JUAN 11

1Ipan altepetl Betania itztoya se tlacatl tlen itoca eliyaya L'azaro tlen san sejco itztoya ininhuaya isihua icnihua, Mar'ia huan Marta. Huan L'azaro pejqui mococohua. 2(Mar'ia, iicni L'azaro, eliyaya nopa sihuatl tlen teipa quitequilis tlaajhuiyacayotl ipan iicxihua Jes'us huan quihuachili ica itzoncal.) 3Huajca quema L'azaro mococo, isihua icnihua tlatitlanque ma quiilhuitij Jes'us: --Toteco, mococohua mohuampo L'azaro tlen tiquicnel'ia. 4Huan quema Jes'us quicajqui ya ni, quiijto: --Nopa cocolistli ax quiajsic para ma miquis. Quiajsic para tenextilis ihueyitilis Toteco Dios huan nojquiya nohueyitilis na niIcone. 5Huan Jes'us nel'ia quinicneli L'azaro, Mar'ia huan Marta. 6Pero quema quicajqui mococohua L'azaro, mocajqui seyoc ome tonali campa itztoya. 7Huan teipa techilhui tiimomachtijcahua: --Ma tiyaca sampa estado Judea. 8Huan tiimomachtijcahua tiquilhuijque: --Tlamachtijquetl, nopa israelita tlayacanani nepa quinequiyayaj mitztepachose. ¿Para tlen sampa tiyase? 9Huan Jes'us technanquili: --Ama ax tleno nopantis. Pampa onca majtlactli huan ome horas quema tlatlanestoc ipan se tonal. Se tlen nejnemi quema tonaya ax tleno ipanti pampa quitlahuil'ia nopa tlahuili tlen ni tlaltepactli. 10Pero intla se nejnemi quema tzintlayohua, motepotlamis pampa ax onca tlahuili. Huan quena, ajsis hora tlen tzintlayohuilotl quema oncas tlen nopantis. 11Jes'us quiijto ya ni huan teipa techilhui: --Tohuampo L'azaro cochtoc, pero niyas niquixititi. 12Huan tiimomachtijcahua tiquilhuijque: --Toteco, intla cochtoc, cualtitoc, pampa quema isas, huajca mochicahuas. 13Pero Jes'us nel'ia techilhuiyaya L'azaro ya mictoya, pero timoilhuiyayaj san cochtoya. 14Huajca Jes'us techilhui xitlahuac: --L'azaro ya mictoc. 15Huan na nipaqui ax niyajqui nimantzi pampa ama m'as cuali para imojuanti pampa m'as innechneltoquilise. Ma tiyaca tiquitatij. 16Huan Tom'as tlen nojquiya quitocajtiyaya "Cuate" huan tlen itztoya se tlen tojuanti tiimomachtijcahua Jes'us, techilhui: --Ma tiyaca ihuaya para nojquiya ma techmictica intla quimictise Jes'us. 17Huan quema Jes'us ajsito altepetl Betania, ya quipixtoya nahui tonali quitlalijtoyaj itlacayo L'azaro ipan tlacacahuaya. 18Huan Betania mocahua nechca Jerusal'en, huelis se eyi kil'ometro ihuejcaca. 19Huan miyac israelitame quistoyaj Jerusal'en para quinseseltise Marta huan Mar'ia pampa mijqui iniicni. 20Huan quema Marta quicajqui para hualayaya Jes'us, yajqui quinamiquito ipan ojtli, pero Mar'ia mocajqui calijtic. 21Huan Marta quiilhuito Jes'us: --NoTeco, intla tihualajtosqu'ia quema mococohuayaya, noicni ax mictosqu'ia. 22Huan yonque ya mictoc, nijmati Toteco mitzchihuilis nochi tlen tijtlajtlanis. 23Huan Jes'us quiilhui: --Moicni sampa moyolcuis. 24Huan Marta quiijto: --Quena, nijmati moyolcuis sampa quema nochi mijcatzitzi moyolcuise ipan itlamiya tonali. 25Huan Jes'us quiilhui Marta: --Na tlen niquinyolit'ia tlacame tlen mictoque huan sampa niquinmaca yolistli. Yonque miquis itlacayo se tlen nechneltoca, quipiyas yolistli yancuic para nochipa. 26Huan nochi tlacame tlen itztoque huan nechneltocaj ax miquise para nochipa. ¿Tijneltoca tlen nimitzilhu'ia? 27Huan Marta quiilhui: --Quena, noTeco nijneltoca ta tiCristo, tiIcone Toteco. Tajaya tlen timitzchiyayayaj xiajsi ipan totlaltepac. 28Huan quema Marta tlanqui quiijto ya ni, yajqui quinotzato Mar'ia huan quiixtacailhui: --Totlamachtijca ya ajsico huan mitznotza. 29Huan quema Mar'ia quicajqui ni, yajqui nimantzi para quinamiquiti. 30Huan Jes'us noja aya ajsiyaya campa altepetl pampa mocajtoya campa Marta quinamiquito. 31Huan nopa israelitame tlen itztoyaj calijtic para quiyolchicahuase Mar'ia quiitaque quema quisqui nimantzi huan quitoquilijque pampa moilhuiyayaj yohuiyaya quichoquiliti iicni campa quitoctoyaj. 32Pero Mar'ia yajqui campa itztoya Jes'us huan quema quiitac, motlancuaquetzqui iicxitla huan quiilhui: --NoTeco, noicni ax mictosqu'ia intla tihualajtosqu'ia quema mococohuayaya. 33Huan Jes'us quiitac chocayaya Mar'ia, huan nojquiya nopa israelitame tlen hualajque ihuaya nojquiya chocayayaj. Huan yajaya nojquiya moyolpitzahuili huan mocueso. 