JUAN 13

1Aya pehuayaya nopa Pascua Ilhuitl huan Jes'us quimatiyaya ya monechcahuiyaya nopa hora para quisas tlen ni tlaltepactli huan mocuepas campa itztoc iTata. Mojmostla technextilijtoya tojuanti tlen tiiaxcahua ipan ni tlaltepactli para techicnel'ia huan nopa tonal technextili para neltlahuel techicnel'ia. 2Eltoya hora para nopa Pascua tlacualistli huan Axcualtlacatl ya quitlalilijtoya ipan itlalnamiquilis Judas Iscariote, icone Sim'on, para quitemactilis Jes'us ininmaco ax cuajcualme. 3Jes'us quimatiyaya Itata quimacatoya tequihuejcayotl para quinahuatis nochi tlamantli. Huan quimatiyaya para hualajqui tlen campa Toteco huan ica se ome tonali mocuepasqu'ia iixtla. 4Pero yonque nochi nopa tequihuejcayotl quipixtoya, ipan nopa tlacualistli moquetzqui Jes'us, huan quiquixti iyoyo huehueyac huan motzinquechilpi ica se toalla. 5Huan quitequili atl se tina huan pejqui techicxipajpaca huan techicxihuatza ica nopa toalla queja quichihua se tlatequipanojquetl. 6Huan quema Jes'us pejqui quiicxipajpaca Sim'on Pedro, yajaya quiilhui: --NoTeco, ¿para tlen tijnequi tinechicxipajpacas? 7Huan Jes'us quinanquili: --Amantzi ax tijmachil'ia tlaque quinequi quiijtos tlen nijchihua, pero teipa tijmachilis. 8Huan Pedro quiijto: --Ax quema nimitzcahuilis xinechicxipajpacas. Huan Jes'us quinanquili: --Intla ax nimitzicxipajpacas, huajca ax tleno tijpiyas noca na. 9Huajca Sim'on Pedro quiilhui: --Huajca, noTeco, ax san noicxi xinechpajpaquili, nojquiya xinechpajpaquili notzonteco huan noma. 10Huan Jes'us quiilhui: --Se tlacatl tlen maltijtoc san monequi quiicxipajpacas pampa ya tlapajpactic itlacayo. Imojuanti intlapajpactique, pero ax nochi imojuanti. 11Huan Jes'us quiijto: "Ax nochi intlapajpactique" pampa quimatiyaya ajqueya quitemactilisqu'ia. 12Quema tlanqui techicxipajpaca nochi tojuanti, sampa moquenti iyoyo huehueyac huan mosehui nechca mesa. Huan techilhui: --Huelis ax inquimachil'iaj tlen nimechchihuilijtoc. 13Innechnotzaj niimotlamachtijca huan niimoTeco. Huan quinamiqui tlen inquiijtohuaj pampa melahuac. 14Pero intla na tlen niimotlamachtijca huan niimoTeco nimechicxipajpactoc, monequi san se inmotequipanose huan inmoicxipajpacase se ica seyoc. 15Pampa nimechnextilijtoc para inquichihuase queja na nimechchihuilijtoc. 16Nel'ia nimechilhu'ia, se tlatequipanojquetl ax itztoc m'as hueyi que iteco. Huan se tlatitlanquetl ax itztoc m'as hueyi que yaja tlen quititlanqui. Innotlatequipanojcahua huan innotlayolmelajcahua huan ax m'as inhuejhueyi que na. 17Ya inquimachil'iaj para nimechilhuijtoc ximotequipanoca se ica seyoc, huajca xijchihuaca huan inmechmacas miyac paquilistli. 18"Ax nicamati tlen nochi imojuanti. Cuali nimechixmati inquesqui tlen nimechtlapejpenijtoc. Ijcuilijtoc ipan Itlajtol Toteco campa quiijto para se tlen quipalohua ipantzi nohuaya ipan notlacualis, mochijtoc nocualancaitaca. Huan ni tlajtoli nimantzi quisas melahuac. 