huan iicnihua Jes'us quihuihuiitaque huan quiilhuijque: --Amo ximocahua nica. Xiya estado Judea para motlatoquilijcahua nopona huelis quiitase nopa tlanescayotl tlen tijchihua. 4Axaca mocahua campa ixtacatzi intla quinequi nochi tlacame ma quiixmatica queja ta tijnequi. Intla nelnel'ia tihueli tijchihua huejhueyi chicahualnescayotl, ximonextiti iniixpa nochi nopa miyac tlacame tlen itztose ipan nopa ilhuitl. 5Iicnihua quiijtojque ya ni pampa niyon inijuanti, ax quineltocayayaj. 6Huajca Jes'us quinilhui: --Aya ajsi nopa tonal tlen Toteco quiixtlalijtoc para nimonextiti nepa. Para imojuanti, hueli inyase tlen hueli tonal. 7Tlacame tlen ni tlaltepactli ax inmechcocol'iaj. Pero tlen ax quiixmatij Toteco nechcocol'iaj pampa niquinyolmelahua tlen ax cuali quichihuaj. 8Xitlayacanaca campa nopa ilhuitl pampa aya ajsi hora para niyas na. 9Quema Jes'us quinilhuijtoya iicnihua ya ni, noja mocajqui quentzi m'as ipan estado Galilea. 10Huan quema iicnihua ya yajtoyaj, Jes'us nojquiya quisqui para yas ipan nopa ilhuitl. Pero ax yajqui ininhuaya nopa miyac tlacame, san ixtaca yajqui. 11Huan nopa israelita tlayacanani quitemohuayayaj Jes'us ipan ilhuitl huan tetlajtlaniyayaj: --¿Canque itztoc nopa tlacatl? 12Huan miyac tlacame quiijilnamictinemiyayaj Jes'us se ica seyoc. Sequin quiijtohuayayaj: "Yajaya se cuali tlacatl." Sequinoc quiijtohuayayaj: "Yajaya ax cuali, san tlacajcayahua." 13Huan axaca quinequiyaya camatis cuali tlen Jes'us tlamiyacapa, pampa quinimacasiyayaj nopa tlayacanani tlen israelitame. 14Huan quema noja polihuiyaya tlajco nopa ilhuitl, Jes'us tlejcoc tlachiquiltipa hasta campa nopa hueyi tiopamitl huan pejqui tlamacht'ia. 15Huan nopa tlayacanca israelitame san quisentlachiliyayaj huan quiijtohuayayaj se ica seyoc: --¿Quejatza m'as tlalnamiqui ni Jes'us que sequinoc huan ax momachtijtoc? 16Huan Jes'us quinnanquili: --Ax nitlamacht'ia san tlen na nimoilhu'ia. Nitlamacht'ia tlen quiijtohua noTata tlen nechtitlantoc. 17Intla se tlacatl quinequi quichihuas ipaquilis noTata, quimatis intla nitlamacht'ia tlen Toteco itlajtol o san na notlajtol. 18Se tlen san camati tlen ya moilhu'ia iselti quinequi para sequinoc ma quihueyichihuaca. Pero na nijnequi nijhueyichihuas yajaya tlen nechtitlantoc. Huan niquijtohua tlen melahuac huan ax quema niistlacati. 19"Mois'es inmechmacac nopa tlanahuatili, pero niyon se imojuanti ax inquitoquil'iaj nopa tlanahuatili pampa inquinequij innechmictise." 20Huan nopa tlacame quinanquilijque: --Ta tijpiya se iajacayo Axcualtlacatl. Axaca quinequi mitzmictis. 21Huan Jes'us quinilhui: --Quema nijchicajqui nopa tlacatl ipan s'abado nopa tonal para timosiyajcahuase, innechsentlachilijque pampa inquiijtojque nitequitiyaya. 22Pero Mois'es inmechmachti para xijtequica nopa tlanescayotl tlen itoca circuncisi'on ipan ipiltlacayo se piloquichpiltzi quema quipiya chicueyi tonali tlacajtoc. (Yonque ax pejqui ni tlamantli ica Mois'es pampa tohuejcapan tatahua ya ipa quichihuayayaj quema Mois'es aya tlacatiyaya.) 23Huan quema ajsis ichicueyi tonal se oquichpil ipan s'abado, nojquiya intequitij pampa inquitequil'iaj nopa tlanescayotl. Huan queja nopa monequi para inquitoquilise itlanahuatil Mois'es, pero ¿para tlen innechcocol'iaj pampa nijchicajqui nopa tlacatl ipan s'abado? 24Amo nimantzi xijteilhuica se tlacatl pampa san nesi quichijtoc tlen ax cuali. Achtohui xijmatica cuali intla melahuac para queja nopa huelis inquitlajtolsencahuase xitlahuac. 25Sequin nopa tlacame tlen ejque altepetl Jerusal'en pejque quiijtohuaj: --¿Ax ya ne Jes'us tlen nopa israelita tequihuejme quinequij quimictise? 26Xiquitaca, moquetza nepa huan camati iniixpa nochi ni tlacame. ¿Para tlen ax tleno quiijtohuaj nopa tequihuejme? ¿Huelis inijuanti ya quimatij para yajaya nopa Cristo tlen Toteco quiijto techtitlanilisqu'ia? Huan sequinoc quiijtohuayayaj: 27--Pero tojuanti tijmatij campa ejqui ni Jes'us. Huan quema Cristo hualas tlen Toteco techtitlanilis, axaca quimatis campa hualajqui. 28Huajca Jes'us tlen tlamachtiyaya ipan nopa hueyi tiopamitl camatqui chicahuac huan quinilhui: --Inquiijtohuaj innechixmatij huan inquimatij campa niejqui. Pero ax nihualajqui san pampa na nijnejqui. Yajaya tlen nel'ia temachtli nechtitlantoc, huan imojuanti ax inquiixmatij. 