1 Huan Jes'us quiijto: "Nel'ia nimechilhu'ia, tlaxtequini ax calaquij campa puerta para tlaxtequise ipan se corral campa cochi borregojme. Inijuanti ixtacatzi tlejcoj huan panoj iixco nopa tepamitl pampa quinequij tlaxtequise. 2 Pero se tlamocuitlahuijquetl ax queja nopa calaqui. Yajaya calaqui ipan cuapuerta. 3 Huan tlen quimocuitlahu'ia nopa cuapuerta quitlapos, huan nopa tlamocuitlahuijquetl quinnotzas iborregojhua ica sesen inintoca para quisase. Huan iborregojhua quitoscaquise huan quitoquilijtiyase. 4 Huan quema nopa tlamocuitlahuijquetl tlamis quinnotzas nochi nopa borregojme tlen iaxcahua, quinyacantiyas huan inijuanti quitoquilise pampa quitoscaquise. 5 Pero nopa borregojme ax quitoquilise se tlacatl tlen ax quiixmatij, san cholose pampa ax quitoscamachil'iaj." 6 Jes'us quinilhui ni huicalotl pero ax quimachilijque tlaque quiijtosnequi. 7 Huajca Jes'us sampa quinilhui: "Nel'ia nimechilhu'ia na niitztoc nopa cuapuerta campa tlacame huelis calaquise san se queja borregojme calaquij corral ijtic campa temachtli. 8 Nochi tlen hualajque achtohuiya huan quinequiyayaj tlacame ma quintoquilica itztoyaj queja tlaxtequini huan tlacajcayahuani, pero tlacame tlen noaxcahua ax quintoquilijque. 9 Na niitztoc nopa cuapuerta. Nochi tlen calaquij corral ijtic ica notlapalehuil, niquinmaquixtis. Se tlamocuitlahuijquetl quinyacana iborregojhua ma calaquica ica tlayohua huan ma quisaca tonaya para yase campa yajaya quinpantil'ia tlacualistli. Quej nopa nojquiya niquinmocuitlahuis notlacajhua huan niquinmacas nochi tlen monequi. 10 "Se tlaxtejquetl hualas para tlaxtequiqui huan temictiqui huan tlaxolehuas. Na nihualajqui para nitemacas yolistli yancuic huan para mojmostla quipiyase nelpano nochi tlen monequi ipan ininnemilis. 11 Na niitztoc nopa cuali tlamocuitlahuijquetl tlen nimotemactil'ia ininpampa noborregojhua. Nimotemactilis huan nimiquis ininpampa tlen noaxcahua. 12 Pero ax san se elis ica se tlatequipanojquetl tlen san quinmocuitlahu'ia borregojme para quitlanis tomi. Quema yajaya quiitas ajsitihuala se tepechichi, nimantzi cholos huan quincajtehuas nopa borregojme ininseltitzi pampa ax iaxcahua. Huan nopa tepechichi quincuas sequin borregojme huan nopa sequinoc mosemantiyase, cholojtehuase huan campa hueli yase. 13 Cholos nopa tlatequipanojquetl pampa san tequiti para se tlaxtlahuili. Ax quinicnel'ia nopa borregojme. 14 "Na niitztoc nopa cuali tlamocuitlahuijquetl. Na niquinixmati tlen itztoque noaxcahua huan inijuanti nechixmatij, 15 san queja noTata nechixmati huan na niquixmati noTata. Huan nimotemactilis huan nimiquis ipampa tlen noaxcahua. 16 Itztoque sequinoc tlacame tlen nojquiya noaxcahua tlen ax aquij nica. Nojquiya monequi niquinnotzati ma nechtoquilica huan nechtoscaquise. Huan huajca nochi noaxcahua itztose san sejco huan nochi san na niquinmocuitlahuijtos. 17 "NoTata nechicnel'ia pampa nimotemactilis para nimiquis huan teipa nimoyolcuis sampa. 18 Axaca huelis nechmictis intla ax nimotemactilis. Pero ica nopaquilis nimotemactilis huan nimiquis. Nijpiya tlanahuatili para nimiquis huan nijpiya tlanahuatili para nimoyolcuis sampa pampa noTata queja nopa nechnahuatijtoc ma nijchihua." 19 Huan nopa tlayacanani tlen israelitame quicajque tlen Jes'us quiijto huan pejque monajnanquil'iaj huan sampa mosemanque. 20 Sequin quiijtohuayayaj: --Yajaya quipiya se iajacayo Axcualtlacatl huan tlapolohua. ¿Para tlen inquicaquij itlajtol? 