1 "¿O huelis ta nel tihueyi hasta tihuelis tiquitzquis nopa leviat'an tlapiyali ica se tepos chijcoli? ¿Huelis tiquilpis ica se lazo ipan icamac queja na nihueli? 2 ¿Huelis tiquilpis ta ica se mecatl ipan iyacatzol o tijcoyonis ipan icamachal para tijpanoltis se tepos chijcoli? 3 ¿Huelis timoilhu'ia para yajaya mitztlajtlanis miyac hueltas para xijcahua, o mitztlacahualtis ica tlajtoli tlen yejyectzitzi? 4 ¿Timoilhu'ia para quichihuas se tlajtol sencahuali mohuaya para elis motlatequipanojca para nochipa? 5 ¿Ta tihuelis tijmaxojtilis huan tijpixtos ipan mochaj queja elisqu'ia se tototl huan tiquinmacas mosihuapilhua ma quiahuiltica? 6 ¿Huelis nopa michtlajtlamani huelise quihuicase ipan tianquis para quinamacase inacayo? 7 ¿Tihuelis tijcoyonis icuetlaxo ica miyac cuatlamintli o tijcoyonis itzonteco ica huejhueyi tepos chijcoli? 8 Intla tiquitzquisqu'ia, yajaya mitztehuisqu'ia. Huan ax quema tiquilcahuasqu'ia nopa tlatehuijcayotl ihuaya. Ayoc quema tijnequisqu'ia tiquitzquisqu'ia sampa. 9 "San tlapic para tijnequis tiquitzquis para tiquilpis pampa ax tihuelis. Itlachiyalis tlahuel mitzmajmatis. 10 Huajca axaca mosemaca quiixitis nopa leviat'an tlapiyali, niyon quiitzquis. Huan intla axaca motemaca itztos iixpa ya tlen na nijchijtoc, ¿ajqueya huelis itztos noixpa na tlen niimoTeco? 11 Na axaca nijtlahuiquil'ia. Nochi tlen onca tlatzintla elhuicactli na noaxca. 12 "Nojquiya nicamatis tlen nopa chicahualistli tlen nopa leviat'an quipiya ipan sesen imetz huan ipan nochi itlacayo huan quejatza yejyectzi hueli ajquis. 13 Axaca hueli quicoyonilis icuetlaxo. Axaca motemaca moquetzas nechca icamac para quitlalilis se tepos camachali. 14 Axaca hueli quitlapohuilis icamac pampa quinpiya itlancoch tlen tlahuel temajmati. 15 Nopa cacahuayotl tlen moquetztoque ipan icuitlapa cuali tlatzquitoque huan mocahuaj tetic queja tetl. 16 Ax quicahuil'ia panos ajacatl huan niyon se tlamantli ax hueli quicoyonis. 17 Tlatzquitoque icacahuayo san sejco huan axaca huelis quiniyocatlalis. 18 "Quema nopa leviat'an mijtzom'ia, quisa tlen eltoc queja tlapetlanilotl. Huan iixtiyolhua nesij chichiltic queja tlanestihuala. 19 Ipan icamac quisa miyac tlitl huan tlimoyotl. 20 Ipan iyacatzol quisa poctli queja quema quimolon'ia se tlacuali ipan se tlitl tlen acatl. 21 Ica iijiyo quilemenaltis tlicoli huan ipan icamac quisa tlilelemectli. 22 "Quipiya miyac chicahualistli ipan iquechtla. Huan campa hueli campa yahui, quinmajmat'ia nochi tlen quipant'ia. 23 Campa mocuelpachojtoc icuetlaxo tlahuel motzquitoc. Neltetic huan ax mojmolin'ia icuetlaxo campa hueli ipan itlacayo. 24 Quipiya iyolixpa neltetic queja se tetl. Quena, tlahuel tetic queja se metlatl. 25 Quema nopa leviat'an moquetza, quinmajmat'ia nochi tlen itztoque iixpa hasta tlen m'as yoltetique. Nochi cholohuaj pampa yajaya tlahuel mosisin'ia. 26 Niyon se machete, cuatlamintli o tepos cuachoso hueli quicocos. 27 Nopa leviat'an quiita tepostli queja elisqu'ia sacatl. Quichihuil'ia nopa tepostli bronce queja elisqu'ia se cuahuitl tlen palantoc. 28 Yajaya ax cholohua quema quimajcahuil'iaj cuatlamintli. Huan quema quimajcahuil'iaj tetl ica tehuitlatztli, yajaya quiita queja quimajcahuilisqu'iaj tlasoli. 29 Yonque quimaquil'iaj ica cuahuitl yajaya ax quichihuil'ia cuenta huan san quinhuetzquil'ia quema quimajcahuil'iaj se huehueyac cuachoso tlen tepostli. 30 Tlatzintla iijti quipiya icacahuayo tlen tetic huan tlen tlatequi. Huan quema mohuahuatatza, tlahuel quipoxahua tlali. 31 "Nopa leviat'an quimolonalt'ia nopa atl quema quiolin'ia. Eltoc queja quichihua ma mojmolini nopa atl hasta campa m'as tlatzintla. 32 Huan quema yahui aixco, quiposonaltijti nopa atl. Quema tijtlachilis nopa hueyi atl tlen posoni, nesi chipahuac queja elisqu'ia itzoncal se huehuentzi. 33 Ipan nochi tlaltepactli ax onca niyon se tlapiyali queja nopa leviat'an tlen ax tleno quiimacasi. 34 Tlen huejcapa, yajaya quintlachil'ia nochi tlen mohueyimatij. Yajaya inintlanahuatijca nochi tlen mohueyimatij."
