Job 38

1Huajca TOTECO quinojnotzqui Job tlen se ajcomalacatl huan quiilhui: 2"¿Para tlen ta tlen ax tleno tijmati tiquijtohua ax cuali tlen na ica nochi notlalnamiquilis nijchihua? 3Ximoquetza cuali huan ximocualtlali para tinechnanquilis pampa na nijpiya sequin tlatzintoquili para ta. 4"¿Canque tiitztoya ta quema nijtlaliyaya itzinpehualtil ni tlaltepactli? Intla nel'ia titlalnamiqui, xinechilhui. 5¿Tijmati quejatza nijcualtlali ihuexca huan nijyejyeco quesqui metros quipiyasqu'ia? 6¿Tijmati ipan tlaque motlatzquilijtoc nopa tlaquetzali ipan itzinpehualtil? ¿Ajqueya quitlali nopa achtohui tetl tlen m'as monequi huan tlen yahui calesquina? 7¿Canque tiitztoya quema nochi nopa sitlalime huicayayaj ica paquilistli ica ijnaloc huan noelhuicac ejcahua tzajtziyayaj ica paquilistli para nechhueyichihuaj? 8"Naja tlen nijtlalili nopa nepamitl tlen nopa hueyi atl ax hueli panos quema topontiquisqui ica nochi ichicahualis tlen campa nijchijqui, 9huan nijtlali mixtli huan tzintlayohuilotl iixco queja elisqu'ia iyoyo. 10¿Tijmati quejatza nijtzajqui nopa hueyi atl queja se quitzacua se puerta para ayoc quisa tlen itejteno? 11Huan niquilhui hueyi atl: 'Hasta nica huelis tiajsis pero ax huelis tipanos m'as. Nica tlamis campa hueli ajsis moa tlen mohuijhuisojtihuala ajachica.' 12"¿Huelis quemantzi ta tijnahuatijtoc tonali ma tlanesis ica ijnaloc huan ma tlahui nopa tonati? 13¿Huelis tijnahuatijtoc nopa tonali ma tlatlanexti hasta campa hueli campa itlamiya tlaltepactli para tlacame ayoc ma quichihuaca m'as tlajtlacoli ica tlayohua? 14¿Tijchijtoc ma tlahui cuali nopa chichiltic tlahuili tlen monext'ia ica ijnaloc? ¿Ta tijchijtoc para iixco tlaltepactli ma nesis queja quipiya iyoyo tlen chichiltic? 15¿Tijpannextijtoc campa motlat'iaj nopa tlajtlacolchihuani? ¿Tijtzacuilijtoc tlen quitlanantoya iajcol para tecocos? 16"¿Tiquitztoc canque meya nopa atl ipan hueyi atl? ¿Ticalactoc ipan nopa hueyi ostotl tlen hueyi atl huan tinejnentoc hasta tlatzintla? 17¿Mitznextilijtoque campa eltoc nopa puerta tlen miquistli huan mictla? 18¿Tijmati quesqui ipatlajca ni tlaltepactli? Xinechilhui intla tijmati nochi ya ni. 19"¿Tijmati nopa ojtli tlen ipan huala tlahuili? ¿Huelis tinechilhuis canque yahui nopa tzintlayohuilotl? 20¿Huelis tijhuicas tlahuili hasta ichaj? ¿Tijmati nopa ojtli hasta campa pejqui? 21Ta, quena, timoilhu'ia tijmati nochi ya ni pampa timoilhu'ia titlacatqui quema aya nijchijchihuayaya nochi ni tlamantli. Temachtli timoilhu'ia tijmati miyac pampa tijpiya tlahuel miyac xihuitl. Pero ax neli tlen timoilhu'ia. 22"¿Tiyajtoc campa nicajcoctoc nopa sitlal setl? ¿Tiyajtoc campa nijchijchihua nopa tesihuitl huan nicajcocui? 23Nochi ya nopa nicajcoctoc para nijtequihuis ipan tonali tlen tlaohuijcayotl huan ipan tlatehuijcayotl. 24¿Tijmati nopa ojtli tlen yahui campa pehua itlahuil tonati? ¿Tijmati canque pejtoc nopa ajacatl tlen huala ica campa quisa tonati huan yahui ipan nochi tlaltepactli? Na nijmati. 25"¿Ta tijmati ajqueya quichijchijqui aojtli ipan tlamayamitl para ipan ma motlalo nopa atl tlen huetzi huan ajqueya quinextili iojhui nopa tlapetlanilotl? 26¿Tijmati ajqueya quichihua ma huetzi atl ipan huactoc tlali campa ax tleno eli? 27¿Tijmati ajqueya quixolon'ia nopa tlali tlen tlahuel amiqui huan quichihua ma ixhua xihuitl tlen selic? Na, quena, nijchijqui. 28"¿Quipiya itata nopa atl tlen huetzi? ¿Canque huala nopa ajhuechtli? 29¿Ajqueya inana nopa setl? ¿Canque huala nopa setl tlen huetzi ica ijnaloc? Na nijtitlani. 30Campa mantoc atl huan iixco atemitl, nopa atl mocuepa setl tlen tetic queja se tetl pampa na nijchihua ma pano. 31"¿Huelis ta tiquintzacuilis nopa sitlalime Pl'eyades para ma ayoc nejnemica? ¿O huelis tijmalacanis nopa sitlalime tlen inintoca Ori'on para ayoc ma mocahuaca tlatzquitoque? 32¿Huelis ta tiquinilhu'ia nopa sitlalime tlen sentic nemij quema ininhora para monextise ipan elhuicac? ¿Ta tlen tiquinyacana ipan iniojhui nopa sitlalime tlen sentic yahuij tlen inintoca Osa Mayor huan Osa Menor? 33¿Tiquinixmati nopa tlanahuatili tlen quintoquil'iaj nochi tlamantli ipan elhuicactli huan ipan ni tlaltepactli? 34"¿Huelis ta tijtzajtzilis chicahuac ne mixtli huan tijchihuas ma tlaahuetzis? 35¿Hueli tijnahuatis ma quisaca miyac tlapetlanilotl huan ma huetzitij campa ta tijnequi? Na nihueli. 36Na nitemaca tlalnamiquistli huan tlaixmatilistli. 37¿Ajqueya quipiya miyac tlalnamiquistli para quiijtos quesqui mixtli onca? ¿Ajqueya hueli quichihuas ma huetzi miyac atl quema tlahuactoc, 38huan nochi tlali mocueptoc tlaltejpoctli huan tlaltojtolomitl? 39"¿Tihueli tijtemos tlacualistli para se sihua le'on para quintlamacas iconehua, 40tlen mochixtoque ipan iniosto o ipan cuatitlamitl? Na nihueli. 41Na nihueli niquintemol'ia inintlacualis nopa cacalome quema ininconehua nechtzajtzil'iaj, niininTeco, huan nentinemij ipan inintepasol pampa mayanaj.

will be added

X\