34Huan quintlajtlani: --¿Canque inquitoctoque? Huan quiilhuijque: --Xihuala, Toteco, ma tijtlachilitij. 35Huan Jes'us chocac. 36Huan nopa israelitame quiijtojque: --Xiquitaca, Jes'us nel'ia quiicneli L'azaro. 37Huan sequin quiijtojque: --Yajaya quichicajqui nopa popoyotzi. ¿Ax hueltosqu'ia nojquiya quichicajtosqu'ia L'azaro para ax mictosqu'ia? 38Huan sampa Jes'us moyolpitzahuili huan yajqui campa quitoctoyaj. Quitlalijtoyaj itlacayo L'azaro ipan se tlacajcahuaya huan quiixtzajque ica se hueyi tepatlactli. 39Huan Jes'us quiijto: --Xijquixtilica ne tetl tlen ica quitzactoque. Huan Marta, iicni L'azaro, quiilhui Jes'us: --Pero ya quipiya nahui tonali tijtojque huan huelis ya potehu'ia. 40Huan Jes'us quiilhui: --¿Ax nimitzilhuijtoc, intla tijneltocas, nimitznextilis ihueyitilis Toteco? 41Huan quema quiquixtilijque nopa tetl tlen nopa tlacajcahuaya campa quitlalijtoyaj nopa mijcatzi, Jes'us ajcoitac huan quiijto: --Pap'a, nimitztlascamati pampa tinechtlacaquilijtoc huan tinechchihuil'ia tlen nimitztlajtlan'ia. 42Nijmati nochipa tinechtlacaquil'ia, pero nimitzcamahu'ia ama tlamiyacapa para nochi tlen nechyahualojtoque nica huelis nechneltocase para tinechtitlantoc ipan ni tlaltepactli. 43Huan quema tlanqui quicamahu'ia iTata, camatqui chicahuac huan quiijto: --L'azaro, xiquisa tlen nopa tlacajcahuaya. 44Huan L'azaro tlen mictoya quistihualajqui huijcontoc nejmajtic ica yoyomitl imaco hasta nochi iicxico. Huan se payo quiixtzacuayaya. Huan Jes'us quinilhui nopa tlacame: --Xijtojtomaca para huelis yas. 45Huan miyac israelitame tlen itztoyaj ihuaya Mar'ia quiitaque tlen Jes'us quichijqui huan quineltocaque para yajaya nopa Cristo tlen hualasqu'ia. 46Pero sequinoc israelitame tlen ax quineltocaque yajque quinilhuitoj nopa fariseos tlaque Jes'us quichijtoya. 47Huajca nopa tlayacanca totajtzitzi huan fariseos mosentilijque ica nopa hueyi tlasentilistli tlen tequihuejme huan quiijtojque: --¿Tlaque tijchihuase? Pampa ni tlacatl Jes'us quichihua miyac tlanescayotl. 48Intla tijcahuilise ma quichihuas m'as, huajca nochi quineltocase. Huan nopa tequihuejme ipan altepetl Roma quicaquise huan techtitlanilise soldados para techxolehuiliquij totiopa huan techmictise nochi tiisraelitame ipan totlal. 49Huan Caif'as tlen eliyaya nopa hueyi israelita totajtzi ipan nopa xihuitl quinilhui: --Ax tleno inquimatij. 50¿Ax inquimachil'iaj m'as cuali quisas para ma miquis san se tlacatl ipampa nochi tlacame huan ax timiquise nochi tiisraelitame? 51Huan Caif'as ax quiijto ya ni pampa iselti moilhuijtoya. Elqui pampa yajaya itztoya nopa hueyi israelita totajtzi ipan nopa xihuitl huan Itonal Toteco quimacac nopa tlajtoli para tenextilis achtohui tlaque panos teipa quema Jes'us miquisqu'ia ipampa nochi tlacame ipan totlal. 52Huan ax san miquisqu'ia Jes'us ipampa tlacame ipan totlal. Miquisqu'ia para ma mosentilise iconehua Toteco tlen mosemantoyaj ipan campa hueli tlali. 53Huajca nopa tonal huan teipa nopa tlayacanca israelitame pejque quisencahuaj quejatza huelis quimictise Jes'us. 54Huajca Jes'us ayoc huelqui nejnemi campa nopa tlayacanca israelitame huelis quiitase. Yajaya quisqui huan yajqui ica tojuanti tiimomachtijcahua ipan se pilaltepetzi tlen itoca Efra'in nechca nopa huactoc tlali campa ax tleno eli. 55Huan ajsitihualayaya nopa tonal para nopa Pascua Ilhuitl. Huan miyac tlacame hualayayaj tlen campa hueli pilaltepetzitzi huan yohuiyayaj hasta altepetl Jerusal'en quema noja polihuiyaya para pehuas nopa ilhuitl pampa monequiyaya mopajpacase queja quiijtohuaj totlanahuatil para teipa quiilnamiquise nopa Pascua Ilhuitl. 56Huan nopa tlacame tlen hualajtoyaj campa hueli quitemohuayayaj Jes'us huan motlajtlaniyayaj se ica seyoc tlen moquetzayayaj hueyi tiopan calijtic: --¿Quejatza tiquita? ¿Hualas Jes'us ipan ni ilhuitl o axtle? 57Huan nopa tlayacanca totajtzitzi huan nopa fariseos ya quinilhuijtoyaj tlacame intla se quimatisqu'ia canque itztoya Jes'us, ma quinyolmelahuatij para huelise quiitzquitij.

will be added

X\