21 Pero sequinoc quiijtohuayayaj intla quipiyasqu'ia se iajaca Axcualtlacatl ax huelisqu'ia camatisqu'ia nelcuali queja camati. Huan se tlen quipiya iajaca Axcualtlacatl ax hueli quitlachiyaltis se popoyotzi. 22 Ipan nopa metztli quema onca tlasesecayotl, Jes'us itztoya ipan altepetl Jerusal'en ipan nopa ilhuitl para tiquilnamiquise quema tohuejcapan tatahua sampa quiyancuilijque huan quimactilijque Toteco nopa hueyi tiopamitl tlen achtohui sequinoc quixolejtoyaj. 23 Huan Jes'us nemiyaya ipan hueyi tiopan tlamapa tlen quitocajtiyayaj Salom'on. 24 Huan nopa tlayacanani tlen israelitame quiyahualojque huan quiilhuijque: --¿Hasta quema timochiyase para nel'ia tijmatise tlen ta? Intla ta tiCristo tlen hualasqu'ia, xitechilhui xitlahuac. 25 Huan Jes'us quinnanquili: --Ya nimechilhui huan ax innechneltocaque. Nopa huejhueyi tlanescayotl tlen nijchihua ica itequiticayo noTata inmechnextil'ia ajqueya na. 26 Pero ax innechneltocaj para na niCristo tlen Toteco quititlanqui pampa ax innoaxcahua queja ya nimechilhuijtoc. 27 Noborregojhua nechtosmachil'iaj huan niquinixmati huan inijuanti, quena, nechtoquil'iaj. 28 Huan tlen noaxcahua niquinmaca yolistli yancuic para nochipa huan ax quema polihuise; niyon axaca huelis nechquixtilis pampa itztoque nomaco. 29 NoTata nechmacatoc inijuanti tlen noaxcahua huan yajaya quipiya m'as chicahualistli que nochi sequinoc. Huan axaca huelis quiquixtilis tlen noaxcahua pampa itztoque imaco nojquiya. 30 Na ihuaya noTata san se tiitztoque. 31 Huajca nopa israelita tlayacanani quiitzquijque tetl para quitepachose. 32 Huan Jes'us quinilhui: --Nijchijtoc imoixpa miyac cuali tlanescayotl tlen tepalehu'ia tlen noTata nechilhuijtoc ma nijchihua. ¿Tlaque tlanescayotl ax cuali nimechnextilijtoc para innechtepachosnequij? 33 Huan nopa tlayacanani tlen israelitame quiilhuijque: --Ax timitztepachosnequij pampa tijchijtoc tlen cuali. Timitztepachosnequij pampa tiquijtohua tiToteco Dios. Huajca tlahuel tiquixpano Toteco pampa nel'ia ta san tieli tlen hueli tlacatl. 34 Huan Jes'us quinilhui: --Ipan imotlanahuatil ijcuilijtoc: 'Niquijtohua para indioses.' 35 Huajca intla Toteco quintocajti 'dioses' nopa tlacame tlen quiseliyayaj itlajtol huan axaca huelis quixolehuas tlen ijcuilijtoc ipan Itlajtol, 36 ¿para tlen inquiijtohuaj para na tlen noTata nechiyocacajqui para se tequitl tlatzejtzeloltic, huan nechtitlani ipan tlaltepactli para nijchihuas, ax nijtlepanita Toteco Dios pampa niquijto para niIcone Toteco? 37 Intla ax nihueli nijchihua huejhueyi tlanescayotl queja noTata quichihua, huajca amo xinechneltocaca. 38 Pero intla melahuac nijchihua huejhueyi tlanescayotl queja noTata, huajca xinechneltocaca ipampa nopa tlamantli tlen nijchihua yonque ax hueli innechneltocaj san ica notlajtol. Intla inquineltocase tlen nijchihua, inquimachilise noTata itztoc san se nohuaya huan na niitztoc san se ica ya. 39 Huajca nopa tlayacanani sampa quinequiyayaj quiitzquise Jes'us para quitzacuase, pero mochololti. 40 Huan Jes'us sampa quiixpanoc nopa atemitl Jord'an huan yajqui hasta ne nali campa quisa tonati campa achtohuiya Juan tecuaaltiyaya. 41 Huan miyac tlacame yajque nepa para itztose ihuaya. Huan quiijtohuayayaj se ica seyoc: --Nel'ia Juan ax quichijqui huejhueyi tlanescayotl queja ni Jes'us quichihua, pero nochi tlen Juan techilhui tlen Jes'us elqui melahuac. 42 Huan miyac tlacame quineltocaque Jes'us nepa.
