JUAN 5

1Teipa tiisraelitame tijpixque se ilhuitl huan Jes'us yajqui altepetl Jerusal'en. 2Huan eltoya se hueyi ameli ipan Jerusal'en tlen temitoya ica atl huan quitocajtiyayaj Betesda ipan tlajtoli hebreo. Nopa ameli eltoya nechca nopa puerta para Borregojme ipan nopa tepamitl tlen quiyahualtzajqui nopa altepetl. Huan nopa ameli quipixtoya macuili icalmapanyo. 3Huan ipan nochi nopa calmapamitl itztoyaj miyac cocoyani; sequin popoyotzitzi, sequin metzcuachotique huan sequin tlacame tlen ax huelque mojmolin'iaj, san huajhuapahuixtoyaj. 4Quineltocayayaj para quemantzi hualayaya se elhuicac ejquetl huan quioliniyaya nopa atl. Huan moilhuijque san mochicahuasqu'ia nopa achtohui cocoxquetl tlen calaquisqu'ia ipan nopa atl. 5Huan nepa itztoya se tlacatl tlen quipixqui treinta y ocho xihuitl para huetztoc ica icocolis. 6Huan Jes'us quiitac huetztoc huan quimatqui quipixtoya nopa cocolistli miyac xihuitl, huan quiilhui: --¿Tijnequi timochicahuas? 7Huan nopa tlacatl quinanquili: --Tate, axaca nijpiya para nechpalehuis nicalaquis ipan ni ameli quema mojmolin'ia nopa atl. Huan yonque nijchihua campeca nicalaquis, seyoc nechpano nimantzi huan calaqui achtohui. 8Huan Jes'us quiilhui: --Ximoquetza, xijtlalana mopetl huan xinejnemi. 9Huan nimantzi nopa tlacatl mochicajqui, huan quitlalanqui ipetl huan pejqui nejnemi. Huan eltoya s'abado, nopa tonal para tiisraelitame ma timosiyajcahuaca. 10Huajca nopa tlayacanca israelitame quiilhuijque nopa tlacatl tlen mochicajtoya: --Ama s'abado huan itlanahuatil Mois'es ax mitzcahuil'ia xijhuica mopetl. 11Huan yajaya quinnanquili: --Nopa tlacatl tlen nechchicajqui nechilhui ma nijtlalana nopetl huan ma ninejnemi. 12Huajca quitlajtlanijque: --¿Ajqueya mitzilhui xijtlalana mopetl huan xinejnemi? 13Pero yajaya tlen mococohuayaya ax quimatiyaya ajqueya quichicajtoya pampa Jes'us quistejtoya huan nejnemiyaya ininhuaya nopa miyac tlacame tlen itztoyaj nepa. 14Pero teipa Jes'us quipanti nopa tlacatl ipan tohueyi israelita tiopa huan quiilhui: --Xiquita, ya tiitztoc cuali. Huajca ayoc xitlajtlacolchihua para ax mitzajsis tlen m'as fiero. 15Huan nopa tlacatl yajqui huan quinilhui nopa tlayacanca israelitame para elqui Jes'us tlen quichicajtoya. 16Huan yeca nopa tlayacanca israelitame pejque quitoquilijtinemij Jes'us para quimictise pampa quichihuayaya tlamantli queja nopa ipan s'abado quema tiisraelitame san timosiyajcahuaj. 17Huan Jes'us quinnanquili: --NoTata, Toteco Dios noja tequiti hasta ama, huajca quinamiqui para na noja nitequitis. 18Ica ya ni nopa tlayacanca israelitame m'as quinequiyayaj quimictise Jes'us, pampa ax san quichicajtoya se tlacatl ipan s'abado, pero ama quinotzqui Toteco Dios: "NoTata", queja yajaya elisqu'ia san se ica Toteco. 19Huajca Jes'us quinilhui: "Nel'ia nimechilhu'ia, na tlen niIcone ax tleno hueli nijchihua noselti. Nijchihua san tlen niquita noTata quichihua. Nochi tlamantli tlen noTata quichihua, ya nopa na niIcone nojquiya nijchihua, 20pampa noTata nechicnel'ia huan nechnextil'ia nochi tlen yajaya quichihua. Huan noTata nechnextilis tlamantli tlen noja m'as huejhueyi que ya ni tlen nijchijqui ama huan nel'ia inquisentlachilise. 21Pampa queja noTata quintlalana huan quinyolit'ia tlacame tlen mictoque, na niIcone nojquiya niquinyolitis nopa tlacame tlen nijnequi. 22Pero noTata ax quintlajtolsencahuas tlacame. Nechmacatoc na nopa tequitl para nitetlajtolsencahuas. 23Quichijqui queja ni para nochi ma nechtlepanitaca ihuical queja quitlepanitaj noTata. Tlacame tlen ax nechtlepanitaj na niIcone, ax quitlepanitaj noTata tlen nechtitlantoc. 