JUAN 16

1"Nimechilhuijtoc nochi ya ni achtohui para ax inquitlahuelcahuase notlajtol ica nopa tlamantli tlen hualas. 2Pampa teipa ayoc inmechcahuilise xicalaquica ipan israelita tiopamitl. Huan ajsis se tonal quema tlacame tlen inmechmictise moilhuise quitequipanohuaj Toteco. 3Ya nopa quichihuase pampa ax quiixmatij noTata, niyon ax nechixmatij. 4Amantzi nimechilhu'ia nochi ya ni para inquiilnamiquise tlen niquijto quema nochi ni tlamantli inmechpanotiyas. "Achtohuiya ax nimechilhui ni tlamantli tlen inmechpanos pampa nijmatiyaya niitztosqu'ia imohuaya m'as tonali. 5Pero ama niyas campa itztoc Toteco tlen nechtitlantoc. Huan axaca tlen imojuanti nechtlajtlan'ia canque niyas. 6San inmocuesohuaj pampa nimechilhu'ia niyas. 7Pero nimechilhu'ia tlen melahuac. M'as cuali para imojuanti intla niyas. Pampa intla ax niyas, ax hualas nopa Tlayoltlalijquetl. Pero quema nimocuepas campa nihualajqui, nimechhualtitlanilis. 8Huan quema ajsiqui nopa Tlayoltlalijquetl, quinmatiltis sesen tlacatl ipan ni tlaltepactli para quihuica tlajtlacoli iixpa Toteco. Huan quimatiltis para monequi sesen ma itztoca xitlahuaque iixpa Toteco. Huan nojquiya quinyolmelahuas quejatza Toteco tetlajtolsencahuas. 9Nopa Tlayoltlalijquetl quinmatiltis tlacame tlen ni tlaltepactli para ya quihuicaj tlajtlacoli pampa ax nechneltocatoque. 10Quinnextilis para huelis mochihuase xitlahuaque iixpa Toteco pampa niya campa itztoc noTata huan ayoc innechitase. 11Quinmatiltis tlacame para Toteco quintlajtolsencahuas queja ya quitlajtolxitlajtoc Axcualtlacatl tlen tlanahuat'ia ipan ni tlaltepactli. 12"Nijpiya m'as tlajtoli tlen nimechilhuisqu'ia, pero elis miyac para inquimachilise amantzi. 13Pero quema hualas Itonal Toteco tlen tlamacht'ia tlen melahuac, yajaya inmechyacanas hasta inquimatise nochi tlen melahuac. Ax inmechilhuis tlen ya itlalnamiquilis, pero inmechmachtis nochi tlen quicactoc tlen noTata, huan nojquiya inmechnextilis tlen panos teipa. 14Itonal Toteco nechhueyitlalis imoixpa pampa quicuis tlen niquijtojtoc na huan tlen nijchijtoc, huan inmechnextilis tlen quiijtosnequi. 15Nochi nopa tlamantli tlen quipiya noTata huan tlen yajaya quichijtiya nojquiya noaxca huan nijchijtiyajtoc. Huajca nimechilhu'ia Itonal Toteco quicuis tlen na nijchijtoc huan inmechnextilis tlen quinequi quiijtos. 16"Ica se ome tonali niyas huan ayoc innechitase. Pero teipa ica seyoc se ome tonali, sampa innechitase pampa niyas campa itztoc noTata." 17Huan sequin tiimomachtijcahua timotlajtlaniyayaj: --¿Tlaque quiijtosnequi quema Jes'us techilhu'ia ica se ome tonali ayoc tiquitase, huan teipa ica seyoc se ome tonali sampa tiquitase? ¿Para tlen techilhu'ia elis queja ni pampa yas campa itztoc iTata? 18¿Tlaque quiijtosnequi 'ica se ome tonali'? Ax tijmachil'iaj tlen techilhu'ia. 19Huan Jes'us quimachili tijnequiyayaj tijtlajtlanise ica tlen techilhuijtoya, huajca techilhui: --¿Para tlen inmotlajtlan'iaj tlaque quiijtosnequi quema nimechilhui ica se ome tonali na niyas huan ayoc innechitase, huan teipa ica seyoc se ome tonali sampa innechitase? 20Nel'ia nimechilhu'ia inchocase huan inmocuesose, pero tlacame tlen ni tlaltepactli tlen ax nechneltocaj, paquise. Pero yonque achtohui inmocuesose, teipa imocuesol mocuepas paquilistli. 21Quema se sihuatl quinequi quitlacatiltis icone, tlaijiyohu'ia pampa ajsic nopa hora para tlacuajcualocayotl, pero quema ya tlacatqui icone, ayoc moilhuis intla tlaijiyohui pampa nel'ia paqui para quiitas icone tlen tlacatqui. 22Ihuical elis ica imojuanti. Ama inmocuesohuaj, pero sampa timoitase huan nel'ia inyolpaquise. Huan axaca huelis inmechquixtilis imopaquilis. 23"Quema ajsis nopa tonali quema niitztos ihuaya Toteco, ayoc tleno monequis innechtlajtlanise. Nel'ia nimechilhu'ia ipan nopa tonali ya huelis inyase xitlahuac ica noTata huan nochi tlen inquitlajtlanise ipan notoca, yajaya inmechmacas. 24Hasta ama aya tleno inquitlajtlanijtoque noTata ipan notoca. Pero ama xijtlajtlanica huan inquiselise para nel'ia inyolpactose. 25"Nochi ni tlamantli nimechilhuijtoc ica huicalotl tlen achi ohui para inquimachilise. Pero ajsis se tonal quema ayoc tleno nimechilhuis ica huicalotl, san nimechilhuis xitlahuac tlen noTata. 26Ipan nopa tonali inquitlajtlanise noTata tlen inquinequise ica notequihuejcayo. Huan ax nimechilhu'ia nijtlajtlanis noTata ma inmechmaca tlen inquitlajtlan'iaj, 27pampa noTata nojquiya inmechicnel'ia pampa innechicnelijtoque. Huan inquineltocatoque nihualajqui tlen campa itztoc Toteco Dios. 28Na niquisqui tlen campa itztoc noTata huan niajsico ipan ni tlaltepactli. Huan ama niquisas tlen ni tlaltepactli. Huan nimocuepas campa itztoc noTata." 29Huajca tiimomachtijcahua tiquilhuijque: --Ama ticamati xitlahuac huan tojuanti tijmachil'iaj. Ayoc ticamati ica huicalotl tlen ohui. 30Huajca ama nel'ia tijmachil'iaj ta tijmati nochi tlamantli. Niyon ax monequi timitztlajtlanise tlen tijnequij tijmatise pampa titechilhu'ia quema aya timitztlajtlan'iaj, huan huajca tijneltocaj Toteco Dios mitztitlantoc. 31Huan Jes'us techilhui: --¿Hasta ama nel'ia innechneltocaj? 32Ama nechca nopa hora, quena, ya ajsico nopa hora quema nochi inmosemanase para sesen quitemos campa mochololtis. Huan innechcajtehuase noselti. Pero nel'ia ax niitztos noselti pampa noTata itztoc nohuaya. 33Nimechilhuijtoc ama nochi ya ni para inquipiyase tlasehuilistli nopan na. Ipan ni tlaltepactli inquipiyase tlaijiyohuilistli huan cuesoli, pero ximosemacaca pampa nijtlantoc ni tlaltepactli.

will be added

X\