19Nimechilhu'ia ya ni ama quema noja polihui para panos para teipa quema panos, inquineltocase para na niitztoc nopa Cristo tlen hualasqu'ia. 20Nel'ia nimechilhu'ia, ajqueya inmechselis imojuanti o tlen hueli tlacatl tlen nijtitlani, nojquiya nechsel'ia. Huan tlen nechsel'ia, quisel'ia noTata tlen nechtitlantoc." 21Quema Jes'us tlanqui quiijto ya ni, moyolpitzajqui huan techilhui tiimomachtijcahua: --Nel'ia nimechilhu'ia, se tlen imojuanti nechtemactilis ica nocualancaitacahua. 22Huan tiimomachtijcahua pejque timoixtlachil'iaj se ica seyoc pampa ax tijmatiyayaj ajqueya quichihuasqu'ia. 23Na nitlacuayaya inechca Jes'us pampa miyac nechicneli. 24Huan Sim'on Pedro nechtlamanextili ma nijtlajtlani Jes'us ajqueya quitemactilisqu'ia. 25Huajca na nimonechcahui achi m'as huan niquilhui: --Toteco, ¿ajqueya mitztemactilis? 26Huan Jes'us nechnanquili: --Na nijpalos ni pantzi ipan tlacuali huan nijmacas ma quicua yajaya tlen nechtemactilis. Huajca quipalo nopa pantzi huan quimacac Judas, itelpoca Sim'on Iscariote. 27Huan quema Judas quiselijtoya nopa pantzi, Axcualtlacatl calajqui ipan iyolo. Huan Jes'us quiilhui: --Nopa tlen tijchihuas, xijchihua nimantzi. 28Huan niyon se tlen tojuanti tlen tiitztoyaj ihuaya campa mesa ax tijmatiyayaj para tlen quiilhui ya nopa. 29Sequin san moilhuiyayaj Jes'us quiilhuiyaya Judas ma quicohuati tlen monequi para nopa ilhuitl o quiilhuiyaya ma quinmacas tomi tlen pilteicneltzitzi pampa Judas quimocuitlahuiyaya totomin bolsa. 30Huajca Judas quiseli nopa pantzi tlen Jes'us quimacac huan nimantzi quistejqui. Huan ya tlayohuatoya. 31Quema ya quistoya Judas, Jes'us techilhui: --Ama monextis nohueyitilis na tlen niMocuepqui Tlacatl. Huan monextis ihueyitilis noTata ipampa tlen nijchihuas. 32Quema nitenextilis ihueyitilis noTata, ax huejcahuas nopa tonal teipa quema noTata nechhueyitlalis. 33Noconehua, san niitztos imohuaya seyoc tlalochtli huan monequi niquistehuas. Yonque innechtemose, queja niquinilhui nopa israelita tlayacanani, ax huelis innechtoquilise campa niyas. 34Huajca nimechmaca se yancuic tlanahuatili para xijchihuaca: Ximoicnelica se ica seyoc queja na nimechicnel'ia. Quena, queja nopa monequi ximoicnelica. 35Nochi tlacame quimachilise para nel'ia innomomachtijcahua intla nel'ia inmoicnelise. 36Huan Sim'on Pedro quitlajtlani: --NoTeco, ¿canque tiyas? Huan Jes'us quinanquili: --Amantzi ax huelis tinechtoquilis campa niyas, pero teipa quena, tinechtoquilis. 37Huan Pedro quiilhui: --NoTeco, ¿para tlen ax huelis nimitztoquilis amantzi? Nimotemacasqu'ia para nimiquis mopampa ta. 38Huan Jes'us quinanquili: --Tinechilhu'ia timotemacasqu'ia para ma mitzmictica pampa tinechneltoca. Pero nel'ia nimitzilhu'ia, ipan ni tlayohua quema noja polihuis para tzajtzis se cuapelech, ta tiquijtojtos expa para ax tinechixmati.

will be added

X\