29Na quena, niquixmati pampa niitztoya ihuaya huan yajaya nechtitlantoc. 30Huajca sequin nopa tlacame quinequiyayaj quiitzquise Jes'us para quitzacuase, pero axaca huelqui quiitzqui pampa noja aya ajsiyaya nopa hora tlen Toteco quiixquetztoya para quiitzquise. 31Huan miyac nopa tlacame tlen itztoyaj nepa quineltocaque para Jes'us eliyaya nopa Cristo huan yeca quiijtojque: --Ijcuilijtoc para quema nopa Cristo hualas quichihuas huejhueyi tlanescayotl. Pero axaca huelis quichihuas chicahualnescayotl tlen m'as huejhueyi que ni Jes'us quichihua. Huajca nel'ia ni Jes'us yajaya Cristo. 32Quema nopa fariseos quicajque tlen nochi tlacame quiijtohuayayaj tlen Jes'us, inijuanti huan nopa tlayacanca totajtzitzi quinnahuatijque ma yaca polic'ias tlen nopa tiopamitl para ma quiitzquitij huan ma quitzacuatij. 33Huan Jes'us noja quincamahuiyaya nopa tlacame huan quinilhui: --Noja nimocahuas imohuaya se quentzi m'as tonali huan teipa nimocuepas campa itztoc yajaya tlen nechtitlantoc. 34Innechtemose pero ax huelis innechpantise. Huan campa na niitztoti ax huelis inyase. 35Huajca nopa israelitame pejque quiijtohuaj se ica seyoc: --¿Canque yas huan ax huelis tiyase, niyon ax tijpantise? ¿Huelis yas campa nopa israelitame tlen mosemantoque huejca campa tlacame camatij griego? ¿Huelis quinmachtiti nojquiya nopa griego tlacame? 36¿Tlaque quiijtosnequi quema yajaya quiijtohua para tijtemose, pero ax huelis tijpantise? ¿Campa itztoti ax huelis tiyase? Ax tijmachil'iaj tlaque quiijtosnequi. 37Ipan itlamiya tonal nopa ilhuitl, nopa tonal tlen m'as hueyi, Jes'us moquetzqui tlatlajco nochi nopa tlacame huan camatqui chicahuac. Huan quinilhui: --Intla se amiqui ipan iyolo, ma huala campa na ma atliqui. 38Yajaya tlen nechneltocas quipiyas miyac atemitl ipan iyolo campa quisas atl tlen temacas yolistli yancuic para nochipa. Quej nopa ijcuilijtoc ipan Itlajtol Toteco. 39Jes'us quiijto ya ni pampa moilhuiyaya tlen teipa panosqu'ia quema Itonal Toteco calaquisqu'ia ipan tlacame tlen quineltocasqu'iaj. Pero quiijto ya ni quema noja polihuiyaya para ajsis Itonal Toteco ipan tlaltepactli pampa Jes'us aya mocuepayaya elhuicac campa Toteco quihueyitlalisqu'ia. 40Sequin nopa tlacame tlen quicajque tlen quiijto Jes'us quiijtohuayayaj para yajaya temachtli eliyaya nopa tiocamanalojquetl tlen Toteco techtitlanilisqu'ia. 41Huan sequinoc quiijtohuayayaj para Jes'us eliyaya nopa Cristo tlen Toteco quiijto techtitlanilisqu'ia. Pero sequinoc quiijtohuayayaj para Jes'us ax huelis elis nopa Cristo pampa nopa Cristo ax hualasqu'ia ipan estado Galilea. 42Quiijtohuayayaj para Itlajtol Toteco quiijtohua Cristo elis se iteipa ixhui nopa hueyi tlanahuatijquetl David tlen huejcajquiya itztoya huan Cristo tlacatis ipan Bel'en, ialtepe David. 43Huajca queja ni tlacame moxejxelojque ica tlen moilhuijque tlen Jes'us. 44Huan sequin quinequiyayaj quiitzquise huan quitzacuase, pero ax quichijque. 45Huan nopa polic'ias tlen tiopamitl mocuepque campa itztoyaj nopa fariseos huan nopa tlayacanca totajtzitzi. Huan nopa tequihuejme quintlajtlanijque nopa polic'ias: --¿Para tlen ax inquihualicaque Jes'us? 46Huan nopa polic'ias tlen tiopa quiijtojque: --Ax quema tijcactoque se tlacatl tlen camati nel'ia cuali queja ya camati. 47Huajca nopa fariseos quiijtojque: --¿Yajaya inmechcajcayajtoc nojquiya? 48Niyon se israelita tequihue huan niyon se fariseo ax quineltoca. 49Pero ni miyac tlacame tlen quitoquil'iaj, ax tleno quimatij tlen itlanahuatil Mois'es. Huajca nochi ma mocuapoloca. 50Huan Nicodemo tlen achtohuiya quicamahuito Jes'us ica tlayohua itztoya se tlen nopa fariseos huan quinilhui nopa sequinoc: 51--Totlanahuatil ax techcahuil'iaj ma tijtlatzacuiltica se tlacatl intla ax tijtlacaquilise tlen quiijtohua para tijmatise intla nel'ia quipiya tlajtlacoli. 52Huajca nopa sequinoc quiilhuijque: --Nesi queja ta nojquiya tiehua estado Galilea campa itztoque tlacame tlen huihuitique. Xijpohua Itlajtol Toteco huan tiquitas ax quema motlalantoc se tiocamanalojquetl tlen ehua Galilea. 53Huan sesen inijuanti yajque ininchajchaj.

will be added

X\