24"Nel'ia nimechilhu'ia, intla se tlacatl quicaqui notlajtol huan quineltoca yajaya tlen nechtitlanqui, quipiyas yolistli yancuic para nochipa. Huan Toteco ax quema quitlatzacuiltis pampa yajaya ayoc yolmictoc. Ya panotoc tlen campa nochi mictoque hasta campa nochi quipiyaj yolistli para nochipa. 25Nel'ia nimechilhu'ia, ajsis tonali, quena, ama ya ajsico nopa tonal quema tlacame tlen mictoque nechcaquise na tlen niIcone Toteco Dios. Huan inijuanti tlen nechtlacaquilise, yoltose. 26Pampa queja noTata quipiya yolistli ipan ya huan hueli quinyolitis tlacame, nojquiya nechmacatoc ma nijpiya yolistli ipan na huan para niquinyolitis. 27Huan nechmacatoc tequihuejcayotl para nitetlajtolsencahuas pampa na niitztoc niIcone tlen niMocuepqui Tlacatl. 28Amo xinechsentlachilica ica tlen nimechilhu'ia. Ajsis se tonal nojquiya quema nochi tlacame tlen mictoque huan tlen quintlalpachojtoque, nechcaquise huan panquisase. 29Tlacame tlen quichijtoque tlen cuali niquinyolitis huan itztose para nochipa, pero tlen quichijque tlen ax cuali niquinyolitis para quiselise tlatzacuiltilistli para nochipa. 30"Noselti ax tleno hueli nijchihua. Queja noTata nechnahuat'ia, niquintlajtolsencahua tlacame. Na nitetlajtolsencahua xitlahuac pampa ax nijchihua san tlen na nijnequi, nijchihua ipaquilis noTata tlen nechtitlantoc nica. 31Intla san na nimechyolmelahua tlen na noselti, ax inquimatise intla melahuac notlajtol. 32Pero itztoc seyoc tlen inmechyolmelahua ajqueya na huan nijmati para melahuac tlen ya quiijtohua tlen na. 33Inquintitlanque tlacame ma yaca campa Juan para inquitlajtlanise tlen na. Huan yajaya inmechilhui tlen melahuac. 34Pero ax nel hueyi ipati para se tlen san se tlacatl ma inmechilhui ajqueya na. Nimechilnamiquilt'ia tlen Juan inmechilhui para xijneltocaca tlen yajaya quiijto huan para queja nopa inmomaquixtise tlen imotlajtlacolhua. 35Juan itztoya queja se tlahuili tlen tlahuiyaya huan tlatlanextiyaya. Huan para se tlalochtli inpaquiyayaj ica tlen inmechnextiliyaya. 36Pero na nijchijtoc tlanescayotl tlen m'as inmechnextilis ajqueya na que itlajtol Juan, pampa noTata nechmacac para ma nijchihua huejhueyi tlanescayotl para nimechnextilis melahuac ya nechtitlantoc. 37Nojquiya noTata tlen nechtitlantoc teyolmelahua para cuali tlen nijchihua. Pero ax quema inquiitztoque, niyon ax quema inquicactoque tlen ya quiijtohua. 38Ax inquipiyaj itlajtol ipan imoyolo pampa ax innechneltocaj. Huan na niitztoc tlen ya inmechtitlanilijtoc. 39Inmomacht'iaj Itlajtol Toteco pampa inmoilhu'iaj inquipiyase yolistli yancuic pampa inquipiyaj nopa amatl. Pero Itlajtol Toteco inmechilhu'ia tlen na. 40Huan ax inquinequij innechneltocase para nimechmacasqu'ia nopa yolistli yancuic para nochipa. 41"Para na, ax ipati intla imojuanti intlacame innechhueyichihuaj o axtle, 42pampa nijmati ax inquiicnel'iaj Toteco. 43Yonque na nihualajtoc ica itequihuejcayo noTata, ax innechselijque. Pero intla seyoc hualas ica san ya itequihuejcayo, quena, inquiselise. 44¿Quejatza huelis innechneltocase? San inquitemohuaj para imohuampoyohua ma inmechtlepanitaca. Ax quema inmoilhu'iaj tlaque monequi inquichihuase para ma inmechtlepanita Toteco huan itztoc san setzi Toteco. 45Amo ximoilhuica nimechteilhuis iixpa noTata. Itlanahuatilhua Mois'es tlen ipan inmotemach'iaj para inmechmaquixtise, nopa tlanahuatili inmechteilhuise. 46Pampa intla nel'ia inquineltocasqu'iaj itlajtol Mois'es, innechneltocasqu'iaj na nojquiya pampa yajaya quiijcuilo tlen na. 47Pero ax neli inquineltocaj tlen Mois'es quiijcuilo, huajca ¿quejatza huelis inquineltocase tlen nimechilhu'ia?"

will be added

X\